Bɔ̀werà 5
5
Ananiasi àá Safira bòo
1Ɛ́ nùún dɔ̀ hàarí wi yán lɛ yèrè ɛ́ ɓɛ́ nɛ Ananiasi àá ɓá hṹnu lɛ yèrè ɛ́ ɓɛ́ nɛ Safira ɛ́ yìɛniɛ ɓá mún dɔ̀. 2Ápe Ananiasi ɛ́ ɲɛ́ɓán àá ɓá hṹnu à fɛ́rɛ hɔ̀ màa dɔ̀ ɛ́ tànkɔ̀niɛ, à dàa hɔ̀ lɛ kɛ́ ɛ́ dàa van ɔ̀ Yiezu tɔnkɛrie viì. 3Ɛ́ Piɛre ɛ́ zɔn bie lɛ́ à ǹ ɛ́ nɛ làa: «Ananiasi, kɔ́ wiɛ dàa fùɛrɛ̀sí Sitũanɛ ǹ á zɔn kɔ̀ tĩì fúu ɛ́ lɛ́ ɛ́ kɔ́ ɓuo hɔ̀ ɓúo ɛ́ lɛ́ lé Mɛkɛ̃n-Sãanu ǹ, ɛ̀ kɔ̀ fɛ́rɛ lè mún lɛ ɛ́ kɔ́ yìɛniɛ màa dɔ̀ ɛ́ tànkɔ̀niɛ? 4Hɔ̀ lɛ ɛ́ kɔ́ hṹn ɲɛùn yí yìɛní lé mún sɔ, ɛ̀ lè bòo ɛ́ sũ̀n hṹn yí sĩ̀ kɔ̀? Ɛ́ hɔ́ lɛ ɛ́ kɔ́ yìɛniɛ lè vɔ́, ɛ́ pehɔ̀ màa ɛ́ kɔ́ sũǹ hṹn yí te? Ɛ́ kɔ́ wo wiɛ dàa nùnɛ hɔ̀pe sí ɓà ńmàa wénlɔ́? Ɓɛ̀ yí nìnbirìe ɛ́ kɔ́ ɓuo hɔ̀ ɓúo ɛ́ lɛ́ nin, kɛ́ hɔ́ iè Dɔfĩn ɛ́ kɔ́ ɓuo hɔ̀ ɛ́ lɛ́ nin.» 5Ɛ́ bòo lɛ ɛ́ Ananiasi ɛ́ ɲɛ́ hɔ́pe biehĩ́ sɔ sí, á kùerɛ ɛ́ síɛ húrun. Ɛ́ ɓɛ́ nìnbirìe lɛ ɛ́ ɲɛ́ hɔ́ ɓɛ́kùi ɛ́ hɛ̀ zɛrɛ. 6Ɛ́ ɓɛ́ zɛ̀fɛ-cíini ɛ́ hĩ́nà ɓɛrɛ mɔ̀ à ɛ́ hiɛnin ɛ́ van wũ̀nɛ.
7Ɛ́ liɛrɛɓɛ bɔ̀nbɔ̀ tĩ ɓà ńmàa ɛ́ mii vɛ khíi, à Ananiasi ɓà hṹnu ɛ́ van ɓɛrɛ ɛ́ ɓen zɔn kɛ́ á yí dũ bòo lɛ ɛ́ wɔ́ wɛ̀. 8Ɛ́ Piɛre ɛ́ zɔn ɔ̀ dìenin nɛ làa: «Kɔ̀pe, sí iè pe yàamu lɛ ɛ́ mí dàa yìɛniɛ lèpe mì mún?» Á zɔn nɛ: «Ũun, sí iè pelè yàamu.» 9Ɛ́ Piɛre ɛ́ zɔn bie lɛ́ à ǹ nɛ làa: «Mí wo wiɛ dàa lɔ̀ tɔ̀ ɛ́ nɛ mi ɛ̀ vua Ɲunsɔ Mɛkɛ̃ni ɲunù? Ɛ́ kɔ́ húi, ɓɛ̀ nìnbirìe lɛ ɛ́ van wũ̀nɛ mì bɛ́rɔ ɛ́ khũ̀a ɓɛrɛ wi le zĩínu ɲunù; ɛ́ ɓɛ́ ɓiɛ̀ ɓɛ ɓén mìí kɔ ɛ̀ dàá lan.» 10Ɛ́ mí laà hũn, á kùerɛ ɛ́ síɛ húrun àpe Piɛre híɛhɔ́. Ɛ́ ɓɛ́ zɛ̀fɛ-cíini ɛ́ yòó zɔn ɛ́ zɔn yú-o kɛ́a húrun, ɛ́ ɓɛ́ síɛ ɛ́ mɔ̀ à ɛ́ van wũ̀nɛ ɓà bɛ́rɔ sɛnù. 11Ɛ́ ɓɛ́ ńdɛsĩriè àá ɓɛ́ nìnbirìe lɛ ɛ́ ɲɛ́ hɔ́pe bòo sɔ ɓɛ́kùi ɛ́ hɛ̀ zɛ́rɛ cɛ̃̀un.
