BON 22
22
1“Vbw-bor tulu hoo ab tulu, ngo nulug agaho ngoqg yolu dooma hvl benam sam tagabto!” 2Bulv mwam Hibru agamb goonam mam tapa tvl bulv cooikab tud-rwb doonum; hoo Poul benum.
3“Ngo Juhudi nyiv ngam Silisiyag Tarsas bopamho ko bwwnum, hvbmabde ngam Jerusalem bopam so Gamalielg tomswrko ho ngam sotv pan ngam ngulug at ab tulug pvvbam biima dvb hindib tomswrnum, ho soolog nulam soq doonbo nyi tulungam nyinam hvbkalam ngamkam Pwnboam jipaq kunum. 4Ngo soq lamtab wnbo nyi tulungam mvnyi-mviyal, bulam nootu banv nyem ge nyega ge, bulam pvtwq bvkam lwqnum, hoo bulam sim dvbkam mvnum. 5Nyub Buda akv la Dookum hoq nyi tulungv ngo jvqtwb bedwk hvl bulv bekin deenbo hvvkiv doodo. Ngo bulug galoqkv, Damaskas ho doonbo Juhudi tulungam nootu dvb hvl pota naalayil, hoqb wgdvl bulam nootu gvdwl tag kvrlwq tvl Jerusalemb boal bulam laqm-baqm dvb hvl ngo wnum.
Poul Jisun Mwwg Mwwjwnam mam Bekinam
(Bn 9:1-19; 26:12-18)
6“Ngo wknv Damaskasam ogumb wnwq kunum, hvbmabde aal lvpa ditaqho cengma lvpab doonyi lvlaq huuda kvlabo doonyi ao toloqgv ngam huulubnum. 7Kokw so ngo kedwb geql kunum, hoqgv ngo agam yal ak ngam, ‘Soul, Soul! No ngam hoggub mvnyi-mviya dvn?’ hvl bedwb tapanum. 8Ngo toxnum, ‘At Sw, no hiyv?’ Mwv birwqnum, ‘Noqg mvnyi-mviyanam Najaretwg Jisu.’ 9Ngoqg lvgab wba bo nyi tulungv huto lvlaqngam kaapanum, hvbmabde bulv ngoqg lvgab agam yal goon mam tapa maanum. 10Ngo mwam toxnum, ‘At Sw, ngo hognvkv nyitayin?’ hoo At Sw ngam benum, ‘Gorab gvdwl Damaskaswb haato, hoo nam Pwnbov alo hog nvkam nyim dvb mwwpan ham nam hog mwlwngam bekin tayin.’ 11Huto lvlaqkv ngam huuceq ko-gab ngo nyiqca caal doonum, kokw so ngoqg wbamv ngam alaqngam gvbw tvl bulv Damaskaswb ngam bool haagnum.
12“Ananiyasvk hvl eminam, Pwnboam boswl swwnbo, dormo nyi ak, ngulug pvvbam bugil swwnbo, Damaskas hoqg Juhudi nyi mwlwngv xikumnam nyi ak doonum. 13Mwv ngoqg dookub haabnv ngoqg bviyoqhv daqtwl ngam benum, ‘Bor Soul, lokta kaapa tuku!’ Ho dara ngo kaapa kunum, ho mwam ngo kaagabnum. 14Mwv benum, ‘Ngulug at ab tulug Pwnbov nam mwwg hang mwwnam mam cengm dvb, mwwg nyedar albo nyerangam kaapa mvdwb la mwwg atwg agam benam mam tapa mvdwb mwv nam xuqpa ku. 15Hoggab mwv nam mwwg gab no hognvkv kaatkun hoo tatkun ham nam hvvky swwm dvb la nyi tulu mwlwngam bekin dvb nyitayin. 16Hoo sija hoggab kaaya lyodu dvn? Gorab gvdwl baptijum naato, hoo mwwg emin gab xumg dvl noqg nyicam nyedar darxaq koto.’
Poulwn Nyoodo Nyiingam Tugu Pui Bekin Mvdwb Dvgoq Goqnam
17“Kokw so ngo Jerusalemb wkur kunv Xumk nam uraho xumdul doodu dvkho ngo nyiqry ak kaanum. 18Hoq nyiqry kaanamv At ngoqg dookub haabnv ngam benum, ‘Nyorib Jerusalem ham apaq pel wto, hoggab soq nyi tulungv ngoqg pagoqkam pui bekinam mam bulv tvjw ram.’ 19Ngo birwqnum, “At Sw, bulv ngam Sinagog nammwb wl nam mwwjwbo nyi tulungam nootul bulam jwwpan hvl ham hindib cengdwn. 20Hoo noqg hvvky swwnbo Istepennvn meng dwkho ngo ham kvtaqb menglaq pan hvl benum, hoo mwam mengbo nyi tulug kamtam koocum tap yaanum.’ 21Hvbmabde At ngam benam, ‘Wn,’ hoggab nam ngo Nyoodo nyi tulug dookub kanam tayin!’”
22Nyi tulungv Poul soq sam benam gab tal doonum, hvbmabde hoq kokw so bulv vc alwb sogoq goqrabnum, “Mwam mengpaqto, mwam mengto! Mwam swwm maabv!” 23Bulv sogoq kiir goqdunyianum, ho bulug vjam lwqyab banv la diikwr tvmwram doonyi aob hwrcal benyanum. 24Ho Roman Sipai tulug gaml jinbo saab akv mwwg Sipai tulungam Poulwn bulug gurum urab boolwq gvdwl xipwql mvtwl mwam hoggub Juhudi tulungv soq sib mwwg ceebiob yolu bedwn ham talin tvk hvl bulam benum. 25Hvbmabde sipai tulungv mwam xipwql mvdwb leedaq yukam, Poul ogumho daqnbo saab akam benum, “Roman nyiam hog yolu dooma boam mwam pw-hwwka majaqb xipwql mvnamhv nulug nyicwngv i?”
26Soq benam sam saab akv tatwl, mwv gaml jinbo saab dookub wnv benum, “No hog mudu dvn? Alo nyi ak vv Roman nyi golak!”
27Hoqgab gaml jinbo saab akv Poulwg dookub wnv mwam toxnum, “Ngam bekin tvb, no Roman nyiv jaqyv?”
Poul mwam birwqnum, “Vv, ngo Roman nyiv,”
28Gaml jinbo akv benum, “Ngo loqkam twngk vigo jilayil Roman nyiib nyinum.” Poul birwqnum, “Hvbma ngam nyiloqkam ko bwwtaqnum.”
29Ho dara Poulwn hudytab haanbo nyi tulungv mwwg ogum hoqgv Roman nyi goj kunyi hvl cengtkul, ho mwam gai lvgab leedwb jigam gab mwv bos sonum.
Poulwn Dookum Agaho Boanam
30Gaml jinbo akv Poulwn Juhudi tulungv hoggab yolu biyumnum ham tvdy dvb mwwnum; hoqgab loogwn so mwv Poulwg tagam paqxia mvtwl nyub but tulungam la Dookum hoqg nyi tulungam gaml mvdwb gaml ak jinum. Kokw so mwv Poulwn boobnv agaho daqm dvb jinum.
ప్రస్తుతం ఎంపిక చేయబడింది:
BON 22: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
