Luka 14

Yesu opozya munthu wovimba manja na mendo pa Sabata

1Pa nsiku iyakine ya Sabata, Yesu eciyolyela kwa mkulu muyakine wa mu gulu ya Afalisi, nipo Afalisi ayake enzoyingomulolesha. 2Pamene apo pa nthangu pake penze munthu muyakine wovimba mendo na manja. 3Yesu ekonsha akaswili ŵa Matetulo na Afalisi kuti, “Kansi Matetulo ozomezya kupozya munthu pa nsiku ya Sabata, keno yayi?” 4Koma ŵeve eyingokuŵa celele. Tetyo, Yesu etola munthu wala, nipo emupozya, emuwuzya kuti aŵekuya.

5Eŵakonsha soti kuti, “Keno yumo wa mwewo ali na mwana keno ali na ngʼombe, yapona mu cisime pa Sabata, mungacite vinji? Mungaseŵenzelepolini pamene apo, cukanga kuti ni pa Sabata?” 6Ŵeve esoŵa coyasuka.

Kulicefya na kupokela alwendo

7Yesu ewona kuti ŵanthu eyitiwa kuzokulya nawo enzozisalulila malo ŵa mcinzi. Tetyo, eŵawuzya kuti, 8“Muyakine akakuyitani ku malyelelo ŵa ukwati, osaŵa pa malo ŵa mcinzi yayi, cikomo cakuti payakine wayita soti muyakine wa mcinzi kupula wewo. 9Niye kuti yeve wala wayita monse mwe aŵili na kuzokuwuzya kuti, ‘Pepa, upe aŵa malo.’ Pamene apo wewo uzamvwe nsoni pakuyonkhala pa malo apansi. 10Koma ukayitiwa, ukankhale pa malo ŵa pansi, kuti wamene ekuyita wala azeakuwuzye kuti, ‘Muyangu, wela unkhale pa malo ŵa mcinzi pano.’ Apo uzeupokele mcinzi pa menso pa wonse ŵa uli nawo polyela. 11Pala aliyense wolikuzya azeamucefye, nipo aliyense wolicefya, azeamukuzye.”

12Yesu ewuzya soti Mfalisi wala emuyita kuzokulya naye kuti, “Keno ukonzeka cakulya ca cisangalalo ciliconse, osayita ayako, keno enekwanu, keno ŵa mtundu wako, keno ayako wolemela, cikomo nawo soti angazokuyitako, tetyo uzeupokele cilambu cako. 13Koma wewo keno ukonzeka malyelelo, uwoyita osauka, opunduka, olemala na mphofu. 14Nipo uzeunkhale woshukishiwa, cikomo ŵeve aliye kanthu kokuwezyela. Mulungu niye azeakuŵezyele, ŵanthu wolungama patiazeawuke kwa akufwa.”

Linganizyo ya malyelelo akulu

(Mt 22:1-10)

15Munthu muyakine enzokulya nawo, pecimvwa ivi ewuzya Yesu kuti, “Ni woshukishiwa munthu watiazalye nawo mkate mu Ufumu wa Mulungu.”

16Koma Yesu eyasuka kuti, “Munthu muyakine ewamya malyelelo akulu, noyita ŵanthu anyinji. 17Nsita ya malyelelo peyikwana etuma nyanchito wake kuyowuzya woyitiwa ŵala kuti, ‘Welani, pakuti vonse vawamyika.’

18“Koma wonse umo na umo etatika kutwala vikomo vokanila. Wotatika elaŵila kuti, ‘Nisita munda, tetyo nuwamila kuluta kuti nikawuwone. Niwelelini.’

19“Muyakine elaŵila kuti, ‘Nisita ngʼombe kumi za pa joko, niye nukuyoziyesa. Niwelelini.’

20“Nipo muyakine elaŵila kuti, ‘Nayingolungula lombapano, tetyo niwelelini.’

21“Tetyo, nyanchito wala peciwelako ecizouzya asikulu ŵake vonse. Pamene apo mwine wa ngʼanda ecipya mtima, nowuzya nyanchito wake wala kuti, ‘Nkhoya mmangu ku misewu ikulu na itontho ya mu mzinda muno ukafwane ŵanthu wozingwa, wolemala, amphofu na opunduka uwele nawo kuno.’

22“Peciwelako nyanchito wala elaŵila kuti, ‘Mwepo, nacita vala vonse vemwenilamulila, koma malo akalipo.’

23“Apo asikulu ŵala emuwuzya nyanchito kuti, ‘Nkhoya ku misewu na ku njila za kunja kwa mzinda, ukaŵakakamizye ŵanthu kuwela kuno, kuti ngʼanda yangu izule. 24Kulaŵila vyendi kwa mwewo, pa ŵanthu ŵeniyita ŵala paliye cukanga yumo watialaŵeko malyelelo ŵangu.’”

Kukonkha Yesu

25Winji wa ŵanthu wenzoyendela pamo na Yesu. Tetyo, yeve ecewuka noŵawuzya kuti, 26“Aliyense opangwa kuŵa msambili wangu, awotemwa newo kupula awisi na anyina, mkazi wake na ŵana ŵake, enekwawo na alongosi ŵake, nipo soti kupula na moyo wake. 27Aliyense otakulalini mtanda wake nonikonkha, angaŵelini msambili wangu.

28“Muyakine mwa mwewo akapangwa kumanga ngʼanda ikulu, kansi ni walalini otatika wankhala pansi noŵelenga ndalama zupangwika, kuti awone keno ali nazo zokwanila kusilizya? 29Akaleka kucita tetyo, payakine azeayike maziko, nokangiwa kusilizya. Ŵanthu wonse powona ivi, akatatike kumuseka. 30Azealaŵile kuti, ‘Akulu aŵa etatika kumanga ngʼanda, koma ekangiwa kusilizya.’

31“Cimozi–mozi kansi ni mfumu yotyani, pakuya ku nkhondo kuyolwishana na mfumu iyakine, yutatikalini yankhala pansi nolingilila luweme? Yulingililatu keno na asilikali myanda kumi (10,000) ingatweshe kulwana na mfumu iyakine yala, yamene ikuza na asilikali myanda makumi aŵili (20,000). 32Keno ingatweshelini, izeitume mtumiki kuyosenga mtendele, mfumu yala payikali kutali.

33“Tetyo, soti aliyense mwa mwewo ŵamene osiyalini vonse va ali navo, angaŵelini msambili wangu.”

Munyu wosila mphamvu

(Mt 5:13; Mk 9:50)

34“Munyu ni uweme. Koma keno munyu wala wasila mphamvu, mphamvu yake na uweme wake ungawele tyani soti? 35Uliye soti nchito cukanga mu munda keno pa cungu. Oyingowutaya mphela.

“Ŵamene ali na matu, amvwishishe.”

ప్రస్తుతం ఎంపిక చేయబడింది:

Luka 14: GMN

హైలైట్

షేర్ చేయి

కాపీ