Génesis 21
21
Isaac yurishqan
1Abrahamta Tayta Dios promitishqannölami Sara qeshyaq rikakurqan. 2Abraham awkinna kaykaptinpis Tayta Dios jitapashqan killachömi olqu wamrata Sara qeshyakurqan.#Heb. 11.11-12. 3Sara wachaykuptinnami Abrahamqa surinta jutisirqan Isaac jutin kananpaq. 4Yurishqanpita puwaq junaqyuq kaykaptinmi Tayta Dios nishqannöla surinpa penqayninta señalarqan.#Gén. 17.12; Hech. 7.8. 5Abraham pachak (100) watayuq kaykaptinmi surin Isaac yurirqan.
6Saypitanami Sara nirqan: <<Wawayuq kanäpaq Tayta Dios wilamaptinmi asikurqä.#Gén. 18.12-15. Wakin runakunapis wawayuq kashqäta musyarmi kushikur asikuyanqa. 7Wawayuq kanäpaq kashqanta ¡piraq Abrahamta ninman karqan! Runä awkinna kaykaptinpis wawata tariykushkämi>>.
Agarta wawantinta Abraham qarqushqan
8Isaac winarkuptinnami maman wasqirqan. Say junaqmi Abrahamqa kushikuypita fiestata rurarqan. 9Say junaqmi Agarpa wawan Ismael Isaacta burlakur puklakuykaqta Sara rikarqan. 10Saymi Abrahamta Sara nirqan: <<¡Say ashmaytaqa wawantinta jukla qarquy! Say warmipa wawanqa wawä Isaacwan manami herencianta rakipänakuyanmansu>>.#Gál. 4.30.
11Sayno niptinmi Abraham fiyupa lakikurqan Ismaelpis surin kaptin. 12Saymi Abrahamta Tayta Dios nirqan: <<Suriki Ismaelpaq y ashmayniki warmipaqqa ama lakikuysu. Qamta promitishqäqa suriki Isaacpaq y paypita miraqkunapaqmi kaykan. Sayno kaykaptinqa Sara nishushqaykita ruray.#Rom. 9.7; Heb. 11.18. 13Ashmaynikipa wawan Ismaeltapis suriki kaptinmi yanapäshaq. Saymi askaman mirar jatun nación rikakunqa>>.
14Tayta Dios sayno niptinmi Abraham waraynin tuta saka sakala Agarta mirkapata y yakutapis kamariparqan. Saykunata apariparkurmi wawantinta despacharqan. Saymi Beersebalächo sunyaq jirkaman chaykur wawanwan Agar pantakash puriyarqan. 15Apashqan yaku ushakaskiptinmi wawanta jacha chakinman jamaykasirqan. 16Yakunaywan wanuqta rikayta mana munarmi karuläman aywaykur jamakuykurqan. Saymi wawan fiyupa waqarqan.
17Ismael waqashqanta wiyarmi Tayta Diospa angilnin jana pasapita qayakamur nirqan: <<¿Imanankitaq, Agar? Ama mansariysu. Wawayki waqaykashqanta Tayta Dios wiyashqami. 18Kutir wawaykita shoqay. Nirkur amana kachaynasu. Paytapis juk nación rikakushqanyaq mirananpaqmi yanapäshaq>>.
19Nirkurnami Agarta Tayta Dios rikasirqan pukyucho yaku kaykaqta. Saymi yaku purisikunanman juntata wishirkur wawanta upusirqan. 20Tayta Dios yanapaptinmi wamra ali winarqan. Sunyaq jirkalacho tashpanmi jirka uywakunata flëchawan wanusiyta yachakurqan. 21Paykuna täyarqan Parán sunyaq jirkalachömi. Maqtayarkuptinnami Egipto jipashta maman ashiparqan.
Abimelecwan Abraham pactuta rurayashqan
22Say wisanmi soldädunkunapa capitannin Ficolwan rey Abimelec#Gén. 26.26. aywayarqan Abrahamwan parlayänanpaq. Chaykurmi niyarqan: <<Lapan rurashqaykicho Tayta Dios yanapäshushqaykitami tantiyashkä. 23Saymi kanan shayämushkä shumaq wilanakunansipaq. Tayta Diospa jutincho promitimay noqata ali rikamashqaykino surïkunata y paykunapita miraqkunatapis ali rikaykunaykipaq. Saynöla kaycho taqkunatapis ali rikaykulay>>.
24Sayno niptinmi Abraham nirqan: <<Diospa jutinchömi promitï nimashqaykino ruranäpaq>>.
25Saypitanami Abimelecta Abraham nirqan: <<Ashmaynïkuna yakuta jorquyänanpaq uchkuyashqan pözutami ashmaynikikuna qechuyämash>>.
26Saymi Abimelec nirqan: <<Kananyaq manami sayta mayashkäsu. Qampis manami wilamashkankisu. Manami musyäsu mayqan kaq ashmaynï sayta rurashqantapis>>.
27Sayno wilanakuskirmi Abrahamqa Abimelecta qararqan uyshakunata, cabrakunata y wäkakunata. Say junaqmi Abrahamwan Abimelec pactuta rurayarqan imaypis ali kawayänanpaq. 28Nirkurmi uyshankunapita qanchis masta Abraham rakirqan. 29Rakiqta rikaykurmi Abimelec tapur nirqan: <<¿Imapaqtaq say qanchis uyshakunata rakishkanki?>>
30Saymi Abraham nirqan: <<Kay qanchis uyshakunata rakishkä chaskimaptiki say pözu noqapa kashqanta pïmaypis musyayänanpaqmi>>.
31Saycho pactuta rurayashqanpitami say partita jutisiyarqan Beerseba#21.31 Beerseba ninanqa Juramentu Pözu ninanmi. jutin kananpaq. 32Beersebacho pactuta ruraskirnami Abimelecwan Ficol kutikuyarqan filisteo runakuna täyashqan partiman. 33Beersebachömi Abraham plantarqan tamarisco jachata.#21.33 Say jachata plantarqan Tayta Dios yanapashqanta yarparänanpaqmi. Saychömi imayyaqpis kawaq Tayta Diosta manakur adorarqan. 34Abrahamqa aska watami filisteo runakuna täyashqan particho tarqan.
ప్రస్తుతం ఎంపిక చేయబడింది:
Génesis 21: qvhB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.
