Kisah Rasul-rasul 6
6
Sé pitu tou pinéléng i mahsawang
1In toro niitu, i sé tou ma'éman wia si Yesus éng kalakeznamo, a méhé sé tou Yahudi sé mahnuwu' karia u nunuwu'en Yunani mahpa'os sé tou Yahudi sé mahnuwu' karia u nunuwu'en Ibrani. Ni séra mahpa'os pahpaan sé wéwéné mahesa-esamokan im wia ni séra én zéi'kan pahwéhan genang i mahwéténg am pemandungen néra i mendo-endo.
2Niitumo, sé mapulu' wo zua aatu itii én timawahmé péléng sé mahkii-kiit si Yesus ang kumua, “Zéi'kan wangun sa kita kumana' i mahwoka' u Nuwu' ni Opo Empung wia sé tou pahpaan uman i mimek am pemandungen i mendo-endo. 3Niitumo katuari-katuari, tawimo kamu i méléngla sé pitu tou im wia ni kamu. Ni séra é léwo'zéi' in tou lé'os, tulap wo kinawasa ni Roh Lenas. Sé tou kenu ém wéhan nai um paayangen i mahimek am pemandungen i mendo-endo, 4wo kalousna ni kai mahwéhé genang i mengaléi wo mahtuzu' u Nuwu' ni Opo Empung.”
5A méikuamé itii é niénéala péléng né tou ma'éman. A séra méléngla sé pitu tou kenu: si Stefanus si totoz ma'éman wia si Yesus wo kinawasa ni Roh Lenas, wo si Filipus, si Prokhorus, si Nikanor, si Timon, si Parmenas, wo si Nikolaus si zéi'kan tou Yahudi taan kimiitola um pa'émanen né tou Yahudi, ni sia ém witi Antiokhia a méyé.
6Sé pitu tou itii é méisaru nérala wia sé aatu ni Yesus. A sé aatu itii zumeta'la u lengen néra witu um wawo né pitu tou itii a mengaléi wia si Opo Empung.
7U Nuwu' ni Opo Empung éng kalousnamo im pahkawoka'ma, wo sé tou ma'éman wia si Yesus witi Yerusalem éng kalakeznamo. Wo lakez kasii sé walian sé ma'émano wia si Yesus.
Si Stefanus in tinionan
8Si Stefanus, si mawuta-wuta karia ung kamang méitambér wo ung kawasa ni Opo Empung, mahwangun a makakompo'en wo an zéi'mo kakuaan im wia sé tou lakez. 9Taan wéwéhan sé woopira tou sé witi walé peraragésan né tou Yahudi u makangaran ‘Tou Zéi'mo Ata’,#6:9 Witu u nunuwu'en Yunani méipantik ‘Libertini’ ung kalakoana én Tou Zéi'mo Ata. Sé tou itii im puuna én ata taan in tarékan én zéi'mo ata pahpaan ni séra é nimaéro. ni séra ém witi Kirene wo Aleksandria a méyé. Wo karia néra kasii ém wéwéhan sé woopira tou Yahudi sé witi Kilikia wo Asia a méyé. Ni séra é mahzéi-zéi'an karia ni Stefanus. 10Taan ni séra zéi'kan makawawa i mahzéi-zéi'an karia ung katulapanna wo si Roh Lenas nimangun si Stefanus makawawa i mahnuwu'ma wia ni séra. 11Niitumo, ni séra sumorokla sé woopira tou ing kumua téntii, “Ni kai én timalingamola ni sia i mahkuama a séséro'an wia si Musa wo wia si Opo Empung.”
12Karia in téntu ni séra mahaker sé tou lakez, sé pahtutu'an wo sé tou tulap un Torat. A sia rengan in tionan néramé, pahkéhongen néramé an ipahwalima witi Mahkamah Agama. 13An isaru néra kasiimé sé woopira tou ing kumua an towo tumoro si Stefanus. Sé tou itii é mahkua, “Si tou kenu én zéi'kan kumana' i mahkua a séséro'an tumoro um Walé ni Opo Empung wo un ukum Torat. 14Ni kai kasii én timalingamola ni sia i mahkua i si Yesus si tou Nazaret itii éng kumayas um Walé ni Opo Empung kenu, wo ang kinanaram a méipahtuzu'ma ni Musa wia ni kita ém pahwalina-Na.”
15In toro niitu, péléng sé tou sé rimumez i mahtotoz witi Mahkamah Agama itii nimerena wia si Stefanus, an ileken nérama ung giona é mahsena' tanu ung gio ni malaekat.
Айни замон обунашуда:
Kisah Rasul-rasul 6: LAITOM
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in