Luˉka‸ li‸ 15

Mehˉ kʼai ve yawˬ awˬ lawn tawˇ pa haˉ te maˍ ve

1Awˬ hkawnˍ shaw paˍ hui leh venˇbaˆ yaˇ hui hkʼa peu-eˬ, Yeˍsuˆ ve tawˇ hta‸ na tuˬ yawˇ awˬ paˇ lo jiˆ laˬ ve yoˬ. 2Hpaˍriˍsehˇ hui leh li‸ bvuh‸ paˍ hui kʼoˆ ve, Chi hpaˇ lehˬ, venˇbaˆ yaˇ hui hta‸ ha‸ yuˬ leh yawˇ hui geh teˇ geh hti caˇ hti dawˬ ve law teh‸, yawˇ hui ca beu ca hkʼaiˉ leh kʼoˆ ve yoˬ. 3Oˇ htaˇ yawˇ hui hta‸ Yeˍsuˆ tawˇ pa haˉ chi maˍ piˇ leh kʼoˆ ve,

4Nawˬ hui awˬ hkʼaw lo chaw teˇ gʼaˇ yawˬ teˇ ha hkeh cawˬ leh teˇ hkeh mehˉ kʼai ve kʼo, kʼawˇ chi kʼawˇ hkeh hta‸ heh puiˉ hkʼaw lo teh taˉ leh, mehˉ kʼai ve yawˬ ehˉ hta‸ mawˬ htaˇ hkʼa gaˬ maˇ ca nyi ve chaw teˇ gʼaˇ gʼaˇ cawˬ laˇ. 5Yawˬ oˇ ve hta‸ yawˇ kʼaw‸ mawˬ htaˇ, ha lehˬ ha kʼa la‸ hpeh kʼaˉ hkʼoˆ chiˇ taˆ ve yoˬ. 6Yawˇ ve aˉ hkʼaw lo gaˬ la htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Ngaˬ ve mehˉ kʼai ve yawˬ hta‸ kʼaw‸ ca mawˬ peuˬ teh‸ yawˇ kʼoˆ tuˬ yoˬ. 7Oˇ ve hkʼa shuˍ shuˍ, venˇbaˆ hta‸ dawˇ hpfuhˆ tuˬ maˇ loˍ ve hteˇ ve cawˇ ve chaw kʼawˇ chi kʼawˇ gʼaˇ hta‸ pa taw, mvuhˇ naw ma hkʼoˆ lo ha lehˬ tuˬ cawˬ ve a‸ kehˉ, venˇ baˆ yaˇ teˇ gʼaˇ, venˇbaˆ hta‸ dawˇ hpfuhˆ ve pa taw, mvuhˇ naw ma hkʼoˆ lo ha lehˬ tuˬ leuˉ leh cawˬ maˇ ve yoˬ teh‸, ngaˬ nawˬ hui hta‸ kʼoˆ laˇ ve yoˬ.

Mehˉ kʼai ve hpu awˬ lawn tawˇ pa haˉ te maˍ ve

8Teˇ lawn lehˬ, yaˇ miˇ teˇ gʼaˇ hpu teˇ chi hteh‸ cawˬ leh, teˇ hteh‸ mehˉ kʼai ve kʼo, aˬ miˍ tuˉ leh yehˬ hta‸ shiˆ leh mawˬ htaˇ hkʼa gaˬ maˇ ca nyi ve chaw teˇ gʼaˇ gʼaˇ cawˬ laˇ. 9Hpu oˇ ve hta‸ kʼaw‸ mawˬ htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Mehˉ kʼai ve hpu hta‸ ngaˬ kʼaw‸ ca mawˬ peuˬ teh‸ kʼoˆ tuˬ yoˬ. 10Oˇ ve hkʼa shuˍ shuˍ, venˇbaˆ yaˇ teˇ gʼaˇ, venˇbaˆ hta‸ dawˇ hpfuhˆ ve hta‸ pa taw, Gʼuiˬsha ve mvuhˇ naw ma tcuh yaˇ teˇ hpaˍ mehˆ gʼuˇ suhˍ ha lehˬ tuˬ cawˬ ve yoˬ teh‸, ngaˬ nawˬ hui hta‸ kʼoˆ laˇ ve yoˬ.

