Mezlər ta Maslaŋ hay 5
5
1Ndana ɓa, mezel Ananiyas va ŋgwaza Safira, ac ka cacala ma teceŋ fa slam ana. Ananiyas ka husamda ley tec ɓa may, 2ka vəna səlay ana dəɓa ecew, ka raɓda gəva leŋgeɗey. Dərziya ana, ke hwedecen maslaŋ hay, e vecen sə, ara səlay te ley teceŋ ana fakwanay cay. Ŋgwaza Safira a sən ma da yaŋ ana fakwanay. 3Amaa Piyer ka gwaɗa Ananiyas, gege: «Ananiyas, ka vana cəv kad bay ta haalay de sehw pa rav takaa sə, mafay te mey? Ka ka ŋgəlafa ma Mesfen Mavəna, afa ka raɓafa dərziya ta səlay te ley takaa ana. 4Wagaa ka ta husamda ley ana sə, naa maŋga bay da yaŋ ana sə, kaa. Kwa masa ka ka husamda cay nesey sə, maŋga bay da yaŋ səlay ana kaa jaŋgata biba? Naa ka wulak meŋgə jə ana ara nesey sə, mafay te mey? Ka ŋgal ma nesey sə, fa Zlav bəna, fa ndana hay bay.»
5Masa Ananiyas a cəna ma ana ara nesey sə, tam! E təɗey, a məcay. Ndah macəna labara ana nesey sə, zidaw ke ŋgec mabay. 6Wudeh gawlah ɓa ec ke dekey, ac ka paɗa macəhwandaw ana, ac ka hwadaɗ pa jəvay.
7Ke ŋgə ler mahkar ava dəɓa ana, ŋgwaza Safira mavaŋga. Amaa ka sən jə masa e ŋgə da yaŋ mawula sə, aabay. 8Piyer ka nəkafa, gege: «Ŋguzdawa, akwa husamda ley takwar sə, səlay ana tar ara na war geyey?» Ka vahan, gege: «Aŋga, anda husamda sə, ara nesey ana.» 9Piyer ka gwaɗa, gege: «Akwa cacala ma takwar ava mawulak fa slam ana ka ta cak Mesfen Mavəna ara nesey sə, mafay te mey? Aha, wudeh mapəsaha mawulak sə, ac kana fəma ta way. Ac ta pəsahakaa ara aŋga ana.» 10Faŋga faŋga ana, ŋgwaz sə, tam! E təɗey, a məcay. Wudeh gawlah sə, ece sehwekey, ac ta ŋgatafa ka məcata cay. Ac ka kəsaw, ac ka hwadaɗ pa jəvay a cak ta mawula. 11Ava dəɓa ana, zidaw ke ŋgec mabay kad Macam yaŋ ta ndah ta Zlavay fakwanay va ndah macəna labara ana hay.
Maslaŋ hay aca ŋgə cah hay
12Maslaŋ hay ac ka ŋgə cah hay mabay dapa taɓa ta ndana hay, de ŋguzdek gədaŋ ta Zlavay. Fa pas ana, fa pas ana, makəsparav hay fakwanay ece dey pə Way ta kwakwas, aca kwas vaw faŋga ava rav pal amta da dara zəmbek ta Salmaŋw. 13Ndah dərziya hay masa ac ka kəs ma te Yesu mambəla ana aabay sə, aca wal makwas vaw eve eceŋ bay, afa aca ŋgə zidaw. Ava aŋga ana fakwanay ndana hay ece hehəmec makəsparav hay ana. 14Cəɗem cəɗem ndana hay ece sekekey kad veŋ eceŋ ana, mawulah va ŋgwaza hay aca kəs ma ta Bay Mazlakava Yesu, aca cam vaw kad veŋ maslaŋ hay te Yesu. 15Maslaŋ ana hay ana ec ke ŋgə cah hay ava gədaŋ ta Zlavay. Mafay ana, ndana hay ec ke hwedek ndah gwabay hay kad ma te cəvey. Ece hwedec ndah gwabay ana kad faŋga sə, ac manaha da yaŋ caɓay, daha aabay da yaŋ gədegəde. Piyer e dey jaka pe cəvey ana ŋgesey, meezeŋ tata e husefec ndah dərziya, ece mbəley. 16Ndana hay mabay ec ke dek da gəva hay mekele mekele masa zef eve berne te Zeruzelem, ec ke hwedek ndah gwabay hay va ndah masa ac ava damkwaw hay. Ndana hay fakwanay ec ke mbəleceŋ dapa mehecey teceŋ.
