Luka 18

Linganizyo ya nyankufwilwa na munthu wopingula

1Yesu eŵawuzya linganizyo popangwa kuti aŵasambizye kuti awolomba nsita zonse, osataya mtima. 2Elaŵila kuti, “Mu munzi uyakine mwenze wopingula wamene enzoyopalini Mulungu keno kuyika nzelu ku munthu. 3Mu munzi mwala mwenze nyankufwilwa. Yeve enzokuza ku wopingula wala kuzosenga kuti, ‘Munipingulileko molungama mlandu uli pakati pa newo na mulwani wangu.’

4“Pa nsita itali wopingula wala enzokana, koma pa vuli pake elingilila kuti, ‘Cukanga nuyopalini Mulungu keno kuyika nzelu munthu, 5koma cikomo uyu nyankufwilwa onivuta nsita zonse, nimupingulile mlandu wake molungama, kuyopa kuti anganiŵeŵeshe na kuwela–wela kwake.’”

6Tetyo, Asikulu elaŵila kuti, “Mwamvwa malizu ŵa wopingula wosalungama wala. 7Nga Mulungu, angaleke tyani kuŵapingulila molungama mlandu wawo osaluliwa ŵake, omudandaulila mzuŵa na usiku? Kansi ayingoŵalekelela? 8Yayi, kulaŵila vyendi aŵapingulile mmangu mlandu wawo. Koma Mwana wa Munthu powela, kansi azafwane cendi cicetekelo pano pansi?”

Linganizyo ya Mfalisi na wosonkhesha msonkho

9Yesu eŵawuzya soti linganizyo ŵanthu ayakine ŵamene enzoziyesa wolungama notafulila ayawo. 10Elaŵila kuti, “Ŵanthu aŵili eciya ku Ngʼanda ya Mulungu kuyolomba. Yumo enze Mfalisi, muyakine enze wosonkhesha msonkho. 11Mfalisi wala epanama notatika kulomba moteti mu mtima mwake: ‘Mulungu, nukutembezyani kuti newo nililini ngani ŵanthu ayakine wonse yayi. Ŵeve na akawalala, wosalungama na ŵa ucende. Nililini soti ngani uyu wosonkhesha msonkho yayi. 12Newo nulekezya vakulya kaŵili pa sondo, nipo nutwala ca kumi pa vonse va nili navo na vanupokela.’

13“Koma wosonkhesha msonkho wala epanama kutali, osapangwa nololesha kululu kwamene. Eyingozigunda pa nganga na nsoni nolaŵila kuti, ‘Mulungu, municitile lusungu newo wocimwa.’”

14Yesu popitilizya malizu elaŵila kuti, “Kulaŵila vyendi, wosonkhesha msonkho uyu ewelela kwawo ali wolungama pa menso pa Mulungu, osati Mfalisi wala yayi. Pala aliyense olikuzya azeamucefye, nipo olicefya, azeamukuzye.”

Yesu oshukisha ŵana

(Mt 19:13-15; Mk 10:13-16)

15Ŵanthu ayakine enzokuza na malucece ŵawo kwa Yesu kuti aŵakumye. Asambili ŵake powona vamene ivi eŵazazila. 16Koma Yesu eŵayita nolaŵila kuti, “Ŵalekeni ŵana awele kwa newo musaŵaleshe, pakuti Ufumu wa Mulungu ni wa woteti. 17Nukuwuzyani vyendi kuti, ŵatiakanopokelela Ufumu wa Mulungu ngani mwana, wamene uyo akaloŵemolini.”

Mkulu muyakine wolemela

(Mt 19:16-30; Mk 10:17-31)

18Mkulu muyakine ekonsha Yesu kuti, “Asambizyi aweme, kansi nicite vinji kuti nikapokele moyo wosasila?”

19Yesu emuyasuka kuti, “Uniyitila vinji muweme? Muweme ni Mulungu yeka kwasila. 20 Matetulo uŵaziŵa: Osacita ucende, osapaya, osapunsha, osacita umboni wa wenye, cinzika auso na anyoko.”

21Munthu wala elaŵila kuti, “Vonse ivi naŵa nuvicita kutatikila penenze mwana.”

22Yesu pecimvwa ivi, emuwuzya kuti, “Ukalusoŵa cinthu cimo: nkhoya ukasitishe vonse va uli navo. Ndalama zake ukape ŵanthu wotamana, nipo cuma ukacifwane Kululu. Nipo uwele, uzeunikonkhe.” 23Koma munthu ŵala pecimvwa ivi, evutika mu mtima, pakuti enze wolemela ngako.

24Yesu ewona kuti wala munthu enze otamana mu mtima, nolaŵila kuti, “Ni cosatwesheka kwa ŵanthu ŵa cuma kuti akaloŵe mu Ufumu wa Mulungu. 25Pakuti ni cipepu kuti ngamila ikapite pa kacibowo ka nsingano, kupula munthu wolemela kuti akaloŵe mu Ufumu wa Mulungu.”

26Ŵanthu ecimvwa ivi ekonshana kuti, “Nga watiakapulumuke ni ŵani?”

27Yesu elaŵila kuti, “Vingacitikelini na ŵanthu ni votwesheka na Mulungu.”

28Pamene apo Petulo elaŵila kuti, “Pala sewo tisiya vonse kuti tikokukonkhani.”

29Yesu eŵawuzya kuti, “Ni cendi nulaŵilisha kuti aliyense osiya ngʼanda, keno mwanakazi keno akwawo, keno avyazi, keno ŵana cikomo ca Ufumu wa Mulungu, 30wamene uyo pano pansi azeapokele vonse ivo mwaunyinji ngako kupula kale, ciyakine ku nthangu azeapokele moyo wosasila.”

Yesu olaŵililatu ka citatu va kufwa nowuka kwake

(Mt 20:17-19; Mk 10:32-34)

31Yesu etola asambili ŵake pa mbali, noŵawuzya kuti, “Tikuya ku Yelusalemu, nipo vonse vikatwesheke mwecilembela aneneli vokumya Mwana wa Munthu. 32Akamutwale ku ŵanthu asali Ayuda. Ŵamene awo akamucitile msikila, akamtafulile nomtila mata. 33Akamkwapule, nomupaya, koma pa nsiku ya citatu yeve akawuke kwa akufwa.”

34Asambili ŵala aliyomvwishe ivi. Tanthauzo ya malizu aŵa yenze yofisika kwa ŵeve, ni cikomo cake aliyomvwishishe venzolaŵila Yesu.

Yesu opozya mphofu

(Mt 20:29-34; Mk 10:46-52)

35Yesu pecifwika kufupi na ku Yeliko, mphofu inkhala mu mbali mwa mseu yenzosenga–senga ŵanthu. 36Peyicimvwa ŵanthu anyinji enzoyenda mu mseu mwala yekonsha kuti, “Kansi kucitika vinji?”

37Emuyasuka kuti, “Kupita Yesu wa ku Nazaleti.”

38Apo elaŵila malizu moŵilikizya kuti, “Mwewo Yesu, Mwana wa Davide, municitile lusungu!”

39Ŵanthu enze pa nthangu emulesha, elaŵila kuti, “Nkhala celele!” Koma yeve ewilikizyilako mokweza lizu kuti, “Mwewo Mwana wa Davide, municitile lusungu.”

40Yesu epanama nolamula kuti awele naye kwa yeve. Pecifwika pafupi, Yesu emukonsha kuti, 41“Kansi upangwa kuti nikucitile vinji?”

Yeve elaŵila kuti, “Asikulu, nupangwa kuti niwone.”

42Yesu emuwuzya kuti, “Wona soti. Cicetekelo cako cakupozya.” 43Nsita iyo ewona soti notatika kukonkha Yesu, otembezya Mulungu. Ŵanthu wonse ŵala peciwona ivi, etembezya Mulungu.

ప్రస్తుతం ఎంపిక చేయబడింది:

Luka 18: GMN

హైలైట్

షేర్ చేయి

కాపీ