Yuhana 12

Mariya a dza à wirdè aka sik Yesuw

Mata 26:6-13; Markus 14:3-9

1A zeha mehinne ndilik na ta ge a *megirive Paska ya. Yesuw a mbəɗ gər a kwite Betaniya, a təv ana Lazar a ndzawa iɗəm a. Ŋgat ka, wele ana Yesuw a mbəlara à ŋgat i məməta ya. 2Aləka hawa a ge ka, ti der dukw mezime i fata. Marta a ndzək a taraha. Tə zəm akaba ɗaf ka, nda Lazar, dite nda gà asiŋ gà mìsle ŋgiɗ ana tə zal a taraha ya mbaŋa. 3I fataya ka, Mariya a zla wirdè ana a ze hwaŋŋà lele, tsakala ŋa hinne, à sìkim a ba tsiye. Wirdè ata ka, zlile dukuməŋa a riŋ tə zalar *nardin, tsìsl maràhà ŋa i kwalaba. A daha, a dzaya aka sik Yesuw. I dəba ŋa ya, a tàpàɗ ihər nda ambəz ŋgar a. Ga ata ka, hwaŋŋà a rah nda meze wirdè ata fit. 4Ama mìsle ŋgiɗ ilik ika magər gà ɓəzla mazazama ŋgat a, zləm ŋgar Yudas Iskariyut, wele ana a ta ge a ɗaf aà Yesuw a, a gwa: 5«Assàh, wirdè aaha ka, a sle kur siŋgwe dərməka makər dze ana, aàla na ta kal dər tsiye, ana ka, tì dzèye a siŋgwe ŋa a gà ɓəzla matawak a?» 6Tsaatsa a tsik bazlam ata kataya ka, aɗaba ana gà ɓəzla matawak ti ndzer are tsehe ya tsa. Ama aɗaba ana ŋgat mala akəl, a gəsawa kìywa ana tə dzawa aɗəm siŋgwe ya ka, a ndzə̀kawa ihər a zaakwa zaakwa ya. 7Ama Yesuw a gwaɗar: «Miyak à məkəs aka sifik. Aɗaba ŋgat ka, aka ge aà iye dukw ana ti ti zle a dər akaba iye a biye ya. 8Gà ɓəzla matawak ka, tar riŋ i təv kurum kəla pat, ama iye ka, i ndze a i təv kurum kəla pat tsa.»

Ti yaha vatwa aà makə̀ɗà Lazar

9Gà mburma hinne tə tsaraka Yesuw a riŋ i kwite Betaniya ka, ta mah ba, tə da a fata. Tə daha a fata ka, a təv ŋgar ɗekɗek tsa, aɗaba a sàs a tar məfə̀rà aà Lazar ana Yesuw a mbəlara à ŋgat i məməta ya mbaŋa. 10Aɗaba taŋa na gà Əbay gà ɓəzla mandəva kuɗa a Mbulum ta mà akaba à bazlam aà makə̀ɗà Lazar mbaŋa ya. 11Aɗaba ŋgat na gà asiŋ gà mburma ana i fataya hinne, ta miyak à tar, ta gəs Yesuw nda gəzləŋ a.

Yesuw a da a Yeruzalem

Mata 21:1-11; Markus 11:1-11; Luka 19:28-40

12Ndidwe ŋana ka, gà mburma ana tə daha a *megirive Paska ata ya, tə tsaraka ka, Yesuw a riŋ a dehe a a Yeruzalem. 13Tə daha, tə sasara gà ahər dizl ɗaf duwa kamala tə̀ɓàh a, tə da dər aà vatwa aà melime dər nda gà ŋgat. I təv ana ti ndze aà vatwa, ti de a dər a ka, ta wideye nda ndzəɗa hinne, ta gwa: «Zlə̀bakwa à Mbulum. Mbulum BATSAH kwa ŋa mi pise ahəm a wele ana a slərra ya. Mbulum mi pise ahəm a Batsah Əbay gà Isərayel.»*fa* 14Ama Yesuw ka, a le aà hezweŋe duwa, a ndza aaka, a de a dərraha a fata kamala ana wakita Mbulum a tsik a, a gwa ka:

15«Gà mburma ana i kwite Siyuna ya,

ki gwim magəɗa tsa.

Araha, Əbay kurum naha a deriŋa,

mandza ŋa ika kəla hezweŋe.»*fb*

16Ama akahər ata ka, gà ɓəzla mazazama ŋgat tə sər bazlam ata a sasar aà megweɗe ana, là ka, tə sər zukw tsa. Say i təv ana aləka Yesuw a ta meŋgete a mezlibe ana tì zlibe a à ŋgat i təv Mbulum a dzekwiŋ, na dite a ma a tarra a gər a kuɗa ya. Ama ka, tàa ge aà ŋgat kalkal kamala ana wakita Mbulum a tsik, a ta ge a ba ya kaɗəŋ.

17Akahər ata, i təv ana Yesuw a zalaha a Lazar a dive, a mbəlara à ŋgat i məməta ya ka, gà mburma riŋ hinne i fata. Gà mburma ata ibam, tə ɗama dukw ana ta ŋgatar a tserdze, a gà mìsle ŋgiɗ. 18Aɗaba taŋa na gà mburma hinne tə da aà melime nda gà ŋgat aka vatwa ya. Aɗaba tàa tsaraka, ŋgat na a ge dukw mene aà mburma ata ya. 19Gà *Farisa ta ŋgatar kamala taŋa ya ka, ta gwaɗaba ika magər tar: «Ki gekwe a dze ana, meme na dukw ana ka dzalakwa aà mege tserdze ya ka, a ge a ŋgùlum tsiye? Araha, gà mburma tserdze tekeɗe, ti zezem a ŋgat ka, hinne asa ana, meme kuɗa ya?»

Gà asiŋ gà Girek əŋgal ti yaha Yesuw

Mata 16:24-25; Markus 8:34-35; Luka 9:23-24

20Ika magər gà mburma ana tə daha a megirive ata a Yeruzalem, aà medzè gurmits a bəɗ a Mbulum akahər ata ya ka, gà asiŋ gà Girek iɗəm mbaŋa. 21Tə da a təv Filip ana a dara i kwite Betsayida ika ahəɗ Galile ya, tə daha, ta gwaɗar: «A sàs a mər maŋgata a Yesuw te ana, meme, wele aaha.» 22Filip a tsaraka kataya ka, a da, a tsikeha a Andire. Dite tə da a təv Yesuw sula məma. Tə daha, ti tsiker. 23Yesuw a gwaɗa a tar aaka: «Məpàslà ahər ŋa aka sle kuɗa. I huɗ mendze zaakwa ya ka, i ŋget a mezlibe ana tì zlibe a à iye, iye, wur ana i dara i təv Mbulum a ya. 24Iye ihər i gweɗe a kurum a nda ndzer, pàrsa iɗəm tsa: Na tàa tike hwife daw ilik a biye tsəka, a ndze a kataya, à sìkèh a tsa. Ama na tàa slige ka, a sliliŋa. Say wur ŋa ata a gwinekiŋa, dite naha a ge a ba, a ge a wur hinne. 25Wur ana aka waya ɗa mesife ŋgar ika gər ahəɗ aaha ya ka, aka miɗ mba ka, a dzeye a dər ivaɗ. Ama wur ana aka ge kəra i gər a mesife ŋgar a ka, wura a zle a ihər a tsa, a ne a biy ŋgar aà biybiy. 26Na aka sàs a wura aà megiŋ meslire ka, say ma zezem iye. Ŋgat ka, a ti ndze a i təv ana i ti ndze aɗəm a ya. Aɗaba wur ana a giŋ a meslire ya ka, Tsir gà a ti zlibe a à ŋgat mbaŋa.»

Yesuw a tsik bazlam məməta ŋgar ana à mìt a ya

27Yesuw a gwaɗa a tar asa: «Kinehe ka, arəv a de a aà iye ya ka, hinne. Dite i gweɗe a ana, meme ɓav a? Wànà i gweɗe a a tsir gà ana, zla ika iye mesewere are ana a ti le a aà iye aka miɗ mba ya ya? Awaŋ, ama ka, i gweɗe a kataya tsa. Aɗaba i dara ka, agəra mesewere are ata ya seyiŋ. 28Ama i gweɗere a ivaɗ ka, Tsir gà, ge dukw ana, dite ka, mburma tì zlibe a à kər a.» I dəba bazlam ŋgar ata ya tsara ka, mifefile a ɗera i gər ŋa ya, Mbulum a gwa: «Yàa mbər meɗife à ndzəɗa gà ana tì zlibe a dər à iye ya, a mburma, dite i ɗif a ter a dər asa.»

29Gà mburma ana i fataya tserdze, tə tsaraka mifefile ata. Gà asiŋ ŋa ta gwa: «A ge a ka, malaka mbulum.» Gà asiŋ ŋa ibam, ta gwa: «A ge a ka, gawla Mbulum a fàfəlar.» 30Ama Yesuw a gwaɗa a tar: «Mifefile ata ta fàfəlara ya ka, agəra iye tsa, ama ka, aɗaba kurum. 31Kinehe ka, Mbulum a ge a seriye agəra gər ahəɗ aaha kuɗa. Kamala taŋa ya, a zle a Əbay aà Əbay gà mburma gər ahəɗ a, a delewe a ŋgat ŋa. 32Iye ka, ta gis a iye, ti tike a iye aà dizl, ta hitse a dər akaba à iye aà mbulum. I dəba ŋa ya, i zelere a a gà mburma ya tserdze, tə dara a təv ga ya.» 33A tsik bazlam ata ka, a ɗif dər meme na à mìt a ya.

34Gà mburma ata ta gwaɗar: «Mì tsaraka i wakita məpala ahəm kwa ya ka, *Kiristi, mala məmbàlà à mburma ana Mbulum a gwa, i ti slir a kurumehe a ya ka, a ti ndzewe a aà bəra ka, aà biybiy ana, dite meme ana, ki gweɗe a ka, say ti tike a *wur ana a dara i təv Mbulum a ka, aà dizl, dite ta hitse a dər aà mbulum asa ya? Weke na a ne wur ana a dara i təv Mbulum a dze ya?» 35Yesuw a gwaɗa a tar aaka: «Kinehe ka, dzaydzay a riŋ i təv kurum. Ama a ndze a kə̀la ka, zaakwa pəra. I təv ana dzaydzay ŋa ata a riŋ i təv kurum mba ya ka, dum aka miɗ tə̀ma, luvuŋ mà gəs kurum tsa. Aɗaba wur ana a de a i luvuŋ a ka, a sir a təv ana a de a aɗəm a ya tsa. Tìtìktìkka luvuŋ aka ndàr aka are. 36Gəsum təv dzaydzay ŋa ata, ka zazamum i təv ana a riŋ i təv kurum mba ya, dite ka nwim gà mburma dzaydzay ŋa.»

Gà Yahuda ta gəs Yesuw nda gəzləŋ tar tsa

Yesuw a tsik aba bazlam ata ya tsara ka, a da, a kaha ba aà tar a. 37Ku mege aka ge gà dukw mene aà mburma i təv are tar hinne tekeɗe ka, ta gəs ŋgat nda gəzləŋ tar tsidze. 38Dukw ata a ge ba ka, kamala ana Ezaya, mala məma à guma Mbulum a tsik akahər ata ya, a gwa:

«Batsah mər ŋa, weke na a gəs bazlam mər a?

Dite weke na a sər ndzəɗa yak a?»*fc*

39Ama gà mburma ata ti sle aà magəsa Yesuw nda gəzləŋ tsəka, kamala ana Ezaya a tsik a asa mbaŋa kaɗəŋ. 40A gwa:

«Mbulum aka ge aà tar guluf.

Aka ne à tar mandàkugùrum aka ndəv.

Kamala taŋa ya, ta ŋgat a vatwa asa tsa,

tə sər gà dukw ata i metsehe tar asa tsa mbaŋa.

Dite kwets tàa mbəɗara ahəm

a təv ga ya ɓav tsa asa mbaŋa,

na dite i ta mbele à ter a ya.»*fd*

41Ezaya a tsik kataya ka, aɗaba ana a sər mezlibe ana tì zlibe a à Yesuw a, dite na a fàfəl aka gər ŋgar a.

42Tsaatsa ku mege kataya tekeɗe ka, gà mburma hinne tàa gəs Yesuw nda gəzləŋ, ku mege ika magər gà Əbay gà Yahuda tekeɗe ibam a. Ama ta gəs meɗife dər a bəra tsəka, aɗaba ana gà *Farisa ti ti delewe a tar i ga mahàmà a Mbulum a ya. 43A sàs a tar ka, tə da a gər a mburma, mà za biy Mbulum.

Dukw ana Yesuw a tsik a ya ka, à gis a mburma a seriye

44Aləka i dəba ŋa ya ka, Yesuw a wideye ŋgəlakəkka. I huɗ Mewideye ŋgar ata ya ka, a gwa: «Wur ana aka gis iye nda gəzləŋ a ka, a gəs taŋa ka, iye ɗekɗek tsa, a gəs ka, wele ana a slərra iye ya mbaŋa. 45Wur ana a riŋ ihər a ŋgetiŋ a ya ka, a ŋget a taŋa ka, a wele ana a slərra iye ya mbaŋa asa. 46I dara aka gər ahəɗ a ka, aà məpàtà à dzaydzay ŋa a mburma, dite ka, gà mburma ana tàa gəs iye nda gəzləŋ tar a ka, tə ndza i luvuŋ asa tsa. 47Na wura aka tsaraka bazlam gà ana i tsik a ya, aka gəs tsəka, iye tsa na a ge ahər a seriye ya. Aɗaba i dara ka, aà məmbə̀là à mburma ya, tsəka, aà mege aà tar seriye tsa. 48Wur ana aka niw iye, aka gəs bazlam gà tsəka, seriye à gis a ŋgat a pat mandəvandəv gər ahəɗ ana Mbulum a ta ge a seriye aà mburma ya. Bazlam gà ana i tsik a ya pəra na à gis a ŋgat i seriye a pat ata ya. 49Aɗaba i fàfəl ka, nda gər gà tsa, ama Tsir gà ana a slərra iye ya, na a gweɗiŋ, fàfəl, tsik naha, kige tsa tsik naaka ya. 50I sər, dukw ana a tsikiŋ a ka, a vile a kurum a mesife ana à ndìv a tsa aà biybiy a. Agəra taŋa na dukw ana i tsik a ya ka, kalkal, kamala biy ana Tsir gà a gweɗiŋ, tsik a.»

ప్రస్తుతం ఎంపిక చేయబడింది:

Yuhana 12: gnd

హైలైట్

షేర్ చేయి

కాపీ