Yuhana 13

Yesuw a bara sik gà ɓəzla mazazama ŋgat

Mata 23:11-12; Luka 22:24-28

1Akahər ata ka, a zeha mehinne ilik na *megirive Paska gà Yahuda a ndze aɗəm a ya. Yesuw a sər dər tits mede a təv Tsir ŋgar ika gər ahəɗ a ide ka, aka sle kuɗa. Daga piŋŋe na a waya gà mburma ana ɗa ika gər ahəɗ, ti ne gà biy ŋgar a, dite na kinehe tekeɗe, a pat a tar dər parakkà à meweye ŋgar ana a waya tar hinne ya.

2A pat ata i hawa ka, tar riŋ ti zim a akaba a ɗaf nda gà ɓəzla mazazama ŋgat. Taŋa Əbay sitene aka mbər mivile madzala gà gər a gəzləŋ a Yudas, kəla Simun Iskariyut, dite ka, ma ge ɗaf aà Yesuw. 3Yesuw a sər ka, Tsir ŋgar aka mbər miviler a ba ndzəɗa aà makwàrà gà dukw ana tserdze ya. Ŋgat nda gər ŋgar a sər mbaŋa ka, a dara ka, i təv Mbulum a, dite a ta mbìɗ a gər tekeɗe ka, a təv ŋgar asa mbaŋa. 4I təv ana tar riŋ mayahaba gər ŋa i təv mazəma dukw mezime tar ata ya ka, a hitse aà mbulum, a suɗara ikaba petek a, a daha, a zla petek magà aba yam a, a dàn dər ba ŋgə̀rəɗ ika dəmkul a. 5A daha, a tə̀f yam a tasà, a dza dər ba aà məbàrà sik gà ɓəzla mazazama ŋgat ata, dite a tèpèɗ a dər aà tar yam ata ya. A dza ahər ba i təv wele ana a mbereha ya tsara.

6Aləka a ndze dər a təv Simun Piyer ka, a gwaɗa a Yesuw: «Gaa, Batsah ga ŋa, na a beriŋ a sik ana, kər ivaɗ a?» 7Yesuw a gwaɗar aaka: «Kà sər dukw ana i ge a ya tsa, na kinehe ya, ama ki sir a ka, aka miɗ mba.» 8Piyer a gwaɗar: «Awaŋ, kər ka, Batsah ga ŋa, ki beriŋ a sik ivaɗ tsa.» Yesuw a gwaɗar aaka: «Na Yàa barak sik tsəka, ki sleme a aà mendze i təv ilik ŋa asa tsa.» 9Simun Piyer a gwaɗar: «Batsah ga ŋa, na kataya ka, ka beriŋ ka, sik ɗekɗek tsa, beriŋ gà ahər nda gər mbaŋa.» 10Yesuw a gwaɗar: «Wur ana aka bara ba ya ka, a ndze a ka, tsəɗaŋŋa, a sasar məbàrà ba masula ŋa asa tsa. A bere a ka, say gà sik ɗekɗek pəra. Kinehe kurum tserdze ka, məbàrà ŋa. Ama kə̀la ka, wura ilik ika magər kurum ka, məbàrà ŋa tsa.» 11Yesuw a sər wele ana a ta ge aà ŋgat a ɗaf a. Aɗaba taŋa na a gwaɗa a tar ka, kurum tserdze tsa na gà məbàrà ŋa ya ya.

12Aləka Yesuw a bara tar aba sik a lele ka, a mà akaba à gà petek ŋgar asa. A daha, a ndza a bəɗ a təv mazəma ɗaf tar ata. I dəba ŋa ya, a gwaɗa a tar: «Kà sərum dukw ana i ge a kurum a ya? 13Kurum ihər ki zelwimiŋ a mala medzeŋge a mər, kige tsa Batsah mər ŋa ka, ndzer kaɗəŋ, pàrsa iɗəm tsa. Aɗaba iye ka, kataya dukw ŋgar. 14Na iye mala medzeŋge a kurum, dite Batsah kurum ŋa asa, Yàa bara kurum sik seyiŋ ivaɗ ka, say kurum tekeɗe, ki bereywim a ba a sik kurum ika magər kurum ilik ilik tserdze kamala taŋa ya mbaŋa. 15Yàa ɗif a kurum dər, meme na ki gwim a ya, dite ka, ki geywim a ba dukw ana ŋgwal ŋa kamala biy na iye i ge a kurum a. 16Iye ihər i gweɗe a kurum a nda ndzer, pàrsa iɗəm tsa: Ɓele ka, à zè a mala ga ŋgar tsa, dite mala meslire à zè a wur ana a slər ŋgat a ɓav tsa asa. 17Kinehe ka, kà sərum taŋa. Maŋgayaba ika magər kurum ka, hinne, na kàa tikwim gər a guma aaha ya.

18I fàfəl taŋa ka, aka gər kurum ana tserdze ya tsa. Iye ŋa i sər gà mburma ana i pala tar a. Ama dukw ana mewetse ŋa i wakita Mbulum akahər ata ya ka, a ge a ba kalkal kamala taŋa ya kaɗəŋ. Aɗaba ta gwa ka: <Wele ana maa zəm akaba ɗaf a ka, a ti niŋ a are.>*fa* 19I tsik a kurum a aba ya daga kinehe, aka na dukuməŋa aka ndzera zukw tsiye, dite aka təv ana aləka aka ndzera ya ka, ki giswim a iye nda gəzləŋ, ki sirwim a dər, iye ka, Wele ana ŋgat ŋa ya ndzer kaɗəŋ. 20Iye ihər i tsik a kurum a nda ndzer, pàrsa iɗəm tsa: Wele ana aka gəs mala meslire ana i slir a ya ka, a gəs taŋa ka, iye mbaŋa. Dite wele ana aka gəs iye ya ka, a gəs ka, wele ana a slərra iye ya mbaŋa asa.»

Yesuw a ɗif à Yudas ana a ta ge aà ŋgat a ɗaf a

Mata 26:20-25; Markus 14:17-21; Luka 22:21-23

21Yesuw a tsik a tar aba bazlam ata ya tsara ka, dùwaɗ arəv a da ihər a. A gwaɗa a tar: «Iye ihər i tsik a kurum a nda ndzer, pàrsa iɗəm tsa: Wura ilik ika magər kurum aaha kinehe ya, a ta ge aà iye a ɗaf.» 22Gà ɓəzla mazazama ŋgat ata, tə tsaraka kataya ka, ta maya akaba à are ika magər tar ba bà ba ba tserdze. Ama tə sər bazlam ata a tsik ana, aà weke ka, tə sər tsa. 23Wele ŋgiɗ ilik ika magər gà ɓəzla mazazama Yesuw ata ya, ŋgat ka, mandərkwasla ŋgar. A riŋ mandza ŋa i təv ŋgar bise. 24Simun Piyer a zekweraha ahər, kamala megweɗe ya, mà tsam bazlam ata aà Yesuw ka, weke na a tsik ahər kataya ya? 25Aɗaba taŋa, mandərkwasla Yesuw ata a dzadzakaha à gər ndàra a təv Yesuw. A gwaɗar: «Batsah mər ŋa, weke na kà tsik ahər kataya dze ya?» 26Yesuw a gwaɗar aaka: «Yàa sàs ɗaf, Yàa ge ahər ala bùnùt, Yàa vəlar ka, wele ata na a ta ge aà iye a ɗaf a.» Aləka Yesuw a sàs ɗaf ata, a ge ahər ala, a vəl a Yudas, kəla Simun Iskariyut.

27Yudas a gəs ɗaf ata tsara ka, Əbay sitene a dar a gəzləŋ. Yesuw a gwaɗar: «Dukw ana a sàsak aà mege ya ka, ge aba ya kinehe tsəma.» 28Wura ilik ika magər gà mburma ana tar riŋ ti zim a ɗaf tserdze ya, aka sər, aàmala na Yesuw a tsiker taŋa ya ka, a sər tsa. 29Aɗaba ana Yudas ŋgat ka, mala makàslà siŋgwe ya, na gà asiŋ ŋa i liwiŋ tar tə dzala, ta gwa: «A ge a ka, Yesuw a gwaɗar: <Da, tə sə̀kəmara gà dukw mezime aà *megirive Paska ya.> « Gà mìsle ŋgiɗ ta gwa: «A ge a ka, a gwaɗar: <Vəl duwa a gà ɓəzla matawak zaakwa.> « 30Yudas a zəm ɗaf ata tsara ka, a dara a bəra ya ndaàvəɗ ata, aɗaba həvəɗ aka ge.

Məpala ahəm awiya ŋana

31Aləka i dəba Yudas ana a dara iɗəm a bəra ya ka, Yesuw a gwaɗa a tar: «Kinehe ka, mburma ta ŋget a a mezlibe ana tì zlibe a à iye, wur ana i dara i təv Mbulum a, dite ta ŋget a a mezlibe ana ti zlibe a à Mbulum nda təv ga ya mbaŋa. 32Na mburma ta ŋget a a mezlibe ana tì zlibe a à Mbulum nda təv ga, iye, wur ana i dara i təv ŋgar a ka, Mbulum tekeɗe, a ɗif a ter a à mezlibe ana tì zlibe a à iye ya mbaŋa. Kinehe bise na a zle a ŋgat a təv mezlibe ŋgar ata tì zlibe a dər a. 33Gà ɓəza gà, kinehe ka, iye ɗa i təv kurum tə̀ma. Ama kə̀la ka, i ndze a hinne asa tsa. Na Yàa da aà kurum a ka, ki ti yehwim a iye. Taŋa kinehe ka, i tsik a kurum aba dukw ana i tsik a gà bàba gà Yahuda ya: Ki slwim a aà mede a təv ana i de aɗəm ya tsa. 34Araha, i tsik a kurum a məpala ahəm awiya ŋa. Dukw ana i tsik a ya ka, wayum ba kurum ilik ilik tserdze. Ki weywim a ba ka, kamala ana i waya kurum a mbaŋa. 35Na kàa gwim dər kataya ka, gà mburma tserdze ti sir a dər, kurum ka, gà ɓəzla mazazama iye nda ndzer kaɗəŋ.»

Yesuw a ɗif à Piyer ana a ta gweɗe aà ŋgat a, i sər ŋgat tsiye

Mata 26:31-35; Markus 14:27-31; Luka 22:31-34

36I fataya ka, Simun Piyer a gwaɗa a Yesuw: «Batsah ga ŋa, kà tsik kataya ana, ki de a ana, a ŋga?» Yesuw a gwaɗar aaka: «I de a ka, a təv ana ki sle a aà mezezeme iye tsiye. Say aka miɗ mba dzekwiŋ na ki ti zezem a iye ya.» 37Piyer a gwaɗar: «Batsah ga ŋa, i sle aà mezezeme a kər tsəna, aàla? Aɗaba iye ka, Yàa hadzal ba aà medzeye à mesife gà aɗaba kər.» 38Yesuw a gwaɗar aaka: «Kàa hadzal ba aà medzeye à mesife yak aɗaba iye ndzer a? Iye ihər i gweɗek a nda ndzer, pàrsa iɗəm tsa: Ələk guŋgwazl a ti tiwe a ka, kàa mbər megweɗe medzige makər, i sər ŋgat tsa.»

ప్రస్తుతం ఎంపిక చేయబడింది:

Yuhana 13: gnd

హైలైట్

షేర్ చేయి

కాపీ