BON 23
23
1Poul dookum daiyab rogab lalal benum, “Ngoqg vbw-bor tulu! Ngoqg hangv hingxw cwrwl mwwdy sudwn, ngoqg swwca so sool godab ngo Pwnboam ngoqg nyik mvkho hog mwlwngam hindib nyispan mwwdwn.” 2Nyub Buda Ananiyas Poulwg ogumho daqnbo nyi tulungam mwwg agam mam jwwtwk hvl gaml jinum. 3Poul mwam benum, “Asoq cwqc jaqb puulu dvb neenam issam Pwnbov nam ya jvqtw jaqb jwwtayin. No hoqho dootwl ngam pvvb lvgab pw-hwwdwb doodo hvbsujaqkam no atv ngam jwwtwk hvl gaml jinv pvvbam juqbo sudo!” 4Ho Poulwg ogumho daqnbo nyi tulungv mwam benum, “No Pwnbog Nyub Budangam hvnyw bepa dvn!”
5Poul birwqnum, “Vbw-bor tulu, ngo mwam Nyub Buda gonwg mwwl cengmanum. Dvrwqbo potangv bedwn, ‘No noqg nyi tulug lvpw abam bec-beyal bedwb jaqb nyima dvn.’”
6Poul nyi tulug pengko ho tuugin Sadusis ho tuugin Parisis nyi gonyi hvl kaapa tvl, mwv Dookum ho sogoql benum, “Ngoqg vbw-bor tulu! Ngo Parisi nyiv, ho Parisig kov. Ngo sik bov turkur taikun hvl mwwgw ko-gab sool ngo soq nyel pw-hwwk si daqdwn!” 7Mwv soq sam beda kalam, Parisi tulungv la Sadusi tulungv yolu durab minsnum, hoq kokw so nyi tulungv dvpar pvrnyi gob nyiknum. 8Hoggab Sadusi tulungv bulv begamv, nyi sik bov turkur kuram, ho ao gumtw gokam dooma dvn, yal gokam dooma dvn hvl mwwjwdvn. 9Hoqgab hur-marabv ceceq yaiyanum, Parisi tulug dvpar hoqgv pvvb tomswrbo nyi tulungv daqrab banv gamtor alwb hvqrwqnum, “Ngulv soq nyi aksi hog nyixiaq wxiaqnam meepa ma! Jvqtw jaqb lokam mwam yal goma lo ao gumtw go bvkam bade!”
10Bulv bulug pengko ho yolu ceceq jaqb durab yukam gaml jinbo akv Poulwn lokam bulv twqmwql mvdwn mwwl bosnum. Hoqgab mwv mwwg Sipai tulungam nyi tulug pengko hoqgv ipoql Poulwn boolin gvdwl gurum urab boa gvnkuk hvl gaml jinum.
11Hoq aiho At Sw Poulwg dook hv daqtwl benum, “Bos maab haakam to! No ngoqg puiyam hvvkib Jerusalem so swwnam hvbkalam no Roman bopam alokam hvvky swwdwb nyiky tayin.”
Poulwn Mengdwb Ywrsnam
12Ar rogwn so Juhudi tulungv hookum banv bulv ywrmin sunum. Bulv Poulwn mengma deedib hog gokam dvram twwram hvl dingnum. 13Soq sib lokub ywrsil ywrnbo nyiv campy laleq gob nyinum. 14Hoq kokw so bulv nyub but tulungv la nyiixa tulug dookub wbnv benum, “Ngulv Poulwn mengma deedib hog gokam dvram twwram hvl lokub dingr pakun. 15Hvbnyiloqkam sija nulv la Dookumv Roman Sipai tulug gaml jinbo Saab ak tam Poulwn nulug dookub bool igtvk hvl pui bilwqto, hoo mwwg pagoqkam meegta tvdy dvbwk hvl nulv bik-bepaq yaato. Hvbmabde ngulv mwam so wc maadab mengdwb mwx-mvaq yaatayin.”
16Hvbmabde Poulwg bwrm akwg ko nyega kov soq ywrsnam sam tapa tvl mwv gurum urab haabnv Poulwn soq pui sam betamnum. 17Kokw so Poul saab tulug akin goqbnv mwam benum, “Soq yaapa ak sam gaml jinbo saab dookub mwam bool wg gvn, mwv mwam hog bes ak doopak hvl bedo.” 18Saab akv mwam boolayil gaml jinbo saab dookub boa banv benum, “Nyuum Poul ngam goqbnv soq yaapa ak sam noqg dookub boa jignvk hvl bepan, hoggab mwv nam hog bes ak doodwk hvl bedo.”
19Gaml jinbo saab akv mwam alaqngam gagab tvl mwv atv boogin banv mwam toxnum, “No ngam hognvkv betamsv doodwn?”
20Mwv benum, “Juhudi tulungv mwlwngv nam aram Poulwn Dookumb bool mvdwb betjuk hvl bir minsnyiag nukun; bulv vm akaqb Poulwg pagoqkam meegta tvdy dvbwk hvl bik-bepaql betayin. 21Hvbmabde bulug benam mam tamab, hoggab bulug nyiv campy laleq gob lamta alo toosil tooiyal dootayin. Bul mwlwngv Poulwn mengma deedib hog gokam dvram twwram hvl dingr kunum. Bulv sija ham nyidwb mwwx svqrwl dooknum, hoo noqg agam mam tadwb kaaya yal doodunam.” 22Gaml jinbo akv mwam benum, “Soq sam no ngam bekin panwk hvl hiyvg dook galokam bekin maab.” Kokw so yaapa akam mwv kanam tukul wwm kunum.
Poulwn Laat Saab Peliks Dookub Kanamnam
23Kokw so gaml jinbo akv mwwg saab vnyi gon goqbnv bulam benum, “Sijariyab wdwb sipai loq lwnyi go mwx-mvaqta, hoq lvgab svpur aob wnbo Sipai lo camkvn go, ho nwwxo bvvnloqkam lwnyi go, ho soi aiyig kiya moodam wrab dvb mwx-mvaqt. 24Ho svpur lo Poulwn caol wn mvdwb jita, ho mwam swrso alwb Laat saab Peliks dookub booc jignv.” 25Hoq lvgab gaml jinbo akv Laat saab Peliksnvn pota ak kam xeqbnv jilwqnum, hoq pota ham soq sib xeqnum.
26“Ngo Klodiyas Lisiyas Bir Laat saab Peliksnvn xumbnv sam xeqg yin: Salam. 27Juhudi tulungv soq nyi ak sam nootul bulv mwam mengsv twqb nyiknum. Ngo mwam Roman nyivk hvl tapa tvl ngo ngoqg sipai tulungam boolayil wbnv mwam naalin pan. 28Bulv mwam hoggab yolu bekap dood nvba dwq ham cengdwb mwwnv mwam bulug Dookum bool ignum. 29Ngo meekanamv mwv hog sig-dorg dvbjaq dooma ho mwam pvtwq lwqdwb mwv hog gokam nyima. Hvbmabde mwam yolu biyum namsi hvbaloqkam bulug atwg pvvb nyinam wnam pagoq gos lak. 30Kokw so ngam pui bekinamv, Juhudi tulungv mwam mengdwb ywrsil doodwk hvl tapanum, hoqgab ngo mwam noqg dookub kanam dvb saqnum. Ho mwam yolu benboam bulam noqg dookho yolu betak hvl betkun.”
31Sipai tulungv bulam gaml jinam mam nyiknum. Bulv Poulwn boolayil hoq aiho Antipatris nagub wnum. 32Loogwn so lvpia wnbo sipai tulungv bulug gurumb wkur kunum, ho svpur sipai tulungam mwwg lvgab wbanum. 33Bulv mwam Sijariya yab booknv potangam Laat saabam jitwl, Poulwn kam mwwg alaqb gvqlwqnum. 34Laat saab akv potangam pooril kaatwl Poulwn no hogloq gvda hoqgv hvl toxnum. Kokw so mwv Poulwn Silisiya gvda hoq nyi hvl cengknum. 35Mwv benum, “Noqg benam mam nam yolu benbo nyi tulungv hvvc yukam ngo tatayin.” Kokw so mwv Poulwn Herodg namlo poonam ho rvkybo nyi doqyum mvdwb gaml jinum.
ప్రస్తుతం ఎంపిక చేయబడింది:
BON 23: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
