Génesis 22
22
Tayta Diosta Abraham cäsukushqan
1Saypita aska wata päsarkuptinnami Tayta Dios musyayta munarqan Abraham cäsukuq kashqanta o mana cäsukuq kashqantapis. Saymi qayarqan: <<¡Abraham!>> nir.
Niptinmi Abraham nirqan: <<¿Imalataq, Taytay?>>
2Saymi Tayta Dios nirqan: <<Japalan kuyay suriki Isaacta pushakurkur Moriah partiman ayway. Saychömi juk jirkata rikasishayki. Say jirkachömi sacrificiupaq surikita rupasinki>>.
3Saymi Abrahamqa waraynin tuta saka sakala yantata seqtarkur ashnunman chaqnakurqan#22.3 Wakin runakunaqa cargakurqan niyanmi.. Nirkurmi ishkay ashmayninkunatawan surin Isaacta pushakurkur aywayarqan. 4Kimsa junaq aywaykäyashqanchönami Abraham rikarqan say jirka karucho kaykämuqta. 5Saymi pushashqan ashmayninkunata nirqan: <<Wamraläwan aywar taqay jirkacho Tayta Diosta adoraskayämushaq. Qamkuna kaylacho kutiyämushqäyaq ashnunsita misipaykäyay>>.
6Sayno nirmi Abrahamqa sacrificiuta rupasinanpaq yantata apariparqan surin Isaacta. Nirkurnami ninata y cuchilluta apakurkur surinwan aywayarqan.
7Aywaykäyashqanchömi papäninta Isaac nirqan: <<¡Papä!>>
Abrahamnami nirqan: <<¿Imatataq munaykanki, hïju?>>
Saymi Isaac tapurqan: <<Ninata y yantatapis apaykansimi. Sacrificiuta rupasinansipaq carnishtaqa ¿imanirtaq apansisu?>>
8Sayno tapuptinmi papänin nirqan: <<Tayta Diosmi carnishtaqa kamarimunqa, hïju>>.
Sayno parlaraykarmi aywayarqan.
9Tayta Dios rikasishqan jirkaman chaykurmi altarta Abraham perqarqan. Say altar jananmanmi yantata shumaq churarqan. Nirkurnami surin Isaacta pankarkur yanta jananman jitarkurqan.#Stg. 2.21. 10Cuchilluta aptarkur surinta wanusinanpaqna kaykaptinmi 11Tayta Diospa angilnin jana pasapita qayakamur nirqan: <<¡Abraham! ¡Abraham!>>
Saymi Abraham nirqan: <<¿Imalataq, Taytay?>>
12Niptinmi angilna nirqan: <<Ama surikita wanusiysu. Kananqa musyänami Tayta Diosta mansapakushqaykita. Japalan kuyay suriki kaykaptinpis manami ñëgamashkankisu>>.
13Niptin tikraykushqanchömi juk carni shatacho sarikash kaykaqta Abraham rikarqan. Say carnitami surinpa trukan sacrificiupaq rupasirqan.#Heb. 11.17-19. 14Saynöpami Abraham say jirkata jutisirqan <<Tayta Dios kamaripan>> jutin kananpaq.#22.14 Hebreo idiömachömi say juti kaykan Yahweh-yireh. Saypitami kananyaqpis runakuna niyan: <<Jirkachömi Tayta Dios kamaripämäshun>>.
15Sacrificiuta rupaskasiptinnami Tayta Diospa angilnin jana pasapita Abrahamta yapay qayakur nirqan: 16<<Tayta Diosmi nin: <Nishqäta cäsukamarmi japalan kuyay surikitapis ñëgamashkankisu. Saymi kikïpa jutïcho jurar nï: 17Rasunpaypami bendicionnïta qoshayki. Saynöpis askaman mirayänanpaqmi qampita miraqkunata yanapäshaq. Jana pasacho qoyllarkunanömi y lamar kuchuncho aqushakunanömi yupaytapis mana atipaypaq kayanqa.#Heb. 6.13-14; 11.12. Paykunaqa chikiqninkunatapis lapantami vinciyanqa. 18Qampita miraqpitami kay pasacho pïmay runakunapis bendicionta chaskiyanqa.#Hech. 3.25; Gál. 3.8. Sayno kanqa nishqäta cäsukamashqaykipitami> >>.
19Nirkurnami Abraham kutikurqan ashmayninkunata kachaykushqan kaqman. Saypitanami Beersebaman ashmayninkunawan kutikuyarqan.
Nacorpa surinkuna
20Saypitanami Abrahamta wilayarqan wawqin Nacorpa surinkuna warmin Milcacho kayashqanta. 21Nacorpa qechpa surinpa jutinmi karqan Uz. Uzpa shulka wawqinmi karqan Buz. Buzpa shulkannami karqan Kemuel. Kemuel karqan Arampa papäninmi. 22Nacorpa wakin surinkuna kayarqan Quesed, Hazo, Pildas, Jidlaf y Betuel. 23Betuel karqan Rebecapa papäninmi. Say puwaq surinkuna kayarqan Nacorpa warmin Milcacho yuriqkunami.
24Saynölami concubïnan Reúmachöpis Nacorpa surinkuna kayarqan Teba, Gaham, Tahas y Maaca.
ప్రస్తుతం ఎంపిక చేయబడింది:
Génesis 22: qvhB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.
