Bɔ̀werà 1
1
Lè Mɛkɛ̃n-Sãanu lɛ ɛ́ Yiezu lɛ́ mí ɲunù nɛ mii vɛ tɔní ɓen síɛní bòo
1Teofile lɛ ń wɛ, niǹ hán vɛ̃hṹ hũn, ɛ́ ń bie bòo lɛ ɛ́ Yiezu wɔ́ míkùi àá bòo lɛ á kɛ̀rɛa míkùi àá ɓɛ́ nìnbirìe àá pehɔ̀ fìi ɓánlén, 2fúu ɛ̀ vɛ dɛ̃ lè wurù lɛ ɛ́ Dɔfĩn dàa lerɛ-à ɛ́ dàa yòó van hɔ̀ hóohũn. Ɛ́ bòo lɛ á vaá-lan, ɛ́ lé Mɛkɛ̃n-Sãanu ɛ́ lɛ́ á lɛ́ hɔ́ bérɛ́ ɓɛ̀ nìnbiriè lɛ á munɛ nɛ ɓɛ wé mí tɔnkɛriè. 3Ɛ́ hɔ́ lɛ á húrun ɛ́ vìé vɔ́, ɛ́ ɓɛ́pe iè pe á zɛ̃́niɛ míte nin, ɛ́ wɔ́ hɔ́ bòo bɔ̀kuì ɛ́ zɛ̃́niɛ lɛ́ ɓà ǹ kɛ́ mí yìe ɛ́ wi. À hṹn wóò ɓen peɓɛ̀ viì fúu wihĩ́ dɛ̀wɛ́ (40) hũn, ɛ̀ ɓen khɛ́ Dɔfĩn bɛ́záanú bòo àá ɓɛ́. 4Ɛ́ wurù dɔ̀ zɔn, ɛ́ hɔ́ lɛ á wi yán ɛ́ dí àá ɓɛ́, á zɔn bie lɛ́ ɓà ǹ hièniɛ nɛ làa: «Mì bí vɛ viì niìní àá Zerizalɛɛmu wɛ̀. Kɛ́ mí dìń ɛ̀ mì hìé hɔ bòo lɛ á Yàá ɛ́ lɛ́ mí ɲunù nɛ mí ɓén lɛ́ miɛ ǹ, lɛ iè lè Mɛkɛ̃n-Sãanu lɛ ɛ́ ń bie bòo àá miɛ. 5Iè hɔ̀ lɛ á Zãn ɛ́ iè hɔ̀ ɲumu á líiníkɛa ɓɛ̀ nìnbiriè hũn, kɛ́ mípe, hũ̀nún àá wihĩ́ bɔ̀nbɔ̀ yiɛní, ɛ̀ mì ɓén tí àá lé Mɛkɛ̃n-Sãanu.»
Yiezu Kirisa khũ̀á yòó viɛnù hɔ̀ hóohũn
6Ápe Yiezu tɔnkɛriè lɛ koo ɓánlɔ̀n àá ɔ́ ɛ́ zɔn ɛ́ ɔ̀ dìenin nɛ làa: «Ɲunsɔ, ɛ́ bòo ɛ́ hɔ́ iè pe pɛ̃̀hṹ sɔ lɛ hũn ɛ́ kɔ́ dàa kɔ bĩní khũ̀á bìsí hɔ́ Yizarayɛɛle bɛ́záanú yée?» 7Ɛ́ Yiezu zɔn kɔ̃́niɛ ɓɛ̀ nɛ làa: «Lè pɛ̃hṹ àá lè yìi lɛ á Yàá ɛ́ te lerɛ míte ǹ ɛ́ mípe ɛ́ yí temu sãawi ɛ̀ mì ɛ̀ dũń wɛ̀. 8Kɛ́ mí ɓén yí pànkɛ́ dɔ̀, pɛ̃̀hṹ lɛ kɛ́ lé Mɛkɛ̃n-Sãanu ɛ́ lɔ́ ɓen síɛ mì lɔ̀n, ɛ́ mí wo ɓén wé nìnbirìe lɛ ɓɛ ɛ̀ munkɛ hɔ̀ bɔ̀berà niǹ bòo hũn hɔ̀ Zerizalɛɛmu lóo hũn, àá hɔ́ Zudee pɛ̃̀hɛ̃ míkùi hũn, àá hɔ́ Samari pɛ̃̀hɛ̃ hũn, fúu ɛ̀ vɛ dɛ̃ le sṹsùnù vénlén míkùi.» 