Luka 19

Yesu na Zakeyo

1Yesu eloŵa mu Yeliko, enzopitila mu mzinda wamene wala. 2Kwiwela munthu, zina yake Zakeyo. Yeve enze mkulu wa wosonkhesha msonkho nipo enze wolemela. 3Enzopangwisha kuwona Yesu kuti ali tyani. Koma pakuti Zakeyo wamene wala enze mufupi, ekangiwa kumuwona cikomo copaka kwa ŵanthu. 4Tetyo, ewutukila ku nthangu, nokwela mu mkuyu kuti amuwone, cikomo Yesu enzowamila kupitila pamene apo.

5Niye pamene Yesu pecifwika pa malo apo, elolesha mu cimuti, nomuwuzya kuti, “Zakeyo, seluka mmangu, cikomo lelo nuwamila kuyonkhala nawe ku ngʼanda kwako.” 6Pamene apo Zakeyo eseluka mmangu, na kuyomupokela Yesu mosangalala ngako.

7Powona ivi, ŵanthu wonse etatika kungʼungʼunzila. Elaŵila kuti, “Wayonkhala ku ngʼanda ya munthu wocimwa.”

8Koma Zakeyo epanama nowuzya Asikulu kuti, “Asikulu, cendi nikatwale citwa ca cuma cangu ku ŵanthu wozingwa. Nipo keno nipokela kanthu kwa munthu aliyense mwa wenye, nimuwezyele kanayi.”

9Apo Yesu emuwuzya kuti, “Cipulumusho cafwika mu banja muno lelo, pakuti wamene uyo soti ni mwana wa Abulahamu. 10Pala Mwana wa Munthu ewela kuzosakila na kuzopulumusha etayika.”

Linganizyo ya ndalama

(Mt 25:14-30)

11Ŵanthu penzokumvwa venzolaŵila Yesu, eŵawuzya linganizyo. Enze pafupi na Yelusalemu, nipo ŵanthu ŵala enzolingilila kuti Mulungu ankhazikishe Ufumu wake mmangu. 12Yesu elaŵila kuti, “Penze munthu, wa mtundu womvwika, enzokonzeka kuya ku calo ca kutali kuyozozewa ufumu na kuti enzolingilila kuti vikayosila ivi, akawelele kwawo. 13Eyita kumi mwa anyanchito ŵake noŵapa ndalama za golide kumi, imo aliyense. Eŵawuzya kuti, ‘Muwocita nazo malonda kufwikila nikawele.’

14“Koma ŵanthu ŵake enzotinkhana naye, tetyo mu vuli mwake etuma atumiki kuti alute ku calo kwamene kwala nakuyolaŵila kuti, ‘Sewo tupangwalini kuti munthu wamene uyu aŵe mfumu yasu.’

15“Koma yeve epokela ufumu wala. Lomba peciwelela kwawo, ewunganisha anyanchito ŵala ŵecipa ndalama kuti aziŵe vamene veciphindula.

16“Wotatika ewela elaŵila kuti, ‘Asikulu, ndalama yanu yala iphindula ndalama kumi.’

17“Asikulu ŵake emuwuzya kuti, ‘Wicita luweme, niwe nyanchito muweme. Tetyo, pakuti wicetekeleka pa vitontho ngako, uzeulamulile minzi kumi.’

18“Wa ciŵili ewela elaŵila kuti, ‘Asikulu, ndalama yanu yala iphindula ndalama zisanu.’

19“Naye asikulu ŵake emuwuzya kuti, ‘Wewo uzeulamulile minzi isanu.’

20“Koma muyakine ewela elaŵila kuti, ‘Asikulu, iyi ndalama yanu yala niyimangilila pa kanyula. 21Nenzokuyopani, pakuti mwewo nimwe munthu mupangwa vinthu kuyondololewa luweme. Mutola pamuliyoyikizye nipo muwezya pamuliyokomole.’

22“Apo asikulu ŵake wala emuwuzya kuti, ‘Niwe nyanchito muyipa, nikusushe na malizu ŵako. Kuti wenzoziŵa kuti nine munthu muyipa, opokela vaniliyoikizye, nipo nuwezya vaniliyokomole. Nupangwa vinthu kuyondololewa luweme. 23Nga tyani osayiseŵenzesha kuti ilete phindu pa ndalama yangu yala, kuti newo powela nizenipokele pamo na ciwongola kwanja cangu?’

24“Pecitetyo ewuzya ŵanthu enzepo kuti, ‘Mupokeni ndalama muyitwale kwa ali na ndalama kumi.’

