Kisah Rasul-rasul 5
5
Si Ananias wo si Safira
1Wéwéhan si tuama makangaran Ananias, wo si mahayona si makangaran Safira. Ni séra é nimangkérla un tana' anu néra. 2Kata'uan ni mahayona im wéwéhan an zoit méilé'os ni Ananias. Wo am walina ém pinahalima an iwéhénala wia sé aatu ni Yesus.
3Taan si Petrus éng kimuala, “Ananias, kaa si tonaas né sétang é méiwayamu ing kimawasa un atému, taka-takazan si Roh Lenas én tinowoannu wo wéwéhan an zoit um winangkéran un tana' itii é méilé'osmu? 4In zéi'kampé' méiwangkérmula, un tana'mu én anumu. Wo niitu i mémoiwangkérmula, un zoitna én anumupé'. Taan kaa ko gimenang un téntu witu un atému? Zéi'kan si tou si tinowoannu taan si Opo Empung si tinowoannu.”
5Kaitalingama u méikuama ni Petrus, a si Ananias ikawesahma witu un tana' a matéla. Péléng sé tou timalinga u nimamuali itii én totoz maindé'. 6Méyé sé woopira tarétumou a sumaputa un awak ni Ananias karia u roko'. Tumondong niitu, am wuléngan néramé un awakna am pahalina i maileweng.
7Im woo teluna jam tumondong niitu, muntepé si mahayo ni Ananias, taan zéi'kampé' kata'uanna u nimamualima. 8Ang kuan ni Petrus wia ni sia, “Ikuamumé wia ni aku. Apa téntu uman un zoit méiwaéré un tana' itii?”
A mingkotla si Safira, “Ulit, téntu uman.”
9Ang kuan ni Petrus wia ni sia, “Kaa ko wo si mahayomu é nimaesaanola i mema'wa' si Roh ni Opo Empung? Amoké ilekenuma, sé tou sé malimewengé si mahayomu é rimendai witi loloangan wo ni séra kangkasii é masaan ni ko i mondol.”
10In toro niitukan an ikawesahma si Safira witu u sinaru ni Petrus a matéla. I sé woopira tarétumou nimuntepé, ileken nérala si Safira é nimatémo. Tumondongla niitu am wuléngan néramé un awakna, a maileweng méitatér u linewengan si mahayona.
11Péléng sé jamaat wo sé timalinga a nimamuali itii én totoz i maindé'.
A makakompo'en wo an zéi'mo kakuaan
12Lakez a makakompo'en wo an zéi'mo kakuaan am winangun né aatu ni Yesus witu u sinaru né tou lakez. Wo péléng sé tou sé ma'émano sekezé é meréréwok witi Loloangan Salomo witi Walé ni Opo Empung karia in esa genang. 13Sé tou walina én zéi'kan wuaya ing kumaria ni séra. Taan zozo' in téntu ni séra ém pahsigi-sigi'en né tou lakez.
14Kauréna éng kalakezna sé tou ma'éman wia si Yesus Mahpiara, séra in tuama kaapa im wéwéné. 15Lumousé niitu, sé tou saki é méipahondol néramé an ipahwalima witi lalan an ikolo'la witu um wuwuléngan wo sasanih. Winangun néra téntu wo sa si Petrus lumangkoia witu, zozo' u lénona uman én ikatoroma wia sé saki itii. 16Téntu kangkasii sé tou lakez sé wana am wanua tua'na walina witi liklik u Yerusalem mahtotondongané i niméyé nimahwalimé sé tou saki wo sé tou sinelazan né sétang. Ni séra péléng é nimalé'os.
Sé aatu ni Yesus i zinézéha
17Ing kamurian, si Walian Wangko' wo sé sana réwok tou Saduki sé mahkii-kiit ni sia, timotozla in zumézéha sé aatu ni Yesus pahpaan ni séra én totoz menéutéu sé aatu itii. 18An tionan nérala sé aatu ni Yesus itii an iuntepa witi bui. 19Taan im wengikan itii, si malaekat ni Opo Empung é niméyé a mukama am pepenet um bui, an iondolnamé séra im witu karia i mahkua, 20“Mangémo, marumendaila witi lésaz um Walé ni Opo Empung wo iwoka'la wia sé tou lakez u nuwu' tumoro ung katou-touan weru itii.”
21Kumawusa séra in timalingama u méikuama ni malaekat itii, i maayahmo a séra muntepa witi lésaz um Walé ni Opo Empung a mahtuzu' witu. Karegas niitu, si Walian Wangko' wo sé mahkii-kiit ni sia é riméwoké sé tou méikauntep witu u Mahkamah Agama, ni séra ém péléng sé pahtutu'an né tou Israel. Tumondong niitu an ipekiangé néramé sé aatu ni Yesus im witi bui.
22Taan i sé tou méiatuma né Mahkama Agama méikaayola witi bui, sé zua aatu ni Yesus itii én zéi'mo witu. Séra mawurimé a mékumua, 23“I ni kai méikaayola witi bui, maileken nai um pepenet um bui éng kinusi', wo péléng sé menénéiz um pepenet ém witupé'. Taan im winuka naila um pepenet, um witu un untep én zéi'mo siapa tou.”
24Kaitalingamé niitu, si tonaas né mahtéiz um Walé ni Opo Empung wo sé tonaas né walian é nimalinganga tumoro sé aatu itii wo mahliligauan tumoro apa u nimamuali.
25A méyé wia ni séra si tou ang kumuama, “Maileken. Sé tou sé méiuntep niouola witi bui, in tarékan ém witi Walé ni Opo Empung wo ni séra é mahtuzu' sé tou lakez.”
26Kaitalingamé niitu, a mangé si tonaas né menénéiz um Walé ni Opo Empung karia né touna, i mangémé sé aatu ni Yesus witi lésaz um Walé ni Opo Empung. Taan ni séra i nimangémé éng karia i lé'o-lé'os uman pahpaan maindé' én taa séra weritené né tou lakez karia am watu.
27Ipahwali néramé sé aatu itii a maisaru wia sé Mahkama Agama. A méhé si Walian Wangko' i meligau wia sé aatu itii. 28#Mat. 27:25 Kuana, “Ni kamu én totoz sinéro' naimola i mahtuzu' karia u Ngaran itii. Taan sé tou wia péléng u Yerusalem én timalingamoma an tutuzu' niou. Wo ni kamu é mapahsasala' ni kai tumoro ung kinawalian ni Tou itii makaz i nimaté.”
29A mingkotla si Petrus wo sé aatu walina, “Ni kita é léwo'zéi' mahtali-talinga wia si Opo Empung, zéi'kan wia si tou. 30Si Opo Empung né nimaopota én timoumomé sumaup si Yesus, si winunu' niou karia i sinalipla. 31Ni Sia si méirakék ni Opo Empung karia ung kawasa-Na é nimaéndo Memumuka lalan wo Memimilot sé tou im witu un ukuman wana a singkéla', wo sé tou Israel toro tumula'u a singkéla' néra wo makailek un ampungan. 32Ni kaimo sé mapata'u um pina'ilek nai tumoro a nimamuali itii, ni kai wo si Roh Lenas si méitambéré ni Opo Empung wia péléng sé tou sé mahtali-talinga ni Sia.”
33Kaitalingamé niitu, ni séra én totoz maupi' wo nimaesaan i munu' sé aatu itii. 34Taan wéwéhan si esaané im wia sé sana réwok tou Farisi si méikauntep witu u Mahkamah Agama, makangaran Gamaliel. Ni sia én tou tulap un Torat wo totoz pahsigi-sigi'en péléng né tou. Sia rumendaié a mahaléila, wo sé aatu ni Yesus itii i mondola im witu zéi'kan uré. 35Kumawusa niitu, a sia kumua wia sé kakariana witu u Mahkamah Agama itii, “É katuari-katuari tou Israel, pakagena-genangela lé'os apa um wangunen niou wia sé tou itii! 36Amoké genangen nioula. Im puuna ém wéwéhan si makangaran Teudas. Ni sia é mahkua-kua in tou ipahpuu-puuna wo sé mahkii-kiit ni sia ém woo epatna atus tou. Taan ni sia ém winunu', an ikaserama sé mahkii-kiit ni sia makaz am pahwangunen néra é nimazéi'ma. 37Tumondongla ni sia, i si Kaisar nimeréntama i mantik a ngaran né tou i mahtata'u ung kalakez né tou, in toro niitu ém wéwéhan si makangaran Yudas, si tou Galilea. Ni sia é nimaker sé tou lakez ing kumiit ni sia sumaru sé pemerénta né Romawi. Taan ing kamurian ni sia kangkasii ém winunu', an ikaserama sé mahkii-kiit ni sia. 38Niitumo, ni aku éng kumuama wia ni kamu: Tia'mo pahkukuran séra. Iwayamola séra, pahpaan sa am pahwangunen néra ém wia uman si tou a méyé, niitu é mazéi'. 39Taan sa am pahwangunen néra ém wia si Opo Empung a méyé, ni kamu én zéi'kan makawawa in zuméi' ni séra. Lumousé niitu, ni kamu ém woo ikatuzu'mé mahsaru si Opo Empung.” Tumalingamé niitu, a sésésa ni Gamaliel itii é niénéan nérala. 40An tawahen néramé sé aatu itii an iatu nérama sé tou i sumaluk sé aatu itii. Wo ni séra kangkasii é siméro'la sé aatu itii i mahtuzu' karia u ngaran ni Yesus. Kumawusa niitu an ipilot néramé sé aatu ni Yesus itii.
41Sé aatu ni Yesus itii mondolé im witu um pahtotozan né Mahkamah Agama karia i mahpaa-paaz, pahpaan ni séra é mahgenangla wangun mazézéha im pahséro'an pahpaan u Ngaran ni Yesus. 42Wo sekez in endo, ni séra é mahtuzu' witi lésaz um Walé ni Opo Empung wo wana am walé. Ni séra é mahtuzu' u Nuwu' Lé'os tumoro si Yesus i ni Sia é si Mesias.
Айни замон обунашуда:
Kisah Rasul-rasul 5: LAITOM
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in