Mehˉ kʼai ve yaˇ paˍ awˬ lawn tawˇ pa haˉ te maˍ ve

11Yeˍsuˆ teˇ pawˆ kʼaw‸ kʼoˆ ve, Chaw teˇ gʼaˇ, yawˇ yaˇ paˍ nyiˇ gʼaˇ cawˬ ve yoˬ. 12Awˬ nyi paˍ teˇ gʼaˇ lehˬ, yawˇ awˬ pa hta‸ kʼoˆ piˇ ve, Ngaˬ pa-oˬ, ngaˬ gʼa cawˇ ve awˬ shinˉ pehˬ laˇ-oˆ teh‸ lawˬ htaˇ, awˬ pa yawˇ huiˉ maˬ hta‸ awˬ shinˉ pehˬ piˇ ve yoˬ. 13Awˬ hkʼaw‸ nawˉ maˇ maw maw, awˬ nyi paˍ teˇ gʼaˇ lehˬ, yawˇ ve mawˇ jeˬ hkʼa peu-eˬ hta‸ shaw yuˬ veu leh, vuiˇ ve mvuhˇmiˬ lo kʼai ve yoˬ. Oˇ kaˬ lo yawˇ miˬguiˬ ha lehˬ tuˬ te ponˬ te leuˉ leh, hpu shi mawˇ jeˬ hta‸ yehˇ baˬ caˇ baˬ peuˬ sheˬ ve yoˬ. 14Yawˇ hkʼa cawˬ ve hkʼa peu-eˬ hta‸ yehˇ baˬ peuˬ hkʼaw‸ nawˉ, mvuhˇmiˬ oˇ ve awˬ hkʼaw lo meu‸ lonˉ kaˆ lonˉ gaˬ la leh, yawˇ gʼa haˍ gʼa gʼawˇ jaˇ ve yoˬ. 15Hkʼe te leh, mvuhˇmiˬ oˇ ve awˬ hkʼaw lo chehˇ ve chaw teˇ gʼaˇ hta‸ yawˇ ca peun chehˇ taˍ ve yoˬ. Yawˇ yawˇ hta‸ heh hkʼaw lo va‸ ca hawˉ caˍ tcuh ve yoˬ. 16Va‸ caˇ ve nawˆ shiˍ teˇ hpaˍ hta‸ yawˇ hkʼa bvuhˆ caˇ gaˇ htawˇ, shu teˇ gʼaˇ ka‸ yawˇ hta‸ caˇ tuˬ maˇ caˍ piˇ. 17Yawˇ kʼaw‸ shiˍ kʼaw‸ nawˇ la leh, Ngaˬ pa geh chehˇ ve gʼaˇ hpfuhˇ caˇ shehˍ hpaˇ teˇ hpaˍ caˇ maˇ peuˬ dawˬ maˇ peuˬ ve ka‸, ngaˬ choˬ kaˬ lo meu‸ jehˇ kaˆ jehˇ leh suh tuˬ yoˬ. 18Ngaˬ tu leh ngaˬ pa geh kʼo‸-e leh, Ngaˬ pa-oˬ, ngaˬ lehˬ Gʼuiˬsha hta‸ ka‸ nawˬ hta‸ ka‸ te ya‸ peuˬ. 19Ya‸ nyi hkʼaw‸ nawˉ, nawˬ ve yaˇ teh‸ kʼoˆ laˇ ve hta‸ ngaˬ maˇ keunˍ. Nawˬ ve gʼaˇ hpfuhˇ caˇ shehˍ hpaˇ teˇ gʼaˇ hkʼe ngaˬ hta‸ shawˍ taˍ laˇ-oˆ kʼoˆ piˇ tuˬ yoˬ teh‸ yawˇ kʼoˆ ve yoˬ. 20Yawˇ tu leh awˬ pa geh kʼo‸-e ve yoˬ.

Yawˇ vuiˇ kuiˬ lo kʼaw‸ la chehˇ ve hta‸ awˬ pa gʼa mawˬ htaˇ, yawˇ hta‸ ha kʼaˉ leh, yawˇ geh gʼuiˇ kʼai ve yoˬ. Awˬ yaˇ paˍ ve kʼawˍ peˍ hta‸ yawˇ kʼuˉ taˍ leh boˆ nu ve yoˬ. 21Oˇ htaˇ awˬ yaˇ paˍ yawˇ hta‸ kʼoˆ piˇ ve, Ngaˬ pa-oˬ, ngaˬ lehˬ Gʼuiˬsha hta‸ ka‸ nawˬ hta‸ ka‸ te ya‸ peuˬ. Ya‸ nyi hkʼaw‸ nawˉ, nawˬ ve yaˇ teh‸ kʼoˆ laˇ ve hta‸ ngaˬ maˇ keunˍ. 22Awˬ ceˬ teˇ hpaˍ hta‸ awˬ pa kʼoˆ piˇ ve, Da‸ jaˇ ve aˉ po‸ lonˉ hta‸ haˆ haˆ yuˬ veu laˇ leh yawˇ hta‸ deh piˇ-oˆ. Yawˇ ve la‸ naw hta‸ la‸ peˍ tcuhˉ piˇ-oˆ. Hkui sheh hta‸ hkuiˉ nuˆ tcuhˉ piˇ-oˆ. 23Caˍ chu taˍ ve nuˇ ehˉ hta‸ sheh veu laˇ leh tiˇ pehˍ-o‸. Ngaˬ hui hti caˇ hti dawˬ leh ha lehˬ ha kʼa te-a veuˬ. 24Awˬ lawn kʼo, ngaˬ yaˇ paˍ chi lehˬ awˉ lawˉ htaˇ suh peuˬ htawˇ, chi beu‸ kʼaw‸ te‸ la peuˬ. Mehˉ kʼai peuˬ ve htawˇ, chi beu‸ kʼaw‸ mawˬ peuˬ teh‸ kʼoˆ leh, yawˇ hui ha lehˬ ha kʼa tanˬ te kʼai ve yoˬ.

