Luka Mbaa naaituruku
Mbaa naaituruku
Kore ana buku ee Lomon Supati ooigero Luka, naa kelimu aaipidaki mbaa kutuaa e tipat naataasate taatua nkichon e Yeso. Kore laigeroni lena buku naa Luka oara apa lkitarrii, nera sii lchore lo lkipaaret oji Paulo otilika ltung'ana kumo mbaa naaipirita Yeso. Kore apa ninye naa mara loo Lyiaudi. Keigero apa ninye ana buku aigeroki ltung'ani oji Teopilo eitodol ajo kedede ntoki pooki natining'o naipirita Yeso. Kejo ltung'ana kebaki naa /keigeroki apa ana buku ta lari 60, eidipaki aatiuu Yeso. Keteyiayie Luka kuna baa naaigero ta nkarriyiano, amu meti apa payie easai. Naa keigeroka ltung'ana loo Lyiaudi o ltung'ana loo lkulie oreren.
Kore ana buku naa kelimu Lomon Supati. Keitodolu ajo ketaasa ltung'ana pooki ng'ok, naa keyiere payie edung'okini nkiguana torno. Kake keyewuo Yeso aye tankaraki ng'ok ang payie kitum melet o Nkai, niking'asu nkichon ng'ejuk tenebo o ninye. Neitodolu Luka ajo kecham apa ꞉Yeso ltung'ana pooki, lewa o ntomonok, nkera kunini, loomena o lparakuo, laisiaayiak o lkutuaa.
Keichiunyie ltung'ana oomoyiaa, nelaku ltung'ana oaata lairiruani. Neiteng'en ltung'ana mbaa naaipirita Nkai eibalakinyie ajo ng'ae ninye o nchaman enye too ltung'ana o mbaa naayieu ꞉ninye payie eas ltung'ana. Kore nkata kitok naa keiteng'ena tee nkitanyanyukot.
Kore lkutuaa loo Lyiaudi, naa ketanya nkiteng'ena e Yeso, neyiaya nkoitiei naarie ninye metua neche to lmusalaba payie ebaya yieunoto e Nkai. Kore payie eri ninye metua nenukari, nepiu ta mparri e uni.
ప్రస్తుతం ఎంపిక చేయబడింది:
Luka Mbaa naaituruku: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy