Luˉka‸ li‸ 14

Gʼoˇ peˬ hkʼaw iˉ kaˆ cawˬ ve chaw teˇ gʼaˇ hta‸ Yeˍsuˆ gu na-e piˇ ve

1Shinˉ nyi teˇ nyi htaˇ Yeˍsuˆ lehˬ, Hpaˍriˍsehˇ awˬ moˍ awˬ hkʼaw lo awˬ hoˉ teˇ gʼaˇ ve yehˬ lo awˍ caˇ tuˬ lo‸-e peuˬ hkʼaw‸ nawˉ, yawˇ hui yawˇ hta‸ jaˆ nyi chehˇ ve yoˬ. 2Oˇ htaˇ, gʼoˇ peˬ hkʼaw iˉ kaˆ cawˬ leh hpo‸ naˬ ve chaw teˇ gʼaˇ yawˇ gʼuˇ suhˍ lo chehˇ taˍ ve yoˬ. 3Yeˍsuˆ kʼoˆ ve, Shinˉ nyi awˬ hkʼaw lo chaw naˬ hta‸ gu na-e piˇ cawˇ laˇ, maˇ cawˇ laˇ teh‸, awˬliˇtawˇhkawˇ shiˍ paˍ leh Hpaˍriˍsehˇ teˇ hpaˍ hta‸ na nyi ve yoˬ.

4Ya‸ hkʼaˇ, yawˇ hui ta‸ iˉ chehˇ taˍ ve yoˬ. Oˇ htaˇ, chaw oˇ ve hta‸ yawˇ yuˬ taˍ leh gu na-e piˇ peuˬ hkʼaw‸ nawˉ, yawˇ hta‸ hpehˇ piˇ ve yoˬ. 5Yawˇ yawˇ hui hta‸ kʼoˆ piˇ ve, Nawˬ hui awˬ hkʼaw lo chaw teˇ gʼaˇ gʼaˇ a shu yawˇ ve yaˇ paˍ maˇ kʼoˆ, nuˇ maˇ kʼoˆ, shinˉ nyi htaˇ nanˬ bawˍ awˬ hkʼaw lo ce lo‸-e ve kʼo, teˇ cawˬ haˉ maˇ gʼawˬ tawˆ piˇ ve a shu teˇ gʼaˇ cawˬ le teh‸ kʼoˆ piˇ ve yoˬ.

6Yawˇ hui lehˬ, tawˇ chi hta‸ te‸ chiˉ kʼaw‸ yaw hkʼaw‸ maˇ gʼa.

Hkehˉ caˇ kuiˬ lo kʼai ve chaw hui awˬ lawn

7Kuˬ taˍ ve chaw teˇ hpaˍ lehˬ, awˬ me‸ awˬ hponˇ cawˬ ve mui kuiˬ hta‸ leuˆ yuˬ chehˇ ve hta‸ yawˇ gʼa mawˬ ve teˇ yanˇ, yawˇ yawˇ hui hta‸ tawˇ pa haˉ te maˍ leh kʼoˆ piˇ ve, 8Chaw teˇ gʼaˇ gʼaˇ nawˬ hta‸ hkehˉ caˇ kuiˬ lo kuˬ ve teˇ yanˇ, awˬ me‸ awˬ hponˇ cawˬ ve mui kuiˬ hta‸ taˇ mui. Awˬ lawn kʼo, nawˬ a‸ kehˉ awˬ me‸ awˬ hponˇ cawˬ ve chaw hta‸ htawˇ yawˇ kuˬ taˍ ve kʼo, 9nawˬ hui nyiˇ gʼaˇ gʼaˇ hta‸ kuˬ shehˍ hpaˇ laˬ leh, Nawˬ ve mui kuiˬ chaw chi teˇ gʼaˇ hta‸ piˇ-oˆ teh‸, yawˇ nawˬ hta‸ kʼoˆ laˇ tuˬ yoˬ. Oˇ htaˇ nawˬ lehˬ, ya‸ taw ve awˬ hkʼaw lo shu a‸ kehˉ awˬ me‸ awˬ hponˇ maˇ cawˬ ve mui kuiˬ hta‸ gʼa kʼaw‸ mui tuˬ yoˬ. 10Chaw teˇ gʼaˇ gʼaˇ nawˬ hta‸ kuˬ ve teˇ yanˇ, shu a‸ kehˉ awˬ me‸ awˬ hponˇ maˇ cawˬ ve mui kuiˬ hta‸ mui-o. Oˇ hkʼe te ve kʼo, nawˬ hta‸ kuˬ shehˍ hpaˇ laˬ leh, Awˬ chawˇ-oˬ, chi a‸ kehˉ awˬ me‸ awˬ hponˇ cawˬ ve mui kuiˬ hta‸ ca mui-o teh‸ nawˬ hta‸ kʼoˆ laˇ tuˬ yoˬ. Oˇ htaˇ, nawˬ geh teˇ geh mui chehˇ ve chaw hkʼa peu-eˬ mehˆ gʼuˇ suhˍ nawˬ awˬ me‸ awˬ hponˇ gʼa tuˬ yoˬ. 11Awˬ lawn kʼo, a shu yawˇ awˬ to hta‸ taˍ uiˍ ve chaw hkʼaˬ ve teˇ gʼaˇ maˇ kʼoˆ, taˍ i ve hta‸ gʼa hkanˍ tuˬ yoˬ. A shu yawˇ awˬ to hta‸ taˍ i ve chaw hkʼaˬ ve teˇ gʼaˇ maˇ kʼoˆ, taˍ uiˍ ve hta‸ gʼa hkanˍ tuˬ yoˬ teh‸ kʼoˆ ve yoˬ.

