ఉద్దేశముతో కూడిన జీవితం జీవించండి!నమూనా

“ప్రభావవంతమైన సాక్షిగా ఉండండి”

మన అనుదిన ప్రపంచంలో ప్రభావవంతమైన క్రైస్తవునిగా ఉండటం అనేది మన జీవితాల్లో ఇతరులు ఏమి గమనించాలని కోరుతున్నాడో అనేది అర్థం చేసుకోవడంతో ప్రారంభమౌతుంది. క్లుప్తంగా చెప్పాలంటే నిజానికి, అది యేసే. అయితే దాని అర్థం ఏమిటి?

మనం ఎలా జీవించాలని దేవుడు కోరుతున్నాడో అనేదానికి యేసు పరిపూర్ణమైన మాదిరిని చూపించాడు. మనం ఇప్పుడు జీవిస్తున్న ప్రపంచ పరిస్థితులకు భిన్నమైన పరిస్థితుల్లో యేసు జీవించినప్పటికి, ఆయన దేవుని సంపూర్ణ లక్షణాలను చూపించి ఆధునిక ప్రపంచానికి తగిన ఉదాహరణ ఇచ్చాడు.

మన జీవితాల్లో మనం దేవుని లక్షణాలను పెంపొందించుకొని ఇతరులు దానిని చూడాలని ఆయన ఆశిస్తున్నాడు. యేసుతో మనకుండే వ్యక్తిగత సంబంధం ద్వారా మాత్రమే దానిని సాధించగలం. యేసు ఇలా చెప్పాడు:

“ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు.” యోహాను 15:5

“మీరు బహుగా ఫలించుటవలన నా తండ్రి మహిమపరచబడును; ఇందువలన మీరు నా శిష్యులగుదురు.” యోహాను 15:8

ద్రాక్షతీగె అది అతుకబడి ఉన్న ద్రాక్షవల్లి నుండి తన జీవమును పొందుతూ ఏవిధంగా ఫలిస్తుందో, యేసులో నిలిచియుండే మనము కూడా అదేవిధంగా ఫలిస్తాము లేదా మన జీవితాల ద్వారా ఇతరులకు దేవుని స్వభావమును కనుపరుస్తాము.

“అయితే ఆత్మ ఫలమేమనగా, ప్రేమ, సంతోషము, సమాధానము, దీర్ఘశాంతము, దయా ళుత్వము, మంచితనము, విశ్వాసము, సాత్వికము, ఆశానిగ్రహము. ఇట్టివాటికి విరోధమైన నియమమేదియు లేదు. క్రీస్తుయేసు సంబంధులు శరీరమును దాని యిచ్ఛలతోను దురాశలతోను సిలువవేసి యున్నారు.” గలతీయులకు 5:22-24

దేవుని స్వభావమైన ఆయన ప్రేమ, సంతోషము, సమాధానము, దయాళుత్వము, మంచితనము, విశ్వాసము, సాత్వికము మరియు ఆశానిగ్రహము మనలో మరియు మన ద్వారా పనిచేస్తున్నప్పుడు మనం జీవించే విధానం ప్రభావవంతమైన సాక్ష్యముగా ఉంటుంది.

యేసు దినములలో ఉన్నట్లుగానే, దేవుని లక్షణాలను మన జీవితాల ద్వారా బహిరంగముగా, క్రియారూపకంగా ప్రదర్శించినప్పుడు ఆత్మ ఫలం ఇతరులకు కనిపించకుండా పోదు. అది క్రైస్తవులు మరియు అవిశ్వాసుల దృష్టిని ఆకర్షిస్తుంది, మరియు ఎవరో ఒకరు దాని గురించి అడుగకుండా ఉండరు.

“నిర్మలమైన మనస్సాక్షి కలిగినవారై, మీలో ఉన్న నిరీక్షణనుగూర్చి మిమ్మును హేతువు అడుగు ప్రతివానికిని సాత్వికముతోను భయముతోను సమాధానము చెప్పుటకు ఎల్లప్పుడు సిద్ధముగా ఉండి, మీ హృదయములయందు క్రీస్తును ప్రభువుగా ప్రతిష్ఠించుడి; అప్పుడు మీరు దేనివిషయమై దుర్మార్గులని దూషింపబడుదురో దాని విషయమై క్రీస్తునందున్న మీ సత్‌ప్రవర్తన మీద అపనిందవేయువారు సిగ్గుపడుదురు.” 1 పేతురు 3:15-16

సిద్ధంగా ఉండండి. ఎవరో ఒకరు గమనిస్తూ మీరు అస్సలు ఊహించని సమయంలో మిమ్మును అడుగుతారు. రక్షణ గూర్చిన మీ సాక్ష్యం మరియు ఈ జీవితంలో దేవుడు కొనసాగిస్తున్న కార్యము దీనికి గొప్ప ప్రారంభముగా ఉంటుంది. మరియు, దేవుని ప్రేమ మరియు రక్షణ అందరికీ అందుబాటులో ఉంటుందనే అద్భుతమైన వార్తను అందరూ అర్థం చేసుకొనటానికి వారికి సహాయపడేందుకు ఈ పుస్తకమును మరొక పరికరముగా మీరు వాడుకోవచ్చు.