9Ɛ́ bòo lɛ ɛ́ Yiezu bie hɔ̀pe sí vɔ́, á síɛ hĩ́nà yòó cɔ́ kã́a hɔ̀ hóohũn kɛ́ ɓɛ́pe ɓɛ́kùi ɛ́ dɛ̃̀ ɛ́ ɔ̀ húi, ɛ́ dùndùí dɔ̀ ɛ́ ɓɛrɛ ɓúrɛ-à ǹ, ɛ́ ɓɛ́ wo bĩniɛ yí loo ɔ wɛ̀. 10Ɛ́ hɔ́ lɛ ɛ́ ɓɛ́ dɛ̃̀ ɛ́ fɛ́ ɓɛ́ yìe ɛ́ húi àá hɔ́ hóohũn kɛ́ Yiezu ɛ́ yòó cɔ́, ɛ́ nìɛ ɓɛ̀ ɲu dɔ̀ lɛ zɔn pɔnkɔ̀-può ɛ́ ɓɛrɛ dɛ̃̀ peɓɛ̀ sɛnù, 11ɛ̀ ɓɛ̀ zɔn bie lɛ́ ɓà ǹ nɛ làa: «Mìpe Kalile siè hɔ ńɓùo ɛ́ mí dàa dɛ̃̀ ɛ́ húi àá hɔ́ hóohũn kɛ̀amu? Àpe Yiezu lɛ ɛ́ Dɔfĩn ɛ́ fɔ́ dàa yòó van hɔ̀ hóohũn, ɛ́ ɓén bĩní khũ̀á ɓén síɛ kɛ̀a bòo lɛ ɛ́ mí dàa mɔn ɔ̀ kɛ́ á yòó cɔ́.»
Bòo lɛ ɛ́ ɓɛ́ tɔnkɛriè dàa lerɛ a Mɛcaasi nɛ a zɔ a Zudaasi kṹn
12Ɛ́ ɓɛ́ tɔnkɛriè ɛ́ lɔ́ lé ɓúkìe lɛ ɓɛ́ wóo ve nɛ Olive vɛ̃̀hɛ̃ ɓúkìe lɔ̀n ɛ́ khũ̀a van Zerizalɛɛmu. Lè ɓúkìe sɔ àá hɔ́pe Zerizalɛɛmu niìrɔ́ ɛ́ wé kilɔn dìcóoní ɓà ńmàa. 13Ɛ́ bòo lɛ ɛ́ ɓɛ́ van dɛ̃un hɔ̀ Zerizalɛɛmu, ɛ́ ɓɛ́ yòó van zɔn lè lɔ́nkɔ́ zũ-bɔ́nú#1.13 Ɓɛ̀dɔ̀ ɛ́ wóò nɛ núnkɔ́ zu-bɔ́nú lɛ ɛ́ ɓɛ́ hṹn wóò kóo ɓánlɔ̀n hũn. Ɓɛ̀lɛ hàarí wi yán ɛ́ hàarí iè Piɛre àá Zãn àá Zaake àá Andere àá Filiipu àá Toma àá Batelemii àá Matiye àá Zaake lɛ iè ɔ̀ Alife yɛ̀nù àá Simɔn lɛ ɛ́ ɓɛ́ wóò ve nɛ Zelɔɔti àá Zaake yɛ̀nù Zuude. 14Ɛ́ ɓɛ́pe ɓɛ́kùi ɛ́ hàarí wɔ́ ɓɛ́ ɲunù àá dìcóoní ɛ̀ ɓɛ̀ wóò kóo ɓánlɔ̀n fúu ɛ̀ páaní hɛ̃un Dɔfĩn àá ɓɛ́ hã́a dɔ̀, àá Yiezu ɓà nín Maari, àá Yiezu ɓà zɛ̀ɓɛ̀. 15Ɛ́ wurù dɔ̀ zɔn, ɛ̀ ɓɛ̀ ńdɛsĩ̀riè lɛ kóo ɓánlɔ̀n ɛ́ dɛ̃un nìɛ ɓɛ́rɛ́ hùiezĩ̀ (120). Ɛ́ Piɛre ɛ́ síɛ hĩ́nà yòó dɛ̃̀ peɓɛ̀ tĩ́ihṹ à zɔn bie lɛ́ ɓà ǹ nɛ làa: 16«Kìe zɛ̀ɓɛ̀, hɔ̀ bòo lɛ ɛ́ lé Mɛkɛ̃n-Sãanu hàarí sɛ̃̀nɛ́hã̀ bie àá ɔ́ Daviide ɲunù à Zudaasi bòo hũn ɛ́ sãawi ɛ̀ hɔ̀ ɲunù tí. Àpe Zudaasi sɔ ɛ́ te ɓɛ nìnbirìe híɛhɔ́ ɛ́ hàarí dú ɛ́ ɓɛ́ dàa ɓaa ɔ̀ Yiezu. 