Kisah Boko Rasul 1
1
Kato pongantar doi' Lukas
(1:1-3)
1Kopado inyo tohormat Teofilus:
Aku udah monulis buku ko kolai. Di dalapm bukuku inyo potamo nantai,#1:1: Buku inyo potamo ia'an Buku Lukas. aku mongisahan somuonyo mongona'i Yesus, somuo hal inyo udah Sio labuhan huatan ajaran. Aku mongisahan somuonyo doi' potamo polayatan-Nyo 2-3sampai watu Yesus noi' ko sorugo. Di masa polayatan-Nyo, Sio momilih duo bolas urakng doi' boko murid-Nyo, inyo disobut boko rasul. Watu ari toahir Yesus hidup, Sio ajab sonsaro sampai mati di kayu salib. Apo, lopas nantai, Sio monunju'an boko tando inyo nyata oca' boko rasul nantai pocayo obai Sio bondar-bondar hidup. Somanah ompat puluh ari, Sio moniant'an diri-Nyo boboropo kali ko boko rasul-Nyo. Sio moonji'i boko porintah ko boko rasul-Nyo agatn kuaso Roh Allah inyo ado dalapm diri-Nyo. Sio pan mongajar sia' mongona'i Koraja'an Allah, ia'an sama'an apo caro Tuhatn momimpitn umant-Nyo sobagai Rajo.
Yesus bojanji mongiripm Roh Allah ko boko rasul-Nyo
(1:4-5)
4Timpu dalapm watu ompat puluh ari nantai, Yesus tongahan makatn bosamo agatn sia'. Sio bopandir, “Jangan botula' doi' kota Yerusalem ni'in. Bodiapm ja'am di si'itn monantian la'apo inyo udah dijanjian Bopai-Ku. Aku udah kalo momadahan ko kaitn mongona'i nantai. 5Yohanes mombaptis urakng agatn ara'i. Apo co manah agi' Aku paca'an mombaptis kaitn agatn Roh Allah.”#1:5: Sio moutus Roh Allah pakai' tinggal di dalapm sia'. Roh Allah moirikan sia', monguat'an sia' pakai' monaati kohonda' Allah, huatan monulukng sia' agatn boko caro. Kalimat ubo ni'in jam dipakai timpu Allah bojanji pakai' ‘moncurahan’ (ia'an ‘moutus’) Roh-Nyo ko umant-Nyo (Yesaya 44:3; Yehezkiel 36:25-27; 39:29; Yoel 2:28–29 huatan Zakharia 12:10).
Yesus toangkat ko sorugo
(1:6-11)
6Jadi, watu ari bukainyo agi', timpu boko rasul bokumpul bosamo agatn Yesus, sia' botakutn ko Sio, “Tuhatn, ni'innam bai watunyo Duatn paca'an mondirian agi' Koraja'an Israel?”#1:6: Boko rasul nantai bopikir Yesus paca'an mongalahan Koraja'an Roma oca' moninjakan Koraja'an Israel. Ubonyo, sia' ija' bolupm mongoroti obai Yesus momimpitn Koraja'an Allah, ia'an boko urakng inyo pocayo ko Sio huatan hidup di babah kuaso-Nyo.
7Sio bopandir, “Allah Bopai udah monotap'an watunyo. Nantai hak Sio siku'. Kaitn co pontikng mongotohu'i watunyo. 8Apo Roh Allah paca'an tinggal di dalapm kaitn. Watu nantai, kaitn paca'an monorima' kuaso. Kaitn paca'an momboritoan mongona'i Aku ko boko urakng bukai di kota Yerusalem huatan di sotiap doerah Yudea. Kaitn paca'an momboritoan mongona'i Aku jam di sotiap doerah Samaria. Kaitn paca'an momboritoan mongona'i Aku sampai ko boko tompat inyo palikng jouh di soluruh dunia.”#1:8: Ayat ni'in kosimpulan doi' boko Buku Kisah Boko Rasul: Yerusalem (1:1–6:7); Yudea, Samaria huatan boko doerah bukai, torus sampai ko Roma (6:8–28:31)
9Lopas jadi Sio bopandir ubo nantai, Sio toangkat ko sorugo. Sia' moniant Sio sampai awatn monutupi-Nyo. Ongko sia' co dapat moniant Sio agi'. 10Apo, watu sia' ija' moniant ko langit tongahan Sio noi', colanant ado duo urakng bojubah putih.#1:10: Bojubah putih monjolasan obai urakng nantai boasal doi' sorugo. Koduo urakng nantai bodiritn di totai sia'. 11Koduo urakng nantai bopandir, “Oi boko urakng doi' doerah Galilea. Jangan kaitn ija' bodiritn di si'itn, monongadah ko langit. Kaitn udah moniant Yesus noi' ko sorugo doi' antaro kaitn. Nononyo, Sio paca'an datakng agi' agatn caro inyo samo ubo nantaiam.”
Boko rasul bodoa kapikng moingu'i Roh Allah datakng
(1:12-14)
12Lopas nian boko rasul nantai bobali' pulakng ko Yerusalem doi' bukit Jaitun, kiro-kiro sopal jouhnyo. 13Kali sampai di kota, sia' botula' ko rumah tompat sia' monoluntukng. Di rumah nantai sia' noi' ko kamar sia' di loteng.#1:13: Ruakan ni'in mungkitn ruakan inyo samo tompat Yesus ongko boko murid-Nyo morayaan Paskah (Lukas 22:12) huatan tompat Yesus moniant'an diri ko boboropo urakng di antaro sia' pado Ari Paskah (Lukas 24:33, Yohanes 20:19, 26). Boko rasul nantai: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (ana' Alfeus), Simon (urakng Zelot),#1:13: Zelot = Kolompok urakng Yahudi inyo bojuakng oca' lopas doi' kokuasa'an Romawi. ongko Yudas (ana' Yakobus).#1:13: Yakobus (Bopai Yudas) bukainyo doi' koduo rasul inyo bodamo Yakobus.
14Bosamo agatn sia' ado jam boboropo botina'#1:14: Teks Yunani kinyo monjolasan sopo boko botina' ni'in. Mungkitn sia' nantai boko botina' inyo monyoroto'i Yesus huatan mondukukng kouakan-Nyo (Lukas 8:2-3) DAMO sia' nantai boko botina' dalapm kolompok boko urakng pocayo socaro umum. tomansu' Maria (indai Yesus), ongko boko somadikan Yesus.#1:14: Kobanya'an ahli Buku Suci (TL, TB huatan BIS pan) monyangko obai inyo dimasud agatn ‘boko somadikan’ di si'itn boko poana'an Maria ongko Yusuf inyo lahir lopas Yesus (tiat Matius 13:55 ongko Markus 6:3). Apo boboropo ahli monyangko inyo dimasud agatn ‘boko somadikan’ nantai boko sana'-tuho Yesus. Sia' somuo opat bokumpul pakai' bodoa. Sia' hala bodoa ongko sohati sopikiran.
Matius dipilih pakai' ponggonti Yudas
(1:15-26)
15Lopas nantai boboropo ari, ado kiro-kiro soratus duo puluh urakng inyo pocayo ko Yesus bokumpul watu nantai. Petrus bodiritn di antaro sia' somuo. Katonyo, 16-20“Boko somadikanku, sobolupmnyo Yudas tomansu' dalapm kolompok koi boko rasul. Io molayati bonsamoan agatn koi. Apo io jam mombori'tohu caro oca' Yesus ulih ditangkap.”
(Yudas mondapat'an duit pakai' molabuhan kojahatan nantai. Agatn duit nantai io momboli sobidakng tanah. Di pucu' tanah nantai io jatu' tokosungkapm, porutnyo tobolah sampai somuo isinyo koluar, ongko io mati.#1:16-20: Matius 27:5 mongatoan obai Yudas monggantukng dirinyo. Di boko ayat ni'in Lukas mongatoan Yudas jatu' doi' tompat inyo tinggi. Ado komungkitan obai tali inyo dipakainyo pakai' monggantukng diri putus huatan bukakngnyo moninggakng boko batu di babah, damo mungkitn bukakngnyo moninggakng sosuatu inyo lancip timpu jatu'. Somuo urakng di kota Yerusalem udah mondinga' mongona'i nantai. Jadi dalapm baso sia' tanah nantai disobut ‘Hakal-Dama’, rotinyo “Tanah Darah”.)
Kato Petrus, “Apo, joman komai kojadian nantai udah totulis dalapm Buku Suci. Kojadian nantai tojadi sosuai agatn tulisan nantai. Joman komai Roh Allah momimpitn Rajo Daud monulis mongona'i hukupan inyo cucu' pakai' Yudas di Buku Mazmur. Bunyi ni'in tulisannyo:
‘Biaram rumah io monjadi puakng;
Biaram co nyiant urakng inyo bodiapm di su'utn.’#1:16-20: Doi' Mazmur 69:26
Kato ni'in pan ditulis:
‘Biaram kodudu'an urakng nantai dikuti' ulih urakng bukai.’#1:16-20: Doi' Mazmur 109:8
21-22Obai nantai am, kito pontikng momilih siku' urakng agi' pakai' ponggonti Yudas. Io paca'an bosamo koi boko rasul pakai' momboritoan obai Tuhatn Yesus udah bobali' hidup doi' komatian. Lobih boi' kito momilih urakng nantai doi' antaro kito inyo ado di si'itn. Apo, io pan gola' hala bosamo agatn koi watu Yesus ado di antaro koi. Io gola' bosamo agatn koi mula'i doi' watu Yohanes mombaptis Yesus sampai Yesus noi' ko sorugo doi' antaro koi.”
23Jadi, boko urakng pocayo inyo bokumpul di santai mousulan duo iku' urakng pakai' ponggonti Yudas. Duo iku' urakng nantai bodamo Matias ongko Yusuf. (Yusuf pan dikonal agatn duo damo bukai, ia'an Barsabas ongko Yustus). 24-25Lopas nian sia' somuo bodoa. Kato sia', “Tuhatn, Duatn mongotohu'i isi hati sotiap urakng. Yudas udah moninggalan tugasnyo sobagai rasul. Io udah mati, huatan monorima' hukupan inyo cucu'.#1:24-25: Mungkitn ni'in rotinyo noraka damo tompat ‘sheol/hades’ di mono boko urakng jahat monantian hukupan inyo toahir. Jadi, tunju'ancam ko koi sopo paca'an monggonti'i io. Ado duo iku' urakng ni'in. Inyo mono dipilih Duatn pakai' molayati sobagai rasul monggonti'i Yudas.”
26Lopas nian sia' botonung.#1:26: Agatn caro nantai sia' mongotohu'i sopo inyo dipilih Tuhatn di antaro koduo urakng nantai.#1:26: Caro urakng Yahudi botonung ia'an monulisan boko damo, boko tando ko boko batu, molota'an boko batu nantai dalapm cangkir lopas nian mongguyakng cangkir nantai sampai sobuti' batu koluar. Urakng, inyo damonyo ado di batu inyo koluar nantai inyo dipilih. Sia' pocayo obai Allah mongohonda'i koputusan ni'in (Amsal 16:33). Lopas jadi poristiwa inyo disobutan di si'itn, caro ni'in kinyo dipadahan agi' di Porjanjian Boharu, mungkitn obai lopas jadi Pentakosta, Roh Allah moirikan sia'. Sobagai contoh, tiat Kisah 11:12, 27-28, 13:1-2, 15:28, 32, 21:10-11. Sokalinyo damo Matias am inyo topilih dalapm potonungan nantai. Jadi, io diangkat monjadi rasul bonsamo kosobolas rasul inyo bukai.
Айни замон обунашуда:
Kisah Boko Rasul 1: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in