Hɔ̀ yéréké bòo bɔ̀kùi bòo
12Ɛ́ Dɔfĩn ɛ́ hàarí wóò bè Yiezu tɔnkɛriè ɛ̀ dàá wé hɔ́ yéréké bòo àá hɔ́ bɔ̀bɛ̃hɛ̃ bɔ̀kuì ɓɛ̀ nìnbirìe tĩ́ihṹ. Ɛ́ ɓɛ́ ńdɛsĩ̀riè ɓɛ́kùi ɛ́ wóò vɛ kóo ɓánlɔ̀n lè Dɔfĩn zũ-bɛhɔ́ ńzɛ̃hṹ lɛ ɛ́ ɓɛ́ wóo ve nɛ Salomɔn ńzɛ̃hṹ fìi hũn. 13Ɛ́ nìnbí-ɓuà dɔ̀ lɛ hṹn wóo ɓɛ hĩ̀ ɓɛ́ tĩɛ̀ ɛ̀ vɛ kóo ɓánlɔ̀n àá ɓɛ́ ɛ́ mí wɛ̀. Kɛ́ ɓɛ́ nìzã̀amáa ɛ́ lò den ɛ́ ɓɛ̀pe ńdɛsĩriè ɛ̀ mɛndɛ̃ cɛ̃̀un. 14Ɛ́ nìnbí-kuì, báa àá hã́a lɛ ɛ́ Ɲunsɔ ɛ̀ dɛsĩ̀nin ɛ́ wo ɛ́ buòní buònírɔ́. 15Ɛ́ ɓɛ́ nìnbiriè wo hṹn wóò dàá ɓɛ́ dɔriè ɛ̀ lé vɛ daanikɛ hɔ́ wṹuhɛ̃ sɛhĩ́ɛ ɓɛ́ dɛmu tĩ̀ɛ lɔ̀n, bòo ɛ́ wé kɛ́ Piɛre ɛ́ ɓen van khíi, ɛ̀ piè ńwĩ́ihṹ ɛ̀ yí lé ɓɛ́dɔ̀ lɔ̀n. 16Ɛ́ nìnbí-kuì ɛ́ ɓiɛ̀ hṹn wóò vɛ lé hɔ́ lóoniɛ̀ lɛ ɛ́ lúwikɛ ɛ̀ ɓen hɔ̀ Zerizalɛɛmu lóo hũn. Ɓɛ̀ hṹn wóò dàá ɓɛ́ dɔriè àá ɓɛ́ nìnbirìe lɛ ɛ́ ɓɛ́ ńɲíkĩ́nìɛ ɛ́ lɔ̀n biení ɛ́ dàá ɓen, ɛ́ ɓɛ́pe ɓɛ́kùi ɛ́ hṹn wóò wɛ.
Yiezu tɔnkɛriè lɔ̀n bienírɔ́ bòo
17Á khɛ̃́ndàarɔ wì-bɛhɔ́ àá ɓɛ́ nìnbirìe lɛ ɛ́ wi ɓánlɔ̀n àá ɔ́, lɛ iè ɓɛ Sadusĩɛɓɛ ɛ́ lè yanlienú ɛ̀ dí àá Yiezu tɔnkɛriè, ɛ́ ɓɛ́ nɛ ɓɛ́ sãawi ɛ̀ ɓɛ́ wé bòo dɔ̀. 18Ɛ́ ɓɛ́ wo khie ɓaakɛa ɓɛ̀ tɔnkɛriè ɛ́ van koo lè kɛ̀sí hũn. 19Kɛ hɔ́ sṹnúhṹn, ɛ́ Ɲunsɔ mɛlɛkɛ dɔ̀ ɛ́ ɓɛrɛ hɛ́rɛ lè kɛ̀sí zĩínù ɲihĩ́ɛ à zɔn lerɛ ɓɛ̀ tɔnkɛriè ɛ́ líeniɛ à bie lɛ́ ɓà ǹ nɛ làa: 20«Mì lan vɛ le Dɔfĩn zũ-bɛhɔ́ hũn ɛ̀ vɛ bie le mɛkɛ̃nì dɛ̀fĩì lɛ bòo míkùi ɛ̀ lɛ́ ɓɛ́ nìnbirìe ǹ.» 21Ɛ́ ɓɛ́ tɔnkɛriè ɛ́ wɔ́ hɔ́pe lɛ á mɛlɛkɛ ɛ́ bie: ɓɛ̀ hĩ́nà ɲɛ̀nbín dùdù ɛ́ van ɛ́ lè Dɔfĩn zũ-bɛhɔ́ hũn ɛ́ van zɔn ɛ́ ɓɛ̀ nìnbirìe kɛ̀rán yán.
Á khɛ̃́ndàarɔ wì-bɛhɔ́ àá ɓɛ́lɛ ɛ́ wi àá ɔ́ ɛ́ khie vɔn ɓɛ̀ Zuifuɓɛ lìe lèriè àá ɓɛ́ Yizarayɛɛle nìkĩ́ɛ ɛ́ koo ɓánlɔ̀n, ɛ̀ ɓɛ̀ nɛ ɓɛ vɛ leń ɓɛ́ tɔnkɛriè lè kɛ̀sí hũn ɛ̀ dàá ɓen. 22Ɛ́ ɓɛ́lɛ ɛ́ ɓɛ́ tɔrɛ ɛ́ van dɛ̃un, ɛ́ ɓɛ́ yí mi ɓɛpe tɔnkɛriè sɔ lè kɛ̀sí hũn wɛ̀. Ɛ́ ɓɛ́ khũ̀a ɛ́ van munkɛa hɔ̀ bòo lɛ ɛ́ wɔ́ ɛ́ lɛ́ ɓà ǹ. 23Ɓɛ̀ van nɛ làa: «Ké van yú kɛ́ lé kɛ̀sí zũnù ɛ́ hiɛ dɛ̃̀ ɛ̀ ɓɛ̀lɛ ɛ́ te le ɛ́ hìénin ɛ́ dɛ̃̀kɛ ɓɛ́ dĩ̀nlénɓɛ̀ hɔ̀ zĩínù ɲihĩ́ɛ ǹ. Ɛ́ hɔ́ lɛ ɛ́ ké hánkɛa hɔ̀ zĩínù ɲihĩ́ɛ, ɛ́ ké yí zɔ tɛ̀rɛ́ nìnbírɔ yán wɛ̀.» 24Ɛ́ hɔ́ lɛ ɛ́ lé Dɔfĩn zũ-bɛhɔ́ hìeriè hándí àá ɓɛ́ khɛ̃́ndàariè hándíe ɛ́ ɲɛ́ hɔ́pe sí, ɛ́ ɓɛ́ hɛ̀ yí dũ bòo lɛ ɛ́ ɓɛ wé wɛ̀. Ɛ́ ɓɛ́ wo ɛ́ bie ɓɛ́ tĩɛ̀ hũn nɛ hɔ wo iè bòo lɛ ɛ́ wiɛ wiɛlɔ́? 25Ɛ́ nìnbírɔ dɔ̀ ɛ́ ɓɛrɛ ɓen bie lɛ́ ɓà ǹ ɛ́ nɛ làa: «Mì húi, ɓɛ̀ nìnbirìe lɛ ɛ́ mí koo lè kɛ̀sí hũn ɛ́ van wi le Dɔfĩn zũ-bɛhɔ́ hũn ɛ́ ɓɛ̀ nìnbirìe ɛ̀ kɛ̀rán yán.»
26Ɛ́ lé Dɔfĩn zũ-bɛhɔ́ hìeriè àá ɓɛ́ hándí ɛ́ hĩ́nà van fɔ́ ɓɛ́pe tɔnkɛriè ɛ́ dàa ɓɛrɛ, kɛ́ ɓɛ́ yí sĩ̀ ɓɛ̀ àá bàanì, iè hɔ̀ lɛ ɛ́ ɓɛ́ hṹn zán nɛ wɔ́ khɔn ɛ́ ɓɛ́ nìzã̀amáa ɛ́ táa ɓɛ́ àá sɛ̃̀nlɛ̀a. 27Ɛ́ hɔ́ lɛ ɛ́ ɓɛ́ dàa ɓɛ ɛ́ dàa ɓɛrɛ vɔ́, ɛ́ ɓɛ́ van lɔ́ dĩ̀niɛ ɓɛ̀, ɓɛ̀ lìe lèriè híɛhɔ́. Á khɛ̃́ndàarɔ wì-bɛhɔ́ ɛ́ khie ɓɛ̀ dìekɛnin ɛ́ nɛ làa: 28«Ké lò bie lɛ́ miɛ ǹ nɛ mi bí bĩní kɛ̀rán nìnbírɔ dɔ̀ àá ɔ́pe nùún sɔ yèrè wɛ̀. Ɛ́ hɔ́ iè ńɓùo ɛ́ mí wɔ́ kɛ̀amu? Mí saaníkɛa mì kɛ̀ránlɔ́ ɛ́ tíiniɛ lè Zerizalɛɛmu lóo míkùi, ɛ̀ mì den ɛ́ cànkɛ nɛ ape nùún sɔ húmú ɲúuhɛ̃ bòo ɛ́ képe ɛ̀ teń ɛ̀ tìé.» 29Ɛ́ Piɛre àá ɓɛ́pe tɔnkɛrie lɛ ɛ́ kɛ́ ɛ́ zɔn kɔ̃́niɛ ɓɛ̀ ɛ́ nɛ làa: «Ńwé Dɔfĩn tĩì bòo ɛ́ bòo tṹ hɔ́ ńwé ɓɛ́ nìnbirìe tĩɛ̀ bòo. 30Kìe zĩnkĩ́nɓɛ̀ Dɔfĩn ɛ́ vìeniɛ ɔ̀pe Yiezu lɛ ɛ́ mí ɓáa lè ɓáalén dãanù lɔ̀n ɛ́ ɓɔ́. 31Ɛ́ Dɔfĩn ɛ́ hóoniɛ ɔ̀ ɛ́ yòó van bɔ̀sí mí ńdóonín à wɔ́ á àá Ɲunsɔ àá fuenírɔ bòo lɛ ɛ́ wé ɛ̀ ɓɛ̀ Yizarayɛɛle nìɛ ɛ̀ dàá zɛ̀ní ɓɛ́ tĩɛ̀ àá ɓɛ́ bɔ̀werà, ɛ̀ Dɔfĩn dàá dé peɓɛ̀ bɔ̀koohɛ̃ sɛ́wɛ́rí. 32Ɛ́ képe ɛ́ mɔn hɔ̀, ɛ́ ké dàa ɛ́ hɔ̀ bɔ̀berà ɛ̀ munkɛ pehɔ̀ bòo hũn, kèpe àá lé Mɛkɛ̃n-Sãanu lɛ ɛ́ hɔ́pe Dɔfĩn ɛ́ lɛ́ ɓɛ́lɛ ɛ́ pehɔ̀ tĩì bòo ɛ̀ wé ǹ.»
33Ɛ́ hɔ́ lɛ ɛ́ ɓɛ́ lìe lèrìe ɛ́ ɲɛ́ hɔ́pe sí, ɛ́ peɓɛ̀ tĩɛ̀ ɛ́ hɛ̀ síɛ hĩ́nà, ɛ́ ɓɛ́ hṹn wɛ ɛ́ ɓɛ ɓé ɓɛ́pe tɔnkɛriè. 34Kɛ́ Farizĩɛ dɔ̀ lɛ yèrè ɛ́ ɓɛ́ nɛ Kamaliɛle ɛ́ hṹn wi peɓɛ̀ tĩ́ihṹ, à hàarí iè làndɛ́ kɛ̀ránlɔ lɛ ɛ́ ɓɛ́ nìnbirìe ɓɛ́kùi ɛ́ wóò mɛ̀ndɛ̃. Á síɛ hĩ́nà ɓɛ̀ lìe lèriè tĩ́ihṹ, à nɛ ɓɛ bie nɛ a Yiezu tɔnkɛriè ɛ̀ yòó lé dìń àá yíe bìcínbóo. 35À kie ɛ́ bie àá ɓɛ́pe nìnbirìe lɛ ɛ́ koo ɓánlɔ̀n ɛ́ nɛ làa: «Mìpe Yizarayɛɛle nìɛ, mì vɛ̀ mì hũn sãàní àá hɔ́ bòo lɛ ɛ́ mí ɛ́ lieníkɛ ɛ́ mii ɛ̀ wé àá ɓɛ́pe nìɛ sɔ lɛ. 36Hɔ̀ ɲɛùn yí míi wɛ̀, ɛ́ nùún dɔ̀ lɛ yèrè ɛ́ ɓɛ́ nɛ Tedaasi ɛ́ síɛ hĩ́nà; à hṹn tĩì à nɛ mí iè nìnbírɔ lɛ ɲún lì, ɛ́ nìnbirìe khĩɛ́-náa (400) ɓà ńmàa ɛ́ van bɔ̀ piè máahṹ. Kɛ́ ɓɛ́ den ɓú-o, ɛ́ ɓɛ́pe nìnbirìe lɛ hṹn bɔ̀ piè máahṹ ɓɛ́kùi ɛ́ saakɛa, ɛ́ piè bòo ɛ́ yí bĩní bie wɛ̀. 37Ɛ́ pehɔ̀ máahṹ, ɛ̀ Kalile nùún dɔ̀ lɛ yèrè ɛ́ ɓɛ́ nɛ Zudaasi ɛ́ ɓiɛ̀ siɛ hĩ́nà ɓɛ̀ nìnbirìe mìnlɔ́ yìi hũn, á hàarí yú nìnbí-kuì ɛ́ bɔ̀ mí máahṹ. Kɛ́ ápe ɛ́ ɓɛ́ lò ɓiɛ̀ ɓɔ́, ɛ́ ɓɛ́pe nìnbirìe lɛ hṹn bɔ̀ piè máahṹ ɓɛ́kùi ɛ́ saakɛa. 38Ɛ́ kɛ̀a sáalɛ, ɛ́ nín bie lɛ́ miɛ ǹ nɛ mi bí bĩní líi ɓɛ́pe nìɛ sɔ lɛ bòo wɛ̀. Mì fùansí ɓà ǹ nɛ ɓɛ lan. Iè hɔ̀ lɛ kɛ́ peɓɛ̀ bòo lɛ ɛ́ ɓɛ́ ɛ́ cɛ̀ àá peɓɛ̀ tɔnlɔ́ ɛ́ lé àá nìnbirìe vìi, ɛ́ pe hɔ̀ ɲún ɛ́ ɓén ɓé. 39Kɛ́ hɔ́ den ɓen ɛ́ lé àá Dɔfĩn viì àá bɔ̀bín, ɛ́ mí yí dɛ̀ hɔ̀ ɛ́ yá yáakɛ wɛ̀. Ɛ́ mí pɛ míte nɛ ɓuɔ́ ɛ̀ mì bí wé Dɔfin ɛ̀ mì dàá fi wɛ̀.» Ɛ́ ɓɛ́ lìe lèriè ɛ́ tɛ̀ à Kamaliɛle bòo. 40Ɛ́ ɓɛ́ khũà vɔn ɔ̀ Yiezu tɔnkɛriè, ɛ̀ ɓɛ̀ han ɓɛ̀ àá hɔ́ ńhùiehĩ́, ɛ̀ ɓɛ̀ bie lɛ́ ɓà ǹ nɛ ɓɛ bí bĩní bie Yiezu bòo, ɛ̀ ɓɛ̀ fùɛrɛ̀sí ɓà ǹ ɛ́ ɓɛ́ cɔ́. 41Ɛ́ ɓɛ́ tɔnkɛriè ɛ́ lɔ́ hɔ́ lìe lènlén ɛ́ lɔ́ cɔ́ kɛ́ ɓɛ́ wɛ ɓɛ́te iè hɔ̀ lɛ ɛ́ Dɔfĩn ɛ́ tɛ̀ nɛ hɔ sãa ɛ̀ ɓɛ̀ lɔ̀n ɛ̀ be Yiezu yèrè yènsénín. 42Ɛ́ sítĩnlɔ́ míkùi, lè Dɔfĩn zũ-bɛhɔ́ hũn àá ɓɛ́ nìnbirìe zĩhĩ́ɛ hũn, ɛ̀ ɓɛ̀ wóò vɛ àá híɛhɔ́ ɛ̀ kɛ̀rán ɓɛ́ nìnbirìe kɛ́ ɓɛ́ ɔ́ Fuenírɔ Yiezu Bentĩnu bòo ɛ̀ bie.
Айни замон обунашуда:
Bɔ̀werà 5: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation