Luka 2
2
Inoto e Yeso
(Matayo 1:18–25)
1Kore tee nenia perot, neipung'u nkitanapata naing'uaa Kaisari#2:1 Kore Kaisari naa laiguanani kitok loo Rroman. oji Agosito, ejo meigeri nkarn ee ltung'ana pooki le nkop pooki naitore Rroman. 2Naa ana apa nkigerore ekue, era Kirinio lkitok le nkop e Siria. 3Nelo ltung'ani pooki lkerenket lenye meigeri nkarn. 4Kore Yosep, neinyuototo te lkerenket le Nasaret otii Galilaya ailiep alo Yudea, nelo Beteleem lkerenket le Daudi. Amu kera apa ninye lo ltim, nera aitoki le ntalipa e Daudi. 5Nelo meigeri nkarna tenebo o Maria, inia apa natasayia, neirochio apa ninye inia kata. 6Kore etii ninche inie, nebau nkata najing Maria aji. 7Neiu nkayieni lkikau lenye neimulumulakini nkilani e keraicho, nepik atua nkarao nati boo ee nkichu, amu ketala apa ninche neperie taatua nkaji ee lomon.
Eipung'oka ꞉lmalaika lchekuti ootii mbooitie
8Kore apa te inia kop, naa ketii lchekuti oowueni aarrip mbooitie enche kuarie taa ang'ata. 9Neipung'oki ꞉lmalaika la Laitoriani, newong'aki ꞉wong'an e nkitoo e Laitoriani taa mbat pooki, neiputukuny oleng. 10Nejoki ꞉lmalaika, <<Emimputukuny! Amu eng'ura, ayaka ntae lomon supati le ng'ida sapuk, naaku too ltung'ana pooki. 11Amu kore ana parri te lkerenket le Daudi, etiikaki ntae laitejeunoni, naa ninye Kristo#2:11 Kore Kristo naa keidimi aatejo Mesia. Kore apa nkarna Kristo, naa keipirita ajo loela anaa lobukokino lata. Kore tenebukokini ltung'ani lata tanaa teneel, naa keitodol ajo keichoo ninye ꞉Nkai siaai le tipat. Keitodolu aitoki ana te lkereri le tikitam o ile. Laitoriani. 12Naa ana nkitodolunoto taa ntae: Itumtum nkerai kini naimulumulakino nkilani e keraicho, eperito taatua nkarao nati boo ee nkichu.>> 13Kore ake inia kata, nejo pang njore kitok ee lmalaikani le chumata. Neisis Nkai tenebo o ilo malaika aajo,
14<<Meisisi Nkai te idie te keper,
neaku sotua to nkop, too ltung'ana oichoo ꞉Nkai omom enye.>>
15Kore payie errinyo lmalaikani aapuo chumata, nejokino lchekuti, <<Enyuoto ja maapetin aabaya Beteleem, aadol ana bae nataase natilika iyioo Laitoriani.>> 16Neinyuototo aapuo aasiooyo, neiniapu Maria o Yosep o nkerai, eperito nkerai ta nkarao. 17Kore payie edol, nelikoo lomon ootiakaki apa ooipirita inia kerai. 18Neing'asia pooki ng'ae otining'o lomon ootilimutua ꞉lchekuti. 19Kake kore Maria nenap kuna baa pooki eparraa ta ltau lenye. 20Nerrinyo lolo chekuti, eisisita, nerrepita Nkai taa mbaa pooki naatining'o o naatoduaa. Naa nejia apake etiu ana natiakaki ninche.
Eichooki Yeso nkarna
21 #
Lal 12:3,
Luka 1:31
Kore payie ebaki mparri e isiet namuratieki inia kerai, neichori nkarna naji Yeso, nkarna naichoo apa ꞉lmalaika ewuon eitu enutai ng'otonye ninye.
Ewaki Yeso nkaji e Nkai
22Kore payie ebau nkata e nkitorropiloto enche ana netiu tee nkitanapat e Musa#2:22 Kore pee eiu ntomononi layieni, nedoli aajo mesinya, newuon mperot artam, eitu elo nkaji e Nkai aitai lasar oituk ninye., neya ntoiwuo enyena Yeso Yerusalem aayaki Laitoriani, 23#Nai 13:2,12ana naigero tee nkitanapat e Laitoriani nchere, <<Kore lkikau pooki, neipoti aajo sinyati ta Laitoriani.>> #2:23 Kore kipirte e sinyati ta Laitoriani tene ng'oji naa <<le Laitoriani.>> 24#Lal 12:6–8Neitai sii lasar ana inia apa natejoki tee nkitanapat e Laitoriani, payie eitaini <<nkutukurruki are anaa nkuoo are e ndapdap.>>
25Eti apa Yerusalem ltung'ani oji nkarna enye Simion, nera ltung'ani loosipat neurie Nkai. Neanyuta payie eitogoli ltauja loo ltung'ana le Isirael, netii Ltau Sinyati tenebo o ninye. 26Neibalakinyie ninye ꞉Ltau Sinyati nchere, meye ewuon eitu edol Kristo la Laitoriani. 27Nelotu ninye nkaji e Nkai erikoo ꞉Ltau Sinyati. Kore payie eyau ꞉ntoiwuo inia kerai enche naji Yeso atua nkaji e Nkai aaimie lkerreti ana nayieu lkerreti loo nkitanapat e Musa, 28neng'amaa ninye taa nkaik enyena neisis Nkai ejo,
29<<Laitoriani, keidim taata laisiaayiani lino atepero te seriani ana nitejo apa.
30Amu kore nkonyek ainien, naa ketodua ilo literewua meitejeu iyioo,
31lintibira tekue nkonyek ee ltung'ana pooki,
32 #
Isa 42:6, 49:6, 52:10 inia wong'an nimbalunyie too loreren pooki,
o nkisisa too ltung'ana linono le Isirael.>>
33Kore menye o ng'otonye, neing'asia tee nenia baa naatiakaki ninche naaipirita ninye. 34Nemayian ꞉Simion ninche, nejoki Maria ng'otonye inia kerai, <<Ng'ura, kegeluno ana kerai paa kore ninye, neaku lorriare anaa loiliepunyie lkumo te Isirael, neaku nkitodolunoto natanyaki naing'uaa Nkai. 35Paa kore mparrunot ee ltauja kumo, neibalunyieki, nikirem lalem opi ltau lino.>>
36Keatae sii apa nkaidetidetani naji Ana, ntito e Panuel e lmarei le Acha. Kore apa ninye, naa keata larin kumo. Keyemaki apa ewuon eitu apake eboitiere lee, neboita o lpayian lenye larin sapa. 37Neye lpayian#2:37 Neye lpayian Kore kulo rereii, naa ketoponikaki payie eibalai. newuon era nkoiliai larin 84 meipung'u taatua nkaji e Nkai, esai Nkai kuarie o parkiji een nkutuk aomon. 38Nenyikaki ninche inia kata nerrinyoki Nkai nache, neiro mbaa naipirita inia kerai too pooki oaanyuta lakunoto e Yerusalem.
39 #
Mat 2:23
Kaa hae, kore payie eidip ninche aataas ana nayieu nkitanapat e Laitoriani, nechuko aapuo mbata e Galilaya lkerenket lenche oji Nasaret. 40Kore inia kerai, nebulaa, neiput ngolon, neboreii ng'eno, netii munyani e Nkai tenebo o ninye.
Yeso etii nkaji e Nkai
41 #
Nai 12:1–27; Nkit 16:1–8 Kore apa ntoiwuo e Yeso, naa kepuo ng'amata nabo ta lari Yerusalem aanya ntasim e Pasaka. 42Kore eata Yeso larin 12, neiliep aapuo inia tasim ana netiu te lkerreti. 43Kore errinyo ninche aapuo nkang'ite eidipe ntasim, neisiadu layieni Yeso te Yerusalem, neitu eyielou ntoiwuo enyena aajo ketowuana. 44Naa kore amu ketejo ninche kebaki naa ketii atua lturrur oloito, nepuo memuto neng'asu aayiaya taatua ltung'ana lenche o too sotuatin lenche. 45Kore payie elau ninye, nerrinyo aapuo Yerusalem aayiaya. 46Netumi eima mperot uni ta nkaji e Nkai, ewuon taatua laiteng'enak loo nkitanapat einining ꞉ninye ninche, neiparichiere. 47Kore lolo pooki oinining'o ninye, neing'asia te ng'eno o woleta enyena. 48Kore payie edol ꞉ntoiwuo enyena neing'asia. Nejoki ꞉ng'otonye ninye, <<Nkerai ai, aanyo payie inkonyi iyioo? Ng'ura, kore papa lino o nanu naa ikiteyiaitie iyie kiata ldukuman.>> 49Nejoki ꞉Yeso ninche, <<Aanyo payie kiyiayaya? Miyielolo ntae aajo meata ajo payie mati nkaji e Papa lai?>> 50Kake eitu eyielou ninche inia natiaka. 51Nerrinyo Yeso tenebo o ninche adoyio alo ana metabaki Nasaret. Neicho ninche nkanyit, nepik ng'otonye lolo omon pooki ltau lenye.
52 #
1Sam 2:26; Rach 3:4 Neponari Yeso te ng'eno, nebulu te sesen, netum omom ta Nkai o too ltung'ana.
ప్రస్తుతం ఎంపిక చేయబడింది:
Luka 2: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
