YOHAN 19

1Kvruex yimaq Pilat rueq Yesu kuex tvshvlx wvnc vtueq tvwung tueq. 2Nolaungx bix rueq muinz shuiuq maq khux phuk tvhungx way vtueq vpiq khux nuex tvbuz kuq tueq; kvmaq hungluz khokshawx#19:2 Khokshawx khvy: vwuil nuiyc vshawx maq vtauk vhtawz tsanc hvlc hokhvmx khvy ngoc rvtueq. khvy tvsvmc kuq ruiux, 3vpiq hep nuex kaz vtueq, “Yuda Hokhvmx waz, rullungx mluz kueq!” ngoz vtueq vhtvlx phawc nuex wung wuez tueq.

4Kvkaq Pilat kuex yuz phic kox nuex laukshiz hulawx dung kaz vtueq nuk miqsaz htenc muex, “Lawc shuinz, vruex waz kuex vthueyc murx tvgurc juing mvrax yvmx muinz humc mauk kuex nuimshiq tvtuiuz kuy tvkoc vpiq kuex nuimshiq kox nuex tvdung laq vphaungx,” ngoz tueq. 5Yesu muinz shuiuq khux phuk buz ruiux hungluz khokshawx khvy svmx vtueq dung kaz tueq, kvkaq Pilat rueq tsuingshiq muex, “Miq vruex waz vruex lawc shuinz!” ngoz tueq.

6Shomc walaungx bix nuiyc shomc yuimx bvmc jix nolaungx bix rueq Yesu kuex khiz vtueq, “Vpiq kuex yauk juinc bulx nuex but gay shuinz! Vpiq kuex yauk juinc bulx nuex but gay shuinz!” ngoz tueq ramc wuez tueq.

Pilat rueq, “Nuimshiq rueq vpiq kuex shvlx laq vtueq but gay shuinz, ngaz rueq lec vpiq htauk nuex yvmx mvrax muinz humc mauk,” ngoz tueq.

7Nuk miqsaz htenc rueq, “Kvruex waz kuex vpiq pumz ngoc Tishox Saz ngoz tueq kv-ngoc ningkhvnc nuex vthueyc aungx yaq ngoz tueq nuiyshiq tvrac nuex jungx shec tueq,” ngoz tueq tvralc wuez tueq.

8Tsuingshiq bomc kuex tay vtueq Pilat kuex pinhtumc hiyaz tueq. 9Kvkhoc rvtueq hoc nuex nyuip waung yek vtueq Yesu muex, “Mnoz kuex mmaq vkaz lac?” ngoz tueq wiz tueq.

Yuq muinz Yesu rueq yvmx muinz tvralc muq. 10Pilat rueq, “Mnoz kuex ngvy bomc tvralc muq ix? Ngaz kuex mnoz tvdungc kuy gay nuiyc yauk juinc bulx nuex but gay muex vrangx vpangx ngvy yauk nuex httax yaq, mnoz rueq tuiuz muq haz?” ngoz tueq vpiq muex wiz tueq.

11Yesu rueq, “Mnoz muex Tishox rueq vkuq vrangx vpangx maq dvyx mnoz rueq vkhoc shuimx vshuiux. Kvkhoc rvtueq m-yauk nuex ngvy tvshuk lekuy gay jix waz kuex mvrax yunghvlc pinhtumc httax yaq,” ngoz tueq tvralc tueq.

12Pilat rueq kvruex kvjaz kuex tay vtueq, Yesu kuex tvdungc gay tvkoc lvmx thuiyx tueq. Yuq muinz nuk miqsaz htenc rueq, “Mnoz rueq kvruex waz kuex httvr gay ruiux yuq, mnoz kuex Kesar hokhvmx waz kungjix rvmuq! Ukhaq yuq muinz miqmac shauk pumz ngoc hokhvmx rvtauk ngoz tueq kvjungc jix waz kuex Kesar hokhvmx muex ralx rvtueq,” ngoz tueq ramc wuez tueq.

13Pilat rueq kvruex kvjaz htenc kuex tay vtueq, Yesu kuex yuz phic nuex shvlx tvdung laq ruiux khac phoc juing hoc nuex ngoz yaq, “Lung Vphawc,” kvyuq ngaungc tueq. (Kvruex lung vphawc kuex Hebre kvjaz maq “Gabatha” ngoz tueq muingc yaq.) 14Kvruex baunglaung kuex Tvlvy Wvnc Moalx tvkoc tvyoalc raungnuiyq shalhtungx tanc khvnc rvtueq, kvkaq Pilat rueq nuk miqsaz htenc muex, “Vruex nuimshiq Hokhvmx waz kuex lawc shuinz!” ngoz tueq.

15Tsuingshiq rueq, “Vpiq kuex thvt gay shuiuz! Vpiq kuex thvt gay shuiuz! Yauk juinc bulx nuex but gay shuiuz!” ngoz tueq guyc tvruingx wuez tueq.

Pilat rueq, “Nuimshiq Hokhvmx waz kuex ngaz rueq yauk juinc bulx nuex haz but gay shaungx? ngoz tueq wiz koq tueq.

Shomc walaungx bix rueq. “Kesar hokhvmx htauk nuex lvy vtueq nuiyshiq hokhvmx vbez vguez!” ngoz tueq tvralc tueq.

16Kvruex kaq Pilat rueq Yesu kuex yauk juinc bulx nuex but thvy gay tvkoc tsuingshiq yauk nuex lekuq gay tueq.

Yesu kuex Yauk Juinc Bulx nuex But gay

(Mat 27:32-44; Mak 15:21-32; Luk 23:26-43)

Tsuingshiq rueq Yesu kuex shvlx wvnc tueq. 17Yesu kuex vpiq yauk juinc bulx kuex vpiq rueq pix vtueq, “Khurawz ngoz yaq Baung nuex kaz wvnc tueq.” (Kvruex baung kuex Hebre kvjaz maq “Golgotha” ngoz tueq ngoz yaq.) 18Kvruex yuq tsuingshiq rueq vpiq kuex yauk juinc bulx nuex but thvt gay tueq; vpiq rulc vdvmz nuex vganc miq wanueyc muinz vpiq yaukkeq kox nuex washiz yauk phvrx kox nuex washiz but gay naungx tueq, Yesu kuex vhvlwvl nuex rvtueq. 19Pilat rueq vtvtsuingc juing luik phushiz wuiyq vtueq Yesu yauk juinc bulx htauk nuex tvkop but tueq. Kvruex bomc thuey kuex, “Yuda miqsaz Hokhvmx Nazaret waz Yesu,” ngoz tueq. 20Yesu but gay tueq baung kuex ghaqyungx maq vnyek dvyx nuiyc Hebre kvjaz, Latin kvjaz, Greek kvjaz maq wuiyq ningkhvnc nuex, Yuda miqsaz paunghvlc rueq kvruex vtvtsuingc juing vwuiyq luik kuex wvllawc wuez tueq. 21Shomc walaungx bix rueq Pilat muex, “Yuda miqsaz Hokhvmx ngoz tueq nauk wuiyq kaz, ‘Ngaz kuex Yuda miqsaz Hokhvmx rvtauk, ngoz tueq vpiq rueq jungx tueq,’ ngoz tueq wuiyq shuiuz,” ngoz tueq jungx kaz tueq.

22Pilat rueq, “Ngaz rueq yvmx khoc lac wuiyq shaungx kvkhoc dvyx rvtuex,” ngoz tueq tvralc tueq.

23Kvkaq nolaungx bix rueq Yesu kuex yauk juinc bulx nuex but gay lot yix, vpiq svmhung kuex phux bvlic muex tvkhoz juir ruiux, washiz muex phushiz phok rv-phvlc wuez tueq. Kvmaq vmungx wawc hungsaz kvmuinz lvmz tueq, yuq muinz vkuk lvmx vguez kamtuingx vtauk rvtueq. 24Nolaungx bix rvjungc tueq kuex, “Svmhung vruex naunghez rueq juir gay miq maq uraq lvp juing lac hangchac#19:24 hangchac: uraq lac lvp shvnx hangchac poz tvroz toc maq thvl yaq. maq toc vtueq lvmz ix,” ngoz tueq. Rumvrc luik nuex:

“Tsuingshiq rueq ngvy khoz vkhvy kuex rv-phvlc wvnc tuex,

ngvy svmhung bonzyanc kuex hangchac maq toc wuez yaq,”

ngoz tueq jungx shex tueq kvjaz kuex hungx wvnc muex rvtueq. Kvkhoc rvtueq nolaungx bix rueq kvkhoc ruez wuez tueq.#Tvts 22:18

25Kvkaq vnyuiuz nuiyc vnyuiuz muex vnox muinz, Klopa taungnyuiuz Mary nuiyc Magdalene Mary muinz Yesu yauk juinc bulx hep nuex jvp tueq. 26Yesu rueq vnyuiuz nuiyc vpiq rueq lungwawc hvlc kungjix waz muinz vhep nuex jvp yaq kuex khiz tueq; kvkhoc rvtueq vpiq rueq vnyuiuz muex, “Piq kuex msaz,” ngoz tueq.

27Kvruex yimaq kungjix waz kvmac muinz, “Piq kuex mnyuiuz,” ngoz tueq. Kvruex raungnuiyq maq phaungc vtueq kungjix waz rueq Yesu nyuiuz kuex vyuimx nuex tvhttax wvnc tueq.

Yesu Thuiuzthuic Pat tueq

(Mat 27:45-56; Mak 15:33-41; Luk 23:44-49)

28Kvruex kaq phvnx ruip saz lot tueq shex lvmz kuex Yesu rueq tuiuz vtueq, Rumvrc luik nuex httax yaq rulc rv-ngvlc hungx wvnc tvkoc vpiq rueq, “Ngaz khvmx sac hvlc,” ngoz tueq jungx tueq.#Tvts 69:21; 22:15 29Kvruex yuq vhix tix mvrc laz vhtawc taq gvmx tuik vshiz vhttax rvtueq, tsuingshiq rueq yuix photwot kuex svpiq hitix nuex tvhemc thuimc ruiux, hisop#19:29 hisop: Naungmungx nuex vguez phvnx pulx muingc rvtueq. kawz nuex tsomz vtueq vnuix nuex tvhemc kuq tueq. 30Yesu rueq vhix tix kuex nuingx lot vtueq, “Nganc tauk shex,” ngoz vtueq vtuk nguk ruiux vluing suip wvnc tueq.

Yesu Samx nuex Paq maq Shuiuq

31Yuda miqsaz vrangx vpangx vhttax jix hez rueq yauk juinc bulx nuex vbut gay hez yaz kuex tv-ngawk wungc tvkoc Pilat yauk wawc vkhangx thoz kaz tueq. Tsuingshiq rueq kvkhoc thoz kaz tueq kuex, kvruex raungnuiyq kuex vtvkuiux raz jepat raungx Bv-ngac raungnuiyq rvtueq nuiyc raungnvp kvyix kuex Vguilc Raungnuiyq ningkhvnc nuex yauk juinc bulx nuex vmaungx kvpauk muq tvkoc muinz, Vguilc Raungnuiyq kuex vsawc raungc hvlc raungnuiyq ningkhvnc nuex muinz rvtueq. 32Kvkhoc rvtueq nolaungx bix kuex kaz vtueq Yesu rulc yauk juinc bulx nuex vbut gay naungx vphaungc wawc waz yaz kuex tv-ngawk wungc yix maq vganc washiz yaz kuex tv-ngawk wung tueq. 33Yesu kox nuex httuiuc koq tueq thuiuzthuic vpat wvnc wuez shex khiz vtueq vyaz kuex tv-ngawk wung muq doc rvtueq. 34Kvkhoc rvyruiux doc muinz nolaungx washiz rueq Yesu samx nuex paq maq shuiuq koq tueq vtvguiy nuiyc yuix yvlx tueq. 35(Vkhoc yaungx wvnc tueq lvmz kuex nuimshiq muinz kvmluimx wvnc tvkoc muik maq khic jix washiz rueq hakhix khvmc tueq. Piq hakhix kuex rvkhauk laz rvtueq, piq rueq doc muinz miqmac kvjaz kuex vlvmx rvtueq lvmz tuiuz yaq.) 36Kvkhoc yaungx wvnc tueq lvmz kuex Rumvrc luik nuex: “Vpiq ruk vrawz vshiz muinz ngawk muq,” ngoz tueq httax yaq rulc rv-ngvlc hungx wvnc tvkoc rvtueq.#Dw 12:46; Wkh 9:12; Tvts 34:20 37Kvmaq vganc Rumvrc luik pvl vshiz nuex muinz, “Tsuingshiq rueq paq maq shuiuq tueq waz kuex tsuingshiq rueq hulawx lawc yek shuex,” ngoz tueq.#Zech 12:10; Tvkh 1:7

Yesu Luip gay tueq

(Mat 27:57-61; Mak 15:42-47; Luk 23:50-56)

38Kvruex yimaq Arimathea ghaq wuinz Yosep rueq Yesu maungx kuex lvmc tvkoc Pilat yauk wawc thoz tueq. (Yosep kuex kvhelc muq maq Yesu kungjix waz rvtueq, yuq muinz Yuda miqsaz vrangx vpangx vhttax jix hez muex hiz vtueq Yesu kungjix ngoz tueq kvjungc muq rvtueq.) Pilat rueq muinz Yesu maungx kuex lvmc tvkoc vkhangx kuq tueq rulc rv-ngvlc Yosep rueq vmaungx kuex tvsvt lvmz tueq. 39Kungkhux nuex laukshiz Yesu kox nuex raungnyauk nuex guilc kay jix waz Nikodemu rueq muinz murra tix nuiyc Aloes maq vshot vhomc tix kilogram 30 kuex lvmz laq vtueq Yosep rulc vdvmz kaz naungx tueq.#Yoh 3:1-2 40Tsuingnueyc rueq Yesu maungx kuex lvmz vtueq Yuda miqsaz htungx httax yaq rulc rv-ngvlc vhomc tix maq nyvt ruiux, bvnluiz khvy maq yop tueq. 41Vpiq but thvt gay tueq httoarc kvyuq sunc vshiz vhttax rvtueq, sunc kvyuq miq maungx vshiz muinz max luip dvyx doc luip ruiuz khux vshiz vhttax rvtueq. 42Kvruex raungnuiyq kuex Vguilc Raungnuiyq maq nuiyq khux tvyoalc moalc raungnuiyq nuiyc luip ruiuz khux muinz vnyek dvyx ningkhvnc nuex, tsuingshiq rueq Yesu maungx kuex luip vtvhungx kvyuq htawc taq tueq.

ప్రస్తుతం ఎంపిక చేయబడింది:

YOHAN 19: HNOT01

హైలైట్

షేర్ చేయి

కాపీ