Mezlər ta Maslaŋ hay 3
3
Nda mahahalɓa ka mbəlata
1Pas mekele ɓa, Piyer va Zaŋ ec ke dey kad pə Way ta kwakwas ka ta cə mbahw. Dapa ŋgesey ana sə, pas fakwaɗ, pas ta macə mbahw te Zuwef hay. 2Zef ava ma ta Way ta kwakwas ana, ma ta way masa mezel «Ma ta way mambəla ana», ndana ɓa manjaha faŋga. Nda ana aŋga mahahalɓa dəga te meheyek tata. Cəɗem cəɗem ndana hay ece hwedekey, aca njahaɗ faŋga, a da rəkaɓa səlay da vara ndah mesehw kad pə Way ta kwakwas ana. 3Ta pəsaŋga ana, nda ana ke welec Piyer va Zaŋ ece dey kad pə Way ta kwakwas ana sə, ke rəkefec səlay. 4Piyer va Zaŋ ac ka njarafa. Piyer ka gwaɗa, gege: «Njarafandaw.» 5Nda sə, ke njerefec mambəla ana, ka wulakaw, gege: «Ac ta vana jene.» 6Amaa, Piyer ka gwaɗa, gege: «Ya ava səlay, kwa gənaɓ masa ya da vakaa sə, aabay, amaa jə masa ya ava aŋga ɓa sə, ya vakaa. Ava gədaŋ te Yesu Kəristi nda Nezeret, ya gwaɗakaa, zleftek, daɗay eve sek takaa.» 7Piyer ka təhazaw pa ha ta zam, ka jənaw e de zleftek. Faŋga faŋga ana, sek ta nda sə, werwer cay. 8Ke zleftek, ke cəkweley, ka zlar medey. Ec ke sehw kad pə Way ta kwakwas ana ava Piyer va Zaŋ. Nda ana ke dey, ke cəkweley, ka hahəm Zlavay. 9Ndana hay fakwanay dapa Way ta kwakwas ana ac ka wala e dey, a hahəm Zlavay. 10Aca səniya aŋga sə, aŋga nda masa sek mahahalɓa, manjaha fəma ta Way Mambəla ana ke te rəkey. Ac fakwanay, ec ke rəzlec mabay da yaŋ jə masa ke ŋgey da vara vaw, aca sən jə masa ac ta ŋgiya bay.
Piyer e bəzedec ma kad ndana hay dapa Way ta kwakwas
11Piyer, Zaŋ va nda mahahalɓa sə, ac da dara zembek ta Way ta kwakwas, mezel «Zəmbek ta Salmaŋw.» Nda ana a gwam ke gərdec Piyer va Zaŋ ana sabay. Ndana hay fakwanay ec ke rəzlec da yaŋ nda ana, mafay ana, ndana hay ec ke hwekey kad vereceŋ.
12Dapa masa Piyer a wala ndana hay ece hwekey kad vereceŋ sə, gege: «Akwar Isreyel hay, marəzlakwar mey? Akwa ndandazlandaw ara nesey sə, mafay te mey? Nda ana da ŋgat sek tata werwer, e də ara nesey sə, akwa wulakiya ava gədaŋ taciya daha aabay ava manah yaŋ taciya kad Zlav geyey? Away, ara na bay!» 13Zlav mambəla nda ana sə, Zlav masa Abəraham, Izak va Zakwab papaŋ ta papaŋ tandakwa hay zleezle ta nahan yaŋ kad aŋga. Nesey sə, Zlavay ana, ta ŋguzdandakwaɗ, ka hahəlan yaŋ te Yesu, nda maŋga mezlər tata. Akwar ava yaŋ takwar, akwar ka paɗ Yesu ana pa ha ta mazlakava hay, kwa gwevernel Pilatu ka wal mapəla sə, amaa akwar ka walaw aabay. 14Yesu sə, aŋga nda mambəla ana, masa e dek da vara Zlavay, aŋga pal amta. Amaa akwa waya bay, sesəker akwa gwaɗa Pilatu a da pəlakwaɗ sə, nda makəɗa nda ka macəhwandaw. 15Ara nesey, akwar ka kəɗa nda mavana manjah katar ka midakw sə, vəda ka macəhwandaw. Amaa Zlav ka pəraka vəda dapa maməcay. Andaw ava yaŋ taciya anda tə yaw da yaŋ mepərekek tata ana. 16Nda masa akwa wala da cak taciya nesey sə, akwa səniya mambəla ana, sek tata de ŋgə werwer sə, mafay ta gədaŋ te Yesu, afa andaw ta kəs ma tata. Mavana gədaŋ te membəley ana ara masa akwar ta wala fakwanay nesey sə, ma te Yesu masa andaw ta kəsiya.
17Amaa təlam nesey, malama hay, ya səniya jə masa akwar va mazlakava takwar hay ta ŋgana kad Yesu sə, akwar sən ma da yaŋ ana bay. 18Jeŋ ana masa e ŋgə nesey sə, Zlav ke ŋguzdecen ndah mehwedek ma tata zleezle, gege: «Cama Kəristi nda masa Zlav e te zlərekey sə, a ta sə marga.» 19Mafay ana, ya gwaɗakwar, maŋgwada rav takwar, meŋgwedek ma kad vara Zlavay, afa a da pəlakwaɗ mebər takwar hay. 20Ara nesey, Zlav a ta vakwar masasak vaw. A ta zlərakwar Kəristi, ara megweɗey, Yesu nda masa aŋga ta piya ka ta mbəlakwar dəga zleezle. 21Təlam nesey, cama Yesu e njehek da baymaləvaŋ ɗagay, kasl pa pas masa Zlav ta ləmada jene hay avəda fakwanay ka waya ara masa aŋga te gweɗ zleezle. Zlav ke gweɗ da yaŋ ma ana jaka pa ma ta ndah mehwedek ma tata hay. 22Yaw, Muyiz ke gweɗ zleezle, gege: «Bay Zlavay a ta zlərakwar nda mehwedek ma ara yey dapa taɓa ta malamaŋ takwar hay. Akwar ta cəkafa zləmay dapa jene hay masa aŋga ta gwaɗakwar fakwanay. 23Kwa waawa masa ka cənan ma ta nda ana aabay sə, Zlav a ta kəsa avəda deveŋ ndah tata hay ka ta zay.»
24«Yaw, ndah mehwedek ma ta Zlav mabay, dəga e zler fe Semiyel va ndah mehwedek ma hay mekele mekele ava dəɓa tata, ac ka ŋguzda ma da yaŋ jə masa e te ŋgə təlam nesey. 25Malama hay, Zlav masa e gweɗ jaka pa ma ta ndah mehwedek ma tata hay nesey sə, kad akwar. Zlav ka jaw ma ava papaŋ ta papaŋ tandakwa hay zleezle, ka gwaɗa Abəraham, gege: “Ye te pəsefec ma ndana hay fakwanay dapa vavara jaka pa tərsam takaa hay”. Majaw ma ana nesey sə, kad akwar may. 26Ara nesey, Zlav ka ŋguzad Yesu nda maŋga mezlər tata sə, kad akwar ɗagay. E zlərek macaaca ana sə, kad akwar ana, afa a da ŋgakwar jə mambəla ana, da ŋgwadakwaɗ mezlər takwar mambəla ana hay aabay ŋgesey.»
ప్రస్తుతం ఎంపిక చేయబడింది:
Mezlər ta Maslaŋ hay 3: CUVnt
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 CABTAL
