Mezlər ta Maslaŋ hay 4
4
Piyer va Zaŋ fəma ta ndah maca mamənak te Zuwef hay
1Masa Piyer va Zaŋ ece gweɗec ndah makwasa sə, ndaakwas hay, mesnendə ta ndah maɓəla Way ta kwakwas va Saaduki hay, ec ke dekey kad cak teceŋ. 2Rav ke hecec fa Piyer va Zaŋ, afa ec ke sesərekec ndana hay, gege: «Ndah maməca hay ec te pərekec dapa maməcay, afa Yesu ka pərakata dapa maməcay.» 3Mesnendə te Zuwef hay sə, ec ke təhezec Piyer va Zaŋ ana, ec ke hwedeɗec pa daŋgay. Amaa ec ke təɗec ma yaŋ pəsaŋga ana ŋga aabay, afa pas ɓasabay. 4Ava aŋga ana fakwanay, ndah dərziya mabay dapa taɓa ta ndah makwasa macəna ma te Piyer sə, ac ka kəs ma te Yesu ana jaŋgata. Ara nesey, makəsparav hay ke sekek kad e veŋ ana, ec ke ŋgə bakatar zlam.
5Tedew te pərek ana, bay ta kwakwas te Zuwef hay, mesnendə te Zuwef hay va ndah mesesərekecen ma majawa kad ndana hay ac ka kwas vaw faŋga de Zeruzelem. 6Deveŋ ndah makwasa faŋga ana sə, Hanas mazlakava ta ndaakwas hay, Kayfas, Zaŋ, Alekzandərus va ndah dərziya hay fakwanay da way ta Hanas. 7Ec ke hwedekec Piyer va Zaŋ, ec ke zleceɗec fəma teceŋ, nda membəlek dapa sek mahahalɓa sə, aŋga da cak teceŋ ana. Ndah sə, ec ke nəkefec Piyer va Zaŋ, gege: «Akwa mbəlek nda masa sek mahahalɓa nesey sə, ava gədaŋ wula? Mavakwar gədaŋ te meŋgə cah hay ana nesey sə, wa?»
8Piyer manəha eve Mesfen Mavəna, ke vehecen, gege: «Akwar, mesnendə hay va bay taciya hay, 9akwa nəkafandaw ta pəsna sə, afa andaw ka ŋgə jə mambəla ana kad nda mahahalɓa na geyey? Akwa nəkafandaw nda mahahalɓa nesey, e mbəlek sə, a ŋgana gwagumaw, biba! 10Yaw, akwar fakwanay va Isreyel hay, a lada akwa səna nda mazlaca fəma takwar nesey sə, sek tata e mbəlek sə, ava gədaŋ te Yesu Kəristi nda Nezeret ana. Yesu Kəristi ana sə, aŋga nda masa akwar ta dariya fa hap mazləlawa ke te kəɗ ka macəhwandaw, amaa Zlav ka pəraka avəda dapa maməcay. 11Mavinda dapa ma ta Zlavay ke gweɗ da yaŋ Yesu, gege: “Kekeŋ masa akwar ndah malama way hay, ta kazlda ava zlalav sə, anjəkar kekeŋ mambəla ana ta mazlac way”. 12Maŋgat membəl jaka vara ndana mekele sə, aabay, say jaka vara vaw, afa mezel ta ndana mekele dapa vavara nesey masa Zlav ka vana gədaŋ, ta mambəl ndana hay jaka vara vaw sə, aabay.» 13Mazlakava hay maca mamənak te Zuwef hay faŋga sə, ece welec Piyer va Zaŋ kwa ece ŋgə zidaw aabay. Mafay ana, ec ke rəzleceŋ, afa aca səniya, Piyer va Zaŋ sə, ndah masa ac ke jeŋgə aabay, ac ara ndah dərziya hay may. Aca sənafa Piyer va Zaŋ sə, ac ka ŋgway ava Yesu fa slam ana. 14Masa mazlakava hay maca mamənak te Zuwef hay aca wala nda membəlek dapa sek mahahalɓa mazlaca da cak te Piyer va Zaŋ sə, kwa ac ka zlafa mevehecen ma ana ɓasabay. 15Ec ke vec cəv ta madaɓa kad a vəda dapa way ta macə mamənak, ac ka cə mamənak dapa taɓa teceŋ. 16Ec ke gweɗ, gege: «Me de ŋgec ndah ana mey? Afa ndah de Zeruzelem fakwanay aca səniya eve metehwe ana, Zlav ke ŋgə cah mazlakava ana jaka vereceŋ. Anda zlafakwaɗ map cah ana nesey ke jə mambəla ana aabay sə, aabay. 17Amaa daha anda walakwa ma ana də dey fəma fəma sabay, ndah mekele aca ra cəna ma ana sabay sə, a lada anda rakwaɗ ma ta ndah ecew nesey. Merecen ma sə, a lada kwa aca ra bəzad ma da yaŋ Yesu kad ndana hay sabay.»
18Ec ke zeleceŋ saya, ec ke recen ma, ac ta sasərak ndana hay da yaŋ Yesu sabay. Asaya, kwa makar maɗay ana kad ndana hay da yaŋ Yesu sə, ac ta kəriya sabay. 19Amaa Piyer va Zaŋ, ec ke vehecen, gege: «Akwar ava yaŋ takwar, mawuzaɗa ma ana mambəla ana. Fa yam te ndey ta Zlavay sə, mambəla anda cən ma takwar da yaŋ macən ma ta Zlav geyey? 20Taciya sə, cama anda gweɗey da yaŋ jene hay masa andaw ta wala eve ndey taciya va masa andaw ta cəna ava zləmay taciya.»
21Mazlakava hay maca mamənak te Zuwef hay sə, ec ke peyefeceŋ ava gədaŋ, aca ra sasərak ndana hay sabay. Ec ke pəleceŋ. Ac ka ŋgat ma te meŋgedec hahar aabay, afa ndana hay fakwanay ac ka hahəm Zlavay mafay te jə masa e ŋgey. 22Nda masa e mbəlek dapa mehehəleɓ tata ava cahay sə, mavay tata ka fəna kwakwar faɗ.
Macam yaŋ ta ndah ta Zlavay dapa macə mbahw
23Ava dəɓa ana, masa mazlakava hay maca mamənak te Zuwef hay ac ka pəla Piyer va Zaŋ sə, ec ke veh kad vara ndah tec hay dərziya. Ec ke ŋguzdecen ma hay masa bay hay ta ndaakwas hay va mesnendə te Zuwef hay te gweɗeceŋ. 24Ndah teceŋ ana hay ece cəkefec zləmay. Ac fakwan teceŋ, ac ka cə mbahw kad Zlavay ava rav pal amta, gege: «Bay taciya, nda malama baymaləvaŋ, vavara, yam mafayakfayak ana ava jene hay dapa fakwanay.» 25Mapana ma ana hay jaka pe Mesfen Mavəna pa ma te Deevet, nda maŋga mezlər takaa kaa zleezle sə, kaa ana:
«Ndah masa Zuwef hay bay aca ɓəsl ma,
aca nas macə mamənak tec taambəla sə, mafay te mey?
26Bay hay dapa vavara ac ka ləmad vaw ke te ŋgə vəram,
mazlakava hay ac ka kwas vaw ka ta ŋgə vəram ava Bay Mazlakava
va nda masa aŋga ta yahiya.»
27«Aŋga, Herawt va Pilatu, ac ka kwas vaw dapa berne ana nesey ava ndah masa ac Zuwef hay bay va tərsam te Isreyel hay, ka ta yahafa ma Yesu, nda maŋga mezlər takaa mavəna, masa ka ka cəhafa mal fə yaŋ. 28Aca ŋgə jeŋ ana hay fakwanay nesey sə, ara ha takaa va mawulak yaŋ takaa ta ləmadiya dəga zleezle ava gədaŋ takaa. 29Təlam nesey, Bay Mazlakava, wala aca payafandaw ava gədaŋ. Vandaw gədaŋ, afa masa andaw ndah maŋga mezlər takaa hay, andaw da bəzad ma takaa kwa ava zidaw bay. 30Ŋguzdandan gədaŋ takaa. Mbəlec ndah gwabay hay, e ŋgə cah hay masa ac de ŋguzdek gədaŋ takaa aŋga ava andaw va gədaŋ te Yesu, nda maŋga mezlər takaa.»
31Ava dəɓa ta macə mbahw teceŋ sə, slam masa ac makwasa dapa sə, ka ɓəla vaw gegeɗ gegeɗ. Ac fakwanay, ac manəha eve Mesfen Mavəna. Ac ka bəzad ma ta Zlavay ava zidaw dapa vaw ɓasabay.
Majən vaw dapa taɓa ta makəsparav hay
32Makəsparav hay fakwanay rav teceŋ va leŋgesl tec macama fa slam ana. Ndana megweɗ masa, «Zleley aɗaw sə, ya ŋgə bay da yaŋ ana pal ya amta» sə, aabay. Amaa zleley tec fakwanay macama fa slam ana. 33Maslaŋ hay ac ka tə yaw da yaŋ mepərek ta Bay Mazlakava Yesu dapa maməcay sə, ava gədaŋ mazlakava ta Zlavay. Ara nesey, mambəla ana ta Zlav ke ŋgə mezlər eve eceŋ fakwanay. 34Deveŋ eceŋ ana, kwa ndana mahwar jə ta mandə aabay. Ara nesey, kwa waawa masa ley tata ɓa, daha aabay way tata ɓa sə, ka husamda, ke hwedecen səlay ana 35kad maslaŋ hay. Kwa waawa ka ŋgataw ara masa mak ta mahusana. 36Ndana ɓa deveŋ eceŋ faŋga mezel Zezef, aŋga dapa tərsam te Levi, e heyek de Kipərus. Maslaŋ hay aca zaliya Barnabas, ara megweɗey, «Nda mavana gədaŋ kad ndana hay.» 37Ley tata ɓa may, ka husamda. Ava dəɓa ana, ke hwedek səlay ana, ke vecen maslaŋ hay.
ప్రస్తుతం ఎంపిక చేయబడింది:
Mezlər ta Maslaŋ hay 4: CUVnt
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 CABTAL
