Mezlər ta Maslaŋ hay 6
6
Aca yah ndah tasəla ka ta jən maslaŋ hay te Yesu
1Dapa ŋgesey ana, makəsparav hay ece sekekey kad veŋ ana, a veŋ ana. Deveŋ eceŋ ana sə, Zuwef hay magwaɗa ma te Gərek hay ɓa. Ece hwehwer da yaŋ Ebəre hay dərziya masa ac dapa vavara ana ŋgesey, ec ke gweɗ, gege: «Ŋgwa macəhwandə hay deveŋ andaw aca ŋgat jə ta mandə masa aca vəniya cəɗem cəɗem sə, aabay.» 2Mafay ana, maslaŋ hay kuraw dapa yaŋ ana ecew sə, ac ka kwasa ndah masasəraka jene fakwanay, gege: «Anda da gərda mabəzad ma ta Zlavay ka ta vən ɗaf sə, a lada bay. 3Mafay ana, malamaŋ taciya hay, mayah ndah tasəla deveŋ akwar, ndah masa ndana hay ece hehəmeceŋ, ndah manəha eve Mesfen Mavəna, ndah masa ec eve leŋgesl te mevən jene, anda de vecen mezlərey ana nesey pa ha teceŋ. 4Taciya sə, anda və yaŋ taciya ka ta cə mbahw kad Zlavay va mabəzad ma tata.» 5Ma ana ke wefec ndana hay fakwanay. Ac ka kəs Etiyen nda makəsparav mambəla ana, manəha eve Mesfen Mavəna. Asaya, ac ka kəs Fəlep, Pərakwar, Nikanawr, Timaŋw, Parmenas va Nikwalas nda Antakiya ana masa ka gərda kwakwas tec zleezle ka ta cəp kwakwas te Zuwef hay. 6Ec ke hwedeɗec ndah tasəla sə, kad vara maslaŋ hay. Maslaŋ hay sə, ac ka cə mbahw kad Zlavay mafay teceŋ, ec ke pec ha yaŋ, aca ra ŋgə mezler teceŋ ava gədaŋ ta Zlavay.
7Ara nesey, ma ta Zlav ke zlezləney fəma fəma. Dapa berne te Zeruzelem sə, ndah masasəraka jene ece sekekey kad veŋ ana, e veŋ ana. Ndah maŋga kwakwas ta Zlav mabay aca kəs ma te Yesu ana may.
Aca təhaz Etiyen
8Etiyen, manəha ava mambəla ana va gədaŋ mazlakava ta Zlavay. Mafay ana, ke ŋgə cah hay marəzla ndana hay mabay dapa taɓa ta ndana hay. 9Amaa ndah deveŋ Zuwef hay masa ece dek dapa berne de Siren va Zuwef hay masa ac dapa berne ta Alekzandərey aca ŋgaŋgəriya. Ndah ana hay ac deveŋ ndah medə kad pə Way ta macə mbahw te Zuwef hay masa aca zaliya «Way ta ndah membəlek dapa ɓeley.» Ndah mekele maŋgaŋgəriya sə, ece dek dapa vavara te Selekiya hay va dapa vavara ta Azi. Aca tə yaw ava Etiyen. 10Amaa ac ka zlafa mambasana Etiyen dapa matə yaw teceŋ ana aabay, afa Etiyen ke gweɗec eve leŋgesl te meven jene hay masa Mesfen Mavəna ta vana.
11Mafay ana, ec ke dey, ec ke vec səlay kad ndana hay, afa aca ra ŋgəlafa ma Etiyen ana. Ece re gweɗ, gege: «Andaw ka cəna nda ana nesey, ke lefec Muyiz va Zlavay.» 12Ara nesey, ec ke heheɗecen dar ta ndana hay, te mesnendə hay va ta ndah mesesərekecen ma majawa kad ndana hay. Ec ke dey, ac ka təhaz Etiyen, ac ka hwadaɗ a vara ndah maca mamənak te Zuwef hay. 13Ec ke həlekec ndah maŋgəlafa ma sə, afa ece re gweɗ, gege: «Nda nesey sə, cəɗem cəɗem e gweɗ ma mambəla ana aabay da yaŋ Way ta kwakwas va da yaŋ ma majawa ta Muyiz. 14Andə ka cəna e gweɗ, gege: “Yesu nda Nezeret, a ta mbəɗandakwaɗ Way ta kwakwas ta Zlav tandakwa na avəda. Asaya, a ta ŋgwada ma majawa masa Muyiz ta sasərakandakwaɗ sə, avəda ke mekele.”» 15Ndah manjaha fakwanay dapa macə mamənak ana ac ka pə ndey ŋgbazl-zla kad fətiya, ac ka wala ndey tata e weɗey ara ndey ta Maskəla.
ప్రస్తుతం ఎంపిక చేయబడింది:
Mezlər ta Maslaŋ hay 6: CUVnt
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 CABTAL
