Lukka 17
17
Ebyesittaza
(Mat 18:6-7,21-22, Mak 9:42)
1Yesu n'agamba abayigirizwa be nti, “Ebyesittaza tebiyinza butajja; naye zimusanze oyo abireeta! 2Waakiri oyo okusibibwa olubengo mu bulago bwe, n'asuulibwa mu nnyanja, okusinga okwesittaza omu ku abo abato.#Mat 18:6,7 3Mwekuumenga mwekka na mwekka, muganda wo bw'ayonoonanga, omubuuliriranga; bwe yeenenyanga, omusonyiwanga.#Mat 18:15 4Era bw'akwonoonanga emirundi omusanvu ku lunaku olumu, era emirundi egyo omusanvu n'akukyukira ng'agamba nti Nneenenyezza; omusonyiwanga.”#Mat 18:21,22
Okukkiriza
5Abatume ne bagamba Mukama waffe nti, “ Otwongereko okukkiriza.”#Mak 9:24 6Mukama waffe n'agamba nti, “ Singa mulina okukkiriza okutono ng'akaweke ka kaladaali, mwandigambye omusikamiini guno nti Siguka osimbibwe mu nnyanja; era gwandibawulidde.” #Mat 17:20; 21:21
Omulimu gw'omuddu
7 “Naye ani ku mmwe, alina omuddu ng'alima oba ng'alunda endiga, bw'akomawo ng'ava mu lusuku, alimugamba nti Jjangu mangu otuule olye; 8naye atamugamba nti Jjula emmere ndye, weesibe, ompeereze, mmale okulya n'okunywa; naawe olyoke olye era onywe? 9Amwebaza omuddu oyo olw'okukola by'alagiddwa? 10Era nammwe bwe mutyo, bwe mumalanga okukola byonna bye mwalagirwa, mugambenga nti, ‘ Ffe tuli baddu abatasaana; ebyatugwanira okukola bye tukoze.’”
Yesu awonya abagenge ekkumi
11Awo olwatuuka bwe baali mu kkubo nga bagenda e Yerusaalemi, yali ng'ayita wakati wa Samaliya ne Ggaliraaya.#Luk 9:51; 13:22 12Awo bwe yayingira mu kyalo ekimu, abagenge kkumi (10) ne bamusisinkana, ne baayimirira walako;#Leev 13:45,46 13ne boogerera waggulu ne bagamba nti, “ Yesu, Mukama waffe, otusaasire.” 14Bwe yabalaba n'abagamba nti, “Mugende mwerage eri bakabona.” Awo olwatuuka bwe baali nga bagenda ne balongoosebwa.#Luk 5:14, Leev 13:49; 14:2,3 15Awo omu ku bo, bwe yalaba ng'awonye, n'akomawo n'atendereza Katonda n'eddoboozi ddene; 16n'avuunama awali ebigere bye, ng'amwebaza: era oyo yali Musamaliya. 17Yesu n'addamu n'agamba nti, “Ekkumi (10) bonna tebalongoosebbwa? Naye bali omwenda bali ludda wa? 18Tebalabise abakomawo okutendereza Katonda, wabula omugenyi ono?” 19N'amugamba nti, “ Yimuka, ogende: okukkiriza kwo kukuwonyezza.”#Luk 7:50
Okujja kw'obwakabaka bwa Katonda
(Mat 24:23-28,37-41)
20Awo Yesu bwe yabuuzibwa Abafalisaayo nti, “Obwakabaka bwa Katonda bulijja ddi?” N'abaddamu n'agamba nti, “Obwakabaka bwa Katonda tebujja nga bweyolese:#Yok 18:36; 3:3 21so tebaligamba nti Laba, buli wano! oba nti buli wali! kubanga, laba, obwakabaka bwa Katonda buli wakati mu mmwe.”#Mat 24:23, Yok 1:26; 12:35
22N'agamba abayigirizwa be nti, “Ennaku zigenda okujja lwe mulyegomba okulaba olumu ku nnaku z'Omwana w'omuntu, so temulirulaba. 23Kale balibagamba nti Laba, wali! Laba, wano! temugendanga, so temubagobereranga;#Luk 21:8 24kubanga ng'okumyansa bwe kumyansiza ku luuyi olumu olw'eggulu, ne kutangaaza n'oluuyi olulala olw'eggulu, bw'atyo Omwana w'omuntu bw'aliba ku lunaku lwe.#Mat 24:26,27 25Naye okusooka kimugwanira okubonyaabonyezebwa ennyo, n'okugaanibwa ab'emirembe gino.#Luk 9:22 26Era nga bwe byali mu nnaku za Nuuwa, bwe bityo bwe biriba ne mu nnaku z'Omwana w'omuntu.#Mat 24:37-39 27Baali nga balya, nga banywa, nga bawasa, nga bawayira, okutuusa ku lunaku Nuuwa lwe yayingira mu lyato, amataba ne gajja, ne gabazikiriza bonna.#Lub 7:7-23 28Era nga bwe byali mu nnaku za Lutti; baali nga balya, nga banywa, nga bagula, nga batunda, nga basiga, nga bazimba, #Lub 18:20 29naye ku lunaku luli Lutti lwe yava mu Sodomu, omuliro n'ekibiriiti ne bitonnya okuva mu ggulu ne bibazikiriza bonna:#Lub 19:24,25 30bwe bityo bwe biriba ku lunaku Omwana w'omuntu lw'alibikkulibwa. 31Ku lunaku olwo, alibeera waggulu ku nnyumba, n'ebintu bye nga biri mu nnyumba, takkanga kubiggyamu; n'ali mu lusuku bw'atyo taddanga mabega.#Mat 24:17,18, Lub 19:26 32Mujjukire mukazi wa Lutti. 33Buli anoonya okulokola obulamu bwe alibubuza; naye buli abubuza alibuwonya.#Luk 9:24 34Mbagamba nti Mu kiro ekyo babiri baliba ku kitanda kimu; omu alitwalibwa, n'omulala alirekebwa. 35Abakazi babiri abaliba awamu nga basa ku lubengo; omu alitwalibwa, n'omulala alirekebwa. #Mat 24:40,41 36[Ababiri baliba mu lusuku; omu alitwalibwa, n'omulala alirekebwa.”] 37Abayigirizwa be ne bamubuuza nti, “Ludda wa, Mukama waffe?” N'abaddamu nti, “ Awaba omulambo n'ensega we zikuŋŋaanira.”#Mat 24:28
Айни замон обунашуда:
Lukka 17: LBR
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
All rights are reserved to the Bible Society of Uganda.