Yohanes 20
20
Yesus bobali' hidup
(20:1-10)
(Mat. 28:1-10; Mrk. 16:1-8; Luk. 24:1-12)
1Watu ari Minggu, sunsukng pukau, ari pan ija' potakng, Maria Magdalena botula' ko pasaran Yesus. Io moniant batu ponutup udah togeser doi' tompat mansu' gua pasaran nantai. 2Jadi, io monggidi'an monggoyapi Simon Petrus huatan siku' urakng murid inyo bukai inyo dikasihi Yesus. Kato Maria ko sia' duo nantai, “Bangkai Tuhatn udah dikuti' doi' pasaran! Koi co tohu di mono Sio dilota'an.”
3Jadi, Petrus huatan murid inyo bukai nantai lansukng botula' ko pasaran. 4Sia' duo monggidi'an, apo murid inyo bukainyo nantai bonggidi'an toning bondar daripado Petrus ia'an io lobih doholu datakng di pasaran. 5Murid inyo bukai nantai monukau ko dalapm pasaran. Io moniant ado koitn di santai, koitn inyo dipakai momutut bangkai Yesus. Apo, io co mansu' ko dalapm. 6Lalu, Simon Petrus mombodapan. Pas io datakng, io lansukng mansu' ko dalapm pasaran nantai. Io pan moniant koitn inyo dipakai momutut bangkai Yesus di santai. 7Apo koitn inyo dipakai pongobat kangkapm-Nyo, kinyo tolota' bosamo agatn koitn inyo dipakai pomutut bukakng-Nyo. Koitn pakai' kopala' nantai tolipat di tompat bukai. 8Lopas nantai, murid inyo bukai nantai mansu' jam, ia'an nantai murid inyo lobih doholu datakng ko pasaran. Io moniant lalu pocayo obai Yesus bondar-bondar hidup agi'. 9(Obai somanah nantai, sia' bolupm mongoroti pomandiran inyo totulis dalapm Buku Suci obai Sio gola' hidup agi' doi' komatian.) 10Lalu, boko murid Yesus nantai pulakam.
Yesus moniant'an bukakng-Nyo ko Maria Magdalena
(20:11-18)
11Apo Maria Magdalena ija' bodiritn di pohadapan pasaran Yesus kapikng monangis. Watu io monangis, io monukau ko dalapm pasaran nantai. 12Kali-labuh, io moniant duo iku' molekat inyo bopakaian putih. Koduo molekat nantai dudu' di tompat bangkai Yesus dilota'an tontainyo. Siku' molekat dudu' di buai kopala' huatan inyo bukai di buai kaki. 13Kato boko molekat nantai, “Mapo kolai monangis?”
Timbas Maria, “Bangkai Tuhatnku udah dikuti'. Cuku tohu di mono Sio dilota'an.”
14Lopas jadi io bopandir ubo nantai, io mongilikng ko bolikat io tiat ado urakng inyo bodiritn di santai. Nantaiam Yesus, apo Maria kinyo tohu obai nantai Yesus. 15Kato Yesus ko io, “Mapo kolai monangis? Kolai monggoyapi sopo?”
Maria pikir urakng nantai urakng inyo bokorojo di kobutn nantai. Jadi, Maria bopandir, “Bopai, aman Duatn momindahan bangkai-Nyo doi' si'itn, tulukng padahan ko aku di mono Kolai molota'an-Nyo oca' aku monguti'-Nyo, mombaba'-Nyo ko si'itan.”
16Lalu, kato Yesus ko io, “Maria!”
Maria mongilikng, lalu sadar nantai Yesus. Katonyo, “Rabuni!” (Dalapm baso Ibrani rotinyo “Guru”.)
17Kato Yesus ko io, “Jangan moncanggapm Aku obai Aku bolupm noi' ko Bopai. Apo, botula'cam ko boko somadikan-Ku. Padahan ko sia' obai ni'in Aku paca'an botula' ko Bopai-Ku, Sio pan Bopai kaitn jam. Sio nam Allah-Ku huatan Allah kaitn jam.” 18Jadi Maria Magdalena mondataki boko murid Yesus. Io momadahannyo ko sia' obai io udah moniant Tuhatn Yesus bobali' hidup. Io pan momadahan ko sia' obai Yesus mo inyo momandiran boko hal nantai ko io.
Yesus moniant'an diri Sio ko boko murid-Nyo
(20:19-23)
(Luk. 24:36-39, 47-49)
19Pas ari udah malapam watu ari Minggu nantai, boko murid Yesus bokumpul di sobuah rumah. Sia' monyongkal boko lawakngnyo obai sia' gola' agatn boko pomimpitn urakng Yahudi. Sopongirap, Yesus datakng, bodiritn di tongah-tongah sia'. Kato-Nyo, “Sonang-asau pakai' kaitn!” 20Lopas jadi Sio bopandir bunyi nantai, Sio moniant'an bokas lukonyo ko sia' di jari huatan porut-Nyo. Watu sia' moniant Tuhatn, sia' sonang bondar. 21Sokali agi', Yesus bopandir ko sia', “Sonang-asau pakai' kaitn!” Samo sama'an Bopai-Ku moutus Aku, ubo nian jam Aku moutus kaitn.
22Lopas jadi Yesus bopandir bunyi nantai, Sio mohombusan kosih-Nyo ko sia' lalu bopandir, “Torima' cam Roh Allah! 23Aman kaitn moamputi dosa urakng bukai, jadi Allah moamputinyo. Aman kaitn co moamputi dosa urakng bukai, jadi Allah co moamputinyo.”
Yesus moniant'an diri ko rasul Tomas
(20:24-29)
24Ado salah siku' doi' koduo bolas rasul Yesus. Damonyo Tomas. Io inyo disobut “Si Ana' Kombar”. Watu Yesus datakng ko santai, Tomas kinyo bosamo agatn sia'. 25Jadi, boko murid inyo bukainyo bopandir ko io, “Koi udah moniant Tuhatn! Sio udah hidup agi'am!”
Apo Tomas bopandir, “Aku co paca'an pocayo nantai sobolupm aku moniant bokas luko paku di koduo jari-Nyo, huatan molota'an tunju'ku ko bokas luko boko paku bosar nantai, ongko molota'an tunju'ku ko bokas luko tumba' di porut-Nyo.”
26Sominggu lopas nantai, boko murid Yesus bokumpul agi' di rumah nantai. Kali nintai, ado Tomas bosamo agatn sia'. Sia' monyongkal boko lawakngnyo samo sama'an komai jam. Kali labuh, Yesus datakng agi', bodiritn di tongah-tongah sia'. Kato-Nyo, “Sonang-asau pakai' kaitn!” 27Lalu, Sio bopandir ko Tomas, “Tiatbo jari-Ku. Gahapan jari kolai di si'itn. Uluran longan kolai, huatan gahapam di porut-Ku. Jangan gangga'-gua'an agi' apo pocayocam!”
28Kato Tomas ko Sio, “Duatn nam Tuhatn huatan Allah-ku!”
29Kato Yesus ko io, “Kolai pocayo obai kolai udah moniant Aku. Apo diborokati sia' inyo pocayo biar pan sia' co moniant Aku.”
Tujuan Yohanes monulis buku ni'in
(20:30-31)
30Yesus molabuhan banya' mujisat inyo bukai di pohadapan boko murid-Nyo. Apo somuo mujisat nantai co ditulis di dalapm buku ni'in. 31Apo somuo hal inyo ado di si'itn, ditulis oca' kaitn pocayo obai Yesus nam Rajo Inyo Dijanjian Allah, Rajo inyo disobut “Kristus”. Huatan oca' kaitn pocayo obai Yesus nam Ana' Allah. Agatn pocayo nantai, kaitn mondapat'an hidup bosatu agatn Sio.
Айни замон обунашуда:
Yohanes 20: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in