Marko 15
15
Yeso tekue Pilato
(Matayo 27:1–2,11–14; Luka 23:1–5; Yoana 18:28–38)
1Kore nochi naikenyunyie, neiguana laitainok kutuaa la lasar o lpayiani o laiteng'enak loo nkitanapat o lkiama pooki laa larikok loo Lyiaudi. Neen Yeso, nerik aaya, nepik nkaik e Pilato.
2Neipar ꞉Pilato ajoki, <<Iyie dei Lkinkii loo Lyiaudi?>>
Nejoki ꞉Yeso, <<Iyie ojoito.>>
3Kore lkutuaa laa laitainok la lasar, nepik ninye mbaa kumo. 4Neigil Pilato aipar ninye ajoki, <<Meata niwol ajo? Todua newua mbaa nikipikitae.>> 5Kake eitu eitoki ꞉Yeso awoliki toki, neing'asia ana Pilato.
Etachamayie ꞉Pilato metari Yeso metua
(Matayo 27:15–26; Luka 23:13–25; Yoana 18:39—19:16)
6Kore ng'amata pooki e ntasim, naa kelaaki echi ꞉Pilato lturrur ltung'ani obo oena oomonu ꞉ninche. 7Netii apa ltung'ani oena oji Barabas tenebo o lboitieii lenyena. Kore apa ninche naa lkiricho oaatara ltung'ana metuata ta ng'amata e long'olng'oli. 8Neiliepaki ꞉lturrur Pilato, neng'asu aaomon meitaasaki ninche naitaasaki chiaake.
9Nejoki ꞉Pilato ninche, <<Iyieuu nalaaki ntae Lkinkii loo Lyiaudi?>> 10Amu keteyielo ajo kore laaduo aitainok kutuaa la lasar, naa keichooitie Yeso tankaraki lom. 11Kake neisur ꞉lkutuaa laa laitainok la lasar lturrur meichoo Pilato metalaaki ninche Barabas alang tenelaku Yeso.
12Neitoki ꞉Pilato ajoki ninche, <<Oo ele lijoijo Lkinkii loo Lyiaudi, kaa aitaas ninye?>>
13Nebuak aitoki aajo, <<Techo ninye to lmusalaba.>>
14Neipar ꞉Pilato ajoki, <<Aa kaa torno etaasa ninye?>>
Kake neitoki ninche aabuak oleng alang duo aajo, <<Techo ninye!>>
15Kore amu keyieu apa ꞉Pilato neiting'id ilo turrur, nelaaki ninche Barabas. Neicho Yeso meidong'i te liche#15:15 Kore apa inia liche naa keinikino loik oopi nkue, naa ltung'ana ootudung'okaki lkiye eidong'ieki. , neichooyo metechei.
Eikordodita ꞉Sikarini Yeso
(Matayo 27:27–31; Yoana 19:2–3)
16Nerik ꞉sikarini Yeso atua lgilata le nkaji e lkitok loo Rroman oji Praitoria namanya apa Pilato, neipotu sikarini pooki ootii inie. 17Neichopoki nanka mugie, neitibir nkopiyia ee lkuku, nepik nkue enye. 18Neng'asu aairoroki ninye eikordod aajoki, <<Supa, Lkinkii loo Lyiaudi!>> 19Neoch nkue to much, nenataki ninye nkamlak, negilakini kung aasai. 20Kore pee eidip aaikordodo, neitai naduo anka mugie, neichopoki nankan enyena, nerik aulo aapuo aache to lmusalaba.
Ncheto e Yeso to lmusalaba
(Matayo 27:32–44; Luka 23:26–43; Yoana 19:2–3)
21 #
Rrom 16:13
Ketii apa ltung'ani oimita nkoitiei eing'uaa nkang'ite e oriong e Yerusalem, oji Simon. Naa keing'uaa apa lkerenket oji Kirene nera sii menye Alekisanda o Rrupo. Neisimaki ꞉sikarini ninye metanapa lmusalaba le Yeso. 22Neriki Yeso ng'oji neji Golgota, aa keji, <<Ng'oji e mborbor e nkue.>> 23Nesaan aicho ninye naichuo e lmusabibu nachulare malmal, kake neany. 24#SNk 22:18Neche ꞉ninche ninye. Neorikino nkilani enyena, nenuk nkuko aadol ntoki nabaki pooki ng'ae atumo.
25Naa saai uni e siran etecho ꞉ninche ninye. 26Naa kore te keper ninye, netii lkigerot oojo <<lkinkii loo lyiaudi >> laa ninche etudung'okinyieki ninye nkiguana e lkiye. 27#Isa 53:12Kore tenebo o ninye netechoki lapurrok oare, lobo te tetene enye o lobo te kidienye. 29#SNk 22:7, 109:25, Mrk 14:58; Yoa 2:19Kore lolo ooimita inie, nedek ninye eipirpir nkuechi ejoito, <<Hoo! Iyie ojo kauroo nkaji e Nkai nintoki achet too mperot uni! 30Todou taata to lmusalaba, ntejeu koon!>>
31Kore sii lkutuaa laa laitainok la lasar, neikordod ninye aaiko nejia ejokino o laiteng'enak loo nkitanapat, <<Keitejewua lkulie kake meidim aitejeu koon! 32Nchoo Mesia Lkinkii loo Isirael metodou to lmusalaba payie kidol, nikiruk.>> Kore lolo ootechoki tenebo o ninye, nedek sii ꞉ninche ninye.
Lkiye le Yeso
(Matayo 27:45–56; Luka 23:44–49; Yoana 19:28–30)
33Kore payie ebaki saai ile, neaku naimin to nkop pooki ana metabaki saai saal. 34#SNk 22:1Kore saai saal, nebuak Yeso to ltoilo kitok ajo, <<Eloi, Eloi, lema sabaktani?>> Kore nautu inia naa ana, <<Nkai ai, Nkai ai, aanyo payie kitung'ayie?>>
35Kore pee ening ꞉lbata loo lolo ooitachoo te inie ejo nejia, nejo, <<Tining'o, Elija eipotuta.>>
36 #
SNk 69:21
Nekuet lobo, neiput mputaput naichuo naisiicho, neremoki loperriai neiliepie aicho metamata, nejo, <<Entung'ai, matodol tanaa kelotu Elija aitodou to lmusalaba.>>
37Nebuak Yeso aichir to ltoilo sapuk, nedung'o tau.
38 #
Nai 26:31–33
Kore nochi anka naor nkaji e Nkai, nekija nkatitin are, ang'asu te keper ana meipung'o. 39Kore pee edol ilo kitok loo sikarini oitache aing'urare Yeso, neikuna pee edung'o tau, nejo, <<Kedede kore ele tung'ani naa kera apa Nkerai e Nkai!>>
40 #
Luka 8:2,3 Netii sii inie ntomonok naaing'orita elakua, kore atua ninche ketii Maria Magadalena o Maria ng'otonye Yakobo lara lkini o lalache lenye oji Yose, netii sii Salome. 41Ninche naairukurukore etii Galilaya, neisiaai. Neatae sii nkulie kumo naailieputua aapuonu Yerusalem tenebo o ninye.
Nukaroto e Yeso
(Matayo 27:57–61; Luka 23:50–56; Yoana 19:38–42)
42-43Kore tankaraki nataa teipa e inia parri e napa, eikienyu eaku mparri e Sabato, neinapnapaki Yosep le Arimataya Pilato neomonu sesen le Yeso. Kore apa ninye naa ltung'ani le nkanyit, nera lobo lo lkiama laa larikok loo Lyiaudi, neanyita sii ninye Nkitoria e Nkai.#15:42–43 Kore apa Sabato too Lyiaudi, naa keng'asu teipa etodooyie ndama. Naa inia payie eyieu Yosep nesiooyo alo anukaa sesen le Yeso, amu meyiere apa neas ta mparri e Sabato. 44Neing'asia Pilato pee eji ketua, neipotu lkitok loo sikarini neipar aitisipu tanaa ketua duo. 45Kore pee esipu te ilo kitok loo sikarini ajo ketua, neicho Yosep meawa ilo sesen lenye. 46Neinyiang'u Yose nanka supat napuyiapui, neitodou ilo sesen, neirinaki inia anka. Nepik atua nkurarei naguetuno to soit sapuk, neibeleleng'oki soit nkutuk e inia kurarei. 47Kore Maria Magadalena o Maria ng'otonye Yosep, nedol inie neiteperieki ninye.
ప్రస్తుతం ఎంపిక చేయబడింది:
Marko 15: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
