Bɔ̀werà 4
4
Piɛre àá Zãn ɓaakɛrɔ́
1Ɛ́ hɔ́ lɛ ɛ́ Piɛre àá Zãn ɛ́ dɛ̃̀ wi yán ɛ́ bie àá ɓɛ́ nìnbirìe, ɛ́ ɓɛ́ khɛ̃́ndàariè àá lé Dɔfĩn zũhìeriè hándí àá ɓɛ́ Sadusĩɛɓɛ ɛ́ van ɓɛrɛ ɓen dɛ̃un. 2Ɓɛ̀ hṹn tĩɛ̀ ɛ́ hĩ́nà cɛ̃̀un, iè hɔ̀ lɛ ɛ́ Piɛre àá Zãn ɛ́ ɓɛ̀ nìnbirìe kɛ̀rán kɛ́ ɓɛ́ ɛ́ ɔ̀ Yiezu vìerɔ́ bòo ɛ̀ bie, ɛ́ dàa ɛ́ zɛ̃́ní kɛ̀amu kɛ́ ɓɛ́ nìhiè ɛ́ ɓén vìé. 3Ɛ́ ɓɛ́ ɓaakɛa ɓɛ̀ ɛ́ van koo lè kɛ̀sí hũn kɛ́ hɔ́ sí ɛ́ tĩ, iè hɔ̀ lɛ ɛ́ hɔ́ sí ɛ́ wo hṹn hĩ. 4Kɛ́ ɓɛ́ nìnbirìe lɛ ɛ́ ɲɛ́ ɓɛ́ tɔnkɛriè biehĩ́, ɛ́ ɓɛ́ cɛ̀rìɛɛ ɛ́ dũmuasɛ̃̀, ɛ́ ɓɛ́ ńdɛsĩ̀riè ɛ́ wookɛa ɛ́ boòní, ɓɛ̀ hṹn yú nìnbirìe muasíe hɔ̀nú (5 000) ɓà ńmàa.
Piɛre àá Zãn ɛ́ wi ɓɛ lìe lèriè híɛhɔ́
5Ɛ́ hɔ́ lɛ ɛ́ hɔ́ sí van tɛ̃un, ɛ́ ɓɛ́ Zuifuɓɛ hándíe àá ɓɛ́ nìkĩ́ɛ àá ɓɛ́ làndɛ́ kɛ̀ránliè ɛ́ lɔ́ koo ɓánlɔ̀n hɔ̀ Zerizalɛɛmu lóo hũn. 6À khɛ̃́ndàarɔ wì-bɛhɔ́ Haanɛ ɛ́ hṹn wi peɓɛ̀ tĩ́ihṹ, à Kayiifu àá Zãn àá Alɛkisandere àá ɔ́pe khɛ̃́ndàarɔ wì-bɛhɔ́ ɓà zũnù nìɛ ɓɛ́kùi ɛ́ lò hṹn wi yán. 7Ɛ́ ɓɛ́ nɛ ɓɛ dàá ɔ́ Piɛre àá Zãn ɛ̀ dàá ɓen ɓɛ́ híɛhɔ́. Ɛ́ ɓɛ́ zɔn ɛ́ ɓɛ̀ dìenin ɛ́ nɛ làa: «À iè wie pànkɛ́ tàá ɔ̀ iè wie yèrè lɔ̀n ɛ́ mí dàa wɔ́ hɔ́pe bòo sí?» 8Ɛ́ Piɛre lɛ ɛ́ tú àá lé Mɛkɛ̃n-Sãanu ɛ́ zɔn bie lɛ́ ɓà ǹ ɛ́ nɛ làa: «Mìpe lóo hándíe àá mípe lóo nìkĩ́ɛ, 9Mí kè dìenin hɔ̀ zoòni lɛ, hɔ̀pe bɔ̀tente lɛ ɛ́ wɔ́ ɛ́ lɛ́ ápe mùamúa ǹ bòo hũn, mí kè dìenin nɛ a nùún sɔ ɛ́ wiɛ wiɛlɔ́ ɛ́ dàa wan. 10Ɛ́ mí dũń sãàní mìpe mìkùi, àá mípe Yizarayɛɛle nìɛ mìkùi: à iè Nazarɛɛte Yiezu Kirisa yèrè lɔ̀n, àpe lɛ ɛ́ mí ɓáa lè ɓáalén dãanù lɔ̀n, lɛ ɛ́ Dɔfĩn ɛ́ vìeniɛ líeniɛ hɔ̀ húmú hũn, lè iè piè yèrè pànkɛ́ temu lɛ́ ápe nùún sɔ lɛ ɛ́ dàa yú ɓɛrɛ dɛ̃̀ mì híɛhɔ́, kɛ́ á lɔ̀n ɛ́ hie. 11Àpe Yiezu iè ɔ̀pe lɛ ɛ́ lé Dɔfĩn bienù ɛ́ khɛ́ bòo ɛ́ nɛ làa:
“Lè sɛ̃̀nlè lɛ ɛ́ mípe zũteriè ɛ́ lerɛ tɛ́viɛniɛ,
Ɛ́ temu bĩniɛ khũ̀a wɔ́ lé sɛ̃̀nlè lɛ bòo hie, lɛ te lepe zũnù ɛ́ zɛ̃nkɛanin.”
12Ɛ́ hɔ́ fuerɛ ɛ́ yí dɛ̀ yá yí nìnbírɔ dɔ̀ viì, kɛ́ ápe Yiezu mí dòonún viì ɛ́ ɓen bòo mí; iè hɔ̀ lɛ ɛ́ lé dímíɲɛ́ míkùi hũn, ɛ́ Dɔfĩn ɛ́ yí lɛ́ yèrè dɔ̀ kèpe nìnbirìe ǹ, lɛ ɛ́ dɛ̀ ɛ́ lɛ́ ɛ́ ké ɛ́ fuen, kɛ́ ápe Yiezu yèrè ɛ́ ɓen bòo mí.» 13Ɛ́ hɔ́ lɛ ɛ́ ɓɛ́ lìe lèriè ɛ́ ɓɛ húi ɛ̀ Piɛre àá Zãn ɛ́ bie kɛ́ ɓɛ́ fɔnù tɛ́rɛ, ɛ́ hɔ́ hɛ̀ yòokɛa peɓɛ̀ lɔ̀n, iè hɔ̀ lɛ ɛ́ ɓɛ́ mɔn kɛ́ ɓɛ́ iè nìnbirìe lɛ yìe ɛ́ yí hán, ɛ̀ ɓɛ̀ lò ɛ́ yí kɛ̀rán wɛ̀. Ɛ́ ɓɛ́ dũnɛ kɛ́ ɓɛ́ hṹn wóò bè Yiezu máahṹ. 14Kɛ́ hɔ́ lɛ ɛ́ ɓɛ́ loo ɔ nùún lɛ wan kɛ́ á dɛ̃̀ peɓɛ̀ sɛnù, ɛ́ ɓɛ́ wo yí dɛ̀ bòo dɔ̀ ɛ́ yá zɔ ɛ́ bie wɛ̀. 15Ɛ́ ɓɛ́ nɛ Piɛre àá Zãn ɛ̀ khíi lé hɔ́ lìe lènlén. Ɛ́ ɓɛ́ khie lɔ́ yán, ɛ́ ɓɛ́pe liè lèriè ɛ́ khie ɛ́ dìkìmú ɓán hũn. 16Ɛ̀ ɓɛ̀ ɛ́ bie ɛ́ nɛ làa: «Ɛ́ hɔ́ wo iè ńɓùo ɛ́ ké wo ké wé àá ɓɛ́pe nìɛ sɔ lɛ? Ɓɛ̀ Zerizalɛɛmu nìɛ ɓɛ́kùi ɛ́ dũ kɛ́ ɓɛ́pe nìɛ sɔ lɛ ɛ́ te hɔ yéréké bòo sɔ ɛ́ wɔ́, ɛ́ ké lò yí dɛ̀ yá pĩ́ ɛ́ bie nɛ hɔ yí be. 17Kɛ́ lɛ ɛ̀ hɔ̀pe bòo sɔ ɛ̀ bí bè hɔ̀ fɔ́hĩ́ ǹ, ɛ́ mí nɛ ke mìí ké núnú ɛ̀ dé peɓɛ̀ yìi hũn ɛ̀ bie ɛ̀ lɛ́ ɓà ǹ nɛ ɓɛ bí bĩní bie Yiezu bòo àá nìnbírɔ dɔ̀ wɛ̀.» 18Ɛ́ ɓɛ́ khũ̀a vɔn Piɛre àá Zãn ɛ̀ ɓɛ̀ bie lɛ́ ɓà ǹ hièniɛ nɛ ɓɛ bí bĩní bie Yiezu bòo, ɛ̀ ɓɛ̀ lò bí bĩní kɛ̀rán nìnbírɔ dɔ̀ àá hɔ́ wɛ̀. 19Ɛ́ Piɛre àá Zãn ɛ́ zɔn ɛ́ kɔ̃́niɛ ɓɛ̀ nɛ làa: «Mìpe kùusɔ síɛ vɛ̀ mì hũn ɛ̀ húi nɛ bòo ɛ́ hɔ́ ɛ́ cã̀aní Dɔfĩn híɛhɔ́ ɛ̀ mìpe mì bòo iè pe ɛ́ ké ɲí ɛ̀ kè pĩ́ ɛ̀ bí ɲí Dɔfĩn bòo? 20Ɛ́ képe ɛ́ yí dɛ̀ yá fùansí ɛ́ yá bie hɔ bòo lɛ ɛ́ ké mɔn àá hɔ́ lɛ ɛ́ ké ɲɛ́ wɛ̀.» 21Ɛ́ ɓɛ́ lìe lèriè ɛ́ bĩniɛ fũn àá ɓɛ́ ɛ̀ ɓɛ̀ fùɛrɛ̀sí ɓà ǹ. Ɓɛ̀ hṹn yí dũ bòo lɛ ɛ́ ɓɛ ɛ̀ wé ɛ̀ dàá biení peɓɛ̀ lɔ̀n, iè hɔ̀ lɛ ɛ́ ɓɛ́ nìnbirìe ɓɛ́kùi ɛ́ hṹn Dɔfĩn ɛ̀ ɓàanínin hɔ̀pe bòo lɛ ɛ́ wɔ́ bòo hũn. 22Àpe nùún sɔ lɛ ɛ́ wan àá hɔ́ yéréké ɛ́ lɔ́líe ɛ́ hàarí pɔ dɛ̀wɛ́ (40).
