Bɔ̀werà 2
2
Lè Mɛkɛ̃n-Sãanu ɓen síɛrɔ́ bòo
1Ɛ́ hɔ́ lɛ ɛ́ lé Pantekɔɔte sɛ́rí ɛ́ van dɛ̃un, ɛ́ ɓɛ́ ńdɛsĩ̀riè ɓɛ́kùi ɛ́ van koo ɓánlɔ̀n vi-cóoní. 2Ɛ́ ɓɛ ɛ̀ húi, ɛ̀ tɛmu dɔ̀ ɛ́ pan pan ɛ̀ lè yòó tɛ̀ hɔ̀ hóohũn ɛ́ ɓen síɛ kɛ̀a pinpi-bɛhɔ́ lɛ ɛ́ zè, ɛ́ síɛ tíiniɛ lè zũnù lɛ ɓɛ́ kɛsí hũn míkùi. 3Ɛ́ ɓɛ́ mɔn bòo dɔ̀ lɛ lɔ́ɓán àá dṹn diɛhĩ́. Ɛ́ hɔ́ ɓɛrɛ saakɛa àá bɔ̀cóohɛ̃ cóohɛ̃ ɛ́ síɛ peɓɛ̀ lɔ̀n. 4Ɛ́ ɓɛ́pe ɓɛ́kùi ɛ́ tú àá Mɛkɛ̃n-Sãanu ɛ́ ɓɛ́ wo ɛ́ hɔ̀ nín-ɓuà ɛ̀ bie, hɔ́rɔ àá lé níi lɛ ɛ́ lépe Mɛkɛ̃n-Sãanu lɛ́ à ǹ nɛ a bie.
5Ɛ́ pehɔ̀ yìi hũn, ɛ̀ ɓɛ̀ Zuifuɓɛ lɛ can ɓɛ́ kuò Dɔfĩn bòo hũn ɛ́ van lɔ́ hɔ́ cɛ̃̀mɛ̀náa míkùi, ɛ́ ɓɛrɛ wi hɔ̀ Zerizalɛɛmu lóo hũn. 6Ɛ́ hɔ́ lɛ ɛ́ hɔ́ hòorè ɲí nin, ɛ́ ɓɛ́ nìnbirìe ɛ́ van zɔ̀ ɓɛrɛ koo ɓánlɔ̀n. Ɛ́ hɔ́ hɛ̀ yòokɛa peɓɛ̀ lɔ̀n iè hɔ̀ lɛ ɛ́ hɔ́rɔ wóò ɲí kɛ́ ɓɛ́ ɛ́ ɓà níi ɛ̀ bie. 7Ɛ́ hɔ́ hɛ̀ yòokɛa peɓɛ̀ lɔ̀n cɛ̃̀un ɛ́ ɓɛ́ hɛ̀ wɛ ɓɛ́te ɛ́ bíekɛ ɛ́ nɛ làa: «Ɓɛ̀pe nìnbirìe lɛ ɛ́ bie ɓɛ́kùi ɛ́ sũǹ yí Kalile siè? 8Ɛ́ hɔ́ wo kɛ wiɛ ɛ́ képe kè kùi ɛ́ hɔ́rɔ dàa wóò ɲí kɛ́ ɓɛ́ ɛ́ ɓà níi ɛ̀ bie? 9Kè tĩ́ihũ, ɛ́ ɓɛ́dɔ̀ ɛ́ lé àá hɔ́ Pariite cɛ̃̀mɛ̀nɛ́, ɛ̀ ɓɛ̀dɔ̀ ɛ́ lé àá hɔ́ Medii àá hɔ́ Elaamu cɛ̃̀mɛ̀náa, ɛ̀ ɓɛ̀dɔ̀ ɛ́ iè Mezopotami siè, ɛ̀ ɓɛ̀dɔ̀ ɛ́ lé àá hɔ́ Zudee àá hɔ́ Kapadɔɔsi pɛ̃̀hɛ̃ hũn, ɛ̀ ɓɛ̀dɔ̀ ɛ́ lé àá hɔ́ Pɔn àá hɔ́ Azii