1 Samuel 9
9
Nauana't ñe'me Saúl choqoñe'me Samuel
1'Uo ca'li ñe'me jiyaĝaua lenaĝat Quis jo'ne yataqachiñe 'uo da'me nauategaĝac, jo'ne mach'e c'oĝot di'me Abiel, nach'eñe jo'ne mach'e c'oĝot di'me Seror, jo'ne mach'e c'oĝot di'me Becorat, nach'eñe jo'ne mach'e c'oĝot di'me Afíah, jo'ne chiyoĝoguet di'me Benjamín. 2Quis 'uo ñe'me nejoqolec c'oĝot jo'ne yataqachiñe onaĝaic da'me 'loyaĝac, nach'eñe lenaĝat Saúl. Qaya'te laqaya ta'le ena'am gaa'me Israel laje'pi da'me yataqachiñe onaĝaic da'me 'loyaĝac joñe'me. Qa'a da'me 'loyaĝac jo'ne loguedaic qaya'te ta'le napacalegue.
3'Uo jo'me nolo' ñe'me Quis yejoma'ape gaa'me lalo ajenadi, qama'le dojapegue' ñe'me c'oĝot Saúl, eetac:
«Aniyamaĝatetac, auelapiyi jaa'me ajenadi. Onolec ga'me aquiaĝaua gaa'me adalemaĝaje'te.»
4Ec ñe'me Saúl, dajoyi ga'me 'lachaqa't gaa'me qajoĝona'a jo'ne 'naleua di'me Efraín, nataq'aen talegue ga'me 'naleua di'me Salisá, qalaĝaja ja yauanalo gaa'me ajenadi. Nataq'aen dajoyi di'me Saalim choqodi'me 'naleua di'me Benjamín, qalaĝaja nach'e ena'am ja yauanalo. 5Da'me yovideta ga'me 'naleua di'me Suf, Saúl dojapegue' ñe'me lalemaĝajet jo'ne naequetapegue', eetac:
«'Noota ta'le qa'viyelaq, qa'a jogamaĝa taĝadena' degueja da'me lelnataĝac qo'mi, male ja uenate'talo jogamaĝa ajenadi.»
6Ñe'me lalemaĝajet 'yateguet:
«Jena'me jenjo' noic 'uo ga'me Dios 'laqatanaĝanaĝanec jo'ne nach'eñe ena'uac 'uo da'me nauategaĝac, qa'a yema nale ga'me 'yaĝatetac yepaquichigui 'uo nale ga'me. ¡Qolaq, jajoĝogue joñe'me! Uotaĝa qo'mi yaloĝonalo ga'me naq'aic jo'ne 'noota ta'le jaĝa'ya.»
7Qama'le 'yateguet ñe'me Saúl, eetac:
«¡Qolaq, jajoĝogue! Qalaĝaja ¿jach'e ga'me qauedo'ogue ñe'me ñejo' jiyaĝaua? Uotaĝa ta'le ch'e pan ga'me 'noquetac naa'me noĝoiqui'; yataqachiñe qaya'te janemaĝam ñe'me Dios 'laqatanaĝanaĝanec.»
8Ñe'me lalemaĝajet 'yateguet:
«Da'me jayem qa'a 'uo jaga'me yemena jo'ne chiyaqayi jaga'me plata: nalo'taguet da'me janemaĝam qomle ñe'me Dios 'laqatanaĝanaĝanec qaedi qo'mi yaloĝonalo ga'me naq'aic jo'ne jaĝa'ya.»
9(Joca'li da'me dojo', gaa'me Israel laje'pi nale jetaque 'uo ga'me dojapegue' ñe'me Jaliaĝanec, eetac: «Jajoĝogue ga'me uanaĝanaĝaic», qa'a joga'me nayi qoyen lenaĝat «Dios 'laqatanaĝanaĝanec», ca'li nach'eda da'me qoyen «uanaĝanaĝaic».)
10Qama'le enaac ñe'me Saúl:
«'Noota qom naq'aeta: ¡qolaq, jajoĝogue!»
Eque' ca'li, dajotegue di'me noic jo'ne neta'ña ñe'me Dios 'laqatanaĝanaĝanec. 11Ca'li male quedijeguem qa'a jetaque yauata joñe'me, yelotede'egue di'me noic, qama'le uo'oe gaa'me yauanalo q'añolel jo'ne do'pi'tape, male yena't:
«¿Qo'li naqaena jena'me jenjo' ua'a da'me jauanaĝa ñe'me uanaĝanaĝaic?»
12Jogaa'me 'yadeteguet:
«Naqaena, qalaĝaja ue'ta na'me p'auo. Ami eneguelo, qa'a nec'ata jena'me noic jouaĝat nayi laloqo' nale qoya'uo ga'me najaqajec, ua'a ga'me 'lachaqa' nale ga'me yema'a't. 13Qom auovidiya'ague aueloyaque, qama'le avidiyalegue qom jona'li yec'ata ga'me ua'a nale qoya'uo ga'me najaqajec, qa'a 'uo ga'me niqui'yaĝac. Gaa'me jiyaĝadipi ja deque'y qom jona'li yovita joñe'me, qa'a nach'eñe netamelegue ga'me najaqajec. Qom yem joga'me, male deque'y jogaa'me yec'adeta. Chane'eja jamoyi, paja'a aueloyaque nayi, qama'le auañiya.»
14Qama'le jogaa'me eque', yec'adije'ma joga'me noic. Mane'e da'me naditeda'a jogaa'me, Samuel naloja'a da'me nenoĝonegue, ta'ya ga'me naq'aic laqaya da'me dajoyi ga'me ua'a nale ga'me yema'a't. 15Jo'me nolo' laqaya da'me jona'li yovidi't ñe'me Saúl, ñe'me Jaliaĝanec joote ya'uo da'me dojo' yauanaĝanaĝanec ñe'me Samuel:
16«Qom 'yoĝoñi, nach'e ena'am nayi, ñamaĝaquena ga'me jiyaĝaua chiyoĝogue ga'me 'naleua di'me Benjamín. Nach'eñe jo'ne auecodelegue ga'me aceite ga'me laqaic, da'me naqaeñe jo' qomle nejaliaĝatelegue ga'me mach'e yalaqapi jo'ne Israel laje'pi, jo'ne nach'eñe yachiyoĝotedaue queda'me gaa'me filisteopi nach'e eta't da'me nejaliaĝatetapelo'te, qa'a janem da'me yichoĝodenataĝanaĝac gaa'me mach'e yalaqapi, da'me loñiquiaĝac jayem yedaje'ma.»
17Ca'li ñe'me Samuel yauana ñe'me Saúl, ñe'me Jaliaĝanec eetac:
«Naqaeda da'me dojo' jiyaĝaua jo'ne joote am ja'aqataĝatapeguem. Dojo' nach'eda nejaliaĝatelo'te qomle gaa'me yalaqapi.»
18Joote ue'ta ga'me qotayape'uo di'me noic, Saúl yec'ata ga'me ue'ta ñe'me Samuel qama'le enaac:
«Am ñachoĝodenot, jayem aualoĝonegue ga'me 'lachaqa' ñe'me uanaĝanaĝaic.»
19'Yateguet ñe'me Samuel:
«Naqayem jo'ne jayem uanaĝanaĝaic. Qolaq, qolaĝajeguem jec'otaĝa ga'me 'lachaqa' ga'me yema'a't, nataq'aen cha'li aueque'e jena'me jenjo' nolo' jayem aneuanaĝaua. Qom 'yoĝoñi ne'teta, ja'ateguet ga'me jo'ne jetaque jayem auenatec. Yem qama'le yemta am jajeta da'me oc. 20Gaa'me ajenadi jo'ne yejoma'ape jaa'me jaajo' noloqo'ote, ena'te auenate'talo, qa'a jogaa'me joote qoyauanalo. Uoja'eda jo'ne naquitetapega ga'me Israel laje'pi, qa'ejo' nach'e am qomle am ua'ajop choqogaa'me adaqaya'.»
21Ñe'me Saúl 'yateguet:
«¡Qalaĝaja da'me jayem mach'e jachiyoĝoguet di'me Benjamín jo'ne yataqachiñe ja di'yaĝa jo'ne chiyoĝoguet ga'me Israel! Da'me laqaya, gaa'me yet'al yataqachiñe ja p'ajodaye, ja ena'ama gaa'me laqaya' jo'ne nach'e ena'am chiyoĝoteguet di'me Benjamín. Qama'le ¿toqoch'e jayem a'uaĝatem yema da'me dojo'?»
22Qama'le Samuel lequiaĝaua ñe'me Saúl choqoñe'me lalemaĝajet, yauegalo joga'me qonapegoue, yaneda'ña ga'me yataqachiñe p'ajaye jo'ne neteda'ña gaa'me treinta jiyaĝa'u. 23Yem qama'le Samuel dojapegue' ga'me uojaĝaic, enaac:
«Anedo'quena ga'me lapat lae jo'ne am jaqatec qaedi aviyota'a.»
24Qampaja'a ñe'me uojaĝaic yeda'a ga'me onolec lo'teta jo'ne maliaĝa nalo'ta't, yanem ñe'me Saúl. Qama'le Samuel enaac:
«Nojo' na'me am qoyaqataĝat'aguet joote qoyiyota'a. Chane'eja nayi 'noota qom aualic, qa'a jiyota'a jouaĝat am nayi, queda'me jiyaĝana gaa'me jiyaĝadipi.»
Chane'eja jo'me jojo' nolo' Saúl neuanaĝaua ñe'me Samuel da'me deque'e. 25Yem qama'le nenochidiñe, chiyoqodaje'ma ga'me 'lachaqa' ga'me nemaĝac, nec'adeta di'me noic, qama'le qoyiyamaĝateta't ga'me nela' jo'ne uaue ga'me emec jo'ne p'ajeguem, qaedi ualegue ñe'me Saúl. 26Qama'le Saúl male viiñe. Mane'e da'me 'yoĝoñi, Samuel yiyaĝana ñe'me Saúl da'me ue'ta ga'me emec jo'ne p'ajeguem, eetac:
«¡Oñejeguem, qa'a yitaĝa aueuotac!»
Saúl ñejeguem qama'le eque' ñe'me choqoñe'me Samuel, quetegue ga'me naq'aic. 27Mane'e da'me natedañe naditede'ga ga'me p'aye di'me noic, qama'le Samuel dojapegue' ñe'me Saúl, eetac:
«A'uauaĝata na'me adalemaĝajet, da'me am qamqa'me cada'ac ap'ategue, qa'a jetaque 'uo ga'me am ja'aĝatem jo'ne jayem 'yaĝatem ñe'me Dios.»
ప్రస్తుతం ఎంపిక చేయబడింది:
1 Samuel 9: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
