Yuhana 11

Məməta Lazar

1-2Wele duwa a riŋ, zləm ŋgar Lazar. Ŋgat a ndzawa ka, i Betaniya, i kwite ana gà damər ŋgar gà Mariya nda Marta tə ndzawa iɗəm a. Mariya ka, məkəs ana a ti dze a wirdè aka sik Yesuw, dite à bèh a ihər a nda ambəz ŋgar a. A pat duwa ka, Lazar ata a dəɗ a dukw məməta. 3Aɗaba taŋa na gà damər ŋgar ata gà dəm ŋa sula ya, tə slər mburma a təv Yesuw. Tə daha, ta gwaɗar: «Batsah mər ŋa, masla yak ŋgwala tsa, dukw məməta a geriŋa.» 4Yesuw a tsaraka kataya ka, a gwaɗa a tar: «Dukw məməta ŋgar ata ka, à mìt a dər a biye tsa. A ger a ka, aà meɗìfè à ndzəɗa Mbulum a mburma, dite tə sər mezlibe ana tì zlibe a à iye Kəla ŋgar a mbaŋa.»

5Ama Yesuw ka, a waya gà Marta ata nda gà damər ŋgar gà Lazar a ka, lele. 6Ku mege aka tsaraka Lazar a riŋ i dukw məməta ata kataya tekeɗe, a ndzaba riŋ i təv ana ŋgat riŋ iɗəm a pat sula asa. 7I dəba ŋa ya, a gwaɗa a gà ɓəzla mazazama ŋgat: «Mbə̀ɗakwa gər aka ahəɗ Yuda a təv Lazar a fata.» 8Gà ɓəzla mazazama ŋgat ata ta gwaɗar aaka: «Ee mala medzeŋge mər, aka ndza ka, hinne tsa na gà mburma ana i fataya, ta waya makàlàwà kər nda kur a ka, dite ki mbìɗekwehe a gər a fata asa ana, meme kuɗa ya?» 9Yesuw a gwaɗa a tar aaka: «Daga aà gər mèkwède ya, haa a hawa ana ki ŋgetekewe a a pat tsiye? Na wura à sìweye a ndaàpat ka, a ndif a sik tsa, aɗaba ŋgat a riŋ a ŋget a a vatwa dzaydzay i bəɗ lele. 10Ama wur ana à sìweye a ndaàvəɗ a ka, ŋgat na a ndif a sik a, aɗaba ziŋziŋ hinne, dzaydzay i təv ŋgar tsa.»

11Yesuw a tsik a tar bazlam ata ka, a gwaɗa a tar asa: «Masla kwa Lazar ka, a riŋ ika mendze are. Ama ka, i ta piɗeke a dər.» 12Gà ɓəzla mazazama ŋgat ta gwaɗar aaka: «Na Lazar ka, mendze are ŋa pəra ka, a mbiliŋa, Batsah mər ŋa.» 13Tsaatsa a sàs a Yesuw aà megweɗe ka, Lazar ka, aka mət, ama gà ɓəzla mazazama ŋgat ta gwa i tar ka, ar ka, ika mendze are kaɗəŋ. 14I dəba ŋa ya, Yesuw a tsik a tar parakkà, a gwaɗa a tar: «Lazar ka, aka mət. 15I ŋgeye a ba aɗaba kurum, agəra ana a mət ka, iye riŋ i fata tsiye. Kamala taŋa ya, a ti zlèk a kurum i təv megìse ana ki giswim a iye nda gəzləŋ, ki sinikwim a dər ba ya. Ama kinehe ka, tàkwa a təv ŋgar, ta fə̀rakwa ŋgat.» 16Tumas, wele ana gà mawusa ya, a gwaɗa a gà asiŋ gà ɓəzla mazazama Yesuw: «Haya, tàkwa, ka matakwa akaba nda gà BATSAH kwa ŋa.»

Yesuw ŋgat mala məmbàlà à mburma i məməta ya

17Yesuw a ndzeha a Betaniya ka, Lazar aka ge i biye mehinne faɗ. 18Ama kwite Betaniya ata ka, bise nda Yeruzalem, a sle kiliwmeter makər tsa na ki de a i Yeruzalem a a fataya. 19Kamala taŋa ya, gà mburma hinne tə daha a təv gà Marta nda damər ŋgar Mariya, aà mege a tar wuɗàh, ta me a terehe a à arəv, agəra damər tar ana a mət a.

20Marta a tsaraka Yesuw ana a riŋ a dehe a ya ka, a valaha a təv ŋgar, aà melime nda gà ŋgat. Ama Mariya ka, ŋgat a riŋ mandza ŋa i ma. 21Aləka Marta a ndzeha a təv Yesuw tsara ka, a gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mìt a tsa ti ibam. 22Ama i sər, ku mege kinehe tekeɗe, Mbulum a vilek a dukw ana kàa wiz ahər a.» 23Yesuw a gwaɗar: «Damər yak ata a mbilere a i məməta ya.» 24Marta a gwaɗar aaka: «I sər ka, a ta mbilere a i məməta ya, i təv ana gà məməta tserdze ta mbele a a pat mandəvandəv gər ahəɗ a.»

25Yesuw a gwaɗar aaka asa: «Iye na mala məmbàlà à mburma i məməta ya ya, dite iye asa na mala məvəla a tar mesife ya. Wur ana à gis a iye nda gəzləŋ a ka, ku mege aka mət tekeɗe, a mbiliŋa, a ndze a aà biybiy. 26Wele ana aka gis iye, aka ŋgat mesife gà ata ya ka, mesife ŋgar à mìt a tsa, a ndze a aà biybiy. Wànà kàa gəs taŋa ya?» 27Marta a gwaɗar aaka: «Haya, Yàa gəs, Batsah ga ŋa. I sər, kər ka, mala məmbàlà à mburma ana Mbulum a gwa ka, i ti slir a kurumehe a ya. Kər ka, Kəla Mbulum ana a gwa, a dere a aka gər ahəɗ a ya.»

Yesuw a tuwa

28Marta a tsik aba bazlam ata ya ka, a mbəɗ gər a ma, a daha, a gəs damər ŋgar Mariya a zlawak, kətsah aà mburma ya. A tsiker nda akəl, a gwaɗar: «Əbay kwa aka dara, a zelekiŋa, a gwaɗak, dara.» 29Mariya a tsaraka bazlam ata tsara ka, pewtsek a mba aba aà mede a təv ŋgar. 30Ama Yesuw ka, a riŋ i təv ŋgar ana Marta a le ahər a mba hiywe. Aka ndze a kwite ata zukw tsa. 31Gà mburma ata ndeɗiŋa tə daha, ta màha à arəv a Mariya, tar riŋ mandza ŋa i ga. Ta ŋgat a Mariya ana a mbàra aba a bəra ya tsara ka, tə zazamara ŋgat a. Tə dzala i gər tar ka, ta gwa: A de a ka, aka dive, a ti tiwe a a fata.

32Tsaatsa Mariya a de a ka, a təv ana Yesuw iɗəm a. A daha, a ŋgatar tsara ka, a dza gurmits a bəɗ aka miɗ ŋgar. A gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mìt a tsa ti ibam.» 33Yesuw a fə̀r aà Mariya ka, a tiwiŋa, dite gà mburma ana tə dəɗ aakaha ya mbaŋa, tə dza akaba tuwa, a tsahən ahər tsa, a wir ahər a i gəzləŋ hinne, aka tsəɓar. 34Dite a gwaɗa a tar: «Kà lwim kinehe ana, a ŋga?» Ta gwaɗar aaka: «Batsah mər ŋa, dara, mìi ɗek a dər.» 35I təv ana ti de a ya ka, a dza ba aà tuwa kwàyìya hinne. 36Gà mburma ana i təv ŋgar i fataya ka, ta gwa: «Fə̀rum na a tiwe a, a waya ŋgat hinne ya kwaŋ.» 37Ama gà asiŋ ŋa ta gwa ika magər tar: «Ŋgat ana à hìndìk a ika are a mala guluf ana, dite aàla na a mbəl à Lazar i dukw məməta ŋgar aaha a mət dər a te tsiye?»

Yesuw a mbəlara à Lazar i məməta ya

38Ama Yesuw ka, gəzləŋ a riŋ ihər a wir ahər a turturtur hinne asa. I dəba ŋa ya ka, a ndze aka dive kuɗa. Dive ata ka, melè ŋa i təv ana gìrdzìdzìhhe ya. Tə tàpàsl ahəraha beliŋ. Ta hə̀ndə̀k dər ahəraha. 39A daha, a gwaɗa a tar: «Hə̀ndə̀kum ihər beliŋ a.» Marta, damər wele ana a mət a, a gwaɗar: «Batsah mər ŋa, kinehe ana, a ze a ana, hinne tsiye, aɗaba aka ge i biye ka, mehinne faɗ dze ana, taŋa ana, meme gwedziye?» 40Yesuw a gwaɗar aaka: «Yàa gwaɗak ka, na kàa gəs iye nda gəzləŋ ka, ki ta ŋget a ndzəɗa Mbulum ana, Yàa tsikik tsiye?» 41Tə daha, ta hə̀ndə̀k ihər beliŋ ata ya. Yesuw a fə̀r a gəza mbulum, dite a gwa: «Tsir ga, iye ihər i gik a kəkaaha, aɗaba ana kàa dza zləm a dukw ana i wiz aà kər a. 42I sər ka, ki tserekiŋ a dər hiywe. Ama i tsik taŋa ka, agəra gà mburma aaha i təv ga ya, dite tar tekeɗe, tə sər dər ka, kər na kà slərra iye ya kaɗəŋ ndzer.» 43A tsik aba bazlam ata ya lele ka, a fàfəl nda ndzəɗa ŋgəlakəkka. A gwaɗa a Lazar: «Dara i biye ya, Lazar.» 44Tsam ka, pakw məməta aaha a dara i dive ya kaɗəŋ, gà sik ŋgar nda are ŋgar fit mendìwìɗè ŋa nda petek. Are ŋgar tekeɗe, simbèkw makùmbuhwa ŋa. Yesuw a gwaɗa a tar: «Pə̀lum à ŋgat, ka məsakum dər, ma da ba.»

Gà bàba gà Yahuda ti yaha vatwa aà magəsa Yesuw

Mata 26:1-5; Markus 14:1-2; Luka 22:1-2

45Gà mburma aaha ndeɗiŋa tə zazamaha Mariya ya ka, ta ŋgat a dukw mene aà mburma ata Yesuw a ge ya tserdze. I fataya tsara ka, gà mburma hinne ika magər tar a, ta gəs ŋgat nda gəzləŋ. 46Ama gà asiŋ ŋa ika magər tar ibam, tə da təv gà *Farisa, tə daha, tə ɗama a tar dukw ana Yesuw a ge tserdze ya. 47Ama gà Farisa ata nda gà Əbay gà ɓəzla mandəva kuɗa a Mbulum a, tə tsaraka kataya ka, ti yaha gər a gà asiŋ gà bàba ŋa ana ta kwere a mburma ya, ta gwaɗa a tar: «Ki gekwe a dze ana, meme na wele aaha a riŋ a geye a gà dukw mene aà mburma hinne ya? 48Na kàa miyakukwa dər, ma ge ba dukw ŋgar ka, gà mburma fit ta gis a ŋgat nda gəzləŋ. I dəba ŋa ya, gà ɓəzla makwàrà mburma ana i Ruma ya, ti dere a, ta mbezle a à batsah ga Mbulum kwa leheɗ leheɗ, ti dzeye a à gwala kwa fit asa.» 49Wele duwa a riŋ ilik ika magər tar, zləm ŋa Kayafas. Ŋgat na *batsah mala mandəva kuɗa a Mbulum ana a ndə̀vawar akahər ata ya. A hitse aà mbulum ika magər tar a, a gwaɗa a tar: «Kurum ka, kà sərum duwa tsa. 50Kà sərum ana, ŋgulum mburma ilik mə̀ mət tsiye, ndəna, gà mburma kwa tserdze ti dzeye a ya?» 51A tsik bazlam ata ka, nda meweye ŋgar tsa. Agəra ana ŋgat batsah mala mandəva kuɗa a Mbulum akahər ata ya, a mà ka, à dukw ana Mbulum a waya, a ta ge a ba ika miɗ mba ya, kamala megweɗe ya: Yesuw à mìt a agəra gà gwala gà Yahuda tserdze. 52Ama kə̀la ka, agəra tar ɗekɗek tsa, agəra gà mburma ana tar gà ɓəza Mbulum, tə dzaya ba vatwa sweyèh sweyèh ika gər ahəɗ tserdze ya mbaŋa. Dite ti yahaba gər a təv ilik ŋa, ti ne ba ilik.

53Agəra bazlam Kayafas ata a tsik a ka, gà bàba gà Yahuda ti yaha vatwa aà makə̀ɗà Yesuw, daga aà pat ata tsara. 54Aɗaba taŋa na a sàs a Yesuw aà mesìweye ndərzakka i təv are gà mburma ata i fataya asa tsiye. A mah ba i fataya, a da a kwite ana tə zalar Efərayim a. Kwite ata ka, aà gùva kusak. Tə ndzaba i fata nda gà ɓəzla mazazama ŋgat.

55Akahər ata ka, megirive gà Yahuda ana tə zalar Paska ya, aka à mendze aɗəm. Ama gà mburma ana i gà kwite ŋgiɗ a pampam hinne, tə da a Yeruzalem, i təv ana megirive ata aka ndzera zukw tsiye. Ti ta bere a ba kamala ana fəla tar a tsik a. 56Ama i təv ana tar riŋ i fataya ka, ti yaha Yesuw. Aləka i təv mendze tar ana i batsah ga Mbulum a ka, ta gwaɗaba ika magər tar: «Kà dzalum dze ana, a dere a a megirive aaha ya ya, na kù gwaɗum a?» 57Aɗaba gà Əbay gà ɓəzla mandəva kuɗa a Mbulum, nda gà Farisa ta gwa: «Na wura aka sər təv ana Yesuw iɗəm a ka, ma ɗif dər,« ta gis a ŋgat.

ప్రస్తుతం ఎంపిక చేయబడింది:

Yuhana 11: gnd

హైలైట్

షేర్ చేయి

కాపీ