Markusna Enjil 5
5
Bag. 5.
1Widegon tasan Jedrichin esheir, essin jerked tebillo. 2Kubirton belsingodon tekki techirton abidisum zol newerti nijiskol wer. Tenna seknadton techir esum. 3Wala zol wer eskergi tekki adigirkomnum, wala silsilechiged. 4Digri wekki tedder oregi undursan wide silsilechiged tekki dulogirsan. Ama la ore wer wala silsile wer tekki arkomnum. Wala zol wekkon eskergi tendogor tirtiyankomnum. 5Wide dime, uguged ugrosked, jebelirgon wide techirgon dajisum, wigka tennewertigi kulwiged bashijingon. 6Yesugi nalsinna wattigi warirton bodirgi wide sejdossir hisi dul wekked wig wesum: 7„Aigon ekkonna barer min dan, wo Yesu, tir dogondina tod? Ekki tirked jodkirrin: Aigi mariskidimen!“ 8Yesu tekki wetirsum: „Wo newerti nijis, ter zolloton bolos!“ 9Wide tekki isigsum: „Enn eri minde?“ Ter rude wesum: „Ann eri lejion eran, mine ari digrichiy erungad.“ 10Wide tekki digri wekki beddisum, tirgi nejarton bochigir tur ishinirmen an.
11Mandogon gunan kello hanziri digrichi weri aïwsan. 12Newertichi wide tekki beddisan: „Argi hanzirir ishinosir.“ 13Tirgi Yesu: „Juw“ esum. Tenna saayen newertichi nijisi belligi wide hanzirir tosan. Man hanzir malegon abdogorton essigir sug shugur kidisan. Tinn idigon eluf owikriy esum.
14Ama hanzirigi aïweli dosossan. Kerichir wide nejachir daligi jurgi wetidirsan ta nogelgi. Eshein idi bel tasan jeritakkelgi nalw an. 15Yesunai targi nalsan doshanbuelgi, lejiongi korelgi, erigkattanos kadeg undred agingi. 16Wide Yesugi sarkossan. Misiged naleli tirgi wetidirsan doshked awtakkelgi wide hanziriged. 17Tir wide ugudisan tekki beddarki, tinn esheirton talos an.
18Kubir torossinn aharro doshanbuel tekki beddisum „Aigi ekkodon weleser an.“ 19Yesu birigmen wetirsum: „Enna kagir wide enn awtindichinai jurgi wetidir ekked arti awsin malegi, wide mine rahmesingi.“ 20Ter wide bijurgi uwarki ugudisum medinechi dimningarir, saï kottekki Yesu tekked awsingi. Male tin ajibesan.
21Yesu kubir wawossinn aharro essin jerkir rejae tasum. Tenna hawalendo jema digri wer jamesum, ter essin garror engon. 22Jamana imam wer tasum. Tenn erigon Yaïrus esan. Yesugi nalos targi tenna osichinai digirsum. 23Wide were jagadelged beddi wetirsum: „Anna buru kinatod tennewertin aharro dabun. Ta enn igi tendogor kujur: ‚Genanos wide ay’ an.“ 24Yesu wide tekki tebae talossum. Widegon jema dul wer tekki tebae uredasum.
25Teddogon en odil wer dasum jen diminde owirton, gewna dabrarked. 26In engon tabib digrirton marsigid digri wekki nalsum. Wide tennai darel malegi dabrossum, nefa wekki nalmeningon, owoldogor kosansinna masir: 27Ter Yesuna gisagi abaindangi gijirbusinged jemagi wachired Yesun aharked jurgi tenna kaden ewgi kumisum. 28Mine ter tennewertigodon awesum: „Ai on tenna kade agudegi i kumikrin, bigenandi an.“ 29Tenna saayen tenna gew misan talebuel tebossum. Wide tennewertir iyirsum, afyadti sune, genansingi tenn oderton. 30En tekki kumisinna saar Yesu hisesum teddoton gudra wer belsingi. Wide dirergi jemagi isigsum: „Ni anna kadechigi kumum?“ 31Tekki tenna hirani wetirsan: „Er analin jeïna ekki uredagingi. Wide wena: Ni aigi kumisum an?“ 32Wide tenna hawalengi urusum, tekki kumelgi nalli an. 33En wide sarkingon kerkeringon tekked awtakkelgi iyiros, targi tenna osichinai ungi ale malegi wetirsum. 34Yesu tekki wetirsum: „Wo anna buru, enna iman ekki gengirsum. Ju enn afyadir. Wide enn oderton genan.“
35Wide ter abainingon jamana imamna karton weri targi wesan: „Enna buru diossum. Mirigirrigi elgon arifki amariskidin?“ 36Yesu were wetakkelgi gijirsum. Ama balemen jamana imamgi wetirsum: „Sarkimen, ama amhe!“ 37Wala zol wekki tekki tebaer ankōmnum, Butruskon wide Yagubkon wide Hana Yagubna timbeskonna masir. 38Jamana imamna kanai targi lilar wekki gijirsum, wide wigarkon, warjar digri wekkongi. 39Ter torgi wetidirsum: „Ir ma lilika wide awigrun? Burfeta dikomnum. Ama nerbun.“ 40Tendogor ususan. Ama ter tir malegi ososir buruna timbabki, tinengi, wide hirani tekkodon dareligi ared burfeta businn agarkir tosum. 41Wide buruna igi morogred wetirsum: „Talisa gumi.“ In werena fesiradton: „Wo buru feta, ekki ai awetirrin, imbel an.“ 42Tenna saayen buru feta imbelligi talossum. Tekkon jen diminde owina burw esum. Mani wattigi ajeb dul werro tosan. 43Ter wide digri wekki weseirsum zolgi in awidti wetirmendangi. Wide wetirsum: „Burugi kale wekki tirw an.“
Айни замон обунашуда:
Markusna Enjil 5: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.