Luka 1
1
1Ketonyua apa ltung'ana kumo aaiger nana baa naaitabayieki taatua iyioo, 2ana natamakita iyioo lolo ootoduaa aasipu nenia baa ta ng'asunoto, nera sii laisiaayiak le ilo rerei. 3Tankaraki inia, kore aidipa nanu atisipu nenia baa pooki ta ng'asunoto, nadol sii nanu ajo, keiririkino payie aaigeroki iyie Teopilo kitok oyanyiti, to nkoitiei naipidari. 4Kataasa ana, payie itum ateyielo sipat ee mbaa nikitilikaki.
Limunoto e inoto e Yoana Laipatisani
5 #
1Ng'a 24:10
Kore apa ta ng'amata e Erode lkinkii le mbata e Yudea, netii laitainoni la lasar oji Sakaria le ntipat ee laitainok la lasar le Abiya. Neyem apa ntito e ltim la laitainoni la lasar oji Aron, naji Elisabet. 6Naa kore apa ninche, kera pukura ltung'ana loosipat tekue Nkai, neibung'a nkitanapat o lkerreti pooki la Laitoriani, meata ntioto. 7Nemeata ninche nkera, amu keolipi apa Elisabet, netaarrarrita pukura.
8Kore mparri nabo eitaita Sakaria lasar, era nkata naisiaaicho laitainoni obo la lasar le ntipat enye, 9nerriakino ninye ꞉nkuko, tana netiu te lkerreti laa laitainok la lasar, payie ejing nkaji e Laitoriani, apej lasar orropili. 10Kore eomonito lturrur kitok to boo ta nkata napeji lasar, 11neipung'oki ninye ꞉lmalaika la Laitoriani, neitache ta mbata e tetene e lperere la lasar orropili. 12Kore payie edol ꞉Sakaria, neiputukuny, neguretu. 13Nejoki ꞉lmalaika, <<Miguretu Sakaria, amu kore nkomono ino, naa ketining'oki. Kore nkitok ino Elisabet, naa ikiiki layieni, ning'amaki nkarna naji Yoana. 14Naa itum iyie ng'ida kitok, neng'idakino lkumo inoto enye. 15#Nki 6:3Amu kore ninye, naa keaku kitok tekue Laitoriani. Nememat naichuo e lmusabibu anaa ndarpoi, naa keiput ninye ꞉Ltau Sinyati, abaki ewuon etii nkocheke e ng'otonye. 16Naa kerrinyoki ꞉ninye ltung'ana le Isirael kumo netii Laitoriani Nkai enche. 17#Mal 4:5,6Neituruk tekue Laitoriani, to mpukunoto o to ngolon ee Elija, paa kore ltauja loo loo menye, neiwuatuwuataki nkera enche. Neiwuatuwuataki sii ltung'ana lemening'icho ng'eno ee ltung'ana loosipat, neitibiraki Laitoriani ltung'ana ooterretenete.>> 18Nejoki ꞉Sakaria lmalaika, <<Aji aiko payie ayielou inia? Amu kara nanu lpayian arrarri, netaarrarra sii nkitok ai.>> 19#Dan 8:16, 9:21Newoliki ꞉lmalaika ajoki, <<Kara nanu Gabiriel, ilo oitache tekue Nkai, naaterewua maairorie iyie, naaliki ele kilikuai supat. 20Naa kore taata iming'anu, nimintoki aidim airoro, ana metabau inia parri naasai kuna baa, tankaraki eitu iruk rereii lainien oitabari ta ng'amata enche.>>
21Kore ake eanyita ꞉ltung'ana Sakaria, neing'asia tankaraki keimalmala ta nkaji e Nkai. 22Kore payie eipung'u ninye, naaku meidim airorie ninche. Neyielou aajo ketoduaa nduata e nking'asia taatua nkaji e Nkai. Neitodol ninche nkitodolunot, kake newuon aa ming'ani.
23Kore payie eichunye nkata e nkisiayiere enye ta nkaji e Nkai, nerrinyo alo nkang. 24-25Kore tesiedi nkiti kata, nenutai nkitok enye Elisabet, newuon ta nkaji meipung lapatin imiet. Nejo, <<Laitoriani laaitaasa ana, ta ng'amata naatoduaa ninye, naaworu anyit tekue ltung'ana.>>
Limunoto e inoto e Yeso
26Kore ta lapa le ile le nutai e Elisabet, neipaaya ꞉Nkai lmalaika Gabiriel, mechomo nkop e Galilaya, lkerenket oji Nasaret, 27#Mat 1:18neti nkoliontoi neitu eboitiere lee. Naa ketasayia apa ninye ꞉ltung'ani oji Yosep, le ntalochi e Daudi. Kore inia oliontoi naa keji Maria. 28Nelo lmalaika neti ninye nejoki, <<Serian iyie naichooki omom! Ikitii Laitoriani tenebo.>> 29Kore ninye, neng'aing'ayu oleng tankaraki lomon la lmalaika, nejo ta ltau, <<Kaji etiu ana kirorokino?>> 30Nejoki ꞉lmalaika, <<Mimputukuny Maria, amu itumo omom ta Nkai! 31#Mat 1:21Naa kore iyie, inutai, niiu layieni, naa ing'amaki nkarna naji Yeso. 32#2Sam 7:12,13,16; Isa 9:7Naa keaku ninye kitok, neipoti ajo Nkerai e ꞉ilo ooisul pooki. Keicho ꞉Laitoriani Nkai ninye lorika le Daudi oara akuyia lenye. 33Neitore locho le Yakobo ntarasi, nemeata nkitoria enye nkiting'oto.>> 34Nejoki ꞉Maria lmalaika, <<Aji eiko ana teneasai, neitu apake aboitiere nanu lee?>> 35Newoliki ꞉lmalaika ajoki, <<Kelotu Ltau Sinyati te keper iyie, nikisiapaa ꞉ngolon e Ilo ooisul pooki. Naa kore ilo oini, neji sinyati naa Nkerai e Nkai. 36Kore sii Elisabet e ntipat ino, naa ketunute nkayieni ta nkarrarro enye. Ketejoki apa kera ninye olipi, kake lapa le ile ele, le nutai enye, 37#Ng'as 18:14amu meatae ntoki nemeidimai ta Nkai.>> 38Nejo Maria, <<Ng'ura, kara nanu nkaisiaayiani e Laitoriani, metaasai ta nanu ana nitejo.>> Neinyuototo lmalaika aing'uaa ninye.
Eisabaka ꞉Maria Elisabet
39Neinyuototo Maria inia ng'amata, nelo asiooyo nebaya lkerenket obo le nkop ee ldonyuo le Yuda. 40Nejing nkaji e Sakaria, neiroroki Elisabet. 41Kore payie ening Elisabet nkirorokino e Maria, neiguran nkerai taatua nkocheke enye, neiput Elisabet ꞉Ltau Sinyati. 42Nebuak to ltoilo sapuk nejo, <<Imayiana iyie alang ntomonok pooki, nemayiana sii inoti le nkocheke ino. 43Aanyo payie aaitaasaki nanu ana, eji paa, ng'otonye Laitoriani lai nalotu natii? 44Amu kore payie aning nkirorokino ino, neiguran nkerai te ng'ida taatua nkocheke ai. 45Naa emayiana inia nairuko nchere, keitabari inia apa natiaka ꞉ninye Laitoriani.>>
Sinkolio le Maria
46Nejo Maria,
<<Kerrep ꞉nkurruk ai Laitoriani
47neng'idakino ꞉ltau lai Nkai, Laitejeunoni lai,
48 #
1Sam 1:11
tankaraki keing'ura mborron e nkaisiaayiani enye.
Naa kore ang'asu taata, kaajo ntowuon pooki namayiana,
49amu aaitaasa Lopeny ngolon mbaa kutuaa,
naa keisinyati nkarna enye.
50Naa kore lng'er lenye too lolo oourie ninye, naa
kebik ntowuon o ntowuon.
51Etaasa mbaa kutuaa e ngolon ta nkaina enye,
nesachaa lolo oaata nkilacha taa mparrunot ee ltauja lenche.
52 #
Ayu 5:11, 12:19 Neitodou lkutuaa too lorikan lenche le nkitoo
neiliepie lolo oobor.
53Neitiemu loaata sumach too ntokitin supati,
nerriny lparakuo taa nkaik naarok.
54-55 #
Ng'as 17:7
#
1Sam 2:1–10
Neret Isirael laisiaayiani lenye,
payie eparraa lng'er lenye
ta Abraam o ichioi enye ntarasi
ana ilo lekutuk apa oitaka lmakui lang.>>
56Nebik Maria o ninye ng'amata nabana lapatin okuni, nerrinyo alo nkang.
Inoto e Yoana Laipatisani
57Nebau naa nkata naichuo Elisabet, neiu layieni. 58Kore latia o ntipat enye nening aajo keitoduaa ninye ꞉Laitoriani lng'er lenye kitok, neng'ida tenebo o Elisabet.
59 #
Lal 12:3
Kore ta mparri e isiet, nepuonu aamurat#1:59 Kore muratare te Isirael naa lminchire oitodolu lning'o, te ilo mumai oatama Nkai o ltung'ana le Isirael. Ng'as 17:10–12. nkerai, nesaan aang'amaki nkarna e papa lenye Sakaria. 60Kake newoliki ꞉ng'otonye ajoki, <<Meji nejia, kake keji Yoana.>> 61Nejoki ꞉ninche, <<Meatae to ltim lino ltung'ani oata inia arna.>> 62Neirorie ꞉ninche menye taa nkaik, aaipar nkarna naichori nkerai. 63Neomonu nchata dapach naaiger. Neiger ajo, <<Keji nkarna enye Yoana.>> Neing'asia pooki. 64Nebolo nkutuk enye nabokata. Neng'asu aitoki airo arrep Nkai. 65Nejing ngureticho atua inia latia enche pooki, neimakini nana baa ta mbata pooki nabore lowuan e Yudea. 66Naa kore pooki ootining'o, nepik kuna baa atua ltauja lenche ejo, <<Amaa sa ana kerai, keaku ltung'ani otuwuaja?>> Amu kore nkaina e Laitoriani ketii tenebo o ninye.
Sinkolio le Sakaria
67Kore Sakaria papa lenye, neiput ꞉Ltau Sinyati, neibonu ajo,
68<<Meisisi Laitoriani Nkai e Isirael,
amu kore ninye, naa keyewuo alaku ltung'ana lenyena.
69Naa keitacheyie Laitejeunoni ogol,
ta ntalochi e laisiaayiani lenye Daudi,
70ana netejo apa too Loibonok lenyena sinyat,
71meeitejeuni iyioo taa lmang'ati lang o taa nkaik ee lolo pooki ooiba iyioo.
72Keing'erru lmakui lang,
neparru lning'o lenye sinyati,
73aa ilo lmumai otamie papa lang Abraam,
74nelaku iyioo taa nkaik ee lmang'ati lang,
payie kitum aaisiaayia mikiata ngureticho
75te sinyaticho o tee sipat, tekue ninye te nkichon ang pooki.
76 #
Mal 3:1
Kore iyie nkerai ai, naa ikiji loiboni le Ilo ooisul pooki,
tankaraki inturuk tekue Laitoriani nintorioo nkoitieii enyena,
77Ninteyielo ltung'ana lenyena njeunoto
ta mpalikinoto ee ng'ok enche,
78tankaraki kenana Nkai ang ocheke.
Kore tankaraki inia, keipung'oki iyioo wong'an e nkakenya nadou eing'uaa chumata,
79 #
Isa 9:2
paa kore lolo oowueni taatua naimin o loip lo lkiye, neitoong,
neteeyo nkejek ang to nkoitiei e seriani.>>
80Kore inia kerai, nebulu, neponikino ngolon e Ltau Sinyati, nebikoo to lkees ana metabai mparri naibalie koon too ltung'ana le Isirael.
ప్రస్తుతం ఎంపిక చేయబడింది:
Luka 1: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