cɛ̃̀mɛ̀náa, 10ɛ̀ ɓɛ̀dɔ̀ ɛ́ lé hɔ́ Firizi àá hɔ́ Panfili pɛ̃̀hɛ̃, ɛ̀ ɓɛ̀dɔ̀ ɛ́ lé àá Eziputi cɛ̃̀mɛ̀nɛ́ àá hɔ́ Libii pɛ̃hɛ̃ lɛ lúwi hɔ Sirɛnɛ ǹ, ɛ̀ ɓɛ̀dɔ̀ ɛ́ lé àá Rɔmu lóo, 11ɛ̀ ɓɛ̀dɔ̀ ɛ́ lé àá Kɛrɛti àá Arabii, ɓɛ̀dɔ̀ iè Zuifuɓɛ, ɛ̀ ɓɛ̀dɔ̀ iè nìɛ lɛ ɛ́ van zɔn ɓɛ̀pe Zuifuɓɛ Dɔfin wṹn bènlɔ́. Ɛ́ ké lò wo ɛ́ ɲí kɛ́ ɓɛ́ ɛ́ hɔ̀ Dɔfĩn bɔ̀sãahĩ́ bòo ɛ̀ bie kìe níiɓɛ̀ hũn.» 12Ɛ́ ɓɛ́pe ɓɛ́kùi ɛ́ hɔ́ hɛ̀ yòokɛa lɔ̀n cɛ̃̀un ɛ́ ɓɛ́ hɛ̀ yí dũ bòo lɛ ɛ́ ɓɛ́ wé wɛ̀. Ɛ́ ɓɛ́ khie biekɛ ɛ̀ lɛ́kɛ ɓán ɛ́ nɛ làa: «Ɛ́ hɔ́pe lɛ wo iè ńɓùo?» 13Kɛ́ ɓɛ́dɔ̀ ɛ́ den wi yán ɛ́ ɓɛ̀ yáakɛ ɛ́ nɛ: «Ɓɛ̀ iè bìe ɛ́ tù àá ɲɛmù.»
Lè bienù lɛ á Piɛre ɛ́ khɛ́ ɓɛ́ nìzã̀amáa híɛhɔ́
14Ɛ́ Piɛre ɛ́ síɛ hĩ́nà ɛ́ yòó dɛ̃̀ àá ɓá ńkɔhĩ́ tɔnkɛriè pírú àá nìcóoní à zɔn bérɛ ɛ́ lɛ́ ɓɛ́ nìzã̀amáa ǹ nɛ làa: «Mìpe Zuifuɓɛ àá mípe lɛ wi hɔ Zerizalɛɛmu lóo hũn mìkùi, mì tɛ́ mí ɲɛkɛ̀a sãaní ɛ̀ mì ɲí hɔ́ bòo lɛ ɛ́ nin bie ɛ̀ lɛ́ miɛ ǹ, bòo lɛ ɛ́ wé ɛ̀ mì dũń hɔ́pe bòo lɛ ɛ́ wé ɲún. 15Ɓɛ̀pe nìɛ sɔ lɛ ɛ́ yí bìe lɛ ɛ́ tù àá ɲɛmu kɛ̀a bòo lɛ ɛ́ mí dàa ɛ́ hɔ̀ lieníkɛ wɛ̀; iè hɔ̀ lɛ ɛ́ wurù ɛ́ ɲɛùn yí yòó wɛ̀. 16Hɔ̀pe lɛ ɛ́ wé iè hɔ̀pe bòo lɛ á Dɔfĩn bɔ̀háanírɔ Zowɛɛle ɛ́ hàarí bie. 17À hàarí bie nɛ Dɔfĩn ɛ́ nɛ làa:
“Lɛ iè hɔ̀ bòo lɛ ɛ́ ɓén wé hɔ́ mɛ́n-wihĩ́ hũn,
Ń ɓén síɛní niǹ Mɛkɛ̃ni ɓɛ̀ nìnbirìe ɓɛ́kùi lɔ̀n.
