Mattheos 25
25
1Hehan maḣpiya wokiconze kin witanśna unpi wikcemna iyacinpi kta; petijanjan ihupa ikikcupi qa tawicu ton kte cin he itkokim iyayapi.
2Unkan zaptan ksapapi, qa zaptan witkotkokapi.
3Witkotkokapi kin hena petijanjan ihupa icupi, tuka wihdi takudan yuhapi śni.
4Tuka ksapapi kin hena cega ohna wihdi hduhapi, petijanjan ihupa iyahna.
5Unkan tawicu ton kte cin he u śni; hehanyan iyuḣpa ḣbapi qa iśtinmapi.
6Unkan hanyecokaya hehan wicaho wan tanin, Iho, tawicu ton kte cin he u ce; itkokim ya po.
7Hehan witanśna unpi kin hena owasin iyotankapi, qa petijanjan kin piyapi.
8Unkan witkotkokapi kin hena ksapapi kin hewicakiyapi; Wihdi nitawapi etanhan ongege unqu miye, petijanjan unkicisnipi kta.
9Tuka ksapapi kin waayuptapi qa hewicakiyapi; Hiya, okinni unkiye niyepi nakun iyounhipi kte śni; tuka tona wopetonpi ece kin ekta ya pe, qa epeiciton miye.
10Unkan he opeton iyayapi, hehan tawicu ton kte cin he hi; unkan tona wiyeya unpi kin hena wakankiciyuzapi kte cin en kici iyayapi; hehan tiyopa kin ecen icupi.
11Iyohakam witanśna unpi unmapi kin en hipi, qa heyapi; Itancan, Itancan, tiyopa unkiciyuḣdoka miye.
12Tuka iye waayupte c̣a; Sdonciyapi śni, awicakehan eciciyapi ce, eya.
13Heon etanhan kiktahan un po, anpetu qa wihiyayedan oape kin tukte wanji en, Wicaśta Cinhintku kin hi kte cin he sdonyayapi śni.
14He iyecen wicaśta wan makoce tokeca ekta ye kta, hehan wowidake wicayuhe cin wicakico, qa woyuha tawa kin wicakipamni.
15Unkan wanji mazaska tkeutapi tanka zaptan qu, qa wanji nom, qa wanji iś wanjidan qu; otoiyohi token okihi kta hecen wicaqu; hehan icimani iyaya.
16Unkan tuwe tkeutapi tanka zaptan icu qon he iyaye, c̣a on wopeton ece econ, qa nakun tkeutapi tanka zaptan kamna.
17Qa tuwe nom icu qon iś eya iyecen nom nakun kamna.
18Tuka tuwe wanjidan icu qon he iyaye c̣a, maka qe c̣a, yuhe cin mazaska tawa kin inaḣma.
19Unkan wanna tehan hehan wowidake unpi kin dena itancan tawapi kin hdi, qa wicakiciyawa.
20Unkan tuwe tkeutapi tanka zaptan icu qon he zaptan toktokeca koya ahi qa heya; Itancan, tkeutapi tanka zaptan mayaqu; iho, nakun tkeutapi tanka zaptan hena awakamna, eya
21Unkan yuhe cin heciya; Han, wowidake waśte qa wacinyepica; taku tonana on wacinyepica yaun, taku ota yuheciciye kta; niyuha towiyuśkin kin en opa wo.
22Hehan tuwe tkeutapi tanka nom icu qon he hi, qa heya; Itancan, tkeutapi tanka nom mayaqu; iho, nakun tkeutapi tanka nom hena awakamna.
23Itancan tawa kin heciya; Han, wowidake waśte qa wacinyepica; taku tonana on wacinyepica yaun, ito taku ota yuheciciye kta; niyuha towiyuśkin kin en opa wo.
24Hehan tuwe tkeutapi tanka wanjidan icu qon he hi, qa heya; Itancan, wicaśta niteḣika sdonwaya, tukten woyaju śni eśta etanhan wamnayaya ece, qa tukten taku eḣpeyaye śni kin hetanhan wayapahi ece.
25Qa kowakipa, heon imdamde c̣a mazaska tkeutapi tanka nitawa maka kin en nawaḣbe; iho, nitawa kin yahduha.
26Itancan tawa kin waayupte c̣a heciya; Wowidake niśice c̣a nikuja; tukten wowaju śni kin hetanhan wamnawaya ece, qa tukten taku wakada śni hetanhan wawapahi ece e sdonyaya;
27Heon etanhan mazaska mitawa wicaśta wopetonpi kin yuhewicayakiye kta iyececa tuka; hecen wahdi, qa mitawa oicage ko ewehdaku kta tuka.
28Heon tkeutapi tanka kin ekiciyaku po, qa tuwe tkeutapi tanka wikcemna yuhe cin he ito qu po.
29Tuwe taku ota yuho cin he nakun qupi ece e kta, hecen iyakicuya yuhe kta; tuka tuwe takudan yuhe śni kin hetanhan taku ton kin hee kaeś ekiciyakupi ece e kta.
30Qa wowidake wakamna śni kin he tankan otpaza kin en eḣpeya po; heciya wicaceya qa hi hdakinskinzapi yuke kta.
31Tohan Wicaśta Cinhintku kin wowitan hduha, ohnihdewicaya wakan kin owasin om u kinhan, hehan wowitan oiyotanke tawa kin en kiyotanke kta:
32Qa itokam oyate kin iyuḣpa mniciyapi kta; unkan wicayukinukan kta, waawanhdake wan taḣinca wanunyanpi, tatokadan etanhan wicapahi ece kin he iyececa.
33Qa taḣinca wanunyanpi kin hena iye etapa eciyatanhan, qa tatokadan kin iye catka eciyatanhan ewicahnake kta.
34Hehan Wicaśtayatapi kin tona etapa eciyatanhan unpi kin hena hewicakiye kta; U po, Ate eciyatanhan niyawaśtepi kin, wokiconze maka kagapi kin ehantanhan wiyeya niciyankapi kin he ito hduha po.
35Wotektewahda, unkan wo mayaqupi; imapuza, unkan wayatkemayakiyapi; wicaśta matokeca waun, unkan tin hiyumayayapi:
36Tancomakadan, unkan waamayakaḣpapi; wamayazanka, unkan onśimayadapi; makaśkapi, unkan wanyag mayahipi ece.
37Hehan wicaśta owotanna kin hena ayuptapi qa heciyapi kta; Itancan, tohinni wotekteyahda wanunniyakapi, qa wo unnic̣upi he; qa inipuza qa wayatkeunniciyapi he:
38Tohinni wicaśta tokeca yaun wanunniyakapi, qa tin hiyuunniyanpi he; qa tancodan yaun, qa wokoyake unnic̣upi he:
39Tohinni waniyazanka qa kaśka nihnakapi yaun wanunniyakapi, qa en unnihipi he.
40Unkan Wicaśtayatapi kin waayupte c̣a hewicakiye kta; Awicakehan heciciyapi; Mihunkawanji kin dena cikcistinpidan hecawicayeconpi kin he miye ecamiyeconpi ece.
41Hehan tona catka kin eciyatanhan unpi kin hewicakiye kta; Niyaśicapi kin, mitantanhan iyaya po, peta owihanke wanica ekta, wakanśica iye taokiyewicaye cin koya on kagapi qon.
42Wotektewahda, tuka wo mayaqupi śni; imapuza, tuka wayatkemayakiyapi śni:
43Wicaśta matokeca waun, tuka tin hiyumayayapi śni; tancodan waun, tuka wokoyake mayaqupi śni; wamayazanka qa kaśka mahnakapi waun, tuka onśimayadapi śni.
44Hehan ayuptapi qa heciyapi kta; Itancan, tohinni wotekteyahda, qa inipuza, qa wicaśta tokeca yaun, qa tanconikadan, qa waniyazanka, qa kaśka nihnakapi yaun wanunniyakapi, qa ounniciyapi śni he.
45Hehan awicayupte c̣a heye kta; Awicakehan heciciyapi; Dena cikcistinpidan hecawicayeconpi śni kin he miye ecamiyeconpi śni ece.
46Unkan dena owihanke wanin wokakije kin en yapi kta; tuka wicaśta owotanna kin hena owihanke wanin wieoni kin en yapi kta.
Айни замон обунашуда:
Mattheos 25: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.