Luka 16
16
Linganizyo ya kapitawo wocenjela
1Yesu ewuzya asambili wake kuti, “Penze munthu wolemela wamene enze na kapitawo wake. Ŵanthu ecizoleta milandu yenzocita kapitawo wala kuti omwazya cuma ca asikulu ŵake. 2Tetyo, asikulu ŵake emuyita, nomukonsha kuti, ‘Ni vinji vanukumvwa va wewo? Niwoneshe mwawankhala useŵenzeshela ndalama zawapokela, pakuti ungankhalelini soti kapitawo yayi.’
3“Pamene apo kapitawo wala etatika kulingilila mu mtima mwake kuti, ‘Nicite vinji, pakuti asikulu onipoka ukapitawo? Kulima, yayi, niliye mphamvu. Kusenga–senga nako soti yayi, kunicitisha nsoni. 4Ciweme, lomba naziŵa canitinicite, kuti ŵanthu akanipokele mu mangʼanda mwawo, ukapitawo ukanisilila.’
5“Motetyo, eyita ankhongole ŵa asikulu ŵake yumo–yumo. Ekonsha wotatika kuti, ‘Kansi uli na nkhongole yotyani kwa asikulu ŵangu?’
6“Yeve elaŵila kuti, ‘Mafuta amuyeso wokwanila nongo makumi kumi (100).’
“Kapitawo wala emuwuzya kuti, ‘Leta kalata yako ya nkhongole, nkhala pansi mmangu, uyingolembapo nongo makumi asanu (50).’
7“Ekonsha soti muyakine kuti, ‘Nga wewo, nkhongole yako ni yotyani?’
“Yeve elaŵila kuti, ‘Tiligu wamuyeso wokwanila matumba makumi kumi (100).’
“Kapitawo wala emuwuzya kuti, ‘Leta kalata yako ya nkhongole, uyingolemba matumba makumi asanu na atatu (80).’
8“Apo asikulu wa kapitawo wala wa wenye emutembezya cikomo ca kucenjela kwake. Pala ŵanthu otemwa tyala va pano pansi ni wocenjela ngako mukucita vinthu vawo, kupula ŵanthu onkhala mu kuŵala kwa Mulungu.”
9Yesu popitilizya malizu elaŵila kuti, “Nipo newo nukuwuzyani kuti mulifwanile ayanu na cuma ca calo ca pansi. Cuma cala cikazomusililani, Mulungu azeamupokeleni ku ngʼanda kwa nsita yosasila. 10Wocetekeleka pa vinthu vitontho, ni wocetekeleka soti pa vinthu vikulu. Nipo wa wenye pa vitontho otala soti wenye pa vikulu. 11Tetyo, keno mwaŵa osacetekeleka pa cuma ca calo ca pansi, ni ŵani ŵatiazeamucetekeleni pa cuma ngaco–ngaco? 12Nipo keno mwaŵa osacetekeleka pa va muyakine, ni ŵani ŵatiazeampeni vili vanu–vanu?
13“Paliye nyanchito angatweshe kutumikila asikulu aŵili, pakuti keno azeatinkhane na yumo notemwa muyakine wala, keno azeazitwale kwa yumo notafulila muyakine wala. Ungatweshelini kutumikila wonse aŵili, Mulungu na cuma.”
Matetulo na Ufumu wa Mulungu
14Afalisi pecimvwa vonse ivi, emufweya Yesu, cikomo cakuti ŵeve enzotemwa ndalama. 15Nipo Yeve eŵawuzya kuti, “Mwewo muliwonesha olungama pa menso pa ŵanthu, koma Mulungu oziŵa mitima yanu. Pala vakuyesa ŵanthu kuŵa va mtengo ngako, mu menso mwa Mulungu ni viyipa.
16“Matetulo ŵa Mose na volemba va aneneli venzoseŵenza mpaka nsita ya Yohane Mbatizi. Kutatikila pamene apo Malizu Aweme oŵilizyiwa kuti Mulungu onkhazikisha Ufumu wake, nipo ŵanthu wonse oyesesha mwa mphamvu kuloŵamo. 17Koma ni cipepu kuti kululu na calo ca pansi visile, kupula kuti kalemba katontho ka pa Matetulo kasile mphamvu.
18“Aliyense oleka mkazi wake, nolungula muyakine, ocita ucende. Nipo olungula mwanakazi wolekewa wala naye soti ocita ucende.”
Linganizyo ya munthu wolemela na Lazalo
19Yesu elaŵila soti linganizyo yakuti, “Penze munthu muyakine wolemela, enzowvala vovwala va mtengo ngako, nipo enzosangalala nakulyela masiku wonse. 20Penze soti munthu muyakine, zina yake Lazalo, enzolala pa mulyango wa ngʼanda ya munthu wolemela. Yeve enze na vilonda mu muŵili monse. 21Enzopangwa kulya nyenyenswa zenzopona pansi kufumila polyela pa wolemela. Koma niyapo tyalalini peka, cukanga imbwa zenzowela kuzomyangulako vilonda vake.
22“Munthu wosauka wala emwalila, angelo emutakula, nomuyika pa mbali pa Abulahamu. Munthu wolemela wala naye soti emwalila, noyikiwa mu manda. 23Penzonzunzika ku Gehena, wolemela wala elolesha Kululu nowona Abulahamu ali patali, na Lazalo ali pa mbali pake. 24Pamene apo elaŵila moŵilikizya malizu olaŵila kuti, ‘Atata Abulahamu, municitile lusungu. Tumani Lazalo ayike nsilililo ya cikumo cake mu manzi kuti azeanizizilisheko lulimi yangu, pakuti nuvutika ngako mu mulilo muno.’
25“Koma Abulahamu elaŵila kuti, ‘Mwana wangu, kumbuka kuti wipokelelatu votemwesha pewenze na moyo, na vinthu viweme na votemwesha venze citwa cako Lazalo pecipokela uzingwi. Koma lomba yeve ali luweme kuno, pamene wewo usauka ngako. 26Nipo pakati pa sewo na wewo pali cimgelo conoka, kotetyo kuti opangwa kufuma kuno kutaukila kwanu uko, angatweshelini yayi, cimozi–mozi kufumila kwanu uko kutaukila kuno.’
27“Pamene apo wolemela wala elaŵila kuti, ‘Nipo numusengani atata, kuti mumtume Lazalo uyo alute ku ngʼanda ya atata. 28Kwamene uko nili na enekwasu asanu. Akaŵacenjezye, kuyopa kuti nawo soti angawele ku malo ŵano ŵa manzunzo.’
29“Koma Abulahamu elaŵila kuti, ‘Ŵeve ali na mabuku ŵa Mose na aneneli amvwile vilimo.’
30“Yeve elaŵila kuti, ‘Yayi, Atata Abulahamu, koma muyakine akawuka kwa akufwa noluta kwa ŵeve, apo azeayaluke mtima.’
31“Koma Abulahamu emuwuzya kuti, ‘Keno ŵeve amvwilelini Mose na aneneli, angatweshelini soti cukanga muyakine awuke kwa akufwa.’”
ప్రస్తుతం ఎంపిక చేయబడింది:
Luka 16: GMN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nsenga New Testament © The Bible Society of Zambia, 2015.