17À bòo hṹn ɛ́ wi yán àá kie ɛ́ hɔ̀ tɔnlɔ́ lɛ ɛ́ Dɔfĩn ɛ́ dɔ́ piè bàanì hũn ɛ̀ tɛ́. 18Ɛ́ hɔ́ màa lɛ ɛ́ ɓɛ́ lɛ́ à ǹ piè bɔ̀koohɔ́ lɛ á wɔ́ bòo hũn, á van yɛ̀ àá mún. Á kùerɛ ɛ́ síɛ àá mí híɛhɔ́, ɛ́ kuò síɛ wua, ɛ́ piè tɛ̃́hĩ́ ɛ́ lɔ́ koosí. 19Ɛ́ ɓɛ́ Zerizalɛɛmu nìɛ ɓɛ́kùi ɛ́ ɲɛ́ hɔ́ ɛ́ ɓɛ́ dàa cɔ́ lé mún sɔ yèrè àá ɓá níi nɛ: “Hakɛledamaa” iè bòo ɛ́ ɓɛ́ nɛ cãani mún.» 20Ɛ́ Piɛre ɛ́ zɔn bie sĩiniɛ nɛ làa: «Hɔ̀ ɛ́ wɛ̃́ hɔ́ yanbehĩ́ vɛ̃hṹ hũn ɛ́ nɛ:
“Nɛ piè zũnù ɛ́ ɓɛ́ pĩ́ tɛ́viɛní,
Nɛ nìnbírɔ dɔ̀ ɛ̀ bí zɔ le wɛ̀!”
Ɛ̀ hɔ̀ lò bĩniɛ ɛ́ wɛ̃́ nɛ:
“Nɛ nìnbí-ɓuɛ̀ ɛ̀ teń piè tɔnlɔ́ ɛ̀ tɛ́!”
21-22Ɛ́ hɔ́ sãa ɛ̀ nìnbírɔ dɔ̀ ɛ̀ yí páa ké lɔ̀n ɛ̀ kè dàá wóò bie hɔ bɔ̀berà ɔ̀ Ɲunsɔ Yiezu vìerɔ́ bòo hũn. Ɓàasɔ sãawi à lé ɓɛ́lɛ hàarí wóò bèɓán àá kie tĩ́ihṹ, pɛ̃̀hṹ míkùi lɛ ɛ́ Ɲunsɔ Yiezu dàa hàarí wi àá kie, ɛ̀ dàá mìí lé yìi lɛ á Zãn dàa líiniɛ ɔ̀ hɔ̀ ɲumu hũn fúu ɛ̀ vɛ dɛ̃ le yìi lɛ á dàa yòó van hɔ̀ hóohũn.» 23Ɛ́ ɓɛ́ zɛ̃́niɛ nìɛ ɓɛ̀ ɲu dɔ̀: Zozɛɛfu lɛ ɛ́ ɓɛ́ wóo ve nɛ Barasabaasi, lɛ ɛ́ ɓɛ́ lò sĩ̀n wóo bĩní ve nɛ Zusitiise àá Mɛcaasi. 24Ɛ́ ɓɛ́ khie hɛ̃nnɛ Dɔfin ɛ́ nɛ làa: «Ɲunsɔ, kɔ̀pe lɛ ɛ́ dũ ɓɛ nìnbirìe ɓɛ́kùi tĩɛ̀, ɛ́ ɓɛ́pe nìɛ ɓɛ̀ ɲu sɔ lɛ tĩ́ihṹ, ɛ́ kɔ́ zɛ̃́ní-ɛ lɛ ɛ́ kɔ́ munɛ 25nɛ a wí-e tɔnkɛrɔ ɛ̀ zɔ a Zudaasi kṹun ɛ̀ zɔ tɛ́ hɔ́ tɔnlɔ́ lɛ ápe Zudaasi ɛ̀ fùɛrɛ̀sínin à lɔ́ van lè viì lɛ á fɔ́ɓán à vɛ hũn.» 26Ɛ́ ɓɛ́ khie lenkɛa hɔ̀ bòo ɛ́ dàa dũnɛ àlɛ ɛ́ mii zɔ a Zudaasi kṹun, ɛ́ hɔ́ síɛ Mɛcaasi lɔ̀n. Ápe ɛ́ temu khie paa à Yiezu tɔnkɛriè pírú àá nìcóoní lɔ̀n.
Айни замон обунашуда:
Bɔ̀werà 1: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation