Luˉka‸ li‸ 16

Maˇ hteˇ ve mawˇ ha‸ shaˉ shehˍ hpaˇ awˬ lawn

1Awˬ la‸ gʼawˇ teˇ hpaˍ hta‸ htawˇ yawˇ kʼoˆ piˇ ve, Paw sha ve chaw teˇ gʼaˇ lehˬ, mawˇ ha‸ shaˉ shehˍ hpaˇ teˇ gʼaˇ cawˬ ve yoˬ. Mawˇ ha‸ shaˉ shehˍ hpaˇ oˇ ve teˇ gʼaˇ lehˬ, yawˇ ve awˬ shehˍ hpaˇ ve mawˇ jeˬ hta‸ yehˇ baˬ chehˇ ve awˬ lawn, awˬ shehˍ hpaˇ hta‸ shu ca hto piˇ ve yoˬ. 2Awˬ shehˍ hpaˇ yawˇ hta‸ kuˬ leh, Nawˬ ve awˬ lawn ngaˬ gʼa kaˇ ve, nawˬ hkʼaˬ hkʼe te ve le. Nawˬ mawˇ ha‸ shaˉ ve caˇ lanˇ ngaˬ hta‸ pe‸ laˇ-oˆ. Ya‸ nyi hkʼaw‸ nawˉ mawˇ ha‸ shaˉ ve kanˉ hta‸ nawˬ maˇ gʼa kʼaw‸ te teh‸, yawˇ hta‸ kʼoˆ piˇ ve yoˬ. 3Oˇ htaˇ, mawˇ ha‸ shaˉ shehˍ hpaˇ yawˇ ve nyi ma hkʼaw dawˇ ve, Ngaˬ hkʼaˬ hkʼe gʼa te tuˬ le. Ngaˬ ve awˬ shehˍ hpaˇ lehˬ, ngaˬ hta‸ mawˇ ha‸ shaˉ ve kanˉ awˬ hkʼaw lo yuˬ tawˆ laˇ tuˬ yoˬ. Miˬguiˬ ca duˇ tuˬ ngaˬ te maˇ gʼa. Shu geh lawˬ caˇ tuˬ ka‸ ngaˬ ya‸ taw ve yoˬ. 4Mawˇ ha‸ shaˉ ve kanˉ awˬ hkʼaw lo ngaˬ tawˆ-e peuˬ hkʼaw‸ nawˉ, shu lehˬ a shu yawˇ ve yehˬ hkʼaw ngaˬ hta‸ ha‸ yuˬ laˇ tuˬ ngaˬ hkʼaˬ hkʼe gʼa te tuˬ ve hta‸ ngaˬ shiˍ peuˬ teh‸ yawˇ dawˇ ve yoˬ.

5Yawˇ ve awˬ shehˍ hpaˇ geh jeˬ cha taˍ ve chaw teˇ gʼaˇ peuˬ teˇ gʼaˇ hta‸ yawˇ kuˬ leh, awˉ lawˉ teˇ gʼaˇ hta‸ kʼoˆ piˇ ve, Ngaˬ ve awˬ shehˍ hpaˇ geh nawˬ jeˬ hkʼaˬ ma cha taˍ ve le teh‸ na nyi ve yoˬ. 6Naˍ manˇ teˇ ha punˇ cha taˍ ve yoˬ teh‸ yawˇ kʼaw‸ kʼoˆ piˇ ve yoˬ. Oˇ htaˇ mawˇ ha‸ shaˉ shehˍ hpaˇ kʼoˆ ve, Nawˬ ve caˇ lanˇ hta‸ yuˬ leh haˆ mui taˍ leh, ngaˇ chi punˇ bvuh‸ keu-o teh‸, yawˇ hta‸ kʼoˆ piˇ ve yoˬ. 7Oˇ ve awˬ hkʼaw‸ nawˉ awˬ kaˍ awˬ nu teˇ gʼaˇ hta‸ yawˇ kʼoˆ piˇ ve, Nawˬ jeˬ hkʼaˬ ma cha taˍ ve le teh‸ na nyi htaˇ, Caˬ shiˍ teˇ ha taˆ cha taˍ ve yoˬ teh‸, yawˇ kʼaw‸ kʼoˆ piˇ ve yoˬ. Oˇ htaˇ mawˇ ha‸ shaˉ shehˍ hpaˇ kʼoˆ ve, Nawˬ ve caˇ lanˇ hta‸ yuˬ leh, hiˉ chi taˆ bvuh‸ keu-o teh‸, yawˇ hta‸ kʼoˆ piˇ ve yoˬ.

8Maˇ hteˇ maˇ cawˇ ve mawˇ ha‸ shaˉ shehˍ hpaˇ oˇ ve lehˬ, cuˇ yiˍ yehˇ puiˉ ve pa taw, awˬ shehˍ hpaˇ yawˇ hta‸ chiˇ mvuh ve yoˬ. Awˬ lawn kʼo, chi miˬguiˬ yaˇ teˇ hpaˍ lehˬ, a shu yawˇ ve teˇ co awˬ hkʼaw lo, awˬ gʼeuˆ yaˇ teˇ hpaˍ a‸ kehˉ cuˇ yiˍ yehˇ puiˉ ve yoˬ.

9Hkʼe te leh, ngaˬ nawˬ hui hta‸ kʼoˆ laˇ ve, hpu shi mawˇ jeˬ teˇ ceuˬ lehˬ, maˇ hteˇ maˇ cawˇ ve ka‸ awˬ chawˇ gʼa tuˬ oˇ ve hta‸ yehˇ-oˆ. Hpu shi mawˇ jeˬ oˇ ve peuˬ kʼai peuˬ hkʼaw‸ nawˉ, co co taiˍ taiˍ ve chehˇ kuiˬ awˬ hkʼaw lo yawˇ hui nawˬ hta‸ ha‸ yuˬ laˇ tuˬ yoˬ.

10I ve kanˉ awˬ hkʼaw lo ka ti‸ yeˬ ve chaw lehˬ, uiˍ ve kanˉ awˬ hkʼaw lo htawˇ ka ti‸ yeˬ tuˬ yoˬ. I ve kanˉ awˬ hkʼaw lo maˇ hteˇ maˇ cawˇ ve hta‸ te ve chaw lehˬ, uiˍ ve kanˉ awˬ hkʼaw lo htawˇ maˇ hteˇ maˇ cawˇ ve hta‸ te tuˬ yoˬ. 11Hkʼe te leh, hpu shi mawˇ jeˬ lehˬ maˇ hteˇ maˇ cawˇ ve ka‸, oˇ ve hta‸ yehˇ ve teˇ yanˇ, nawˬ hui ka ti‸ maˇ yeˬ ve kʼo, hteˇ ve cawˇ ve mawˇ jeˬ teˇ ceuˬ a shu nawˬ hui hta‸ chiˇ a‸ laˇ tuˬ le. 12Nawˬ hui lehˬ shu ve mawˇ jeˬ hta‸ yehˇ ve awˬ hkʼaw lo ka ti‸ maˇ yeˬ ve kʼo, nawˬ hui ve mawˇ jeˬ a shu nawˬ hui hta‸ chiˇ a‸ laˇ tuˬ le.

13Awˬ ceˬ hkʼaˬ ve teˇ gʼaˇ maˇ kʼoˆ, awˬ jawˇmawˇ nyiˇ gʼaˇ ve awˬ ceˬ te maˇ gʼa. Awˬ lawn kʼo, teˇ gʼaˇ hta‸ canˇ kʼo teˇ gʼaˇ hta‸ ha‸ tuˬ yoˬ. Teˇ gʼaˇ hta‸ yawˆ yan kʼo teˇ gʼaˇ hta‸ maˇ shawˍ maˇ caˆ te tuˬ yoˬ. Nawˬ hui lehˬ, Gʼuiˬsha ve awˬ ceˬ ka‸, hpu shi mawˇ jeˬ ve awˬ ceˬ ka‸, teˇ pawˆ tiˉ te maˇ gʼa taˬ teh‸ kʼoˆ ve yoˬ.

14Hpaˍriˍsehˇ teˇ hpaˍ lehˬ, yawˇ hui hpu hta‸ sheˉ lai ve chaw hpeh‸ leh, tawˇ hkawˇ oˇ ve hkʼa peu-eˬ hta‸ yawˇ hui gʼa kaˇ ve teˇ yanˇ, yawˇ hui yawˇ hta‸ kʼoˆ guiˇ gʼuiˬ guiˇ ve yoˬ. 15Yeˍsuˆ yawˇ hui hta‸ kʼoˆ piˇ ve, Nawˬ hui lehˬ, chaw yaˇ mehˆ gʼuˇ suhˍ a shu yawˇ awˬ to hteˇ ve cawˇ ve hkʼe te htawˇ, Gʼuiˬsha lehˬ nawˬ hui ve nyi ma hta‸ shiˍ ve yoˬ. Awˬ lawn kʼo, chaw yaˇ taˍ uiˍ ve awˬ ceuˬ lehˬ, Gʼuiˬsha mehˆ gʼuˇ suhˍ cha‸ chiˆ ve awˬ ceuˬ hpeh‸ ve yoˬ.

