Mattheos 24
24
1Unkan Jesus tipi wakan kin etanhan tankan inanpe c̣a tokan iyaya; unkan waonspewicakiye cin en hipi qa tipi wakan token kagapi kin he wanyag śipi.
2Unkan Jesus hewicakiya; Dena owasin wandakapi śni he; awicakehan heciciyapi; Dena inyan wanji inyan itakihna wanke kte śni, owasin yujujupi kta.
3Unkan Oliwe paha kin akan iyotankehan yanka, hehan waonspewicakiye cin iśnana en hipi qa heciyapi; Dena tohan ecetu kta, qa niye yahi kte c̣a maka ihanke kta, taku on sdonyapi kta, he ito unkokiyaka miye.
4Unkan Jesus waayupte c̣a hewicakiya; Ihnuhan tuwe nihnayanpi kinhan.
5Wicota mi caje on upi kta qa, Messiya he miye ce, eyapi kta; qa wicaśta ota wicahnayanpi kta.
6Unkan wicokicize qa kicizapi oyakapi kin nayaḣonpi kta; ihnuhan nihinniciyapi kinhan; hena owasin hecetu kte, tuka owihanke kin hinaḣinke śni.
7Oyate wan oyate azuwicaye kta, qa wokiconze wokiconze anatan kta; qa tuktekten wicaakiḣan qa makośikśica qa maka śkanśkan yuke kta.
8Dena owasin wicoiyokiśice tokaheya kin hee.
9Hehan wicokakije en yeniyanpi kta qa niktepi kta; qa micaje on oyate owasin śicenidapi kta.
10Unkan hehan wicaśta ota śihdapi kta, qa otoiyohi kicihnayanpi kta qa śicekicidapi kta.
11Qa wicaśta wokcan itonśni ota icagapi kta, qa wicota wicahnayanpi kta.
12Hehan wicoḣan śica ota icage kta, heon wicota waśtedake ciqon he sni aye kta.
13Tuka tuwe owihanke hehanyan najin kinhan he ni kta.
14Unkan wokiconze wotanin waśte kin de maka kin owancaya oyakapi kta, oyate owasin en wotanin un kta; qa hehan owihanke kta.
15Tohan wośice woihangye kin, Daniel wicaśta wokcan cajeyata qon he tipi wakan kin en han wandakapi kinhan; tuwe yawa kinhan okahniga nunwe;
16Hehan tona Juda makoce kin en unpi kin ḣe kin ekta napapi kta.
17Qa tuwe tipi akan un kinhan kun ku, qa taku ti mahen tanhan ehdaku kte śni.
18Qa nakun tuwe magata un kinhan, hdicu qa wokoyake ikikcu kte śni.
19Unkan tona anpetu kin hena en ihduśakapi, qa hokśiyoqopa azinwicakiyapi kin hena woteḣi yuhapi kta.
20Tuka waniyetu, qa anpetu wakan icunhan, nayajicapi kte śni e ito cekiya po.
21Hehan wokakije tanka kte, maka kagapi kin ehantanhan dehanyan taku hecece śni, qa nakun tohinni tokata ekta hecece kte śni.
22Qa anpetu kin hena yuptecedan śni kinhan, wicaśta tuwedan ni kte śni; tuka wicakahnigapi kin hena on anpetu kin hena yuptecedan kta.
23Hehan tuwe, Messiya den un ce, qa, kakiya un ce, eniciyapi eśta, wicadapi śni po.
24Messiya itonśni, qa wicaśta wokcan itonśni kin heca icagapi kta, qa wowanyake tanka wicoḣan tanka ko econpi kta, hecen okihipica unkanś wicakaḣnigapi kin hena eepi kaeś wicahnayanpi kta tuka.
25Iho, itokam hena ociciyakapi
26Heon etanhan; Iho, ḣewotahedan un ce, eniciyapi eśta, ekta yapi śni po; qa, Iho naḣmana un ce, eniciyapi eśta, wicadapi śni po.
27Wakanhdi wiyohiyanpa tanhan u, qa wiyoḣpeyata hehanyan tanin hinhda ece, Wicaśta Cinhintku kin hi kte cin he iyecece kta.