25“Ŵeve emuyasuka kuti, ‘Pepani, asikulu, uyu ali kale na ndalama zinyinji.’

26“Koma yeve elaŵila kuti, ‘Pakuti wala ali na vinthu, akamupelepo viyakine, koma wala aliye kalikonse, akamupoke na katontho ka ali nako. 27Koma alwani ŵangu, ŵala enzokana kuti ninkhale mfumu yawo, welani nawo kuno, muŵapaye newo nulolesha.’”

Yesu oloŵa na mcinzi mu Yelusalemu

(Mt 21:1-11; Mk 11:1-11; Yh 12:12-19)

28Yesu pecilaŵila vamene ivi, etangulila asambili ŵake kuya ku Yelusalemu. 29Pecifwika pafupi na minzi ya Betifage na Betaniya, pafupi na lupili yoyitiwa Lupili ya Olivi, etuma asambili aŵili, 30noŵawuzya kuti, “Nkhoyani mu munzi wamuwona uyo. Mukayoloŵamo mukafwane mwana wa bulu womangiwa, akaliyokwelapo munthu kutatikila kale. Mukamumangulule, nakuza naye kuno. 31Aliyense akakukonshani kuti, ‘Mumumangululilanji?’ mukalaŵile kuti, ‘Asikulu ali naye na nchito.’”

32Ŵala aŵili eluta, na kuyofwana ngani mweciŵawuzyila Yesu. 33Penzomangulula mwana wa bulu wala, ŵene ŵake eŵakonsha kuti, “Mumumangululilanji mwana wa bulu uyu?”

34Ŵeve eyasuka kuti, “Asikulu ali naye na nchito.”

35Tetyo, eluta naye kwa Yesu, noyanzikapo vovwala vawo pa bulu wala nipo Yesu enkhalapo. 36Yesu penzokuya, ŵanthu emucitila mcinzi poyanzyika vovwala vawo mu njila.

37Penze pafupi na Yelusalemu, poselukila lupili ya Olivi, umba yonse ya omukonkha wala etatika kukondwela. Ekweza malizu, notembezya Mulungu cikomo ca nchito zonse za mphamvu zeciwona ŵeve. 38 Elaŵila kuti,

“Ni yoshukishiwa Mfumu yamene ikuza mu zina ya Leza.

Mtendele Kululu, mcinzi kwa Mulungu Kululu ngako.”

39Apo Afalisi ayakine enze mu winji ewuzya Yesu kuti, “Asambizyi, ŵawuzyeni asambili ŵanu aŵa aleke vamene ivi.”

40Yeve elaŵila kuti, “Nikuti aŵa akayingokuŵa celele, myala iyi iŵilikizye cendi.”

Yesu olila cikomo ca Yelusalemu

41Yesu pecifwika pafupi, nowona Yelusalemu, elila cikomo ca mzinda wala. 42Elaŵila kuti, “Ha, nawe soti Yelusalemu wayingoziŵa lelo yamene vinthu vukupa mtendele! Koma, lomba ungaviwonelini. 43Nsita ikazofwika alwani ŵako patiazeakuzinge na vozingilila, na kuzokuzungulila, nokufwinda paliponse. 44Azeakusakazye, wewo pamo na ŵanthu wako wonse. Azeasiyelini mwa wewo mwala palulu pa uyakine, cikomo cakuti uliyoziŵe nsita yatiazeakupulumushilemo Mulungu.”

Yesu otuŵisha Ngʼanda ya Mulungu

(Mt 21:12-17; Mk 11:15-19; Yh 2:13-22)

45Yesu eloŵa mu ngʼanda ya Mulungu, notatika kufumya ŵanthu enzocita malonda mwala. 46 Eŵawuzya kuti, “Malembo olaŵila kuti, ‘Ngʼanda yangu ikayitiwe kuti ngʼanda ya malombelo.’ Koma mwewo mwayiyalusha kuŵa ‘malo ŵa anyankapondo.’”

47Yesu enzosambizya mu Ngʼanda ya Mulungu nsiku na nsiku. Akulu ŵa Ansembe, Asambizyi ŵa Matetulo na Akulu ŵa Ayuda, enzopangwa kumupaya. 48Koma esoŵa cocita, cikomo ŵanthu wonse ekatiwa nawo mtima malizu ŵake.

ప్రస్తుతం ఎంపిక చేయబడింది:

Luka 19: GMN

హైలైట్

షేర్ చేయి

కాపీ