Luka 17
17
Ucimo na kalekelezi
(Mt 18:6-7,21-22; Mk 9:42)
1Yesu ewuzya asambili wake kuti, “Voyifyisha ŵanthu vingalekelini kucitika, koma shamu ku munthu woleta ivo. 2Sembe kwenze luweme kuti amumangilile cimwala ca mphelo mu mkosi nakuyomupoza mu cimmana, kupula kuti atayishe cicetekelo yumo wa aŵa ŵana atontho. 3Ŵani celu lomba!
“Mkwanu akayifya, umucimule. Akayaluka mtima, umulekelele. 4Akakuyifyila kasanu na kaŵili pa nsiku nakuza kasanu na kaŵili kuzolaŵila kuti, ‘Nayaluka mtima,’ umulekelele cendi.”
Cicetekelo
5Nthumi zesenga Asikulu kuti, “Mutiyangizyile cicetekelo.”
6Koma Asikulu elaŵila kuti, “Kuti mwenze na cicetekelo ngani ca kambuto katontho ngako, mungawuzye cimuti ici cikulu kuti, ‘Nyuka ukazikomole mu cimmana,’ nipo cingamumvwileni.”
Udindo wa anyanchito
7Yesu elaŵila soti kuti, “Ni ŵani mwa mwewo angaŵe na nyanchito wolima ku munda keno woŵetela mbelele. Pamene yeve wafwika kufumila ku munda, kansi ungamuwuzye kuti, ‘Wela mmangu uzalye?’ 8Ungacitelini tetyo, koma umuwuzye kuti, ‘Niwamyile cakulya, ukonzeke kunitumikila mpaka newo nilye na kumwa. Wewo uwulye na kumwa pa vuli pake.’ 9Kansi ungamutembezye nyanchito wala cikomo cakuti wacita vawimulamulila? 10Tetyo, namwe soti, mucita vonse vecikulamulilani, mwakuti, ‘Nise tyala anyanchito osawamila kupokela kanthu. Taingocita vatuwamila kucita.’”
Yesu opozya ŵa mambombo kumi
11Pa ulwendo wake wakuya ku Yelusalemu, Yesu epitila mu malile ŵa Samaliya na Galileya. 12Penzoloŵa mu munzi uyakine, ŵanthu kumi ŵa mambombo ecizomucinguzyila. Epanama kutali, 13nolaŵila moŵilikizya kuti, “Yesu Asikulu, muticitile lusungu.” 14Pamene Yesu peciwona, eŵawuzya kuti, “Nkhoyani mukaliwoneshe kwa ansembe.” Pamene apo peenzokuya, epola.
15Tetyo, yumo mwa ŵeve, peciwona kuti wapola, ewelela notatika kuzotembezya Mulungu na malizu oŵilikizya. 16Efukama noŵelama ngako pa menso pa Yesu, nomutembezya. Koma wala munthu enze Msamaliya. 17Apo Yesu elaŵila kuti, “Kansi ŵala ŵanthu apola enzelini kumi? Nga asanu na anayi ayakine ŵala ali kuni? 18Niye kuti kuliye aliyense muyakine wawelela kuzotembezya Mulungu, koma mulwendo yeka uyu?” 19Nipo Yesu ewuzya munthu wala kuti, “Yima, nkhoya. Cicetekelo cako cakupozya.”
Mwatiazeankhazikishile Ufumu wake Mulungu
(Mt 24:23-28,37-41)
20Afalisi ayakine ekonsha Yesu elaŵila kuti, “Kansi Mulungu azeankhazikishe lini Ufumu wake?”
Yesu eŵayasuka kuti, “Mulungu onkhazikishalini Ufumu wake mowoneka na menso yayi. 21Ŵanthu azealaŵilelini kuti, ‘Wonani! Ni uyulini ali pano?’ keno ‘Ni uyolini?’ pakuti cukanga lomba Mulungu onkhazikisha Ufumu wake pakati panu.”
22Yesu ewuzya asambili wake kuti, “Akuza masiku ŵatimuzepangwe ngako kuwona nsita ya kuza Mwana wa Munthu cukanga nsiku imo yeka, koma muzemuyiwonelini. 23Ŵanthu azokuwuzyani kuti, ‘Niwuyolini ali uko?’ keno ‘Ni uyulini ali pano,’ osalutako keno kuŵakonkha yayi. 24Pala ngani kaleza kongʼanima mu kuŵala kufumila ku citwa ciyakine ca kululu kufwikila ku citwa ciyakine, Mwana wa Munthu azeacite tetyo soti pa nsiku yowela kwake. 25Pavikaliyocitika ivi, koma yeve owamila kuti atatike kumvwa voŵaŵa vinyinji, nipo kuti luko ino imukane.
26“Ngani mwevicitikila pa nsita ya Nowa, vizevicitike tetyo na pa nsita ya Mwana wa Munthu. 27Masiku ŵamene awo ŵanthu enzokulya na kumwa, enzolungula nolunguliwa, mpaka nsiku yeciloŵa mu wato Nowa. Pamene apo cigumula ciwela noŵaceneka wonse. 28Ngani mwamene mwevicitikila soti, pa nsita ya Loti. Ŵanthu enzokulya na kumwa, enzositishana malonda, enzokomola mbuto, enzomanga ngʼanda. 29Koma nsiku yecifuma mu Sodomu Loti, Mulungu eponesha mulilo na myala yoyaka na sulufule noŵaceneka wonse ŵala. 30Vizaŵe tetyo soti pa nsiku yatiazeawonekele Mwana wa Munthu.
31“Nsiku iyo, wamene ali palulu, pa ngʼanda osati azeaseluke kutola katundu wake mu ngʼanda. Cimozi–mozi soti wamene ali ku munda, asawelele ku ngʼanda. 32Mukumbuke va mwanakazi wa Loti. 33Aliyense woyesa kulisungila moyo wake, azeawutaye, koma wowutaya azeawusunge. 34Kulaŵila vyendi, usiku wamene uyo, pazaŵe ŵanthu aŵili pa bedi imo, yumo akatolewe, muyakine akasiyiwe. 35Anakazi aŵili azeaŵe akutwa pamo, yumo azeatoleŵe, muyakine nomusiya. [36Ŵanthu aŵili azaŵe ku munda, yumo azeatoleŵe muyakine nomusiya.]”
37Apo asambili ŵake emukonsha kuti, “Kansi ivi vikacitikile kuni, Asikulu?”
Yesu elaŵila kuti, “Acipungu kwati koo kuli nyama.”
ప్రస్తుతం ఎంపిక చేయబడింది:
Luka 17: GMN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nsenga New Testament © The Bible Society of Zambia, 2015.
