YOHAN 21
21
Yesu kuex Sangac waz Mvshix muex Shvmx Kvkhic
1Kvruex yimaq Yesu kuex Tiberia jumx kawx maq vpiq sangac hez muex shvmx laukshiz kvkhic tueq. Kvruex lauk kvkhic tueq kuex vkhoc rvtueq. 2Simon Peter, (vpop ngoz tueq muingc yaq) Thoma, Galile mungx Kana ghaq wawc Nathanael, Zebede saz nuiyc Yesu sangac vganc wanueyc muinz vroc nuex rvtueq. 3Simon Peter rueq, “Ngaz ngaq khup kaz phaungx,” ngoz tueq vganc muex jungx tueq.#Luk 5:5
Tsuinghez rueq, “Nuiyhez muinz kaz naungx phix,” ngoz tueq. Kvkhoc rvtueq tsuinghez kuex lix maq ngaq lvp gay kaz wvnc wuez tueq, yuq muinz kvruex raungwvrx ngaq vshiz muinz lvp muq doc. 4Raungnvp shalx dung wvnc yaq nuex Yesu yuix jumx kawx nuex jvp kaz tueq. Yuq muinz sangac hez rueq Yesu ngoz tueq tuiuz muq. 5Kvkaq Yesu rueq tsuinghez muex, “Yalx rox bix lex, nuimhez nuex phuiuz svy juing phvnx shishiz vhttax haz?” ngoz tueq wiz tueq.
Tsuingshiq rueq, “Yvmx muinz vguez,” ngoz tueq tvralc tueq.
6Vpiq rueq, “Nuimhez jak kuex lix kvmaq vkeq kox kvyuq khup shuinz, ngoz ruiux lvp shuinx,” ngoz tueq jungx kuq tueq. Kvrulc rv-ngvlc tsuinghez rueq khup koq tueq ngaq paunghvlc lvp vtueq vhet muinz het lot muq rvtueq.#Luk 5:6
7Kvkaq Yesu rueq lungwawc hvlc kungjix waz kvraq Peter muex, “Taungjix khoc kvnauz,” ngoz tueq. Kvruex kvjaz kuex Simon Peter rueq tay vtueq, piq rueq vpuk taq khvy kuex vkhez nuex menc svmx ruiux yuix jumx mungx nuex dauk svt wvnc tueq. (Piq kuex sawkumx ningkhvnc nuex rvtueq.) 8Sangac bix vbez kuex yuix kawx maq mtanc luz muq tvlvmx rok bv-ngac tanc dvyx ningkhvnc nuex ngaq vmvrx jak kuex het vtueq lix maq taung nuex duiz waung tueq. 9Tsuingshiq kuex lix maq svt vtueq taung nuex httuiuc waung koq tueq, wvrkez muinz wvrkez htauk nuex vgaungc taq ngaq muinz, wanx muinz khiz wuez tueq. 10Kvkaq Yesu rueq tsuinghez muex, “Nuimhez rueq majuiuc vlvp ngaq kvwawc vbez lvmz wvnc luit,” ngoz tueq.
11Simon Peter lix nuex duiz vtueq ngaq yungx jvnc kuiux 153 khup tueq jak kuex taungkawx nuex het tueq, kvjuc paung ruiux muinz jak kuex kvjuirc muq. 12Yesu rueq, “Waung vtueq phauk saq wuez shuinz,” ngoz tueq. Vpiq kuex Taungjix rvtueq kuex tsuinghez rueq tuiuz yaq ningkhvnc nuex sangac bix uraq muinz, “Mnoz ukhaq lac?” ngoz tueq wiz khvmc muq. 13Kvkhoc rvtueq Yesu kuex tsuinghez kox nuex kaz vtueq, wanx kuex lvmz ruiux tsuinghez muex phvlx kuq tueq, ngaq muinz kvkhoc phvlx kuq tueq.
14Vruex kuex Yesu thueyc vtueq yuing kvtenc wvnc yix, sangac bix muex lauk thuimx ngoc yaungc shvmx kvkhic tueq.
Yesu nuiyc Peter
15Tsuinghez rueq phuiuz svy lot yix, Yesu rueq Simon Peter muex, “Yohan saz Simon lex, vruex hez rueq ngaz lungwawx yaq htauk nuex jvnc vtueq haz ngaz lungwawx vphux?” ngoz tueq wiz tueq.
Peter rueq, “Taungjix lex, ngaz rueq mnoz lungwawx yaq kuex mnoz rueq tuiuz yaq,” ngoz tueq tvralc tueq.
Yesu rueq, “Ngvy khelbuenx sahez kuex remx shuiuz,” ngoz tueq jungx tueq. 16Kvmaq lauknueyc ngoc yaungc Yesu rueq, “Yohan saz Simon, mnoz rueq ngaz lungwawx vphux haz?” ngoz tueq wiz tueq.
Peter rueq, “Rvtueq, Taungjix lex, ngaz rueq mnoz lungwawx yaq kuex mnoz rueq tuiuz yaq,” ngoz tueq tvralc tueq.
Yesu rueq, “Ngvy khelbuenx htenc kuex remx shuiuz,” ngoz tueq jungx tueq. 17Kvmaq lauk thuimx ngoc yaungc Yesu rueq, “Yohan saz Simon lex, mnoz rueq ngaz lungwawx vphux doc haz?” ngoz tueq wiz tueq.
Peter kuex vthuinz bac vtueq, “Taungjix lex, mnoz rueq phvnx ruip saz tuiuz yaq, ngaz rueq mnoz lungwawx yaq lvmz kuex mnoz rueq tuiuz yaq!” ngoz tueq tvralc tueq.
Yesu rueq, “Ngvy khelbuenx htenc kuex remx shuiuz. 18Mnoz muex ngaz rueq vsuing jungx kuq ix, mnoz yalxrox baunglaung nuex mkhez kvyuq keshuit shuit vtueq, kaz roc tuiux baung nuex kaz lvp tuiux, yuq muinz nyuiuz waz yaungx wvnc tuiux yuq, m-yauk nuiyc kuex tvlanc vtueq miq vshiz shiz rueq mnoz muex tvyoalc kuq ruiux, mnoz kaz roc muq baung nuex shvlx laq kv-phux,” ngoz tueq jungx tueq. 19(Kvkhoc jungx tueq kuex, Peter kuex yvmx khoc nuex thueyc tuex lvmz nuiyc Tishox ngauz vngax tvdung wvnc shuex lvmz kuex tvluz nuex jungx wvnc tueq rvtueq.) Kvkhoc jungc lot yix Yesu rueq Peter muex, “Ngvy yix nuex phvnx naungx koq!” ngoz tueq.
Yesu nuiyc Vganc Sangac bix
20Peter rueq yix kox nuex nyez lawc koq tueq, Yesu rueq lungwawx yaq kungjix waz kuex khiz tueq, piq kuex raungyac dungc saq tueq nuex Yesu yapemc nuex kvnanc vtueq, “Taungjix lex, mnoz tvshuk lekuy gay jix waz kuex ukhaq lac rvtvnx?” ngoz tueq wiz jix waz phvnx naungx yaq kuex khiz tueq.#Yoh 13:23,25; 20:2 21Peter rueq kvruex waz kuex khiz vtueq, Yesu muex, “Taungjix lex, vruex waz kuex yvmx khoc lac yaungx tvnx?” ngoz tueq wiz tueq.
22Yesu rueq, “Ngaz httuiuc kaz taungx nuex httuiuc laz piq kuex rullungx tvraungx tvhttaz roc ruiux muinz, mnoz muex yvmx lac seng tvnx? Mnoz kuex ngvy yix nuex phvnx koq!” ngoz tueq tvralc tueq.
23Kvkhoc rvtueq kvruex kungjix waz kuex thueyc tuex rvmuq, ngoz tueq kvjaz kuex Yesu yix phvnc naungc jix kungjix htenc kox nuex nyvmc wvnc tueq. Yuq muinz Yesu rueq kvruex waz kuex thueyc muq ngoz tueq ngoc kvjaz rvmuq, “Ngaz httuiuc kaz taungx nuex httuiuc laz piq kuex rullungx tvraungx tvhttaz roc ruiux muinz, mnoz muex yvmx lac seng tvnx?” ngoz tueq vjungx dvyx rvtueq.
24Vruex lvmx htenc kuex hakhix khvmc vtueq wuiyq shec jix waz kuex kvruex kungjix waz kvruex rvtueq. Piq rueq jungx tueq kvjaz kuex vlvmx rvtueq nuiyhez rueq tuiuz yaq.
Bomc Tvsuip
25Yesu rueq shuimx wvnc tueq yauk shuimc vganc paunghvlc doc vhttax. Kvruex htenc lvmz kuex phvnshiz maq phvnshiz wuiyq taq ruiux yuq, kvruex luik dvp htenc kuex mungkawx vyuq doc muinz banz muq rvtuex shvmx, ngoz tueq ngaz rueq tvmaung vshaungx.
ప్రస్తుతం ఎంపిక చేయబడింది:
YOHAN 21: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