Ɓɛ̀ ńdɛsĩ̀riè Dɔfĩn hɛ̃nnɛ
23Ɛ́ hɔ́ lɛ ɛ́ Piɛre àá Zãn ɛ́ ɓɛ́ fùɛrɛsínin, ɛ́ ɓɛ́ khie cɔ́ van ɛ́ yú ɓán ńkɔhĩ́ lɛ ɛ́ kɛ́, ɛ̀ ɓɛ̀ bie hɔ̀ bòo lɛ ɛ́ ɓɛ́ khɛ̃́ndàariè hándíe àá ɓɛ́ nìkĩ́ɛ ɛ́ khɛ́ ɛ́ lɛ́ ɓà ǹ míkùi. 24Ɛ́ hɔ́ lɛ ɛ́ ɓɛ́ ɲɛ́ hɔ́ vɔ́, ɛ́ ɓɛ́pe ɓɛ́kùi ɛ́ páaníɛ koo ɓɛ tɛmu ɓánlɔ̀n, ɛ̀ ɓɛ̀ ɛ́ Dɔfĩn hɛ̃nnin ɛ́ nɛ làa: «Ɲunsɔ, kɔ̀pe ɛ́ te hɔ hóohũn àá lé sṹsùnù ɛ́ mɛ́, ɛ̀ kɔ̀ lò te hɔ ɲun-bɛhɔ́ àá hɔ́ bòo lɛ zɔn wi pehɔ̀ hũn míkùi ɛ́ mɛ́. 25Lè iè kɔ̀ Mɛkɛ̃ni ɛ́ temu lɛ́ ɛ́ kìe zĩkĩ́n Daviide lɛ ɛ́ ie kɔ̀ tɔntɛ́ ɛ́ dàa hàarí bie nɛ làa:
“Hɔ̀ ńɓuò ɛ́ hɔ́ dàa míkùi nìɛ ɛ́ dàa ɛ́ kìrín?
Ɓɛ̀ nìnbiriè iè hɔ̀ bòo lɛ ɛ́ ɲún mí ɛ́ ɓɛ́ wóò lieníkɛ.
26 Lè sṹsùnù bɛ́zɛ̀ɓɛ̀ ɛ́ hĩ́nà dɛ̃̀ iè hɔ̀ hĩɛ̀ ɛ́ ɓɛ ɛ̀ tɛ́,
Ɛ̀ ɓɛ̀ nìnbiriè hándíe ɛ́ wɔ́ ɓɛ́ ɲunù àá dìcóoní,
Ɛ́ dàa ɓɛ ɛ̀ fi àá ɔ́ Ɲunsɔ àá ɔ́lɛ ɛ́ ápe Ɲunsɔ ɛ́ munɛ.”