Ece ŋgedec marga kad maslaŋ hay
17Yaw, mazlakava ta ndaakwas hay va ndah da cak tata, ara megweɗey ndah masa ac deveŋ Saaduki hay, ec ke ŋgə səlek mabay da yaŋ maslaŋ hay. Mafay ana, ac ka cə mamənak, aca wal meŋgedec marga. 18Ec ke təhezec maslaŋ ana hay, ec ke hwedeɗec pa daŋgay. 19Amaa, ta vaɗ ana ŋgesey, maskəla ta Bay Mazlakava ke dekey, ka wuna ma ta way ta daŋgay ana, ke həlekec kad a vəda, ke gweɗec, gege: 20«Madaɗay pə Way ta kwakwas, mebəzedecen ma hay fakwan da yaŋ mesfen nesey kad ndana hay.» 21Maslaŋ ana hay ec ke cənecen ma. Metev ta slamɓal, ec ke dey pə Way ta kwakwas, faŋga ec ke sesərekec ndana hay.
Dapa ŋgesey ana, mehusek ta mazlakava ta ndaakwas hay, aŋga va ndah da cak tata sə, ec ke zelekec ndah maca mamənak te Zuwef hay kad pa macam yaŋ mazlakava te Isreyel hay. Ac ka zlar ndana hay ke te kəsekec maslaŋ hay dapa daŋgay. 22Mahusa ta ndah ana pa daŋgay sə, ec ke ŋgetec maslaŋ ana hay aabay. Ec ke vehekeceŋ, ec ke gweɗecen ma ana kad ndah mazlakava hay maca mamənak hay, 23gege: «Anda ŋgatafa ma ta way ta daŋgay ana maɓəzla mambəla ana, ndah maɓəla ndah dapa daŋgay ana ac fəma ta way ana. Amaa mesehw taciya pa sə, andə ka ŋgat ndana dapa aabay.»
24Bay ta ndah maɓəla Way ta kwakwas va bay hay ta ndaakwas hay sə, masa aca cəna ma ana sə, ke dəŋgezlecen yaŋ avəda, aca sən jə masa meŋgec kad maslaŋ ana hay sabay. 25Ndana mekele ɓa, ke dekey, gege: «Maha, macak zləmay, ndah masa akwar te kezleɗec pa daŋgay sə, ac dapa Way ta kwakwas, ece sesərekec ndana hay.»
26Ava dəɓa ana, bay hay ta ndah maɓəla Way ta kwakwas va kafaraŋ tata hay ec ke dey ke te təhezekec maslaŋ ana hay. Kafaraŋ ana hay ec ke peyefec maslaŋ tata ana hay ava gədaŋ aabay, afa ece lel fa ndana hay ac te kelec eve kekeŋ. 27Ava dəɓa ta masa ec ke kəsekec avəda, ec ke ŋguzdec fəma ta ndah mamənak te Zuwef hay. Mazlakava ta ndaakwas hay ka nəkafa, gege: 28«Andaw ka vakwar cəv ta mabəzad ma kad ndana hay da yaŋ nda ana aabay, amaa akwar ke ŋguzdecen ma ana kad ndah dapa berne te Zeruzelem fakwanay. Asaya, akwa wal ndana hay fakwanay aca ra wulakiya sə, andaw ta kəɗ nda ana biba?»
29Piyer va maslaŋ hay dərziya ec ke vehecen ma ana, gege: «Taciya sə, anda nah yaŋ kad Zlavay, da yaŋ manah yaŋ kad ndana hay. 30Akwar ka kəɗa Yesu ana avəda fa hap mazləlawa. Amaa Zlav Papaŋ ta papaŋ tandakwa hay ke pərekek avəda dapa maməcay. 31Yesu ana sə, aŋga nda masa Zlav ka kəsa avəda kad ha ta zam tata da baymaləvaŋ. Ka paɗ ka nda mazlakava, nda mambəla ndana hay. A ŋgiya ara nesey, a wal mewunecen cəv kad Isreyel hay aca ra ŋgwada rav teceŋ, aca ra yah Zlavay ava rav tec amta, Zlav e de pəlecen mebər teceŋ. 32Andaw sə, anda tə yaw da yaŋ jeŋ ana hay fakwanay. Mesfen Mavəna masa aŋga te vec kad ndah manahan yaŋ hay sə, a tə yaw da yaŋ ana ara nesey.»
33Mazlakava hay maca mamənak sə, rav ke hecec mabay da yaŋ ma masa ac ta cəna, mafay ana, aca wal mekəɗec avəda cukw cukw. 34Amaa nda amta dapa taɓa ta ndah maca mamənak ke zleftek, nda ana aŋga Farisa ana, mezel Gamaliyel. Aŋga nda mesesərekecen ma majawa kad ndana hay masa ndana hay aca hahəmiya deveŋ tərsam hay fakwanay. Ke və cəv te mehəlekec ndah matəhaza sə, kad a vəda ta manjah kusetke. 35Ava dəɓa ana, ke gweɗec mazlakava hay maca mamənak sə, gege: «Akwar Isreyel hay, map leŋgesl da yaŋ jə masa akwar te ŋgec kad ndah nesey. 36Masənafa, zleezle sə, ndana ɓa mezel Tewdas ke dekey, ke gweɗ, gege: “Yey sə, ya nda mazlakava”. Ndana hay gaa, ec ke ŋgə temere faɗ masa ac ka cəpaw. Amaa ndah mekele ac ka kəɗa avəda cukw cukw. Ndah macəpiya sə, ec ke kwekwecec fakwanay, ma ana ka maməhata. 37Ava dəɓa tata, ndana ɓa mezel Zudas, nda Gelile ana. Nda ana ke dekey dapa masa ndana hay aca vində vaw. Aŋga ana sə, ka həlaɓa ndana hay gaa ka ta cəpiya. Ava dəɓa ana, ac ka kəɗa avəda cukw cukw saya, ndah macəpiya sə, ec ke kwekwecec saya may. 38Mafay ana, ya gwaɗakwar, akwar ta həzla yaŋ takwar mafay ta ndah ana bay, megərdec aca ra daɓa. Daha mawulak yaŋ teceŋ va mezlər teceŋ ana, ece dek dapa gədaŋ ta ndana sə, ece meməheceŋ. 39Amaa daha mawulak yaŋ teceŋ va mezlər teceŋ ana e dek dapa gədaŋ ta Zlavay sə, ŋgesey, akwa zlafa maziya bay. Map leŋgesl, afa akwar te ŋgə vəram ava Zlav bay.»
Mazlakava hay maca mamənak sə, ac ka kəs ma ta Gamaliyel ana. 40Ec ke zelekec maslaŋ hay sə, saya. Ec ke kəɗeceŋ, gege: «Akwar ta bəzad ma da yaŋ Yesu ana sabay.» Ec ke pəleceŋ.
41Maslaŋ hay sə, ac ka data dapa taɓa ta ndah maca mamənak te Zuwef ana hay, ac fakwanay ec ke wesley, afa Zlav ke weleceŋ, ac mak te maɓəs marga hay mafay te mezel te Yesu. 42Cəɗem cəɗem, ece dey pə Way ta kwakwas. Asaya, a way ta ndah mekele mekele, ece sesərekecen Labara mambəla ana da yaŋ Yesu Kəristi kad ndana hay faŋga, kwa ac ka gərda mabəzadiya aabay. Ac ka bəzad ma da yaŋ Yesu ana sə, aŋga nda masa Zlav ta yahaɗha ka ta mbəl ndana hay.
ప్రస్తుతం ఎంపిక చేయబడింది:
Mezlər ta Maslaŋ hay 5: CUVnt
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 CABTAL
