1 Samuel 8
8
Gaa'me Israel laje'pi jetaque qoya'uo ga'me lejaliaĝane'j
1Male 'yaĝaicachigui ca'li ñe'me Samuel, qama'le yanema daa'me lajoĝola'te gaa'me Israel laje'pi jogaa'me c'oqo'te. 2Ga'me 'uaeñe c'oĝot jo'ne lenaĝat Joel, ñe'me c'oĝot laqaya jo'ne Abías, nach'enaua neteda'ña di'me Beerseba nach'e ena'am nejaliaĝatedelegue di'me Israel. 3Qalaĝaja ñaa'me c'oqo'te ja eda'am ga'me loec ñe'me let'a', maq joda'me jetaque degueja ga'me yauata, yacoteguet da'me lecochita ga'me 'uo ga'me yanegue, ja yauote da'me chimaqachiñe. 4Jouaĝat da'me dojo', jogaa'me 'yaĝaicachidi Israel laje' male dajotegue di'me Ramá qaedi dojedapegue' ñe'me Samuel. 5Eetac ga'me 'laqata'j:
«Da'me am male am 'yaĝaicachigui, gaa'me ac'oqo'te ja eda'am da'me adoec. Qama'le 'noota ta'le aua'uo ga'me jaliaĝanec qaedi qo'mi nejaliaĝatelo'te, ena'am ga'me yauote naa'me ale'u lael.»
6Qama'le ñe'me Samuel ja 'yamaqaten da'me yiyaĝatedaque ga'me lejaliaĝane'j, qama'le ya'uo ga'me netamenaĝac, netamenot ñe'me Jaliaĝanec. 7Qama'le ñe'me Jaliaĝanec 'yateguet:
«Anaquiaĝanalo, aua'uo ga'me yiyaĝatedaque jogaa'me jiyaĝadipi. Ja naqa'am da'me jetaque am 'yota'n, dite joda'me jayem, qaedi ja ñejaliaĝatelo'te. 8Chiyoĝoguet jo'me nolo' ca'li ñaqatedegue di'me Egipto, chayovida'a nayi, da'me jayem etede'ec, jouaĝat da'me jayem yaĝadiñe, e'n gaa'me qop'iyapegalo yate'm nale ga'me lemaĝa'j. 9Chane'eja aua'uo ga'me lejaliaĝane'j jo'ne yiyaĝatedaque. Qalaĝaja yataqata auayatenaĝanaĝaneque ga'me ya'uo qomle ga'me jaliaĝanec.»
10Qama'le Samuel 'yaĝatema gaa'me jiyaĝadipi ga'me 'laqatac ñe'me Jaliaĝanec, 11qama'le eetac:
«Dojo' da'me auañiya qomle 'uo ga'me jaliaĝanec jo'ne ami nejaliaĝatelo'te: yiyaĝanalo gaa'me ac'oqo'chedi' qaedi uo'oe gaa'me e'n yelo'tegueta gaa'me cadeeta jo'ne nalada't lo'o; uo'oe gaa'me e'n lo'ol gaa'me pe'ga; uo'oe gaa'me e'n mach'e neteleta joñe'me; 12uo'oe gaa'me lajoĝola'te jo'ne mil gaa'me coicopi; uo'oe gaa'me e'n lajoĝola'te gaa'me cincuenta coicopi; uo'oe gaa'me e'n t'onataĝadelegue ga'me 'naleua; uo'oe gaa'me e'n napo'j ga'me lanec; uo'oe gaa'me e'n ye't gaa'me 'neuoĝonaqa'te choqogaa'me loĝoje'te gaa'me cadeeta jo'ne nalada't lo'o. 13Nataq'aen 'yonataĝanaĝa'n gaa'me ac'oqo'cheldi' e'n ye't ga'me yoĝoqui jo'ne davioĝon, uotaĝa e'n uojaĝael, nataq'aen uo'oe gaa'me e'n pan lo'ol. 14Doĝotaĝanec qomle ga'me a'naleuai jo'ne onaĝaic choqoga'me onaĝaic jalayaĝac ga'me adaniqui, qama'le yanema gaa'me nejoĝonaqa. 15Nataq'aen qonecolaĝachiñi ga'me lae ga'me adaniqui qama'le yanema gaa'me nejoĝonaqa choqogaa'me lejaliaĝanaqa gaa'me coicopi. 16Nataq'aen doĝotaĝaneque gaa'me adalemaĝaje'chidi' choqogaa'me alodi' jo'ne 'noe'n, gaa'me uaca choqogaa'me ajenadi, qaedi 'yonataĝanaĝa'n. 17Nataq'aen e'n loqote jaga'me lae jaga'me 'nanaĝatelpi, chayovida'a ami da'me a'uonataĝañiuo'o. 18Ga'me nolo' qomle ja a'uamaqachiñe ga'me jaliaĝanec jo'ne mach'e adiquiyaqui, male ñe'me Jaliaĝanec Dios ja ami 'te yoqocha'alo.»
19Qalaĝaja gaa'me jiyaĝadipi ja yoqochideta ga'me 'yaĝatema ñe'me Samuel, enapega't:
«Dojo' ja yaqalan. Jetaque 'uo ga'me qadejaliaĝanec, 20qaedi jenaqa'ama gaa'me noyaqa laqaya' nataq'aen qo'mi nejaliaĝatelo'te nataq'aen nach'ega qadejaliaĝanec nale 'uo ga'me nalada't.»
21Yem da'me domachiya ga'me 'laqata'j gaa'me jiyaĝadipi, ñe'me Samuel 'yiyelaĝatelegue da'me t'aqataĝanem ñe'me Jaliaĝanec Dios. 22Ñe'me Jaliaĝanec 'yateguet:
«Anaquiaĝana ga'me yiyaĝatedaque, aua'uo ga'me lejaliaĝane'j.»
Chane'eja Samuel yamaĝadeuo gaa'me Israel laje'pi, e'n yec'atapegalo naa'me noyaqa 'me chiyaqapeguelo.
ప్రస్తుతం ఎంపిక చేయబడింది:
1 Samuel 8: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
