1 Samuel 10
10
Ñe'me Samuel 'yalegue ñe'me Saúl queda'me lejaliaĝanec di'me Israel
1Qama'le Samuel yacona jaga'me lae't ga'me aceite, yecodelegue ga'me laqaic ñe'me Saúl, nec'ouoq qama'le eetac:
«Ñe'me Jaliaĝanec am yachalegue nayi queda'me am lejaliaĝane'j gaa'me Israel laje'pi jo'ne mach'e c'oqo'tepi. Naqa'am anejaliaĝatelo'te nataq'aen aue'uolo'te queda'me coletapejopa gaa'me laute'upi. Da'me dojo' nach'eda yaloĝon da'me yataqatelegue queda'me yataqata eja ñe'me Jaliaĝanec en am lajoĝola't gaa'me c'oqo'tepi: 2nayi queda'me male jayem oca'e, auanalo qomle gaa'me dos jiyaĝa'u jo'ne lejeque'ta jaga'me napa'l lae't ua'ña jadi'me Raquel, di'me Selsah, jo'ne 'naleua di'me Benjamín. Jogaa'me am 'yaĝadetem queda'me joote qoyauanalo gaa'me ajenadi jo'ne auelotapiyi, nataq'aen ga'me adet'a male ja uenate'talo jogaa'me dite da'me ami, qama'le nenatetapela't jach'e jogamaĝa ya'uo. 3Qama'le yitaĝa oc, na'me naja': qom auovita jaga'me epaq jo'ne encina di'me Tabor, auada'agueta gaa'me tres jiyaĝa'u jo'ne quidije'mec di'me Betel qaedi 'nonaĝachedigui joñe'me Dios. Onolec ga'me yachi'tape tres gaa'me quetaq c'oqo'te, gaa'me laqaya yachi'tape gaa'me tres pan, ga'me laqaya yachitac ga'me lataĝa lae't. 4Am yep'iye'n qomle nataq'aen am yate'm gaa'me dos pan, qama'le 'noota qom auaconegueta. 5Yem qama'le auovida'a di'me Guibeá jo'ne loĝot ñe'me Dios, nach'edi jo'ne ue'ta gaa'me coicopi jo'ne filisteopi. Qom male aue di'me noic, qama'le auada'agueta gaa'me Dios 'laqatanaĝanaĝanaqa jo'ne t'aqataĝa'tape, 'yaĝatetedac da'me Dios 'laqatac, jo'ne yec'adeta ga'me 'lachaqa' nale ga'me yema'a't. Jogaa'me dajota'yelo gaa'me jiyaĝa'u jo'ne diviquinaĝa'tape uo'oe gaa'me natoviaĝanata, gaa'me najeedel choqogaa'me neviquil. 6Qama'le da'me lañoqotaĝanaĝac ñe'me Jaliaĝanec yataqachiñe am yanem da'me lañoqotaĝanaĝac, qama'le nach'e ena'am a'uaĝate'tape daa'me 'laqataqa ñe'me Dios, auena'ama jogaa'me. Qama'le da'me anejiyaĝauayaĝac neleguemaĝata da'me jiyaĝaua laqaya. 7Qom yepaquichiguilo ena'uaque daa'me daajo', qama'le aua'uo ga'me auetapega 'noota ta'le aua'uo: qa'a ñe'me Dios am lecochiya. 8Yem qama'le a'uau'tague di'me Guilgal, qa'a nach'e ena'am jajoyi qomle, qama'le am jauana qaedi je'et ga'me najaqajec jo'ne jegoue, janem ñe'me Jaliaĝanec, choqoga'me najaqajec da'me 'nemaĝac. Oue'ta joga'me nalo'taguet siete gaa'me noloqo'ote, chayovida'a qom jovita joga'me, qama'le am jaloĝona ga'me jo'ne jetaque aua'uo.»
9Qampaja'a da'me Saúl male ca'e ñe'me Samuel da'me male ec, ñe'me Dios yataqachiñe yadalaĝat jaga'me lequidiaqate; nach'ejo jo'me nolo' da'me yepaquichigui ena'uac ga'me jo'ne qo'yaĝatem. 10Ca'li male Saúl choqoñe'me lalemaĝajet yovideta di'me Guibeá, jogaa'me Dios 'laqatanaĝanaĝanaqa jo'ne t'aqataĝa'tape queda'aguet. Qama'le da'me lañoqotaĝanaĝac ñe'me Dios yataqachiñe yemaue joñe'me Saúl, qama'le nach'e ena'am t'aqataĝatac, 'yaĝate'tape daa'me Dios 'laqataqa, ena'ama jogaa'me. 11Qalaĝaja ena'uaque jogaa'me jo'ne jalchi'ena yateto'n joñe'me Saúl, da'me yauata queda'me nach'e ena'am 'yaĝate'tape daa'me Dios 'laqataqa, nach'e ena'ama jogaa'me Dios 'laqatanaĝanaĝanaqa, qama'le nenatetapega't:
«¿Jach'e ga'me eeta da'me lajouaĝac ñe'me c'oĝot ñe'me Quis? ¿Qo'li nach'e ena'am ñe'me Saúl da'me Dios 'laqatanaĝanaĝanec?»
12'Uo ga'me laqaya yitaĝa enaac:
«Qama'le ¿jach'e jogamaĝa chiyoĝoteguet naa'me naajo'?»
Nach'ega ua'a da'me 'uo ga'me 'naqatac: «¿Qo'li nach'e ena'am ñe'me Saúl da'me Dios 'laqatanaĝanaĝanec?»
13Yoĝo'yi da'me nach'e ena'am 'yaĝate'tape gaa'me Dios 'laqataqa, Saúl yovita ga'me 'lachaqa'. 14Ñe'me netejoqo' yenat joñe'me Saúl choqoñe'me lalemaĝajet:
«¿Jach'e ga'me auajoyiyi?»
Qama'le Saúl 'yateguet:
«Qa'a jelaqapiyi jaa'me ajenadi. Qalaĝaja da'me jayatenaq da'me ja jauanaĝalo, male jec'otaĝa ñe'me Samuel.»
15Ñe'me netejoqo' ñe'me Saúl 'yateguet:
«Qama'le ¿jach'e ga'me ami 'yaĝatema ñe'me Samuel? ¡Jayem a'uaqataĝañiyem!»
16Saúl 'yateguet ñe'me netejoqo':
«Yataqachiñe qo'mi 'yaĝatema queda'me joote qoyauanalo gaa'me ajenadi.»
Qalaĝaja Saúl ja ch'e ta'le nenaĝata'a da'me jetaque lejaliaĝa jo'ne 'yaĝatetapem ñe'me Samuel.
17Yem qama'le Samuel yiyaĝana gaa'me Israel laje'pi qaedi qo'nonaĝachigui ñe'me Jaliaĝanec, ua'a di'me Mispá. 18Naqaedi ua'a da'me enaac:
«Jenjo' 'laqatac ñe'me Jaliaĝanec, mach'e Nedios di'me Israel: “Jayem ami ñaqatedegue ca'li di'me Egipto, ami jo'ne Israel laje'pi, nataq'aen ami je'uolo'te da'me ami nejaliaĝatetapelo'te jogaa'me Egipto laje' nataq'aen ena'uaque jogaa'me nejaliaĝanaqa jo'ne nach'e eta't da'me ami yeloiquiaĝa'tape.” 19Qalaĝaja nayi da'me ami ma'te a'uotañi joñe'me Dios jo'ne ami de'uolo'te queda'me ena'uaque gaa'me adajouaĝacodi' choqoda'me nach'e eta't da'me ami lichiguilo, nataq'aen da'me avimii da'me aviyaĝañiyaque ga'me adejaliaĝanequi qaedi ami nejaliaĝatelo'te. Chane'eja, 'noota qom auajoyiya'aguet nayi ñe'me Jaliaĝanec, onolqa'tape gaa'me net'alpi choqoga'me c'oqo'tepi.»
20Yem qama'le Samuel damajoĝolegue qaedi davitedeuo jogaa'me c'oqo'tepi di'me Israel, qama'le joga'me qoya'uo tachigui ga'me mach'e c'oqo'tepi di'me Benjamín. 21Jona'li yem, maliaĝa queta joga'me ca'li yitaĝa yiyaĝana qaedi yitaĝa nichiqueteuo gaa'me mach'e c'oqo'tepi di'me Benjamín, qama'le yitaĝa jogaa'me tachigui jogaa'me mach'e c'oqo'tepi di'me Matrí, qama'le nach'egaua jogaa'me male tachigui ñe'me Saúl, jo'ne mach'e c'oĝot ñe'me Quis. Qalaĝaja ma'te qoyelotaque qalaĝaja ja qoyauana. 22Jouaĝat da'me dojo' yitaĝa yena't joñe'me Jaliaĝanec, qa'a jetaque yayate'n ñe'me Saúl, qom ue'ta jodi'me. Ñe'me Jaliaĝanec 'yat queda'me Saúl joote ue'ta jodi'me, uetauelo gaa'me nachoĝonaĝaiqui' da'me nañoĝotetapiñe. 23Chane'eja qoyacha'a, qoyachiyoĝota'ña ga'me neta'ña da'me nañoĝotetapiñe. Qama'le ñe'me Saúl male dajoya'agueta gaa'me jiyaĝadipi, male qoyauana da'me qaya'te laqaya gaa'me Israel laje'pi ta'le napacalegue da'me 'loyaĝac da'me loguedaic. 24Qama'le Samuel yachimaĝatouelo ena'uaque jogaa'me:
«¿Qo'li joote auañiya ga'me jo'ne liquiyac ñe'me Jaliaĝanec qaedi naqaeñe adejaliaĝanequi? ¡Qaya'te Israel le'ec ta'le qoyaqanatet da'me qonaloqotenaĝaneguet joñe'me!»
'Yadeteguet gaa'me Israel laje'pi:
«¡Eja qa'nonaĝachigui ñe'me qadejaliaĝanec!»
25Qampaja'a Samuel yayatenaĝanaĝaneque gaa'me jiyaĝadipi gaa'me lamajoĝonaĝaco ga'me jaliaĝanec, qama'le yededelegue jaga'me nede qama'le yiyamaĝa't, yachedaue ga'me tamenaqa' ñe'me Jaliaĝanec. Yem qama'le Samuel yamaĝadeuo ena'uaque jogaa'me qaedi yec'atapegalo naa'me 'lachaqa'te. 26Nach'e ena'am ñe'me Saúl queuo, dajoyi ga'me 'lachaqa' jo'ne Guibeá, qama'le Dios nichigaĝategue da'me yanema ga'me 'lañaĝa'j jogaa'me qayoĝode' jiyaĝa'u 'uañaĝayaqa qaedi quetedapegue' joñe'me. 27Qalaĝaja ja qayaua gaa'me ja 'noe'n ga'me nenaĝatedegue, eetac gaa'me 'laqataqa: «Qama'le jo'me jojo', ¿qo'li naqaejo jo'ne qo'mi nec'alaĝatedegue?» Qama'le 'yotatedac joñe'me nataq'aen ja 'nonaĝachedigui joñe'me. Qalaĝaja Saúl ena'am ta'le ja domachiyalo.
ప్రస్తుతం ఎంపిక చేయబడింది:
1 Samuel 10: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