Mì bɛ́zikíini àá mí hĩ́ini ɛ́ wóo ɓén háaní niǹ bòo ɛ́ lɛ́ ɓɛ́ nìnbirìe ǹ,
Ɛ̀ ǹ wóo ɓén lɛ́ ɛ́ mí zɛ̀fɛ̀-cíini ɛ́ mi hɔ yìnmirà bòo,
Ɛ̀ ǹ lò wóo ɓén bie àá mí nìkĩ́ihɛ̃ hɔ̀ dɛ̀woò hũn.
18 Ũun ń ɓén síɛní niǹ Mɛkɛ̃ni niǹ tɔntɛ́riè báa àá niǹ tɔntɛ́riè hã́a lɔ̀n hɔ̀pe wihĩ́ sɔ hũn,
Ɛ́ ɓɛ́ ɛ́ háaní niǹ bòo.
19 Ń wóo ɓén wé hɔ́ bɔ̀bɛ̃hɛ̃ hɔ̀ hóohũn,
Ɛ̀ ǹ lò ɛ́ wé hɔ́ yéréké bòo lɛ ɛ́ niǹ pànkɛ́ ɛ̀ zɛ̃́ní lé sṹsùnù:
Hɔ̀ cãani àá hɔ́ dṹn àá hɔ́ miikɛ ńɲíi ɛ́ wóo ɓén kań,
20 Ɛ̀ lè wurù ɛ́ ɓén zɛ̀ní ɛ́ wé síbínú,
Ɛ̀ lè ńpĩ́ihṹ ɛ́ wé dɛ̀miì kɛ̀a hɔ cãani bòo sí,
Hɔ̀pe sí míkùi ɛ́ ɓén wé kɛ́ á Ɲunsɔ wurù lɛ á vaá-ɓen hũn
Ɛ́ ɲɛun yí ɓen dɛ̃ wɛ̀. Lè ɓén wé sí-bɛhɔ́, lè ɓén wé Dɔfĩn ɓàarɔ́ sí.
21 Ɛ́ nìnbírɔ yée nìnbírɔ kɛ́ á vɔn Ɲunsɔ yèrè á ɛ́ fuen.”
22Mìpe Yizarayɛɛle nìɛ, mì tɛ́ mí ɲɛkɛ̃̀a ɛ̀ mì ɲí hɔ́ bòo lɛ ɛ́ nin bie lɛ́ miɛ ǹ: à Nazarɛɛte Yiezu ɛ́ iè ɔ̀pe nìnbírɔ lɛ ɛ́ Dɔfĩn munɛ mì yènsénín, á hàarí wóò wé hɔ́ bɔ̀bɛ̃hɛ̃ àá hɔ́ yéréké bòo lɛ ɛ́ Dɔfĩn pànkɛ́ ɛ̀ zɛ̃́ní mí tĩ́ihṹ, kɛ̀a bòo lɛ ɛ́ mí dàa dũ hɔ. 23Ɛ́ ɓɛ́ ɛ́ dú-o mì núnú hũn kɛ̀a bòo lɛ ɛ́ Dɔfĩn ɛ́ dàa nɛ hɔ́ wé, hɔ̀pe Dɔfĩn lɛ sɛ̃̀nɛ́hã̀ dũ hɔ bòo míkùi. Ɛ́ mípe ɛ́ ti-e dɔ́ ɓɛ́ nìnbirìe lɛ yá hɔ̀pe Dɔfĩn làndɛ́ ɛ̀ mɛ̀ndɛ̃ núnú hũn, ɛ́ ɓɛ́ ɓáa ɔ̀ lè ɓáalén dãanù lɔ̀n. Ɛ́ kɛ̀amu, ɛ́ mípe ɛ́ ti-e ɓɔ́. 24Kɛ́ Dɔfĩn ɛ́ lerɛ-à lɔ́ hɔ́ húmú núnú hũn à vìeniɛ ɔ̀, iè hɔ̀ lɛ ɛ́ hɔ́ húmú ɛ́ hṹn yí dɛ̀ à ɛ́ yá ɓaà ɛ́ dĩ̀ní wɛ̀. 25Ɛ́ Daviide hàarí ɛ́ bie piè bòo hũn ɛ́ nɛ làa:
“Ń loo ɔ Ɲunsɔ niǹ híɛhɔ́ fúu,
Iè hɔ̀ lɛ á wi àá niǹ ńdóonín, bòo lɛ ɛ́ wé ɛ̀ ǹ bí zɛ̀kɛ wɛ̀.
