Marko 16
16
Mpiunoto e Yeso
(Matayo 28:1–8; Luka 24:1–12; Yoana 20:1–10)
1Kore teipa e Jumamos eicha Sabato, neinyiang'u Maria Magadalena o Maria ng'otonye Yakobo, o Salome latan naarropil pee etum aachom aaelie Yeso. 2Nepuo tasiran oleng e Jumapili#16:2 Kore Jumapili naa mparri ekue e uki too Lyiaudi. , nkurarei nochi ake nailiepunyie ndama. 3Nejokino ninche maate, <<Ng'ae sa oibeleleng'oki iyioo ele soit to nkutuk e nkurarei?>>
4Kore pee eapu nkonyek aing'or, nedol aajo eibeleleng'oyieki ilo soit, naa keikitok oleng. 5Nejing nkurarei, nedol lbarnoti owuon ta mbata e tetene neichopito nkila naibor naado, neing'asia ninche oleng.
6Nejoki ninche, <<Eming'asia, Yeso le Nasaret iyieitata otechoki. Etipiwua, metii ene! Eng'ura, ende apa eiteperieki ninye! 7#Mat 26:32; Mrk 14:28Kake enchom entiliki looiteng'eni lenyena o Petero aajoki, <Keituruk tekue ntae alo Galilaya. Kore te inie, naa idoldol ninye ana apake natiaka ntae.> >>
8Neipung to nkurarei aaisig, amu keikirikirete to ngureticho, neing'asiate. Neaku meata hoo obo otilikita amu ketuguretita.#16:8 Kore mpala kumo e Marko naatumoki apa, naa ene ake ebaki tele kereri le isiet. Kore mbata enche naa ketoponikita kulo omon: Kake kore kuna kitaarriyianat pooki naaichooki, neliki ꞉ninche lolo oonyikita Petero to ndorropo. Kake kore tesiedi, neirruaaya Yeso inia likoroto sinyati nemerroyo naipirita njeunoto ee ntarasi aimu ninche eing'uaa neiliepunyie ndama metabaki nedoyiere. Aamin.
Eipung'oka ꞉Yeso Maria Magadalena
(Matayo 28:2–9; Yoana 20:11–18)
9Kore pee epiu Yeso te siran e Jumapili, neipung'oki Maria Magadalena tekue. Kore Maria, naa ninye apa etaarayie ꞉Yeso lairiruani sapa meeipung'o. 10Nelo ninye aliki lolo ootii apa tenebo o Yeso, ooisinanio, neichirita. 11Kore pee ening ninche aajo keichu Yeso, netoduaa ꞉Maria Magdalena, neany eiruk inia.
Eipung'oka ꞉Yeso looiteng'eni oare
(Luka 24:13–35)
12Kore eicha inia, neitoki Yeso aipung'oki lkulie lenche oare, ta nkae pukunoto epuoito lchampai. 13Nepuo sii ninche aaliki lolo kulikae, kake eitu abaki eiruk ꞉ninche.
Eipung'oka Yeso looiteng'eni lenyena tomon obo
(Luka 24:36–46; Yoana 20:24–30)
14Kore tesiedi, neipung'oki lolo tomon obo enyeita ndaa. Nekusakan tankaraki neitu eiruk, negol ltauja lenche. Amu kore lolo otoduaa ninye etipiwua, neitu eiruk ꞉ninche.
15 #
Asat 1:8
Nejoki ninche, <<Enchom nkopi pooki entilikoi Lomon Supati too ltung'ana pooki le nkop. 16Kore loiruk naa keipatisi, neitejeuni. Naa kore ilo lemeiruk, nedung'okini nkiguana torno. 17Naa kuna nkitodolunot naaku tenebo o lolo laairuk nanu. Kore ta nkarna ai naa kearaa lairiruani meipung'o neiro too nkutukie ng'ejuko, 18neibung lasuria taa nkaik naa kore tenemat sayiet nayecho, nemeata hoo neiko ninche. Keiteleki ꞉ninche ltamoyia nkaik neichiu.>>
Ewaki Yeso aailiepie chumata
(Luka 24:50–53; Asat 1:9–11)
19 #
Asat 1:9–11
Kore pee eidip Laitoriani Yeso airorie ninche, neyai aailiepie chumata. Newuon ta mbata e tetene e Nkai. 20Nepuo laaduo ooiteng'eni aalikoo to ng'oji pooki, neasicho Laitoriani tenebo o ninche, eitodolu ajo kedede ilo kilikuai too nkitodolunot naataa tenebo o ninche.
ప్రస్తుతం ఎంపిక చేయబడింది:
Marko 16: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