27Ɛ́ hɔ́ hɛ̀ bɔn, à Herɔɔde àá Pɔnse Pilaate ɛ́ wɔ́ ɓɛ́ ɲunù àá dìcóoní hɔ̀pe lóo hũn àá hɔ́ dàa lɛ kɛ́ nìɛ àá ɓɛ́pe Yizarayɛɛle nìɛ, ɛ́ dàa sɛ̃́ ɓán àá kɔ́ tɔntɛ́ tente Yiezu lɛ ɛ́ kɔ́ munɛ. 28Ɛ́ hɔ́ bòo lɛ ɛ́ kɔ́ sɛ̃̀nɛ́hã̀ bie bòo nɛ hɔ ɓén wé kɔ́ pànkɛ́ àá kɔ́ tĩi bòo hũn iè pe ɛ́ ɓɛ́ wɔ́ míkùi. 29Ɛ́ kɛ̀a sáalɛ Ɲunsɔ, ɛ́ kɔ́ húi lé hiɛ̀ lɛ ɛ́ ɓɛ́ ɛ́ lɛ̀, ɛ̀ kɔ̀ lɛ́ nɛ kɔ tɔntɛ́riè ɛ́ bie kɔ bienù ɛ̀ lɛ́ ɓɛ́ nìnbiriè ǹ àá tĩhiè. 30Zɛ̃́ní kɔ́ núnú pànkɛ́, bòo lɛ ɛ́ wé ɛ̀ ɓɛ̀ dɔriè ɛ̀ wóo wɛ, ɛ̀ hɔ̀ yéréké bòo àá hɔ́ bɔ̀bɛ̃hɛ̃ ɛ̀ wóo wé kɔ́ tɔntɛ́ tente Yiezu yèrè lɔ̀n.» 31Ɛ́ hɔ́ lɛ ɛ́ ɓɛ́ hɛ̃nnɛ Dɔfĩn vɔ́, ɛ́ lé viì lɛ ɛ́ ɓɛ́ koo ɓánlɔ̀n hũn ɛ́ síɛ zɛ̀, ɛ́ ɓɛ́pe ɓɛ́kùi ɛ́ wo tú àá Mɛkɛ̃n-Sãanu, ɛ́ ɓɛ́ khie ɛ́ Dɔfĩn bienù ɛ̀ bie lɛ́ ɓɛ́ nìnbiriè àá tĩhiè.
Bòo lɛ ɛ́ ɓɛ́ ńdɛsĩ̀riè dàa wóò sankɛ ɓɛ́ núnú hũn bòo ɓán hũn
32Ɓɛ̀pe ńdɛsĩ̀riè lɛ hɛ̀ hàarí buò buò ɓɛ́kùi ɛ́ den hàarí ɛ́ ɲí ɓán cɛ̃̀un. Peɓɛ̀ tĩɛ̀ àá peɓɛ̀ hɛciri ɛ́ hàarí iè dìcóoní. Àdɔ̀ hàarí yáà bie nɛ mí núnú hũn bòo ɛ́ mípe mí dòonún ɛ́ te wɛ̀. Kɛ́ ɓɛ́pe ɓán hũn, ɛ́ hɔ́ bòo lɛ ɛ́ hɔ́rɔ ɛ́ wóo yí míkùi ɛ́ iè bòo lɛ ɛ́ ɓɛ́pe ɓɛ́kùi ɛ́ lɔ̀nin. 33Ɛ́ hɔ́ hàarí iè pànkɛ́ bɛhɔ́ ɛ́ ɓɛ́ tɔnkɛriè ɛ́ dàa ɛ́ hɔ̀ bɔ̀berà ɛ̀ munkɛ a Ɲunsɔ Yiezu vìerɔ́ bòo hũn, ɛ̀ Dɔfĩn ɛ́ hàarí ɛ́ mí hiì ɛ̀ wé àá ɓɛ́pe ɓɛ́kùi. 34Ɛ́ nìnbírɔ dɔ̀ lɛ ɛ́ bòo ɛ́ hàarí wóo pɔní peɓɛ̀ tĩ́ihṹ ɛ́ mínɛ wɛ̀. Ɓɛ̀lɛ ɛ́ hàarí dàa hɔ mɛhɛ̃ tàá hɔ̀ zĩhiɛ́ ɛ́ wóo yìɛní hɔ́ ɛ̀ dàá màa dàá ɓen 35ɓɛ̀ tɔnkɛriè ǹ viì. Ɛ̀ ɓɛ̀ den wo khíi sankɛ hɔ màa ɓán hũn, hɔ́rɔ wóo yí bòo lɛ á mɛ̀kóo wi nin. 36Ɛ́ Zozɛɛfu lɛ iè Levii hũn nùún dɔ̀, lɛ ɛ́ lé àá hɔ́ Siipere cɛ̃̀mɛ̀nɛ́, lɛ ɓɛ́ tɔnkɛriè ɛ́ cɔ́ yèrè nɛ Baranabaasi iè bòo ɛ́ ɓɛ́ nɛ «tĩ-hĩ̀inírɔ», 37ɛ́ van yìɛniɛ mí mún, à dàa pelè màa ɛ́ dàa ɓɛrɛ ɓɛ tɔnkɛriè viì.
Айни замон обунашуда:
Bɔ̀werà 4: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation