Yohanes 21
21
Yesus Moniant'an diri ko boko murid-Nyo di pantai danau Tiberias
(21:1-14)
1 Boboropo ari lopas nantai, Yesus moniant'an diri-Nyo agi' ko boko murid-Nyo. Nantai tojadi di pantai danau Tiberias. Ubo ni'inan kisahnyo:
2Boboropo murid Yesus inyo bokumpul. Ado Simon Petrus, Tomas (inyo disobut ‘Si Ana' Kombar’), Natanael (doi' laman Kana di doerah Galilea), koduonyo ana' Zebedeus,#21:2: Koduo ana' Zebedeus ia'an Yakobus ongko Yohanes. huatan duo urakng murid-Nyo inyo bukai. 3Kato Simon Petrus ko sia', “Aku honda' botula' monjalo ikatn.”
Kato sia' ko io, “Koi tuyut jam.” Jadi, sia' borangkat jumpat porohu. Apo, somalapan nantai sia' co bulih siku' pan.
4Pas matoari moncara', Yesus bodiritn di pantai. Apo boko muridnyo nantai co tohu obai nantai Yesus. 5Kato Yesus ko sia', “Oi boko pokawalan, bulih cadonai kaitn ikatn?”
Timbas sia', “Cado!”
6Yesus bopandir ko sia', “Tibaranbo jalo kaitn ko sopia' kanan porohunan, lalu kaitn paca'an bulih ikatn.” Jadi, sia' monibaran jalo ko santai. Sia' bulih ikatn kotakan banya' sampai honda' kinyo totari' sia' ko dalapm porohu nantai.
7Murid inyo dikasihi Yesus nantai bopandir ko Petrus, “Nantai Tuhatn!” Pas Petrus mondinga' nantai, io mongona'an pakai'annyo obai tontainyo io co bopakaian. Lalu, io torojutn ko ara'i, bononang ko pantai. 8Lopas nian, boko murid inyo bukai mombodapan agatn porohu, kapikng monari' jalo di bolikat inyo bisi agatn ikatn. Sia' co jouh doi' pantai, kiro-kiro soratus meter mo.
9Pas sia' turutn doi' porohu, sia' moniant di pantai ado api bobaroam. Di pucu' baro api nantai ado boboropo iku' ikatn. Ongko ado roti. 10Kato Yesus ko sia', “Baba'cam boboropo iku' ikatn, ulih kaitn nantai.”
11Jadi, Simon Petrus jumpat ko porohu lalu monari' jalo nantai ko darat. Jalo nantai bisi agatn ikatn inyo bosar-bosar, soratus lima' puluh tigo iku'. Biar pan sobanya' nantai, jalo nantai kinyo birat. 12Kato Yesus ko sia', “Marabo, kito nyogo sunsukng ni'in.” (Somuo murid-Nyo tohu obai nantaiam Tuhatn Yesus. Jadi, conyiant di antaro sia' inyo borani botakutn ko Sio, “Sopo Duatn ni'in?”)
13Lopas nantai, Yesus maju monguti' roti lalu moonju'nyo ko sia', ubo nantai jam ikatn nantai. 14Nantaiam kotigo kalinyo Yesus moniant'an diri-Nyo ko boko murid-Nyo lopas Sio bobali' hidup agi'.
Yesus monyiuh Petrus monjago boko urakng inyo pocayo
(21:15-19)
15Lopas sia' jadi makatn, Yesus bopandir ko Simon Petrus, “Simon, ana' Yohanes, kolai mongasihi Aku lobih doi' sia' ni'in kata'an cadoai?”
Timbas Petrus ko Sio, “Bondar Tuhatn! Duatn tohu obai aku mongasihi Duatn. Kato Yesus ko io, kobolocam boko domba-Ku.”
16Lalu, Yesus botakutn agi', koduo kalinyo. Kato-Nyo, “Simon, ana' Yohanes, kata'an kolai mongasihi Aku ai?”
Timbas Petrus ko Sio, “Bondar Tuhatn! Duatn tohu obai aku mongasihi Duatn.”
Kato Yesus ko io, “Kobolocam boko domba-Ku.”
17Lopas nantai, Yesus botakutn agi', kotigo kalinyo. Kato-Nyo, “Simon, ana' Yohanes, kata'an kolai mongasihi Aku ai?”
Petrus mooso kotakan salu' obai Yesus botakutn nantai sampai tigo kali. Kato Petrus ko Sio, “Tuhatn, Duatn tohu boko sosuatu. Duatn tohu obai aku mongasihi Duatn!”
Kato Yesus ko io, “Kobolocam boko domba-Ku. 18Pondinga'ancam boboi' inyo Ku padahan ni'in: Timpu kolai ija' muda', kolai siku' mo mongobat punggukng. Kolai ulih bojalatn ko mono ja' kohonda' kolai. Apo timpu kolai udah tuho nononyo, kolai paca'an mouluran koduo longan kolai. Urakng bukai paca'an mongobat kolai lalu mombaba' kolai ko tompat inyo co kolai kohonda'i.” 19(Yesus momadahan nantai pakai' monunju'an caronyo Petrus paca'an mati. Agatn caro ubo nantai, Petrus nantai, paca'an momuliaan Allah.)
Lopas Yesus jadi momadahan bunyi nantai, Sio bopandir ko Petrus, “Hincapm tuyut Aku!”
Murid inyo bukai salah bopikir obai Yohanes co paca'an mati
(21:20-23)
20Pas Petrus mongilikng ko bolikat, io moniant ado murid inyo bukai tuyut sia'. Murid nantaiam murid inyo kotakan kokidah Yesus. (Timpu sia' makatn bosamo komai, murid-Nyo nantaiam murid inyo dudu' dampikng Yesus lalu botakutn, “Tuhatn, sopo kironyo inyo paca'an monyorahan Duatn ko musuh?”).#21:20: Tiat Yohanes 13:23-25.
21Pas moniant murid nantai, Petrus bopandir ko Yesus, “Tuhatn, ubo apo agatn io nian? Lapo inyo paca'an tojadi agatn io?”
22Timbas Yesus, “Jangan bopikir mongona'i roncana-Ku pakai' urakng bukai. Soandainyo, Aku honda' oca' io totap hidup sampai Aku datakng agi', nantai bukainyo urusan kolai. Apo Aku monyiuh kolai: Tuyut Aku.”
23Obai Yesus momadahan nantai, toboritoam kabar di antaro boko urakng pocayo obai murid-Nyo nantai kinyo paca'an mati. Padohal Yesus co momadahan obai murid-Nyo nantai co paca'an mati, Yesus ongkah momadahan, “Soandainyo, Aku honda' oca' io totap hidup sampai Aku datakng agi', nantai bukainyo urusan kolai.”
Yohanes monjadi'i Kabar Boi'nyo
(21:24-25)
24Murid nantaiam murid inyo momadahan mongona'i somuonyo ni'in. Ionam inyo udah monulisnyo. Kito tohu obai pomandirannyo bondar.
25Ija' ado banya' hal inyo bukai dilabuhan Yesus. Soandainyo somuo hal nantai ditulis sobuti' nyombuti', aku bopikir co paca'an cukup tompat di soluruh bumi pakai' tulisan somuo buku nantai.
Айни замон обунашуда:
Yohanes 21: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in