YOHAN 20
20
Vmaungx Woalc muq Ruiuz Khux
(Mat 28:1-8; Mak 16:1-8; Luk 24:1-12)
1Taungjix raungnuiyq raungnvp raungx max wuix nuex Magdalene Mary kuex luip kvyuq kaz koq tueq, luip puingc juing lung kuex vkvlanc kay wuez khiz kaz tueq. 2Piq kuex Simon Peter nuiyc Yesu rueq lungwawc hvlc vpiq kungjix waz kox nuex yuz wvnc vtueq, “Taungjix kuex luip mungx wawc tsuingshiq rueq lvmz wvnc vshuex, m-yuq wuez taq gay kaz tvnx tuiuz miq!” ngoz tueq jungx tueq.
3Kvkaq Peter nuiyc vganc kungjix waz kuex luip ruiuz khux nuex yuz wvnc tueq. 4Tsuingnueyc vdvmz nuex yuz wvnc tueq rvhvt maq vganc kungjix waz rueq Peter kuex yix nuex gay shec ruiux, piq kuex luip nuex kungkhux httuiuc kaz tueq. 5Piq bumx vtueq lawc koq tueq vyop juing bvnluiz khvy dvyx shex kvjungx yaq kuex khiz tueq, yuq muinz piq kuex vmungx nuex nyuip muq doc. 6Piq yix nuex kay jix waz Simon Peter httuiuc kaz vtueq, lungluip mungx nuex nyuip lawc koq tueq, vyop juing khvymvnz htenc dvyx kvjungx yaq kvmuinz, 7vpiq khux yop juing phajet kuex pungbaung baungshiz nuex kvtul iruiux kvmuinz khiz tueq. 8Luip nuex kungkhux httuiuc jix vganc kungjix waz muinz luip mungx kvyuq nyuip koq tueq, yaungx wvnc tueq lvmz htenc kuex khiz vtueq kvmluimx tueq. 9(Yesu kuex vthueyc wawc yuing kvtenc wvnc tuex ngoz tueq Rumvrc luik nuex httax yaq kvjaz kuex tsuingnueyc rueq tuiuz muq dvyx doc.) 10Kvkaq sangac wanueyc kuex miqmac yuimx nuex yek waung wuez tueq.
Magdalene Mary muex Shvmx Kvkhic
(Mat 27:9-10; Mak 16:6-11)
11Mary kuex luip ruiuz khux hep nuex khoar yaq lvmx maq jvp tueq, piq kuex vhtaq maq vkhoar luip mungx nuex lawc koq tueq, 12Yesu maungx tvwoalc juing kvyuq raungkamx wanueyc hungluiz svmx vtueq vkhux kox nuex washiz vyaz kox nuex washiz ngaungc yaq kuex piq rueq khiz tueq. 13Tsuingnueyc rueq, “Yalxjuik nyuiuz lex, yvmx ngoz tueq lac khoar vtuiux?” ngoz tueq wiz tueq.
Piq rueq, “Ngvy Taungjix waz maungx kuex lvmz laq vtueq, m-yuq wueq taq gay kaz tvnx ngaz rueq tuiuz mauk ningkhvnc nuex!” ngoz tueq tvralc tueq.
14Kvkhoc jungx vtueq yix kox nuex kvroz lawc koq tueq Yesu jvp yaq kuex khiz tueq, yuq muinz Yesu ngoz tueq tuiuz muq. 15Yesu rueq, “Yalxjuik nyuiuz lex, yvmx ngoz tueq lac khoar vtuiux? Ukhaq lac thuiyx vshuiux?” ngoz tueq wiz tueq.
Mary rueq vpiq kuex sunc bvmc jix waz shvmx ngoz tueq, “Iphuz lex, vpiq maungx kuex mnoz rueq lvmz wvnc toq ngoz ruiux lec m-yuq lac taq gay tonx ngaz muex tvkhic kuq koq, ngaz rueq tvyenc lvmc kay muex,” ngoz tueq jungx tueq.
16Yesu rueq, “Mary!” ngoz tueq gvl tueq.
Kvkaq Mary kuex yix nuex nyelauk nyez vtueq Hebre kvjaz maq, “Rabboni!” ngoz tueq tvralc tueq. (Rabboni ngoc bomc kuex “Tvluingc waz lex,” ngoc rvtueq.)
17Yesu rueq, “Ngvy gvnz nuex nauk kvtungc kaz, ngaz kuex Iwaz kox nuex max waung dvyx doc. Yuq muinz iphuz inox hez kox nuex waung vtueq, ngaz kuex Iwaz nuiyc nuimshiq Waz, ngvy Tishox nuiyc nuimshiq Tishox kox nuex waung wvnc taungx lvmz kuex jungx tvtay kaz kuiuz,” ngoz tueq piq muex jungx tueq.
18Kvkhoc rvtueq Magdalene Mary kuex sangac hez kox nuex kaz wvnc vtueq, Taungjix kuex piq rueq khiz tueq lvmz nuiyc vpiq rueq yvmx khoc lac jungx kuq tvnx lvmz kuex jungphvnx kuq tueq.
Yesu Vpiq Sangac hez muex Kvkhic
(Mat 28:16-20; Mak 16:14-18; Luk 24:36-49)
19Sangac bix kuex Yuda miqsaz vrangx vpangx vhttax jix bix muex hiz ningkhvnc nuex Taungjix raungnuiyq buirruimz buirrak nuex yuimx kaluix kuex shauk kvr gay ruiux rvtuimx wuez tueq. Kvkaq Yesu kuex tsuinghez hvlwvl nuex jvp kaz vtueq, “Nuimshiq nuex nomic mhttax kueq,” ngoz kuq tueq. 20Kvkhoc jungc kuy yix vpiq yauk nuiyc vsamx mac kuex tvkhic tueq. Sangac bix muinz Taungjix kuex khiz vtueq kokez wuez tueq. 21Kvruex yimaq laukshiz hulawx Yesu rueq, “Nuimshiq nuex nomic mhttax kueq, Iwaz rueq ngaz tvkaz phuex kvkhoc nuimshiq muinz ngaz rueq tvkaz phaungx,” ngoz tueq jungx tueq. 22Kvkhoc jungx vtueq kungjix bix htauk nuex vpiq rueq muy vtueq, “Vsawc Siyac lvp wvnc wuez shuinz. 23Nuimshiq rueq miq mvrax htenc dawc kuq ruiux yuq, tsuingshiq mvrax dawc kuy rvhumc tuex; nuimshiq rueq tsuingshiq mvrax dawc kuq muit ngoz ruiux yuq, tsuingshiq mvrax dawc kuq shuex rvmuq,” ngoz tueq jungx tueq.#Mat 16:19; 18:18
Yesu nuiyc Thoma
24Yesu httuiuc kaz tueq nuex sangac rokshiz rac wanueyc phungc wawc (vpop ngoz yaq) Thoma kuex tsuingshiq rulc roc nuex rvmuq. 25Kvkhoc rvtueq vganc sangac hez rueq piq muex, “Taungjix kuex nuiyhez rueq khiz tiq!” ngoz tueq jungx tueq.
Thoma rueq, “Vpiq yauk yanx maq vbut mac kuex khiz mauk, vyauk mac kuex yaukshix maq htuinc mauk, vsamx nuex paq maq vshuiuq mac muinz ngaz rueq yauk maq pemz lvp mauk ngoz ruiux kuex ngaz kvmx mauk,” ngoz tueq.
26Jepat shiz yix maq sangac bix kuex yuimx mungx nuex rvtuimx wuez tueq. Thoma muinz tsuinghez rulc roc nuex vhttax rvtueq. Kaluix shuiuz yoalx rvhvt maq Yesu kuex httuiuc waung vtueq tsuinghez hvlwvl nuex jvp ruiux, “Nuimhez nuex nomic mhttax kueq,” ngoz tueq. 27Kvkaq vpiq rueq Thoma muex, “M-yauk shix maq vruex baung vyuq htuinc lawc shuiuz, ngvy yauk vmuinz lawc shuiuz, m-yauk tvlanc vtueq ngvy samx vruex pemz lawc shuiuz, kvmluimx thuinz nauk tvyaq kaz, kvmx kuiuz!” ngoz tueq.
28Thoma rueq, “Ngvy Taungjix nuiyc ngvy Tishox khoc vnauz!” ngoz tueq.
29Yesu rueq, “Mnoz kuex ngaz khiz vtueq jix kvmx vtuiux ix? Khiz muq maq kvmx jix kuex thuinhvlx httax yaq!” ngoz tueq.
Vruex Luik Dvp Kvmungx
30Yesu rueq vpiq sangac bix htumc nuex vwangc juing phvnx paunghvlc shuimx shec tueq htenc kuex luik dvp vyuq wuiyq shec muq. 31Yuq muinz Yesu kuex Tishox Saz Mesia rvtueq lvmz nuimshiq kvmluimx lvp tvkoc muinz, kvkhoc kvmluimx wvnc vtueq, vpiq muingc maq rullungx lvp wvnc tvkoc muinz vruex lvmz htenc kuex wuiyq shec tueq.
ప్రస్తుతం ఎంపిక చేయబడింది:
YOHAN 20: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
