Génesis 20
20
Sarata warminpaq Abimelec pushasishqan
1Saypitanami Neguevpa päsar Abraham tarqan Cadespita Shurman päsaq sunyaq jirkacho. Saypitanami Gerar markaman aywakurqan saycho tänanpaq. 2Saycho taykarmi warminpaq Abraham nirqan: <<Payqa panïmi>>.#Gén. 12.13; 26.7. Sayta musyaykurmi Gerarpa mandaqnin rey Abimelec Sarata pushasirqan warmin kananpaq.
3Pushasishqan sakaymi Abimelecta sueñuynincho Tayta Dios nirqan: <<Warmikipaq pushasimushqayki warmi runayuqmi kaykan. Saypitami kanan wanunki>>.
4Abimelecqa Sarawan manaraqmi punurqanraqsu. Saymi nirqan: <<Tayta Dios, paywan manaraq punuykaptïqa ¿imanirtaq wanusimayta munanki? 5Kikin Abrahammi nimash panin kashqanta. Saynölami Sarapis nimash turin kashqanta. Sayno nikäyämaptinqa manami imatapis lutanta rurashkäsu>>.
6Sayno niptinmi sueñuynincho Tayta Dios nirqan: <<Aw, noqapis musyämi lutala imatapis mana rurashqaykita. Saynöpami jusalikunaykita mana munar say warmiwan pununaykitapis kachapashkäsu. 7Kananqa runanman say warmita kutisiy. Runanqa noqapa wilakuqnï profëtami kaykan. Kutisiptikiqa mana wanunaykipaqmi manakamanqa. Warminta mana kutisiptikimi isanqa qamta y wayikicho lapan taykaqkunata ushakäsishayki>>.
8Pasa wararkuptinnami lapan mandäsiqninkunata qayaykasir sueñushqanta Abimelec wilarqan. Sayno wilaptinmi paykuna fiyupa mansakäyarqan. 9Nirkurnami Abrahamta qayaykasimur Abimelec nirqan: <<¿Imamantaq jitarpariykamashkanki? ¿Imachötaq rabyanäsishkä noqata y makïcho kaqkunata jusalikuyman jitarpamänaykipaq? Saytaqa mana alitami ruraykushkanki. 10¿Imata yarpartaq Sara paniki kashqanta nimarqayki?>>
11Sayno niptinmi Abraham nirqan: <<Noqa yarparqä kay markacho runakuna Tayta Diosta mana mansapakuyashpan warmïpaq rayku wanusiyämänanpaq kashqantami. 12Panï kaytaqa panïmi kaykan. Isanqa papänïpa surïpakuyninmi. Kananqa warmïnami kaykan. 13Papänïpa wayinpita yarqakamunäpaq Tayta Dios nimaptinmi Sarawan wilanakuyarqä mayman chäyaptïpis turin kashqäta ninanpaq>>.
14Abraham sayno niptinmi Abimelec kutisirqan Sarata. Kutisirnami Abrahamta qaraykurqan uyshakunata, cabrakunata, wäkakunata, ashmay warmikunata y ashmay runakunatapis. 15Nirkurmi payta nirqan: <<Musyashqaykinöpis noqapa makïchömi kay nación kaykan. Munashqaykicho täkunaykipaq akrakuy>>.
16Nirkurnami Saratapis nirqan: <<Turikita qoykushqäkunaqa waranqa (1,000) siclo qellay chaninmi kaykan.#20.16 Juk siclo qellayqa juk killa aruypa chaninmi karqan. Saymi kananqa honornikita pipis parlaykäyanqanasu>>.
17-18Sarata apashqanpitami Abimelecpa warminta y warminpa ashmayninkunatapis Tayta Dios qoluqyäsish karqan. Saymi Sarata shuntarkurna Abrahamqa Abimelecpaq Tayta Diosta manakurqan. Manakuptinmi Abimelecta, warminta y warminpa ashmayninkunatapis aliyäsirqan wawayuq kayänanpaq.
ప్రస్తుతం ఎంపిక చేయబడింది:
Génesis 20: qvhB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.