Awˬliˇtawˇhkawˇ leh Gʼuiˬsha ve mvuhˇmiˬ awˬ lawn

16Awˬliˇtawˇhkawˇ leh Gʼuiˬsha ve tcuh kaˍ paˍ teˇ hpaˍ ve tawˇ hkawˇ lehˬ, Yoˇhanˬ ve awˬ co-e maˇ gaˬ sheˍ htaˇ ve awˬ pon hpeh‸ ve yoˬ. Oˇ ve awˬ hkʼaw‸ nawˉ, Gʼuiˬsha ve mvuhˇmiˬ awˬ lawn ha lehˬ ve bon hkawˇ maˍ piˇ leh, chaw hkʼa peu-eˬ mvuhˇmiˬ oˇ ve awˬ hkʼaw lo buiˆ da‸ leh lo‸-e ve yoˬ. 17Miˬguiˬ mvuhˇ naw ma luˬ kʼai haˍ ve a‸ kehˉ, awˬliˇtawˇhkawˇ li‸ awˬ hkʼaw lo awˬ maiˉ ehˉ teˇ maˬ luˬ kʼai tuˬ haˍ ve yoˬ.

Awˬ miˇ ma hta‸ baˬ ve awˬ lawn Yeˍsuˆ maˍ ve

18A shu yawˇ ve awˬ miˇ ma hta‸ baˬ taˉ leh awˬ kaˍ awˬ nu yaˇ miˇ hta‸ heuˆ ve chaw hkʼa peu-eˬ lehˬ, haˉ chawˇ haˉ paˆ te ve yoˬ. Awˬ hpawˇ baˬ taˉ peuˬ ve yaˇ miˇ hta‸ ca heuˆ ve chaw htawˇ haˉ chawˇ haˉ paˆ te ve yoˬ.

Paw sha paˍ leh Laˍzaˍruˆ awˬ lawn

19Teˇ pawˆ htaˇ, paw sha paˍ teˇ gʼaˇ lehˬ, hpa nyi naˆ meuˉ lehˍ ve leh da‸ jaˇ ve hpa hpu hta‸ veu‸ deh leh, teˇ nyi le le ha lehˬ ha kʼa hti caˇ hti dawˬ chehˇ ve yoˬ. 20Yawˇ ve yehˬ gʼuˇ suhˍ lo cawˬ ve yehˬmiˉhpe‸ awˬ paˇ lo, awˬ to hkʼa peu-eˬ pawˆ lawˆ kʼuˉ hkʼa biˇ cawˬ ve Laˍzaˍruˆ meh ve lawˬ leh‸ paˍ teˇ gʼaˇ hta‸ shu ca taˆ teh taˍ ve yoˬ. 21Yawˇ lehˬ, paw sha paˍ ve hpui lawˇ awˬ hawˉ lo caˇ sheˆ dawˇ sheˆ taˍ ve hta‸ caˇ gaˇ ve yoˬ. Hpuiˇ teˇ hpaˍ laˬ leh yawˇ ve pawˆ lawˆ kʼuˉ teˇ hpaˍ hta‸ shaw leh‸ ve yoˬ.

22Teˇ nyi htaˇ, haˍ yaˇ gʼawˇ yaˇ oˇ ve suh leh, mvuhˇ naw ma tcuh yaˇ teˇ hpaˍ yawˇ hta‸ Aˍbraˍhanˍ ve nyi ma pui lo shiˍ teh taˍ piˇ ve yoˬ. Paw sha paˍ htawˇ suh leh, shu yawˇ hta‸ ca taˆ tuˍ ve yoˬ. 23Suh mvuhˇmiˬ awˬ hkʼaw lo hehnˇ jaˇ ve tu‸ ve hkanˍ ve hta‸ yawˇ gʼa hkanˍ leh, yawˇ chiˇ nyi ve teˇ yanˇ, vuiˇ kuiˬ lo Aˍbraˍhanˍ hta‸ maˇ kʼoˆ, Aˍbraˍhanˍ ve nyi ma pui lo Laˍzaˍruˆ hta‸ maˇ kʼoˆ, yawˇ gʼa mawˬ ve yoˬ. 24Oˇ htaˇ yawˇ gʼaˇ hte‸ kuˬ leh kʼoˆ ve, Awˬ pa Aˍbraˍhanˍ-oˬ, ngaˬ hta‸ ha kʼaˉ laˇ-oˆ. Ngaˬ lehˬ aˬ miˍ chi awˬ hkʼaw lo gʼa tu‸ gʼa hkanˍ jaˇ ve pa taw, Laˍzaˍruˆ yawˇ ve la‸ naw meuˇ iˉ kaˆ hkʼaw tuˍ leh, ngaˬ ve ha tehˍ gawˬ la piˇ tuˬ, yawˇ hta‸ ngaˬ geh peu laˇ-oˆ teh‸ kʼoˆ ve yoˬ.

25Ya‸ hkʼaˇ Aˍbraˍhanˍ kʼaw‸ kʼoˆ ve, Yaˇ paˍ-oˬ, nawˬ te‸ chehˇ ve teˇ yanˇ, da‸ ve awˬ ceuˬ teˇ hpaˍ hta‸ nawˬ gʼa leh, Laˍzaˍruˆ maˇ da‸ ve awˬ ceuˬ teˇ hpaˍ hta‸ gʼa ve hta‸ dawˇ nawˇ loˬ. Chi beu‸ lehˬ, choˬ kaˬ lo yawˇ dawˇ sha gaˇ sha ve awˬ hkʼaw gʼa chehˇ leh, nawˬ lehˬ tu‸ ve hkanˍ ve awˬ hkʼaw lo gʼa chehˇ ve yoˬ. 26Chi hkʼoˆ ka‸, ngaˬ hui leh nawˬ hui awˬ kaˍ lo naˉ jaˇ ve awˬ hkʼo‸ lonˉ cawˬ ve yoˬ. Chi hta‸ pa taw, choˬ kaˬ te leh nawˬ hui chehˇ kuiˬ lo shu kʼai gaˇ ka‸ kʼai maˇ hpeh‸. Nawˬ hui ve chehˇ kuiˬ lo te leh ngaˬ hui ve chehˇ kuiˬ lo shu laˬ gaˇ ka‸ laˬ maˇ hpeh‸ teh‸ kʼaw‸ kʼoˆ piˇ ve yoˬ. 27Paw sha paˍ kʼaw‸ kʼoˆ ve, Awˬ pa-oˬ, hkʼe te kʼo, ngaˬ nawˬ hta‸ chi hkʼe lawˬ hkawˉ ve yoˬ. 28Ngaˬ ve awˬ nyi paˍ ngaˇ gʼaˇ cawˬ sheˍ ve pa taw, yawˇ hui lehˬ choˬ kaˬ tu‸ ve hkanˍ ve chehˇ kuiˬ lo maˇ gʼa gaˬ la tuˬ, Laˍzaˍruˆ hta‸ ngaˬ pa ve yehˬ lo kʼai tcuh leh, yawˇ hui hta‸ gʼaˇ hte‸ maˍ piˇ tcuh-o teh‸ kʼoˆ piˇ ve yoˬ.

29Aˍbraˍhanˍ kʼaw‸ kʼoˆ ve, Yawˇ hui geh Moˉseˍ leh Gʼuiˬsha ve tcuh kaˍ paˍ hui ve tawˇ hkawˇ cawˬ taˍ ve yoˬ. Tawˇ hkawˇ oˇ ve hta‸ yawˇ hui na piˇ-oˆ teh‸ kʼoˆ piˇ ve yoˬ. 30Paw sha paˍ kʼaw‸ kʼoˆ ve, Awˬ pa Aˍbraˍhanˍ-oˬ, chi hkʼe maˇ heˆ. Suh kuiˬ lo kʼaw‸ te‸ tu la ve teˇ gʼaˇ yawˇ hui geh kʼai ve kʼo, yawˇ hui venˇbaˆ hta‸ dawˇ hpfuhˆ tuˬ yoˬ teh‸ kʼoˆ ve yoˬ. 31Aˍbraˍhanˍ kʼaw‸ kʼoˆ ve, Moˉseˍ leh Gʼuiˬ sha ve tcuh kaˍ paˍ hui ve tawˇ hkawˇ hta‸ yawˇ hui maˇ na ve kʼo, suh kuiˬ lo chaw teˇ gʼaˇ kʼaw‸ te‸ tu la ve htawˇ yawˇ hui yonˍ tuˬ maˇ heˆ teh‸, yawˇ hta‸ kʼaw‸ kʼoˆ piˇ ve yoˬ.

ప్రస్తుతం ఎంపిక చేయబడింది:

Luˉka‸ li‸ 16: LHBE

హైలైట్

షేర్ చేయి

కాపీ