26 Ɛ́ sí iè hɔ̀pe ɛ́ ń dàa wi tĩwiɛ̀ hũn ɛ̀ niǹ biehĩ́ ɛ́ iè tĩwiɛ̀ biehĩ́.
Ɛ́ niǹ tɛkɛ̀a ɛ́ ɓén síɛ vũùní kɛ́ hɔ́ bòo lɛ ɛ́ nín hìé àá ńdɛsĩ̀nlɔ́ ɛ́ ɓen;
27 Iè hɔ̀ lɛ ɛ́ kɔ́ yá ɓen fùansí mi ǹ ɓɛ̀ nìhiè lóo hũn wɛ̀;
Kɔ́ yá ɓén tɛ̀ ɛ́ ńpe lɛ iè kɔ̀ nìnbírɔ lɛ ɛ́ ce ɛ́ tiè lè búi hũn wɛ̀.
28 Kɔ́ zɛ̃́niɛ mi àá lé mɛkɛ̃nì wṹuhɛ̃,
Ń ɓén kań tĩwiɛ̀ hũn iè hɔ̀ lɛ ɛ́ kɔ́ wi àá mi.”
29Kìe zɛ̀ɓɛ̀, ń dɛ̀ hɔ̀ bòo lɛ ɛ́ bie ɛ́ lɛ́ miɛ ǹ wìée àpe kìe zĩkĩ́n Daviide bòo hũn: À hàarí húrun ɛ́ ɓɛ́ wũ̀nɛ, ɛ́ piè búi ɛ́ pɛ́ wi ke tĩ́ihṹ hɔ̀ zoòni lɛ. 30Kɛ́ á hàarí iè Dɔfĩn bɔ̀háanírɔ, à lò hàarí dũ hɔ lɛ kɛ́ Dɔfĩn ɛ́ tɛ̀ lè ɲunù kiè àá ɔ́ nɛ piè máahṹ nìɛ hũn ádɔ̀ ɛ́ ɓén yìrí kansí piè bɛ́záanú wànlè lɔ̀n. 31Ápe Daviide den ɛ́ sɛ̃̀nɛ́hã̀ mɔn hɔ̀ bòo lɛ ɛ́ mii wé, á dàa bie ɔ̀ Kirisa vìerɔ́ bòo ɛ́ nɛ làa:
“Dɔfĩn ɛ́ yá ɓén fùansí-è ǹ ɓɛ̀ nìhiè lóo hũn,
Ɛ̀ piè tɛkɛ̀a ɛ́ yá ɓén tiè lè búi hũn wɛ̀.”
32Àpe Yiezu lɛ ɛ́ nín bòo ɛ̀ bie ɛ́ Dɔfĩn ɛ́ vìeniɛ, ɛ́ képe kè kùi ɛ́ mɔn hɔ̀ ɛ́ bie. 33Ɛ́ Dɔfĩn ɛ́ hóoniɛ ɔ̀ ɛ́ yòó van bɔ̀sí mí ńdóonín, àpe Yàá Dɔfĩn ɛ́ lɛ́ mí Mɛkɛ̃ni ɔ̀ ǹ, lèpe Mɛkɛ̃ni lɛ ɛ́ Hɔ́ hàarí lɛ́ mí ɲunù nɛ mí ɓén lɛ́. Ápe Yiezu ɛ́ lɛ́ lépe Mɛkɛ̃ni sɔ kiè ǹ, ɛ́ sí iè hɔ̀pe ɛ́ mí loo, ɛ̀ sí lò iè hɔ̀pe ɛ́ mí ɛ́ ɲí. 34À Daviide míte ǹ ɛ́ hàarí yí yòó vɛ hóohũn wɛ̀. Kɛ́ á den hàarí bie nɛ làa: “Ɲunsɔ Dɔfĩn ɛ́ bie ɛ́ lɛ́ niǹ Ɲunsɔ ǹ ɛ́ nɛ làa: Ɓen siɛ kansí niǹ ńdóonín, 35Fúu kɛ́ yí bòo ɛ́ ń lɛ́ ɛ́ mì ńbíyanliè ɛ́ wɔ́ kɔ́ zehĩ́ bènlén wànlè.”
36Ɛ́ mípe Yizarayɛɛle nìɛ mìkùi, mí sãawi ɛ̀ mì dũń sãàní kɛ́ ápe Yiezu lɛ ɛ́ mí ɓáa lè ɓáalén dã̀anù lɔ̀n, ɛ́ iè ɔ̀pe lɛ ɛ́ Dɔfĩn ɛ́ wɔ́ àá Ɲunsɔ àá Kirisa.»
37Ɛ́ bòo lɛ ɛ́ ɓɛ́ nìnbiriè ɛ́ ɲɛ́ hɔ́pe biehĩ́ sɔ sí, ɛ́ hɔ́ hɛ̀ zɔn ɓà ǹ cɛ̃̀un. Ɛ́ ɓɛ́ zɔn ɛ́ ɔ̀ Piɛre àá ɓɛ́pe tɔnkɛriè lɛ kɛ́ ɛ̀ dìenin ɛ́ nɛ làa: «Kìe zɛ̀ɓɛ̀, ɛ́ hɔ́ iè ńɓùo ɛ́ ké wo sãawi ɛ̀ kè wé?»
38Ɛ́ Piɛre zɔn kɔ̃́niɛ ɓɛ̀ nɛ làa: «Mì zɛ̀ní mí tĩɛ̀ ɛ̀ mì fùansí hɔ́ bɔ̀koohɛ̃ wénlɔ́n, ɛ̀ hɔ́rɔ wóo vɛ lɛ́ míte ɛ̀ ɓɛ̀ líiní hɔ́ ɲumu hũn Yiezu Kirisa yèrè lɔ̀n, bòo lɛ ɛ́ wé ɛ̀ mì bɔ̀koohɛ̃ sɛ́wɛ́rí ɛ̀ dàá dé lɛ́ miɛ ǹ. Ɛ́ mí ɓén yí Dɔfĩn hɛ̃mù bòo lɛ iè le Mɛkɛ̃n-Sãanu. 39Iè hɔ̀ lɛ ɛ́ Dɔfĩn ɲunù lɛ ɛ́ Hɔ́ lɛ́ ɛ́ bòo sɛ̃̀ mìpe àá mí nìɛ ǹ, àá ɓɛ́pe lɛ ɛ́ van viì ni ɓɛ́kùi lɛ ɛ́ ké Ɲunsɔ Dɔfĩn ɛ́ ɓén ve.»
40Ɛ́ Piɛre ɛ́ bĩniɛ khie khɛ́ biehĩ́ bɔ̀kùi dɔ̀ ɛ́ lɛ́ ɓà ǹ, ɛ̀ ɓɛ̀ dàá dũń hɔ́ bɔ̀berà, à lò lɛ́ hɔ́ bérɛ́ ɓà ǹ ɛ́ nɛ làa: «Mì fùansí nɛ Dɔfĩn ɛ̀ fuení miɛ ǹ ɛ̀ lé ɓɛ́pe zoòní nìɛ lɛ ɛ́ yí sãa tĩ́ihṹ.» 41Ɛ́ nìnbí-kuì peɓɛ̀ tĩ́ihṹ ɛ́ tɛ̀ à Piɛre biehĩ́ bòo ɛ́ ɓɛ́ khie líiníkɛa ɓɛ̀ hɔ̀ ɲumu hũn. Ɛ́ pehɔ̀ zɔn, ɛ́ nìnbirìe muasíe tĩ (3 000) ɓà ńmàa ɛ́ sĩiniɛ ɓɛ̀ ńdɛsĩ̀riè lɔ̀n.
Bòo lɛ ɛ́ ɓɛ́ ńdɛsĩ̀riè dàa ɲunù iè dìcóoní
42Ɛ́ ɓɛ́pe ɓɛ́kùi ɛ́ hṹn dɔ́ ɓɛ́ ɲún ɛ́ ɓɛ̀ tɔnkɛriè kɛ̀ránlɔ́ lɛ ɛ́ ɓɛ́ wóò lɛ́ ɓà ǹ ɛ̀ ɲí, ɛ̀ ɓɛ̀ wóò páaní kóo ɓánlɔ̀n kɛ̀a zɛ̀ɓɛ̀ bòo sí, ɛ̀ ɓɛ̀ wóò páaní ɓùenkɛ hɔ búrú ɛ̀ lɛ̀, ɛ̀ ɓɛ̀ páaní hɛ̃un Dɔfĩn. 43Ɛ́ ɓɛ́ tɔnkɛriè ɛ́ Dɔfĩn ɛ́ hṹn bɔ̀nin ɛ́ dàa ɛ́ hɔ̀ yéréké bòo àá mí bɔ̀bɛ̃hɛ̃ ɛ̀ wé, ɛ́ hɔ́ hɛ̀ lɛ́ ɛ́ ɓɛ́ nìnbirìe ɓɛ́kùi ɛ́ hɛ̀ zɛ́rɛ. 44Kɛ́ ɓɛ́ ńdɛsĩ̀riè ɓɛ́kùi ɛ́ pe hṹn ɲunù iè dìcóoní, ɛ̀ bòo lɛ ɛ́ ɓɛ́ dàa míkùi ɛ́ ɓɛ́ wóò páaní sankɛ. 45Ɓɛ̀ wóò yìɛní ɓɛ́ mɛhɛ̃ àá ɓɛ́ núnú hũn bòo, ɛ̀ kóo màa ɓánlɔ̀n ɛ̀ sankɛ ɓán hũn, hɔ́rɔ wóò yí ɛ̀ ɓáaníɓán àá bòo lɛ bòo hie piè lɔ̀n. 46Sitĩnlɔ́ míkùi hũn, ɛ̀ ɓɛ̀ wóò wé ɓɛ́ ɲunù àá dìcóoní ɛ̀ zɔ kóo ɓánlɔ̀n lè Dɔfĩn zũ-bɛhɔ́ hũn, ɛ̀ ɓɛ̀ wóò páaní ɛ̀ dí ɓɛ́ zĩhĩ́ɛ hũn àá tĩwiɛ̀ àá hũn hánlɔ́. 47Ɓɛ̀ wóò ɓàaní Dɔfĩn ɛ̀ ɓɛ̀ nìnbirìe ɓɛ́kùi ɛ́ hṹn ɓɛ̀ mɛ̀ndɛ̃. Àá sítĩnlɔ́, ɛ̀ Ɲunsɔ hṹn wóò fuení ɓɛ́ nìnbí-fĩɛ̀ dɔ̀ ǹ ɛ̀ ɓen páa ɓɛ́ ńdɛsĩ̀riè lɔ̀n.
Айни замон обунашуда:
Bɔ̀werà 2: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation