Yuhana 14

Yesuw ka, vatwa ana a da a təv Mbulum a

1I dəba bazlam ata ya ka, Yesuw a gwaɗa a tar asa: «Arəv ma da aà kurum a tsa. Gəsum Mbulum nda gəzləŋ kurum, dite ka, gəsum iye mbaŋa. 2Gà ga a riŋ i bəra Tsir gà pampam hinne. Na mege təv riŋ tsəka, ana ka, i tsik a kurum a tsa. Kinehe ka, iye ihər i de a, i ti lèmbeɗe a kurum a aba təv mendze ata ya. 3Na Yàa da, Yàa làmbaɗa a kurumara aba təv mendze ata ya ka, i mbiɗere a gər a təv kurum a, dite i dzik a kurum a təv gà, kurum tekeɗe, ki ndzwim a i təv ana iye iɗəm a mbaŋa. 4Kurum ka, kà sərum vatwa təv ana iye ihər i de aɗəm a ya.»

5Tumas a gwaɗar: «Batsah mər ŋa, mì sər təv ana ki de aɗəm a ya tsa. Dite meme na mìi sle aà mesire a vatwa ŋa dze ya?» 6Yesuw a gwaɗar aaka: «Iye na a ne vatwa ata ya. Ki ŋgetwim a ndzer nda mesife ka, i təv ga ya mbaŋa. Wura a sle a aà mede a təv Tsir gà tsa, say na nda təv ga ilik tsiye. 7Na kàa sərum iye ka, ki sirwim a Tsir gà mbaŋa. Daga aà kinehe ya, kà sərum ŋgat, dite kàa ŋgatumar.»

8Filip a gwaɗar: «Batsah mər ŋa, ɗif a mər à Tsir yak ŋa, tsam ka, aka ndəv.» 9Yesuw a gwaɗar aaka: «Yàa ndza hinne na i təv kurum dze ana, kà sər iye tsa hiywe ya, Filip? Na wura aka ŋgetiŋ ka, a ŋgat taŋa ka, a Tsir gà mbaŋa. Aàmala na ki gweɗe a ka, say ɗif a mər à Tsir yak ŋa asa dzekwiŋ a? 10Wànà kàa gəs iye, kà sər tsiye ka, mər nda Tsir gà mandza ŋa i təv ilik ŋa ya? Gà bazlam ana i tsik a kurum a tserdze ya ka, nda meweye gà tsa. I mà ka, à biy Tsir gà ana mər mandza ŋa i təv ilik ŋa, a ge a megemir nda ahər gà ya. 11Gəsum bazlam gà ana i gwaɗa a kurum ka, mər ilik nda Tsir gà, iye i təv ŋgar, ŋgat tekeɗe, i təv ga ya. Na kàa gəsum taŋa i tsik a kurum a tsəka, gəsum bazlam megemir aaha i gewa ya, àsla pəra ka, ide.

12Iye ihər i gweɗe a kurum a nda ndzer, pàrsa iɗəm tsa: Wele ana aka gəs iye nda gəzləŋ a ka, a ge a gà mege megemir ana iye ihər i ge a ya mbaŋa. A ta ge a ka, gà bàba gà megemir ana à ze a taŋa ya, aɗaba iye ihər i de a a təv Tsir gà. 13Dukw ana tserdze kàa wizwim nda zləm gà ya ka, i vile a kurum ŋa, na dite mburma ti zlibe a à Tsir gà, aɗaba iye ana Kəla ŋgar a. 14Na kàa wizwim duwa tserdze nda zləm gà ka, i vile a kurum ŋa.»

Mezite Mesife ana Yesuw a gwa ka, i ti slir a kurumere a ya

15Yesuw a gwaɗa a tar asa: «Na kàa wayum iye ka, ki giswim a məpala ahəm gà ana i tsik a ya mbaŋa. 16-17I ta heme a a Tsir gà, ma slər a kurumara mìsle ŋgiɗ a, aà mazlàkà kurum, kamala megweɗe ya ka, Mezite Mesife ana a ɗif a kurum a à ndzer, a ndze a i təv kurum kəla pat aà biybiy a. Gà mburma ana ti zezem a gər ahəɗ ka, ti sle aà meŋgete a tsa, aɗaba ana tə sər tsa, dite ka, ta ŋgeter a tsa asa ya. Ama kurum ka, ki sirwim a ŋgat, aɗaba ana a dere a ka, a ndze a i gəzləŋ kurum, ki ndzwim a tserdze i təv ilik ŋa ya.

18Aɗaba taŋa, sərum dər ka, i ta miyek à kurum a à gər kurum kamala gà ɓəza kəla megile ya tsa. I mbiɗere a gər a təv kurum a. 19I huɗ mendze zaakwa ya ka, i de a ika gər ahəɗ a. Ama kə̀la ka, i ndze a i təv kurum hiywe. Aɗaba ana iye riŋ nda gà mesife ya, kurum tekeɗe, ki ti ndzwim a nda gà mesife ata mbaŋa. 20Na pat ana Mezìtè Mesife Mbulum a dere a a təv kurum a, aka ndzera ka, ki ti sirwim a dər, mər ilik nda Tsir gà, iye riŋ i təv ŋgar, kurum tekeɗe, mandza ŋa i təv i ilik ŋa nda gà iye. Iye tekeɗe, iye riŋ mandza ŋa i gəzləŋ kurum.

21Wur ana aka gəs məpala ahəm gà, a dzar gurmits a bəɗ a ka, ŋgat na a waya iye ndzer a. Ama wele ana a waya iye ya ka, Tsir gà tekeɗe, a weye a ŋgat mbaŋa. Dite iye ibam, i weye a ŋgat asa mbaŋa. I ta pèter a à ndzəɗa gà.»

22Wele ŋgiɗ pam, zləm ŋgar Yudas asa, tsəka, kəla Iskariyut tsa, a gwaɗa a Yesuw: «Batsah mər ŋa, meme na a sàsak ki pèt a mər a à ndzəɗa yak ka, a mər ɗekɗek a? Dite ki pèt a dər a gà mburma ana ti zezem a gər ahəɗ a tsiye?» 23Yesuw a gwaɗar aaka: «Wur ana a weye a iye ya ka, a ti dze a gurmits a bəɗ a dukw ana i tsik a ya mbaŋa. Tsir gà a ta weye a ŋgat, dite ka, mər məma mìi dere a, mìi ndze a nda gà ŋgat. 24Wele ana a waya iye tsiye ka, a dze a gurmits a bəɗ a mifefile gà ɓav tsa. Dukw ana kà tsarakum a ka, a dara ka, i madzala gà gər gà ya tsa. Ama a dara ka, i təv Tsir gà ana a slərra iye ya.

25I tsik a kurum aba bazlam aaha ya ka, aɗaba ana iye ɗa i təv kurum mba ya. 26Wele ana a ti zlèk a kurum a, kamala megweɗe ya, Mezite Mesife ana Tsir gà a ti slir a kurumere a avukw iye ya, a ti ɗif a kurum a à dukw tserdze, dite gà dukw ata i tsik a kurum a tserdze, ta mèye a kurumere a a gər a.

27Ama kinehe i de a aà kurum a ka, i vile a kurum a aba matasla yam gà a gəzləŋ kurum a. Ki ndzwim a dər ɗa barbararra lele. I vile a kurum a ka, kamala biy ana gər ahəɗ a vile a kurum a ya tsa. Ki gwim magəɗa, arəv ma da aà kurum a tsa. 28Kàa tsarakum dukw ana i gwaɗa a kurum ka: <I de a aà kurum a, dite i mère a a təv kurum a> ya. Na kàa wayum iye ka, ŋgeywim ba hinne, aɗaba ana kàa sərum dər, i de a a təv Tsir gà, ŋgat ka, batsah ŋa, a za iye ya. 29Yàa tsik a kurum aba məpàslà ahər ŋa a gà dukw ata ti ta ge a ba aka miɗ mba i təv ana tàa ndzera zukw tsiye ya, dite i təv ana aka ndzera ya ka, ki giswim a nda gəzləŋ kuɗa. 30Kinehe ka, i tsik a kurum a duwa hinne asa tsa, aɗaba Əbay gər ahəɗ aaha aka à mendzera. Ama kə̀la ka, ndzəɗa ŋgar a riŋ aà mekwere iye tətsà. 31Ama i ge a ka, kamala ana Tsir gà a gweɗiŋ, ge ya, na dite ku weke ma sər dər ka, i waya ŋgat a.

Kinehe ka, hitswim aà mbulum, tàkwa i faha ya.»

ప్రస్తుతం ఎంపిక చేయబడింది:

Yuhana 14: gnd

హైలైట్

షేర్ చేయి

కాపీ