12Yawˇ hta‸ kuˬ ve chaw teˇ gʼaˇ hta‸ htawˇ yawˇ kʼoˆ piˇ ve, Mvuhˇ shawˉ awˍ caˇ tuˬ maˇ kʼoˆ, mvuhˇ hpeu‸ awˍ caˇ tuˬ maˇ kʼoˆ, nawˬ shu hta‸ kuˬ ve teˇ yanˇ, nawˬ ve awˬ chawˇ awˬ paˆ teˇ hpaˍ, awˬ viˉ awˬ nyi teˇ hpaˍ, awˬ ceuˬ awˬ hkʼaˇ teˇ hpaˍ leh, awˬ paˇ awˬ kui lo chehˇ ve paw sha ve chaw teˇ hpaˍ hta‸ taˇ kuˬ. Oˇ hkʼe ve chaw hta‸ kuˬ ve kʼo, yawˇ hui htawˇ nawˬ hta‸ kʼaw‸ kuˬ leh awˬ bon kʼaw‸ te hkʼaw‸ laˇ tuˬ yoˬ. 13Ya‸ hkʼaˇ, nawˬ hti caˇ hti dawˬ tuˬ shu hta‸ kuˬ ve teˇ yanˇ, haˍ ve gʼawˇ ve chaw, hkui luˬ la‸ luˬ ve chaw leh, mehˆ cuˉ ve chaw teˇ hpaˍ hta‸ kuˬ-o‸. 14Chi hkʼe te ve kʼo, nawˬ awˬ bon uiˍ tuˬ yoˬ. Awˬ lawn kʼo, yawˇ hui nawˬ hta‸ awˬ bon kʼaw‸ te hkʼaw‸ laˇ maˇ gʼa. Hteˇ ve cawˇ ve chaw teˇ hpaˍ kʼaw‸ te‸ tu la ve awˬ yanˇ gaˬ kʼo, Gʼuiˬsha nawˬ hta‸ awˬ bon kʼaw‸ te hkʼaw‸ laˇ tuˬ yoˬ teh‸, Yeˍsuˆ kʼoˆ piˇ ve yoˬ.

Hti caˇ hti dawˬ lonˉ te ve awˬ lawn tawˇ pa haˉ te maˍ ve

15Yawˇ geh teˇ geh mui caˇ ve chaw teˇ gʼaˇ lehˬ, tawˇ oˇ ve hta‸ gʼa kaˇ htaˇ, Gʼuiˬ sha ve mvuhˇmiˬ awˬ hkʼaw lo gʼa caˇ gʼa dawˬ ve chaw teˇ gʼaˇ lehˬ, awˬ bon uiˍ ve yoˬ teh‸ Yeˍsuˆ hta‸ kʼoˆ piˇ ve yoˬ.

16Yeˍsuˆ kʼaw‸ kʼoˆ ve, Chaw teˇ gʼaˇ lehˬ, hti caˇ hti dawˬ lonˉ te tuˬ, chaw maˇ maˇ hta‸ kuˬ taˍ ve yoˬ. 17Hti caˇ hti dawˬ ve awˬ yanˇ gaˬ la htaˇ, Laˬ-o‸, hkʼa peu-eˬ gu taˍ peuˬ teh‸ kuˬ taˍ ve chaw teˇ hpaˍ hta‸ ca kʼoˆ piˇ tuˬ, yawˇ ve awˬ ceˬ hta‸ kʼai tcuh ve yoˬ. 18Yawˇ hui hkʼa peu-eˬ nyi ma teˇ shiˍ tiˉ taˍ leh, maˇ gʼa kʼai tuˬ lawˬ hkawˉ leh ca awˉ ve yoˬ. Awˉ lawˉ teˇ gʼaˇ kʼoˆ ve, Ngaˬ ti mi teˇ peˆ vuiˬ taˍ leh gʼa ca nyi ve pa taw, ngaˬ hta‸ a ciˉ hpehˇ laˇ-oˆ teh‸, yawˇ hta‸ lawˬ hkawˉ ve yoˬ. 19Awˬ kaˍ awˬ nu teˇ gʼaˇ kʼoˆ ve, Ngaˬ nuˇ ngaˇ ceh hta‸ vuiˬ taˍ leh gʼa ca te nyi ve pa taw, ngaˬ hta‸ a ciˉ hpehˇ laˇ-oˆ teh‸, yawˇ hta‸ lawˬ hkawˉ ve yoˬ. 20Awˬ kaˍ awˬ nu teˇ gʼaˇ kʼoˆ ve, Ngaˬ awˬ miˇ ma heuˆ peuˬ leh, laˬ maˇ hpeh‸ teh‸ kʼoˆ piˇ ve yoˬ.

21Hkʼe te leh awˬ ceˬ kʼaw‸ la leh, yawˇ ve awˬ jawˇmawˇ hta‸ awˬ lawn oˇ ve teˇ hpaˍ hto piˇ ve yoˬ. Oˇ htaˇ yehˬ shehˍ hpaˇ nyi ma zuhˆ jaˇ leh yawˇ ve awˬ ceˬ hta‸ kʼoˆ piˇ ve, Venˇ hkʼaw ya‸ kʼaw lonˉ ya‸ kʼaw ehˉ teˇ hpaˍ lo haˆ haˆ kʼai leh, haˍ ve gʼawˇ ve chaw, la‸ luˬ ve chaw, mehˆ cuˉ ve chaw leh hkui luˬ ve chaw teˇ hpaˍ hta‸ ca kuˬ veu laˇ-oˆ teh‸ kʼoˆ piˇ ve yoˬ. 22Oˇ ve hkʼaw‸ nawˉ awˬ ceˬ kʼaw‸ kʼoˆ ve, Jawˇmawˇ-oˬ, nawˬ kʼoˆ laˇ ve hkʼe te taˍ peuˬ. Ya‸ hkʼaˇ, chehˇ kuiˬ cawˬ sheˍ teh‸ kʼoˆ piˇ ve yoˬ. 23Awˬ jawˇmawˇ kʼaw‸ kʼoˆ ve, Venˇ awˬ baˬ lo ya‸ kʼaw lonˉ leh ti mi hkʼaw kʼai ve ya‸ kʼaw ehˉ teˇ hpaˍ lo kʼai leh, ngaˬ ve yehˬ hkʼaw chaw biˇ la tuˬ, laˬ htaˇ hkʼa gaˬ kuˬ veu laˇ-oˆ. 24Awˬ lawn kʼo, ngaˬ nawˬ hui hta‸ kʼoˆ laˇ ve, awˉ lawˉ htaˇ kuˬ taˍ ve chaw teˇ hpaˍ teˇ gʼaˇ ka‸ ngaˬ ve caˇ tuˬ hta‸ maˇ gʼa leh‸ nyi teh‸, awˬ ceˬ hta‸ kʼoˆ piˇ ve yoˬ.

Awˬ hpfuhˇ hta‸ shawˍ nyi ve awˬ lawn tawˇ pa haˉ te maˍ ve

25Oˇ htaˇ, chaw awˬ moˍ lonˉ teˇ hpaˍ yawˇ geh kʼai chehˇ ve teˇ yanˇ, yawˇ hpfuhˆ nyi leh yawˇ hui hta‸ kʼoˆ piˇ ve, 26Ngaˬ awˬ hkʼaˇ suh laˬ ve chaw hkʼaˬ ve teˇ gʼaˇ maˇ kʼoˆ, a shu yawˇ ve awˬ pa awˬ e, awˬ miˇ awˬ yaˇ, awˇ viˉ awˬ nyi teˇ hpaˍ hta‸ maˇ kʼoˆ, a shu yawˇ ve a sha‸ hta‸ maˇ kʼoˆ, maˇ canˇ ve kʼo, ngaˬ ve awˬ la‸ gʼawˇ te maˇ hpeh‸ taˬ. 27Chaw hkʼaˬ ve teˇ gʼaˇ maˇ kʼoˆ, a shu yawˇ ve la‸ ka hta‸ taˆ leh ngaˬ hkʼaˇ suh maˇ laˬ ve kʼo, ngaˬ ve awˬ la‸ gʼawˇ te maˇ hpeh‸ taˬ.