25Awˬ viˉ paˍ teˇ gʼaˇ lehˬ, heh hkʼaw chehˇ taˍ ve yoˬ. Yawˇ kʼaw‸ la leh, yehˬ awˬ paˇ lo gaˬ la htaˇ, nawˍ meuˆ leh kʼaˍ hkʼeˆ ve awˬ hkawˇ hta‸ gʼa kaˇ ve yoˬ. 26Yawˇ awˬ ceˬ teˇ gʼaˇ hta‸ kuˬ leh, Aˬ hto‸ ma te chehˇ ve le teh‸ na nyi ve yoˬ. 27Awˬ ceˬ paˍ kʼoˆ ve, Nawˬ nyi paˍ kʼaw‸ kʼaw‸ la peuˬ. Yawˇ naˬ ve gawˬ ve luˬ ve sheˆ ve hta‸ gʼa ponˬ leh, awˬ pa yawˇ hta‸ gʼa kʼaw‸ ha‸ yuˬ ve pa taw, caˍ chu taˍ ve nuˇ ehˉ hta‸ tiˇ peuˬ teh‸ kʼaw‸ kʼoˆ piˇ ve yoˬ.

28Awˬ viˉ paˍ teˇ gʼaˇ nyi ma zuhˆ jaˇ leh, yehˬ hkʼaw maˇ lo‸-e. Hkʼe te leh, awˬ pa tawˆ la leh yawˇ hta‸ ca lawˬ hkawˉ ve yoˬ. 29Yawˇ awˬ pa hta‸ kʼaw‸ kʼoˆ piˇ ve, Nyi-o, ngaˬ lehˬ nawˬ ve awˬ ceˬ tiˉ te chehˇ ve awˬ hkʼaw‸ awˬ yanˇ chi maw maw gaˬ peuˬ. Nawˬ ve tawˇ teˇ hkawˇ hta‸ ka‸ ngaˬ maˇ ponˬ leuˉ jaw. Ya‸ hkʼaˇ, ngaˬ ve awˬ chawˇ teˇ hpaˍ geh ha lehˬ ha kʼa te tuˬ, aˉ che‸ ehˉ teˇ hkeh ceh ka‸ nawˬ teˇ pawˆ htawˇ ngaˬ hta‸ maˇ pe‸ laˇ jaw. 30Ya‸ hkʼaˇ, meh maˬ lanˉ hui geh awˬ chawˇ te leh, nawˬ ve hpu shi mawˇ jeˬ hta‸ yehˇ baˬ caˇ baˬ peuˬ ve, nawˬ ve yaˇ paˍ chi teˇ gʼaˇ kʼaw‸ la leh, caˍ chu taˍ ve nuˇ ehˉ yawˇ awˬ pon nawˬ tiˇ peuˬ law leˇ teh‸, awˬ pa hta‸ kʼaw‸ kʼoˆ piˇ ve yoˬ. 31Awˬ pa kʼaw‸ kʼoˆ ve, Ngaˬ yaˇ paˍ-oˬ, nawˬ lehˬ ngaˬ geh hkʼaˬ htaˆ ka‸ chehˇ ve yoˬ. 32Ngaˬ hkʼa cawˬ taˍ ve mawˇ jeˬ hkʼa peu-eˬ nawˬ ve deˇ deˇ yoˬ. Nawˬ nyi paˍ lehˬ, awˉ lawˉ htaˇ suh peuˬ htawˇ chi beu‸ kʼaw‸ te‸ la peuˬ. Awˉ lawˉ htaˇ mehˉ kʼai peuˬ htawˇ, chi beu‸ kʼaw‸ mawˬ peuˬ. Chi hta‸ pa taw, ha lehˬ ha kʼa te piˇ cawˇ tehˬ ve yoˬ teh‸, awˬ pa yawˇ hta‸ kʼaw‸ kʼoˆ piˇ ve yoˬ.

ప్రస్తుతం ఎంపిక చేయబడింది:

Luˉka‸ li‸ 15: LHBE

హైలైట్

షేర్ చేయి

కాపీ