Mattheos 27
27
1Unkan hanḣanna ḣinca wośnapi kagapi kin owasin qa oyate kin en wicaḣincapi kin hena koya, Jesus token ktepi kta e he aiapi.
2Unkan kaśkapi hehan ayapi, qa Pontios Pilate wicaśta itancan kin he kaipi.
3Unkan Judas wiyopeye cin he wanna yacopi wanyaka, hehan iyopeic̣iye c̣a, mazaska wikcemna yamni kin, wośnapi kagapi wicaḣincapi ko ake wcakahi;
4Qa heya; Wawaḣtani, wicawe taku iyaonpepica śni kin wiyopewaya ce. Unkan heyapi; He etanhan unkitokecapi śni; he niś niye.
5Unkan mazaska kin tipi wakan kin en eḣpeye ca kihda; qa hetanhan iyaye c̣a poskin ic̣ikte.
6Unkan wośnapi kagapi kin mazaska kin hena icupi, qa heyapi; Mazaska opiye kin en unkohnakapi kta iyecece śni, wicawe iyopeyapi kin dena ee, heon etanhan.
7Hecen wiyukcanpi qa hena on wakśica kage cin tamaga he opetonpi; ohna wicaśta tokeca wicaḣapi kta.
8Heon etanhan maga kin he, Wicawe maga, eciyapi, anpetu kin dehanyan.
9Hehan Jeramiya wicaśta wokcan taku eye ciqon yuecetupi; he kaken eya; Unkan mazaska wikcemna yamni, tuwe iyopeyapi qon, Israel cincapi kin hecen iyacinpi qon, hena icupi,
10Qa wakśica kage cin tamaga kin iyopeyapi, Itancan kin econmaśi iyececa.
11Unkan Jesus wicaśta itancan kin itokam inajin: Qa wicaśta itancan kin wiwange c̣a heciya; Juda wicaśtayatapi kin he niye he. Unkan; Niś heha ce, Jesus eya.
12Unkan wośnapi kagapi wicaḣincapi ko taku iyaonpapi, tuka takudan ayupte śni.
13Hehan Pilate heciya; Dena taku iyanionpapi kin nayaḣon śni he.
14Tuka oie wanjidan eśta ayupte śni, hecen wicaśta itancan kin nina yuśinyaya.
15Wotapi kin de iyehantu eca wicaśta itancan kin wicakaśkapi wanji kiyuśka ece, tukte wanji oyate kin kicapi.
16Unkan he ehan wanji tanyan śdonyapi, Barabbas eciyapi, he kaśka hnakapi.
17Hecen en mniciyapi hehan Pilate hewicakiya; Unma tukte eiciyuśkapi kta yacinpi he, Barabbas qa iś Jesus nakun Messiya eciyapi.
18Winawizipi on he iye en kahipi e sdonya.
19Unkan woyaco oiyotanke kin akan kiyotanka hehan tawicu kin tuwe en uśi, qa heciya; Wicaśta owotanna kin he takudan ecakicon śni we, on anpetu kin de wiwahamna en nina mayuśinyaya ce.
20Tuka wośnapi kagapi wicaḣincapi ko oyate kin wahokonwicakiyapi, Barabbas kicapi kta, qa Jesus ihangyapi kta.
21Hehan wicaśta itancan kin ake wiwicawange c̣a hewicakiya; Unma tukte ciciyuśkapi kta yacinpi he. Unkan, Barabbas, eyapi.
22Pilate hewicakiya; Jesus nakun Messiya eciyapi kin he token ecamon kta he. Unkan owasin; Icipaweḣ okatanpi kta, eciyapi.
23Unkan wicaśta itancan kin heya; Tokeca, taku śica econ kin tukte e he. Tuka nina panpi qa; Icipaweḣ okatanpi kta, eyapi.
24Hecen Pilate takudan okihi śni, qa nina owodutaton icaga he wanyaka, hehan mini icu, qa wicota wicitokam nape hdujaja, qa heya; Wicaśta owotanna kin de we kin miye en amaupi kte śni; niye ito wanyaka po.
25Hehan oyate kin iyuḣpa ayuptapi qa heyapi; He we kin unkiyepi qa unkicincapi koya en unkaupi nunwe.
26Unkan hehan Barabbas wicakiciyuśka; qa Jesus kapsinpsinta hehan icipaweḣ okatanpi kta e wicaqu.
27Hehan wicaśta itancan taakicita kin Jesus ti mahen ayapi, qa wicobe ocowasin en mniciyapi.
28Qa iye tawokoyake kiyuśdokapi, qa śina duta wan inkiyapi.
29Qa wapepeka kazontapi on wateśdake kagapi qa teśdagkicatonpi, qa cedi wan nape etapa kin on yuskiyapi; qa itokam canpeśka makehde inajinpi, qa iḣaḣapi, qa heyapi; Iho, Juda Wicaśtayatapi kin.
30Qa atagośapi, qa cedi kin icupi qa pa en apapi.
31Unkan hecen iḣaḣapi hehan śina kin ekiciyakupi qa iye tawokoyake qon kic̣unkiyapi, qa icipaweḣ okatanpi kta ayapi.
32Tankan ayapi hehan wicaśta wan Kurene etanhan, Simon eciyapi, he wanyakapi; unkan he cansusbeca kin kicic̣inkiyapi.
33Unkan makoce wan Golgotha eciyapi, he wicapahu makoce eyapi kin he kapi, he ekta ipi;
34Hehan miniśa pizi icahiyapi kin hetanhan yatkekiyapi; tuka uta hehan yatke kta wicada śni.
35Unkan hen icipaweḣ okatanpi, oeconna econpi qa tawokoyake kicipamnipi. Hecen wicaśta wokcan oie qon yuecetupi; Mitawokoyake kicipamnipi qa onḣdoḣda mitawa on oceonua econpi ce.
36Unkan hen iyotankapi qa awanyakapi:
37Qa wiyaonpapi kin de owapi qa pa iwankam ehnakapi; JESUS, JUDA WICAŚTAYATAPI KIN HE DEE.
38Nakun wicaśta wamanon sa nom kici icipaweḣ owicakatanpi, unma etapa eciyatanhan, qa unma is catka tanhan econpi.
39Unkan tona en hiyayapi kin hena aiapi, qa apomnamnapi;
40Qaheyapi; Tipi wakanihangyaye c̣a anpetu yamni ake piya yakage kte ciqon, niic̣iya wo. Wakantanka Cinhintku kin he niye hecinhan, cansusbeca kin etanhan kun ku wo.
41He iyececa, wośnapi kagapi kin iḣaḣapi, qa wowapi kagapi wicaḣincapi ko om heyapi;
42Wicaśta tokeca niwicaya ece, iye niic̣iye kta okihi śni; Israel wicaśtayatapi tawapi hecinhan, iho, wanna cansusbeca kin etanhan kun ku kta, kinhan wicaundapi kta.
43Wakantanka wacinkiye ciqon; tawa kta hecinhan wanna ehdaku kta; Wakantanka Cinhintku kin he miye ce, eye ciqon.
44Nakun wicaśta wamanon sa, kici icipaweḣ owicakatanpi kin hena iś eya iyecen i en hiyeyapi.
45Unkan wihiyayedan oape śakpe hetanhan napcinwanka ape cin hehanyan makoce kin owancaya otpaza.
46Unkan napcinwanka apa hehantu ecetu, Jesus howaye c̣a hotankakiya heya; Eli, Eli, lama sabakthani; Wakantanka mitawa, Wakantanka mitawa, tokeca eḣpemayaya he, eyapi kin hee.
47Unkan en najinpi kin he naḣonpi qehan, apa heyapi; Elias kipan ce.
48Unkan wanji etanhan inyang ye c̣a mini iyuḣepe wan icu, qa miniakuya en oputkan, cedi wan icape c̣a yatkekiya.
49Unmapi kin heyapi; Hinnahanka, Elias nikiya hi kta hecinhan ito wanunyakapi kta.
50Tuka Jesus ake hotankakiya hotanin qehan, taniya kin hiyuya.
51Unkan iho, tipi, wakan cokaya ozanpi kin he okiyuḣdecapi, wankantanhan qa kun ihanke kin hehanyan; nakun maka kin śkanśkan qa inyan namdecapi:
52Qa wicaḣapi kin yuḣdokapi, qa wicaśta waśte iśtinmapi kin hena ota hiyupi;
53Qa wicahnakapi kin etanhan hninanpapi, qa otonwe wakan kin en hipi, qa wicota en taniniciyapi.
54Unkan akicita tancan qa tona om Jesus awanyake cin hena maka kin śkanśkan qa taku econpi ko wanyakapi qehan, nina yuśinyayapi, qa, Awicakehan Wakantanka Cinhintku kin he dee tuka ce, eyapi.
55Unkan winoḣinca ota hen unpi qa itehanyan wanyakapi; tona Galile etanhan upi qa okiyapi ece qon:
56Mary Magdalene he wanji ee, qa Mary Jakob qa Joses hunku, qa Zebede cineca hunkupi kin.
57Wanna ḣtayetu hehan Arimathea etanhan wicaśta wijica wan en hi, Joseph eciyapi, he nakun Jesus waonspewicakiye cin wanji ee;
58He Pilate en i, qa Jesus tancan kin kida. Hehan Pilate tancan kin he quwicaśi.
59Unkan Joseph tancan kin he icu qehan, miniḣuha ska wan opazunta;
60Qa ohna hnakapi tawa teca, imnija kin en kaḣdoke cin, he en ohnaka; qa inyan wan tanka ohna hnakapi i kin en eonpa, hehan kihda.
61Unkan ohna hnakapi kin iyotakons, Mary Magdalene qa Mary unma qon iyotankehan yukanpi.
62Unkan anpetu en ihduwiyeyapi ece kin he ihanḣanna, hehan wośnapi kagapi qa Pharisee kin hena Pilate en hipi,
63Qa heyapi; Itancan, wicahnaye sa kin de ni un qehan, Anpetu yamni hehan wakini kta ce, eya keyapi, he unkiksuyapi.
64Heon etanhan wicahnakapi kin natag wicaśi wo, anpetu yamni hehanyan; okinni waonspewicakiye cin hena en hipi qa tancan kin manon akiyahdapi kta, qa hehan, Wicate cin etanhan kini ce, oyate kin ewicakiyapi kta; hecen ehake wicahnayanpi kin he tokaheya kin isanpa tanka kta.
65Pilate hewicakiya; Akicita wicaduhapi; hdapi qa token oyakihipi sutaya nataka po.
66Hecen kihdapi qa wicahnakapi kin sutaya natakapi; inyan kin he apuspapi qa akicita en najinwicakiyapi.
Айни замон обунашуда:
Mattheos 27: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.