Éxodo 2
2
Moisés paqarin
1Chaypacha Leví jatun ayllumanta uj qhari, chay ayllullamantataj uj sipaswan casarakorqa. 2Warmin wijsallikusparí, uj qhari wawata paqarichikorqa. K'achitu wawa kasqanta rikuspataj, mamanqa kinsa killata pakayllapi uywarqa.#Hch 7.20; Heb 11.23. 3Chantá wawitaj maman manaña astawan pakayta atispa, t'uturamanta canastata ruwarqa, ama yaku yaykunanpajtaj maphawan llut'aykorqa. Chayman wawata churaykuspataj, Nilo mayu kantupi t'utura chawpiman churaykamorqa. 4Chaywanpis wawaj panan karunejllamanta qhawasharqa, wawawan imachus kananta yachananpaj.
5Chay qhepata faraonpa ususin mayllakoj mayuman urayk'orqa. Sipas kamachinkuna mayu kantuta puriykachashanankukamataj, faraonpa ususin t'utura chawpipi tuytushaj uj canastata rikorqa. Chantá ujnin kamachinwan chay canastata orqhochimorqa. 6Paytaj canastata qhawaykuspa, wawata waqashajta rikorqa. Chantá faraonpa ususin wawamanta khuyakuspa, nerqa: Kayqa israelitakunaj wawanku, nispa. 7Jinallapi chay wawaj pananqa faraonpa ususinman qayllaykuspa, nerqa: Kay wawata chuchuchispa uywapusunanpaj, munawajchu uj israelita warmita wajyampusunayta? nispa.
8Faraonpa ususintaj nerqa: Arí, riy wajyamuy, nispa. Chantá wawaj pananqa usqhay usqhayta rispa, mamallantataj wajyamorqa. 9Chay warmi jamojtintaj, faraonpa ususin payta nerqa: Kay wawata uywampuway, noqataj uywasqaykimanta pagapusqayki, nispa. Mamantaj wawata apaspa, uywamorqa.
10Chantá wawa jatunña kajtin, mamanqa wawata faraonpa ususinman apaporqa. Paytaj wawanpajpuni rejsikaporqa,#Hch 7.21-22. suticharqataj “Moisés”, nispa, imaraykuchus pay nerqa: Yakumanta noqa orqhorqani, nispa.
Moisés Egiptomanta ayqekun
11Moisés ña yuyayninpiña kaspa, uj kuti israelita masinkunata waturikoj rerqa. Chantá sinch'i ruwanawan imaynatachus ñak'arichisqa kasqankuta rikorqa. Moisés rikullarqataj Egipto llajtayojqa uj llajta masin israelitata maqashajta. 12Jinapi Moisés tukuynejta qhawarerqa, manataj ni pipis kashasqanta rikuspa, Egipto llajtayojta wañurparicherqa. Jinaspataj, t'iyupi ayanta p'ampaykorqa.
13Q'ayantin ujtawan rispa, Moisés iskay israelitakunatañataj maqanakushajta rikorqa. Chantá llajta masinta maqashajta nerqa: Imaraykutaj llajta masillaykitataj chay jinata maqashankiri? nispa. 14Chay runarí Moisesta kuticherqa: Pitaj churasunki noqaykuta kamachinawaykupaj, juezniykutaj kanaykipajri? Imaynatachus Egipto llajtayojta wañucherqanki, jinatachu noqatapis wañuchiyta munashawanki? nispa.
Moisés chayta uyarispa, mancharikorqa, nerqataj: Egipto llajtayojta wañurparichisqayqa yachakunña, nispa. 15Jinataj karqa. Faraonqa Moisés egipciota wañuchisqanta yachaytawan, payta wañuchichinanpaj mask'achimorqa. Moisestaj faraonmanta ayqekuspa, Madianman riporqa.#2.15 Madián: Madián llajtayojkunaqa mana uj cheqallapichu sayaj kanku. Paykunaqa uywankuta michispa, kayman jaqayman purinaman yachasqa karqanku. Purinankoqa Palestina cheqamanta uranejman, chantá inti yaykuynejman ima kasqa. Madianitakunaqa Abrahammanta miraj kasqanku. Gn 25.2. Madianman chayaspataj, uj yaku pujyu kantupi tiyarikorqa.
16Chaypi tiyashajtin, Madianmanta sacerdote Reuelpa#2.16 Reuel: Ujnin sutin Jetro karqa. Payqa Moisespa suegron karqa. Ex 3.1; 18.1; Jue 4.11. qanchis ususinkuna jamorqanku, yakuta bateaman orqhospa, tatankoj ovejankunata ujyachinankupaj. 17Chaywanpis waj michejkuna chayamuspa, chay sipaskunata chaymanta qharqorqanku. Chayrayku Moisesqa sipaskunaman sayakuspa, chay michejkunamanta jark'arqa. Chaymantataj yakuta pujyumanta orqhospa, ovejakunata ujyacherqa.
18Chantá sipaskuna wasinkuman chayapojtinku, tatanku Reuel taporqa: Imajtintaj kunan usqhayllata kutimunkichejri? nispa. 19Paykunataj kuticherqanku: Chay waj michejkuna wijch'umushawajtiyku, Egipto llajtayoj uj runa kutikuwarqayku. Chantá pay kikin yakuta orqhospa, uywanchejman ujyacherqa, nispa. 20Jinapi Reuelqa ususinkunata nerqa: Maypitaj chay runa kashanri? Imaraykutaj saqerparinkichejri? Rispa, pusamuychej mikhunata jaywarinanchejpaj, nispa.
21Jinamanta Moisesqa Reuelwan tiyakorqa. Qhepamantaj Reuelqa ususin Seforawan Moisesta casaraykucherqa. 22Aswan qhepamantaj chay warmi uj wawata paqarichikorqa, Moisestaj wawanta “Gersón”, nispa suticharqa: Runaj llajtanpi kashani, nispa.
23Chaymanta aswan qhepanejman Egipto suyuta kuraj kamachej wañuporqa. Israelitakunatajrí, wata runa kasqankumanta waqarikuspa, qhaparikorqanku. Diostaj sinch'i ñak'arispa qhaparikusqankuta uyarerqa. 24Chantá israelitakunaj ayqospa qhaparikusqankuta uyarispa, Dios yuyarikorqa Abrahamwan, Isaacwan, Jacobwan ima tratota ruwasqanmanta.#Gn 9.15-16; 12.1-3; 15.13-14; Ex 6.5. 25Chayrayku pay israelitakuna imaynatachus ñak'arishasqankuta rikuspa, paykunamanta khuyakorqa.
ప్రస్తుతం ఎంపిక చేయబడింది:
Éxodo 2: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