28Tukten taku ṭa wanka ec̣a, hen wamdi kiwitayapi ece e kta.
29Unkan wokakije anpetu kin hena ahankeya, anpetu wi kin aotpaza kta, qa hanyetu wi kin iyoyanpa kte śni, qa wicanhpi maḣpiya eciyatanhan hinḣpaye kta, qa maḣpiya wowaśake kin yuhuhuzapi kta.
30Unkan hehan maḣpiya en, Wicaśta Cinhintku kin wowakta tawa kin tanin kta. Hehan maka akan oyate owasin nihinciyapi kta, qa Wicaśta Cinhintku kin wowaśake qa wowitan tanka hduha, maḣpiya śapa akan u wanyakapi kta.
31Unkanmazayahotonpi tanka hotanin kin on ohnihdewicaye cin yewicaśi kta, qa hena tate uya topa eciyatanhan, tona wicakaḣnige ciqon hena wicapahi kta, maḣpiya ihanke kin etanhan unma ihanke kin ekta hehanyan.
32Wanna suken can kin etanhan wiyacinpi wan onspeic̣iciya po. Can intpa hinaḣin suta śni, qa wanna ape uya, hehan mdoketu kin wanna ikiyedan sdonyayapi ece.
33He iyecen dena owasin ecetu wandakapi kinhan, wanna ikiyedan, tiyopa kin ehantu e sdonya po.
34Awicakehan heciciyapi; Wicoicage kin de ihanke kte śni, ecen dena owasin ecetu kta.
35Maḣpiya maka ko ihanke kta, tuka mioie kin owihanke kte śni.
36Tuka anpetu kin he, qa wihiyayedan oape kin he tuwedan sdionye śni; maḣpiya ohnihde kin hena sdonyapi śni; Ate ecedan sdonya.
37Nowa taanpetu qon hena, Wicaśta Cinhintku kin hi kte cin iyecece kta.
38Minitan qon isanpa anpetu kin hena en, wotapi qa wayatkanpi, winoḣinca wicayuzapi qa wicaśta hihnawicayapi ece, Nowa wata kin en iyaye cin anpetu kin hehanyan;
39Qa iyukcanpi śni, ecen minitan aye c̣a iyuḣpaihangwicaya: iho, Wicaśta Cinhintku kin u kte cin he iyecece kta.
40Hehan wicaśta nom magata unpi kta; wanji icupi kta, qa unma kin iś okaptapi kta.
41Winoḣinca nom wiyutpan on wotpan unpi kta; wanji icupi kta, qa unma kin okaptapi kta.
42Heon etanhan waktaya un po, wihiyayedan oape tukte en Itancan nitawapi u kta sdonyayapi śni.
43Tuka de sdonya po; wicaśta tipi tawa kin wamanon sa tohan hi kta sdonya unkanś, kikta un qa tipi tawa yuḣdokapi kta iyowinwicakiye kte śni tuka.
44Heon etanhan niś eya wiyeya un po; Wicaśta Cinhintku kin wihiyayedan oape tukte wanji en hi kta, he sdonyayapi śni.
45Tuwe wowidake owotanna qa wayupika, itancan tawa tipi awanyagkiya, tohan iyehantu eca wo wicaqu ece e kta.
46Wowidake kin hecen econ ece, itancan tawa en hdi qa wanhdake cinhan, he yawaśtepi ece.
47Awicakehan heciciyapi; Taku yuhe cin owasin awanyagkiye kta.
48Tuka wowidake śice cin he cante mahen, Itancan mitawa tehan hdi śni ce, eye cinhan;
49Qa tona om wowidake un kin hena wicakaśtake c̣a, witkopi om wote c̣a wayatke cinhan;
50Anpetu wan waktaya un śni, qa wihiyayedan oape wanji iye kecin śni, he en wowidake un kin yuhe cin hdi kta;
51Qa cokaya kicakse kta, qa wanaic̣iḣmanpi kin om taku yuhekiye kta; heciya wicaceya qa hi hdakinskinzapi yuke kta.
Айни замон обунашуда:
Mattheos 24: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.