Mattheos 26
26
1Unkan Jesus wicoie kin dena owasin ihunnikiya, hehan waonspewicakiye cin hewicakiya;
2Anpetu nom iyohakam woacakśin kin hehantu kta sdonyayapi; hehan Wicaśta Cinhintku kin icipaweḣ okatanpi kta e wicaqupi kta.
3Hehan wośnapi kagapi, wowapi kagapi qa oyate kin en wicaśta tankapi kin hena koya mniciyapi, wośnapi kagapi itancan, Kaiaphas eciyapi, he ti kin en.
4Qa Jesus token naḣmana icupi qa ktepi kta he aiapi.
5Tuka wotapi anpetu kin hena icunhan śni, okinni oyate kin owodutaton kta, eyapi.
6Unkan Jesus Bethani en Simon lepros ecece ciqon he ti kin ohna yanka.
7Hehan winoḣinca wan inyan opiye wan wihdi waśtemna teḣika ojudan he yuha eh hi, qa iye iyotankehan yanka icunhan, pa kin en okaśtan.
8Tuka waonspewicakiye cin hena he wanyakapi qehan śihdapi, qa heyapi; Tokeca de awihnuniyapi he.
9Wihdi waśtemna kin de ota iyopeyapi kta, qa waḣpanica wicaqupi kta iyececa tuka ce.
10Jesus he okaḣnige c̣a hewicakiya; Tokeca winoḣinca kin de iyokiśinyayapi he; wicoḣan waśte wan ecamicon.
11Waḣpanicapi kin ohinniyan wicaduhapi, tuka miye ohinniyan mayaduhapi śni.
12Wihdi waśtemna kin de mitancan amakaśtan kin, mahnakapi kte cin on etanhan hecon.
13Awicakehan heciciyapi; Maka kin owancaya wootanin waśte kin de tukten oyakapi hecinhan, winoḣinca kin de taku econ kin he wowitan on oyakapi ece e kta.
14Hehan akenonpapi kin etanhan wanji, Judas Iskariot eciyapi, he wośnapi kagapi kin ekta wicai;
15Qa heya; He cic̣upi kinhan taku mayaqupi kta he. Unkan mazaska wikcemna yamni qupi kta, keciyapi.
16Unkan hetanhan token hnayan wicaqu kta e he akita.
17Aguyapi on napoḣyapi codan anpetu tokaheya, hehan waonspewicakiye cin Jesus en hipi, qa heciyapi; Tukten woacakśin kin yate kta wiyeya unnicihnakapi kta yacin he.
18Unkan heya; Otonwe kin en ya po, qa wicaśta kae heciya po; Wanna iyemicihantu, woacakśin kin yati en waonspewicawakiye cin om ecamon kta ce, Waonspekiye cin heya ce.
19Unkan waonspewicakiye cin Jesus econ wicaśi kin ecen econpi, qa woacakśin kin wiyeya ehnakapi.
20Wanna ḣtayetu hehan akenonpapi kin om en iyotanka.
21Qa wotapi icunhan heya; Niyepi etanhan wanji wiyopemayayapi kta, awicakehan eciciyapi ce.
22Unkan iyokiśicapi ḣinca, qa otoiyohi heciyapi; itancan, he miye he.
23Unkan waayupte c̣a heya; Tuwe wakśica ohna kici nape yewaye cinhan he wiyopemaye te cin ee.
24Wowapi en kagapi qon he iyecen, Wicaśta Cinhintku kin ye kta; tuka wicaśta kin Wicaśta Cinhintku kin wiyopeye cinhan he woteḣi kiciyanke kta; wicaśta kin he tohinni tonpi śni unkanś waśte kta tuka.
25Unkan Judas wiyopeye kte cin he ayupte c̣a; Itancan, he miye he, eya. Unkan, Niye heha ce, eciya.
26Unkan wotapi icunhan Jesus aguyapi icu, qa yawaśte, qa yuśpaśpa, qa waonspewicakiye cin wicaqu, qa heya; Icupi qa yuta po; mitancan kin he dee.
27Qa wiyatke kin ehdaku, qa wopida eye c̣a wicaqu, qa heya; Owasin etanhan yatkan po.
28Mawe kin he dee, wicotakuye teca kin en, wicota on papsonpi, woaḣtani kajuju kta heon.
29Tuka heciciyapi, Detanhan hastanhanka iyuwi waskuyeca kin etanhan icimana mdatke kte śni, Ate tokiconze kin en anpetu wan teca unyatkanpi kte cin hehanyan.
30Unkan odowan wan ahiyayapi hehan tankan iyayapi, Oliwe paha kin he ekta.
31Hehan Jesus hewicakiya; Hanyetu kin de niyepi owasin eḣpemayayapi kta. Kaken wowapi en kagapi; Waawanhdake kin he awape kta, unkan hetanhan taḣinca wanunyanpi optaye kin enanakiya iyayapi kta.
32Tuka ake wakini kinhan Galile ekta nitokam mde kta.
33Hehan Inyan ayupte c̣a heciya; Owasin eḣpeniyanpi eśta, miye tohinni eḣpeciye kte śni.
34Jesus heciya; Hanyetu kin de anpaohotonna hoton śni itokam yamni anamayakiḣbe kta, awicakehan eciciya.
35Inyan heciya; Nici maṭa eśta anaciḣbe kte śni. Waonspewicakiye cin iyuḣpa nakun iyecen eyapi.
36Hehan Jesus waonspewicakiye cin om can wojupi wan Gethsemene eciyapi kin he en i, qa hewicakiya; Den iyotanka po, ito kakiya cekiya mde kta.
37Unkan Inyan qa Zebedee cinhintku kin napin iwicacu, qa iyokiśica hinhda qa nina yuśaka.
38Hehan hewicakiya; Minagi iyokiśice ḣinca, mate kta iyececa; den kiktahan mici yukan po.
39Unkan hetanhan kitan ecinyan iyoopte iyaye c̣a makata eḣpeic̣iya, cekiye c̣a heya; Ate, okihipica kinhan, wiyatke kin de tokan imiciyaye kta; tuka miye wacin kin hee śni, niye token yacin kin hee ecetu kte.
40Unkan waonspewicakiye cin iśtinma hiyeya en wicahdi, qa Inyan heciya; Tokeca wihiyayedan oape wanji kiktahan mici yaunpi kta oyakihipi śni he.
41Kiktahan unpi qa cekiya po, okinni taku wawiyutanyan un kin en idadapi nun ce. Wicanagi kin he wicada, tuka wicaceḣpi kin waśake śni.
42Ake inonpa ekta iyaye c̣a cekiye c̣a heya; Ate, wiyatke kin de mdatke śni tokan imiciyaye kta okihipica śni kinhan, nitawacin ecen econpi nunwe.
43Hehan ake en wicahdi, qa iśtinma hiyeya wanwicahdaka; iśta ḣbapi ḣinca nakaeś.
44Unkan eḣpewicaye c̣a ake iyaye c̣a iyamni cekiya, oie un qon hena ake ohna ecen eya.
45Hehan waonspewicakiye cin en wicahdi qa hewicakiya; Wanna niśtinmapi qa ozinic̣iyapi he; iho, wanna iyehantu, qa Wicaśta Cinhintku kin waḣtanipi sa napepi kin en wicaqupi.
46Najin po, unyanpi kta; iho, tuwe wiyopemaye cin he kiyedan u ce.
47Unkan iahan icunhan, iho, Judas, akenonpapi kin wanji ee, he hi, qa wicota wośnapi kagapi qa oyate kin en wicaśta tankinyanyanpi etanhan, mazasagye cansagye ko yuha kici hipi.
48Unkan tuwe wiyopeye cin he iwaktawicaye c̣a heya; Tuwe i iwaputake cinhan hee kta; sutaya yuza po.
49Unkan katinyan Jesus en hi qa, Iho, Itancan, eye c̣a i iputaka.
50Unkan Jesus heciya; Kicuwa, taku on yahi he. Hehan en hipi qa Jesus nape ahnakapi qa yuzapi.
51Unkan, iho, Jesus kici unpi wanji nape hdukatin, qa mazasagye ehdaku, qa on, wośnapi kagapi itancan taokiye wanji ape c̣a noge kaśpa.
52Hehan Jesus heciya; Mazasagye nitawa ojuha en iyekiya wo; tona mazasagye ehdakupi kin owasin mazasagye kin on ṭapi kta.
53Nakaha Ate cewakiya owakihi śni kecanni he; qa hinnakaha maḣpiya ohnihde wicobe akenonpa sanpa maqu kta tuka.
54Tuka hecetu kinhan, wowapi en kagapi, he decetu kta eyapi qon he token yuecetupi kta he.
55Wihiyayedan oape kin he en Jesus oyate kin hewicakiya; Tokeca wamanon sa iyecen, mazasagye cansagye ko hduha takpe mayahipi he; anpetu otoiyohi tipi wakan kin ohna waonspeciciyapi manka, tuka mayaduzapi śni.
56Tuka dena owasin econpi, wicaśta wokcan taku owapi qon he yuecetupi kta heon. Hehan waonspewicakiye cin owasin eḣpeyapi qa najicapi.
57Unkan tona Jesus yuzapi kin hena Kaiaphas wośnapi kagapi itancan kin ekta ayapi, wowapi kagapi wicaḣincapi ko mniciyapi kin en.
58Tuka Inyan itehan ihakam u, wośnapi kagapi itancan ti kin hehanyan, qa mahen ye c̣a ookiyewicayapi kin om iyotanka, owihanke kte cin he wanyake kta.
59Unkan wośnapi kagapi qa wicaḣincapi kin, qa omniciye ocowasin, woitonśni wootanin oyakapi Jesus on akitapi, ktepi kte cin heon:
60Tuka takudan iyeyapi śni; woitonśni woyakapi ota hipi, tuka takudan iyeyapi śni. Unhanketa woitonśni oyakapi nom hipi;
61Qa heyapi; Wicaśta kin de, Tipi wakan Wakantanka tawa kin he mdujuju, qa anpetu yamni kinhan ake piya wakage kta owakihi ce, eya ce.
62Hehan wośnapi kagapi itancan kin najin hiyaye c̣a heciya; Dena taku iyanionpapi kin takudan adupte śni he.
63Tuka Jesus inina yanka. Unkan wośnapi kagapi itancan kin heciya; Wakantanka ni un kin on wacajeciciyate, Messiya Wakantanka Cinhintku kin he niye hecinhan, unkokiyaka miye.
64Unkan Jesus heciya; Niye ecen eha; tuka nakun heciciyapi; Tokata ekta Wicaśta Cinhintku kin wowaśake etapa eciyatanhan iyotanka qa maḣpiya śapa akan u wandakapi kta.
65Hehan wośnapi kagapi itancan kin śina hduḣdeḣdece c̣a heya; Taku śica eya; taku on sanpa woyakapi unkakitapi kta he; iho, wanna śicaya ie cin he nayaḣonpi:
66Token idukcanpi he. Unkan ayuptapi qa, He ṭe kta iyececa ce, eyapi.
67Hehan ite atagośapi qa nape on apapi; qa hunḣ kapsinpsintapi;
68Qa heyapi; Messiya he niye, tuwe anipe cin he ito unkokiyaka po.
69Inyan tankan tipi kin ohna iyotankehan yanka; unkan wikośka wan en hi qa heciya; Qa niś nakun Jesus Galile etanhan kin he kici yaun qon.
70Tuka iye owasin wicitokam anakiḣbe c̣a heya; Taku ehe cin he sdonwaye śni.
71Unkan ohanzi hdepi kin ekta tankan iyaya, hehan wanji tokeca wanyake c̣a tona en unpi kin hewicakiya; De nakun Jesus Nazareth etanhan kin he kici un qon.
72Unkan akeś anakiḣbe c̣a, Taku wakan namaḣon, wicaśta kin de sdonwaye śni ce, eya.
73Hehan ake iecadan tona en najinpi kin hena hipi, qa Inyan heciyapi; Awicakehan ewicatanhan yaun; iyae cin he oniyaka ece.
74Hehan iapi śica ota eye c̣a, Taku wakan namaḣon, wicaśta kin he ecaca sdonwaye śni ce, eya. Unkan ecahankeya anpaohotonna kin hoton.
75Hehan Inyan, Jesus taku eciye ciqon, Anpaohotonna hoton śni kin itokam yamni anamayakiḣbe kta ce, eye cin he kiksuya. Unkan tankan iyaye c̣a nina ceya.
Айни замон обунашуда:
Mattheos 26: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.