BON 21
21
Poul Jerusalem Wnam
1Ngulv bulam alwb dooiyak hvl bepekul wleq kunum. Ngulv jvvs jaada banv Kosub haanum, hoqgv loogwn so ngulv Rodes wcnum, hoqgv Patarab wnum. 2Hoo ngulv Ponisiya ho iss jaajv ak wpeqnam mam kaapanum, hoqgab hoqb caobanv wleqnum. 3Ho ngulv Saipras sam kaapa dvb akob jaal banv Saipraswb wnum. Jaajv dupum dvrab pam paapoq tvl Taiyar ho ngulv ipoqnum. 4Ngulv hoq gvdaho mwwjwbo nyi tulu go kaapa tvl bulug lvgab aal kvn go doobanum. Bulam Dvrwqbo Yalv ator jigam gab bulv Poulwn Jerusalem wma bvk hvl betornum. 5Hvbmabde ngulv wd moodv haaikukam, ngulv bulam apaqpel ngulug wtub hvraqb wknum. Bul mwlwngv bulug nywxw-kongam bootwl ngulug lvgab bopam bviywr godab lengmin gvnum. Ngulv swnyiq bviywrho lwbwngv kumbw tvl xumnum. 6Kokw so akwn akwn alwb dooiyak hvl bepekul ngulv jaajib caol wleq kunum, bulv bulug nammwb wkur kunum.
7Ngulv hvraqb jaajib jaaknv Taiyar hoqgv Tolemayis ho wc kunv mwwjwbo vbw-bor tulungam Salam jitwl, bulug lvgab aal loog doobanum. 8Loogwn so ngulv hoqgv wknv Sijariya wc kunv, ngulv pui bekinbo Pilipg nammwb wbnv ngulv mwwg lvgab doobanum. Mwv Jerusalemho xuqnam nyi tulug kvnwg pengko hoqg akin. 9Mwv nyem ko nyijwr vpy go nyem wma daqn bov doognum, bulv nyiqry benum. 10Ngulv Pilipg namho apo jaqg doodu yukam Judiya hoqgv nyiqry kaanbo Agabusek hvl eminam ak haanum. 11Mwv ngulug dookub haabnv, Poulwg vj tonangam naabnv mwwg alaqngam atv leetu tvl mwv benum, “Soq sam Dvrwqbo Yalv bedwn, soq tona atam Juhudi tulungv Jerusalem alo soq sib kalam leedaql aptayin, hoq kokwb bulv mwam Nyoodo nyi tulug alaqb gvqlwq tayin.” 12Ngulv sam tapa tvl, ngulv la mwwjwbo nyi tulu gon Poulwn Jerusalem wma bek hvl mvnyi-moiyul benum. 13Hvbmabde mwv birwqnum, “Nulv hoggab soq sib xabl ngoqg hangam bik-bimul begdvn, “Ngo Jerusalem alo ngam leek dvb mwwtwq ma, hvbmabde ngo At Sw Jisu gab sid bvkam mwwr saqkwl doodwn.”
14Ngulv mwam bitwr nyokmab nyigam gab ngulv bekmab apaq kunum, hvbmabde ngulv hvl benum, “At Swg mwwlwqkob nyimto.”
15Meeg apo go dooxo kokw so ngulv mwx-mvaq layil Jerusalem wleqnum. 16Sijariya hoqgv ngulug lvgab mwwjwbo nyi tulu go wbanum, bulv ngulug doota ko Nasonwg nammwb ngulam bool wgnum. Mwv Saipras hoqg nyiv, mwv otuqjaq hoqgv mwwjwl doonum.
Poul Jemsnvn Kaatab Wnam
17Ngulv Jerusalemho wc yukam mwwjwbo nyi tulungv ngulam hookuml svgagvrwqnum. 18Loogwn so Poul ngulug lvgab Jemsnvn kaatab wmin gvnum, hoqho dvrwq namlo hoqg mwwjwbo nyiilo nyi tulungv hookum banv doonum. 19Poul bulam salam hvl betwl bulam Pwnbov hoggub nyil mwwg lvgab doomin gvl Nyoodo nyi tulug pengko ho bon nyinum hoq hog mwlwngam bulam bidil bekinnum. 20Mwwg bekinam mam tatwl bulv Pwnboam paqnum. Kokw so bulv Poulwn benum, “Bor Poul no kaaka to, hoggub nyil hwdgo Juhudi nyiv lwwyw lwwywb mwwjw nyiadkun, hoo bul mwlwngv bulug pvvbam apaq majaqb bugum bwiywr nyidwn. 21Bulam nyi tulungv nam Nyoodo gvdaho doonbo Juhudi tulungam Mojesg pvvbam apaq tuku, ho bulam bulug ko tulungam mux mvmabvk hvl, ho Juhudi tulug nyicwngam nyik maabwk hvl tomswr yvdnvk hvl nyi tulungv bekin pakun. 22Bulv nam haapa kunyi hvl tapa keeta yi; hvnyiloqkam sija hoggub nyikin pa.” 23No ngulug bekjaqb tato. Dingkbo nyi vpy go doodwn. 24No bulug lvgab wba gvdwl bulug lvgab nyedar darxaqnam nyik-wkho nyibal bulug hiqsam no hiqj tvl bulug dumpongam reqmta soq sib nyibaloqkam bulv vx cerv noqg puiyam nyi tulungv bekinam hv akukam jvqtw kumanyi hvl bulv cengtayin, hvbmabde no Mojesg nyicw-wcwb nyil swws dvnyi hvl cengtayin. 25Hvbmabde mwwjwbo Nyob luusaq nyi tulungam ngulv pota ak xeqbnv jilwq banv bulam ngulv sam bibwq pakun, mwwjwbo nyi tulungv ui pan nvnam dvnam gotwq bolo dvma bvk hvl, ho uiyam dvma bvk hvl, ho ui lengsor maanbo vdinam dvma bvk hvl, hoo bulam nyiig nywxw-nyolam bwwxin maabv hoqgv atam aadoho ap sutwk hvl bekin pakun.”
26Kokw so Poul nyi tulungam boolayil loogwn so nyedar darxaq dvb nyinam mam bulug lvgab nyiknum. Hoq kokw so Poul Xumk nam urab haabnv bulam nyedar darxo aal loogwn kokwngam bulv vx cerv bulug gab pwr jidwb nyitayin ham mwv bekinnum.
Poulwn Xumk Nam Uraho Nootunam
27Aal kvnv wnya svqtwqb nyiknum, ho Asiya gvda hoqgv Juhudi nyi tulu go mwam xumk nam uraho yvnam mam kaapanum. Bulv nyi pvtwngam ol lubur tvl mwam nootunam. 28Bulv sogoq goql benum, “Israel nyi tulu! Svka to! Soq nyi ak siilak gvda mwlwb wgaq banv Israel nyi tulungam, Mojesg pvvbam, ho soq Xumk nam sam ceebio bebnv nyi vxiam tomswrl yvnbov. Ho sija mwv Nyoodo nyi tulu gota bulam soq Xumk nammwb boa banv soq dvrwqbo ked sam mubur paku!” 29Bulv soq benam siiloqkam bulv Ipisi hoqgv haanbo Tropimasnvn Poulwg lvgab bopamho gaql yvdwb kaapanum, hoqgab bulv Poulwn Xumk nam urab mwam boanamgo mwwnum.
30Bopam bumpwngv hur-marab nyirabnum, hoo nyi tulungv xorkum banv Poulwn nootu layil agab Xumk nam hoqgv mwam seelinum. Ho cox alwb Xumk nam viyap pam kuqtumnum. 31Nyi tulungv mwam mengdwb nyidu yukam, nyi akgon Roman sipai tulug gaml jinbo saab akam Jerusalem bopam bumpwngv hur-marab poogub yolu dudu dvk hvl pui bepanum. 32Nyebia alwb Sipai gaml jinbo saab akv sipai saab ata go la sipai pvtw twwg boolayil nyi olumg pengkob juqlwqnum. Nyi tulungv mwam sipai bool haanam mam kaatwl bulv Poulwn jwwngo tvl apaqnum. 33Gaml jinbo saab akv Poulwg dookub haabnv mwam nootu banv mwam gai soonyi go leetwk hvl gaml jinum. Kokw so mwv toxnum, “Soq nyi aksi hiyv, ho mwv hognvkv nyipan?” 34Ho nyi pvtwngv bulv tulu gon oksub, ho tulu gon oksub sogoq goqnum. Hur-marab rooxob dugum gab gaml jinbo saab akv jvqtw jaqb hognvkv jaqkv nyinum ham meelin nyok maanum. Hoqgab mwv mwwg sipai tulungam Poulwn bulug dookub gurumb bool wg tvk hvl gaml jinum. 35Bulv Poulnvn soobia ho booca kalam nyi tulungv hur-marab nyirab yukam sipai tulungv mwam jool wgnum. 36Bul mwlwngv mwwg kokwb wmin gvbnv sogoq kiirl benum “Mwam mengto!”
Poul Mwv Atv Betur Sunam
37Sipai tulungv Poulwn bulug gurumb boatai yikho mwv gaml jinbo saab akam benum, “Ngo hog ak nam bekin nwwpa?”
Gaml jinbo saab akv mwam toxnum, “No Gwrik agam goolaqs i?” 38“Hvnyiloqkam no oyu maadab hur-marab dul nyi sony mengbo lwwyw vpy nyi tulungam deexa-rarab bool wgbo Ijipt nyi ak hvvmas i?”
39Poul mwam birwqnum, “Ngo Juhudi nyiv ngam Silisiyag bopam xinam Tarsas bopamho ngam ko bwwnam nyiv. Ngo nam mvnyi-moiyul bedwn, ngam nyi tulungam bem dvb gaml jitwb?”
40Gaml jinbo saab akv Poulwn gaml jinum, ho mwv soobia aohv daqtwl mwwg alaqngv meetor banv ody maab dooiyak hvl benum. Hwdlo nyi tulungam cooikab doodu yin mwv bulam Hibru agamb benum:
ప్రస్తుతం ఎంపిక చేయబడింది:
BON 21: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