28Awˬ lawn kʼo, nawˬ hui awˬ hkʼaw lo chaw teˇ gʼaˇ gʼaˇ, mvuh ve yehˬ lonˉ hta‸ te gaˇ ve kʼo, yehˬ oˇ ve hta‸ te peuˬ tuˬ yawˇ hpu law‸ leh naˍ, maˇ law‸ leh naˍ, hkʼaˬ ma peuˬ tuˬ ve hta‸ mui taˍ leh awˉ lawˉ maˇ shawˍ nyi ve chaw teˇ gʼaˇ gʼaˇ cawˬ laˇ. 29Chi hkʼe maˇ shawˍ nyi ve kʼo, yehˬ awˬ hkuiˉ puiˍ hta‸ yawˇ kawˍ taˍ peuˬ hkʼaw‸ nawˉ, peuˬ htaˇ hkʼa gaˬ te maˇ gʼa ve kʼo, hkʼa gʼa mawˬ ve chaw teˇ hpaˍ yawˇ hta‸ kʼoˆ guiˇ gʼuiˬ guiˇ leh chi hkʼe kʼoˆ tuˬ yoˬ. 30Chi hpaˇ lehˬ, yehˬ awˬ hkuiˉ puiˍ tanˬ te sheˬ leh, peuˬ htaˇ hkʼa gaˬ te maˇ gʼa law teh‸ kʼoˆ tuˬ yoˬ.

31Maˇ heˆ kʼo, hkunˉ hawˉ hkanˇ teˇ gʼaˇ lehˬ, awˬ kaˍ awˬ nu hkunˉ hawˉ hkanˇ teˇ gʼaˇ hta‸ bawˆ da‸-a teh‸ te ve teˇ yanˇ, shu ve ma‸ yaˇ nyiˇ meunˍ laˬ ve hta‸ yawˇ ve ma‸ yaˇ teˇ meunˍ bawˆ gʼaˇ tuˬ naˍ, maˇ gʼaˇ tuˬ naˍ, mui taˍ leh awˉ lawˉ hkʼa deh‸ maˇ dawˇ nyi ve hkunˉ hawˉ hkanˇ teˇ gʼaˇ gʼaˇ cawˬ laˇ. 32Maˇ gʼaˇ ve hta‸ shiˍ kʼo, awˬ kaˍ awˬ nu hkunˉ hawˉ hkanˇ teˇ gʼaˇ vuiˇ kuiˬ lo laˬ chehˇ htaˇ ka‸ yawˇ ve awˬ tan te shehˍ hpaˇ teˇ hpaˍ hta‸ kʼai tcuh leh, kʼaw‸ cawˇ da‸ hui da‸ tuˬ yawˇ lawˬ hkawˉ tuˬ yoˬ. 33Chi hkʼa shuˍ shuˍ, nawˬ hui awˬ hkʼaw lo hkʼaˬ ve chaw teˇ gʼaˇ maˇ kʼoˆ, yawˇ hkʼa cawˬ ve hkʼa peu-eˬ hta‸ maˇ baˬ taˉ ve kʼo, ngaˬ ve awˬ la‸ gʼawˇ te maˇ hpeh‸ taˍ.

Pehˆ kʼai ve aˉ leh‸ awˬ lawn

34Aˉ leh‸ lehˬ, da‸ ve yoˬ. Ya‸ hkʼaˇ, mehˬ ve pehˆ kʼai peuˬ ve kʼo, hkʼaˬ hkʼe te kʼaw‸ mehˬ la tuˬ le. 35Aˉ leh‸ oˇ ve lehˬ, miˬguiˬ awˬ pon maˇ kʼoˆ, miˬ hkuiˇ te tuˬ awˬ pon maˇ kʼoˆ, awˬ bon maˇ cawˬ leh, aˉ kʼa‸ paˉ lo shu yuˬ baˬ sheˬ ve yoˬ. Kaˇ tuˬ naˍ paw cawˬ ve chaw na-o teh‸ kʼoˆ piˇ ve yoˬ.

ప్రస్తుతం ఎంపిక చేయబడింది:

Luˉka‸ li‸ 14: LHBE

హైలైట్

షేర్ చేయి

కాపీ